१० प्रस्कण्वः काण्वः। अश्विनौ। प्रगाथः – विषमा बृहत्यः, समा सतोबृहत्यः।
अ॒यं वां॒ मधु॑मत्तमः सु॒तः सोम॑ ऋतावृधा ।
तम॑श्विना पिबतं ति॒रोअ॑ह्न्यं ध॒त्तं रत्ना॑नि दा॒शुषे॑ ॥१॥
त्रि॒व॒न्धु॒रेण॑ त्रि॒वृता॑ सु॒पेश॑सा॒ रथे॒ना या॑तमश्विना ।
कण्वा॑सो वां॒ ब्रह्म॑ कृण्वन्त्यध्व॒रे तेषां॒ सु शृ॑णुतं॒ हव॑म् ॥२॥
अश्वि॑ना॒ मधु॑मत्तमं पा॒तं सोम॑मृतावृधा ।
अथा॒द्य द॑स्रा॒ वसु॒ बिभ्र॑ता॒ रथे॑ दा॒श्वांस॒मुप॑ गच्छतम् ॥३॥
त्रि॒ष॒ध॒स्थे ब॒र्हिषि॑ विश्ववेदसा॒ मध्वा॑ य॒ज्ञं मि॑मिक्षतम् ।
कण्वा॑सो वां सु॒तसो॑मा अ॒भिद्य॑वो यु॒वां ह॑वन्ते अश्विना ॥४॥
याभि॒: कण्व॑म॒भिष्टि॑भि॒: प्राव॑तं यु॒वम॑श्विना ।
ताभि॒: ष्व१स्माँ अ॑वतं शुभस्पती पा॒तं सोम॑मृतावृधा ॥५॥
सु॒दासे॑ दस्रा॒ वसु॒ बिभ्र॑ता॒ रथे॒ पृक्षो॑ वहतमश्विना ।
र॒यिं स॑मु॒द्रादु॒त वा॑ दि॒वस्पर्य॒स्मे ध॑त्तं पुरु॒स्पृह॑म् ॥६॥
यन्ना॑सत्या परा॒वति॒ यद्वा॒ स्थो अधि॑ तु॒र्वशे॑ ।
अतो॒ रथे॑न सु॒वृता॑ न॒ आ ग॑तं सा॒कं सूर्य॑स्य र॒श्मिभि॑: ॥७॥
अ॒र्वाञ्चा॑ वां॒ सप्त॑योऽध्वर॒श्रियो॒ वह॑न्तु॒ सव॒नेदुप॑ ।
इषं॑ पृ॒ञ्चन्ता॑ सु॒कृते॑ सु॒दान॑व॒ आ ब॒र्हिः सी॑दतं नरा ॥८॥
तेन॑ नास॒त्या ग॑तं॒ रथे॑न॒ सूर्य॑त्वचा ।
येन॒ शश्व॑दू॒हथु॑र्दा॒शुषे॒ वसु॒ मध्व॒: सोम॑स्य पी॒तये॑ ॥९॥
उ॒क्थेभि॑र॒र्वागव॑से पुरू॒वसू॑ अ॒र्कैश्च॒ नि ह्व॑यामहे ।
शश्व॒त् कण्वा॑नां॒ सद॑सि प्रि॒ये हि कं॒ सोमं॑ प॒पथु॑रश्विना ॥१०॥
१० praskaṇvaḥ kāṇvaḥ | aśvinau | pragāthaḥ – viṣamā bṛhatyaḥ, samā satobṛhatyaḥ | a॒yaṃ vāṃ॒ madhu॑mattamaḥ su॒taḥ soma॑ ṛtāvṛdhā | tama॑śvinā pibataṃ ti॒roa॑hnyaṃ dha॒ttaṃ ratnā॑ni dā॒śuṣe॑ || १ || tri॒va॒ndhu॒reṇa॑ tri॒vṛtā॑ su॒peśa॑sā॒ rathe॒nā yā॑tamaśvinā | kaṇvā॑so vāṃ॒ brahma॑ kṛṇvantyadhva॒re teṣāṃ॒ su śṛ॑ṇutaṃ॒ hava॑m || २ || aśvi॑nā॒ madhu॑mattamaṃ pā॒taṃ soma॑mṛtāvṛdhā | athā॒dya da॑srā॒ vasu॒ bibhra॑tā॒ rathe॑ dā॒śvāṃsa॒mupa॑ gacchatam || ३ || tri॒ṣa॒dha॒sthe ba॒rhiṣi॑ viśvavedasā॒ madhvā॑ ya॒jñaṃ mi॑mikṣatam | kaṇvā॑so vāṃ su॒taso॑mā a॒bhidya॑vo yu॒vāṃ ha॑vante aśvinā || ४ || yābhi॒: kaṇva॑ma॒bhiṣṭi॑bhi॒: prāva॑taṃ yu॒vama॑śvinā | tābhi॒: ṣva१smām̐ a॑vataṃ śubhaspatī pā॒taṃ soma॑mṛtāvṛdhā || ५ || su॒dāse॑ dasrā॒ vasu॒ bibhra॑tā॒ rathe॒ pṛkṣo॑ vahatamaśvinā | ra॒yiṃ sa॑mu॒drādu॒ta vā॑ di॒vasparya॒sme dha॑ttaṃ puru॒spṛha॑m || ६ || yannā॑satyā parā॒vati॒ yadvā॒ stho adhi॑ tu॒rvaśe॑ | ato॒ rathe॑na su॒vṛtā॑ na॒ ā ga॑taṃ sā॒kaṃ sūrya॑sya ra॒śmibhi॑: || ७ || a॒rvāñcā॑ vāṃ॒ sapta॑yo’dhvara॒śriyo॒ vaha॑ntu॒ sava॒nedupa॑ | iṣaṃ॑ pṛ॒ñcantā॑ su॒kṛte॑ su॒dāna॑va॒ ā ba॒rhiḥ sī॑dataṃ narā || ८ || tena॑ nāsa॒tyā ga॑taṃ॒ rathe॑na॒ sūrya॑tvacā | yena॒ śaśva॑dū॒hathu॑rdā॒śuṣe॒ vasu॒ madhva॒: soma॑sya pī॒taye॑ || ९ || u॒kthebhi॑ra॒rvāgava॑se purū॒vasū॑ a॒rkaiśca॒ ni hva॑yāmahe | śaśva॒t kaṇvā॑nāṃ॒ sada॑si pri॒ye hi kaṃ॒ somaṃ॑ pa॒pathu॑raśvinā || १० ||