१३ प्रस्कण्वः काण्वः। सूर्यः (११-१३ रोगघ्न्य उपनिषदः, १३ अन्त्योऽर्धर्चः द्विषद् घ्नश्च)। गायत्री, १०-१३ अनुष्टुप्।
उदु॒ त्यं जा॒तवे॑दसं दे॒वं व॑हन्ति के॒तव॑: । दृ॒शे विश्वा॑य॒ सूर्य॑म् ॥१॥
अप॒ त्ये ता॒यवो॑ यथा॒ नक्ष॑त्रा यन्त्य॒क्तुभि॑: । सूरा॑य वि॒श्वच॑क्षसे ॥२॥
अदृ॑श्रमस्य के॒तवो॒ वि र॒श्मयो॒ जनाँ॒ अनु॑ । भ्राज॑न्तो अ॒ग्नयो॑ यथा ॥३॥
त॒रणि॑र्वि॒श्वद॑र्शतो ज्योति॒ष्कृद॑सि सूर्य । विश्व॒मा भा॑सि रोच॒नम् ॥४॥
प्र॒त्यङ् दे॒वानां॒ विश॑: प्र॒त्यङ्ङुदे॑षि॒ मानु॑षान् । प्र॒त्यङ् विश्वं॒ स्व॑र्दृ॒शे ॥५॥
येना॑ पावक॒ चक्ष॑सा भुर॒ण्यन्तं॒ जनाँ॒ अनु॑ । त्वं व॑रुण॒ पश्य॑सि ॥६॥
वि द्यामे॑षि॒ रज॑स्पृ॒थ्वहा॒ मिमा॑नो अ॒क्तुभि॑: । पश्य॒ञ्जन्मा॑नि सूर्य ॥७॥
स॒प्त त्वा॑ ह॒रितो॒ रथे॒ वह॑न्ति देव सूर्य । शो॒चिष्के॑शं विचक्षण ॥८॥
अयु॑क्त स॒प्त शु॒न्ध्युव॒: सूरो॒ रथ॑स्य न॒प्त्य॑: । ताभि॑र्याति॒ स्वयु॑क्तिभिः ॥९॥
उद्व॒यं तम॑स॒स्परि॒ ज्योति॒ष्पश्य॑न्त॒ उत्त॑रम् । दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम् ॥१०॥
उ॒द्यन्न॒द्य मि॑त्रमह आ॒रोह॒न्नुत्त॑रां॒ दिव॑म् । हृ॒द्रो॒गं मम॑ सूर्य हरि॒माणं॑ च नाशय ॥११॥
शुके॑षु मे हरि॒माणं॑ रोप॒णाका॑सु दध्मसि । अथो॑ हारिद्र॒वेषु॑ मे हरि॒माणं॒ नि द॑ध्मसि ॥१२॥
उद॑गाद॒यमा॑दि॒त्यो विश्वे॑न॒ सह॑सा स॒ह । द्वि॒षन्तं॒ मह्यं॑ र॒न्धय॒न् मो अ॒हं द्वि॑ष॒ते र॑धम् ॥१३॥
१३ praskaṇvaḥ kāṇvaḥ | sūryaḥ (११-१३ rogaghnya upaniṣadaḥ, १३ antyo’rdharcaḥ dviṣad ghnaśca) | gāyatrī, १०-१३ anuṣṭup | udu॒ tyaṃ jā॒tave॑dasaṃ de॒vaṃ va॑hanti ke॒tava॑: | dṛ॒śe viśvā॑ya॒ sūrya॑m || १ || apa॒ tye tā॒yavo॑ yathā॒ nakṣa॑trā yantya॒ktubhi॑: | sūrā॑ya vi॒śvaca॑kṣase || २ || adṛ॑śramasya ke॒tavo॒ vi ra॒śmayo॒ janām॒̐ anu॑ | bhrāja॑nto a॒gnayo॑ yathā || ३ || ta॒raṇi॑rvi॒śvada॑rśato jyoti॒ṣkṛda॑si sūrya | viśva॒mā bhā॑si roca॒nam || ४ || pra॒tyaṅ de॒vānāṃ॒ viśa॑: pra॒tyaṅṅude॑ṣi॒ mānu॑ṣān | pra॒tyaṅ viśvaṃ॒ sva॑rdṛ॒śe || ५ || yenā॑ pāvaka॒ cakṣa॑sā bhura॒ṇyantaṃ॒ janām॒̐ anu॑ | tvaṃ va॑ruṇa॒ paśya॑si || ६ || vi dyāme॑ṣi॒ raja॑spṛ॒thvahā॒ mimā॑no a॒ktubhi॑: | paśya॒ñjanmā॑ni sūrya || ७ || sa॒pta tvā॑ ha॒rito॒ rathe॒ vaha॑nti deva sūrya | śo॒ciṣke॑śaṃ vicakṣaṇa || ८ || ayu॑kta sa॒pta śu॒ndhyuva॒: sūro॒ ratha॑sya na॒ptya॑: | tābhi॑ryāti॒ svayu॑ktibhiḥ || ९ || udva॒yaṃ tama॑sa॒spari॒ jyoti॒ṣpaśya॑nta॒ utta॑ram | de॒vaṃ de॑va॒trā sūrya॒maga॑nma॒ jyoti॑rutta॒mam || १० || u॒dyanna॒dya mi॑tramaha ā॒roha॒nnutta॑rāṃ॒ diva॑m | hṛ॒dro॒gaṃ mama॑ sūrya hari॒māṇaṃ॑ ca nāśaya || ११ || śuke॑ṣu me hari॒māṇaṃ॑ ropa॒ṇākā॑su dadhmasi | atho॑ hāridra॒veṣu॑ me hari॒māṇaṃ॒ ni da॑dhmasi || १२ || uda॑gāda॒yamā॑di॒tyo viśve॑na॒ saha॑sā sa॒ha | dvi॒ṣantaṃ॒ mahyaṃ॑ ra॒ndhaya॒n mo a॒haṃ dvi॑ṣa॒te ra॑dham || १३ ||