१४ प्रस्कण्वः काण्वः। अग्निः, १-२ अग्निः, अश्विनौ, उषाश्च। प्रगाथः – विषमा बृहत्यः, समाः सतोबृहत्यः।
अग्ने॒ विव॑स्वदु॒षस॑श् चि॒त्रं राधो॑ अमर्त्य ।
आ दा॒शुषे॑ जातवेदो वहा॒ त्वम॒द्या दे॒वाँ उ॑ष॒र्बुध॑: ॥१॥
जुष्टो॒ हि दू॒तो असि॑ हव्य॒वाह॒नो ऽग्ने॑ र॒थीर॑ध्व॒राणा॑म् ।
स॒जूर॒श्विभ्या॑मु॒षसा॑ सु॒वीर्य॑म॒स्मे धे॑हि॒ श्रवो॑ बृ॒हत् ॥२॥
अ॒द्या दू॒तं वृ॑णीमहे॒ वसु॑म॒ग्निं पु॑रुप्रि॒यम् ।
धू॒मके॑तुं॒ भाऋ॑जीकं॒ व्यु॑ष्टिषु य॒ज्ञाना॑मध्वर॒श्रिय॑म् ॥३॥
श्रेष्ठं॒ यवि॑ष्ठ॒मति॑थिं॒ स्वा॑हुतं॒ जुष्टं॒ जना॑य दा॒शुषे॑ ।
दे॒वाँ अच्छा॒ यात॑वे जा॒तवे॑दसम॒ग्निमी॑ळे॒ व्यु॑ष्टिषु ॥४॥
स्त॒वि॒ष्यामि॒ त्वाम॒हं विश्व॑स्यामृत भोजन ।
अग्ने॑ त्रा॒तार॑म॒मृतं॑ मियेध्य॒ यजि॑ष्ठं हव्यवाहन ॥५॥
सु॒शंसो॑ बोधि गृण॒ते य॑विष्ठ्य॒ मधु॑जिह्व॒: स्वा॑हुतः ।
प्रस्क॑ण्वस्य प्रति॒रन्नायु॑र्जी॒वसे॑ नम॒स्या दैव्यं॒ जन॑म् ॥६॥
होता॑रं वि॒श्ववे॑दसं॒ सं हि त्वा॒ विश॑ इ॒न्धते॑ ।
स आ व॑ह पुरुहूत॒ प्रचे॑त॒सो ऽग्ने॑ दे॒वाँ इ॒ह द्र॒वत् ॥७॥
स॒वि॒तार॑मु॒षस॑म॒श्विना॒ भग॑म॒ग्निं व्यु॑ष्टिषु॒ क्षप॑: ।
कण्वा॑सस्त्वा सु॒तसो॑मास इन्धते हव्य॒वाहं॑ स्वध्वर ॥८॥
पति॒र्ह्य॑ध्व॒राणा॒मग्ने॑ दू॒तो वि॒शामसि॑ ।
उ॒ष॒र्बुध॒ आ व॑ह॒ सोम॑पीतये दे॒वाँ अ॒द्य स्व॒र्दृश॑: ॥९॥
अग्ने॒ पूर्वा॒ अनू॒षसो॑ विभावसो दी॒देथ॑ वि॒श्वद॑र्शतः ।
असि॒ ग्रामे॑ष्ववि॒ता पु॒रोहि॒तो ऽसि॑ य॒ज्ञेषु॒ मानु॑षः ॥१०॥
नि त्वा॑ य॒ज्ञस्य॒ साध॑न॒मग्ने॒ होता॑रमृ॒त्विज॑म् ।
म॒नु॒ष्वद् दे॑व धीमहि॒ प्रचे॑तसं जी॒रं दू॒तमम॑र्त्यम् ॥११॥
यद् दे॒वानां॑ मित्रमहः पु॒रोहि॒तो ऽन्त॑रो॒ यासि॑ दू॒त्य॑म् ।
सिन्धो॑रिव॒ प्रस्व॑नितास ऊ॒र्मयो॒ ऽग्नेर्भ्रा॑जन्ते अ॒र्चय॑: ॥१२॥
श्रु॒धि श्रु॑त्कर्ण॒ वह्नि॑भिर्दे॒वैर॑ग्ने स॒याव॑भिः ।
आ सी॑दन्तु ब॒र्हिषि॑ मि॒त्रो अ॑र्य॒मा प्रा॑त॒र्यावा॑णो अध्व॒रम् ॥१३॥
शृ॒ण्वन्तु॒ स्तोमं॑ म॒रुत॑: सु॒दान॑वो ऽग्निजि॒ह्वा ऋ॑ता॒वृध॑: ।
पिब॑तु॒ सोमं॒ वरु॑णो धृ॒तव्र॑तो॒ ऽश्विभ्या॑मु॒षसा॑ स॒जूः ॥१४॥
१४ praskaṇvaḥ kāṇvaḥ | agniḥ, १-२ agniḥ, aśvinau, uṣāśca | pragāthaḥ – viṣamā bṛhatyaḥ, samāḥ satobṛhatyaḥ | agne॒ viva॑svadu॒ṣasa॑ś ci॒traṃ rādho॑ amartya | ā dā॒śuṣe॑ jātavedo vahā॒ tvama॒dyā de॒vām̐ u॑ṣa॒rbudha॑: || १ || juṣṭo॒ hi dū॒to asi॑ havya॒vāha॒no ’gne॑ ra॒thīra॑dhva॒rāṇā॑m | sa॒jūra॒śvibhyā॑mu॒ṣasā॑ su॒vīrya॑ma॒sme dhe॑hi॒ śravo॑ bṛ॒hat || २ || a॒dyā dū॒taṃ vṛ॑ṇīmahe॒ vasu॑ma॒gniṃ pu॑rupri॒yam | dhū॒make॑tuṃ॒ bhāṛ॑jīkaṃ॒ vyu॑ṣṭiṣu ya॒jñānā॑madhvara॒śriya॑m || ३ || śreṣṭhaṃ॒ yavi॑ṣṭha॒mati॑thiṃ॒ svā॑hutaṃ॒ juṣṭaṃ॒ janā॑ya dā॒śuṣe॑ | de॒vām̐ acchā॒ yāta॑ve jā॒tave॑dasama॒gnimī॑ḷe॒ vyu॑ṣṭiṣu || ४ || sta॒vi॒ṣyāmi॒ tvāma॒haṃ viśva॑syāmṛta bhojana | agne॑ trā॒tāra॑ma॒mṛtaṃ॑ miyedhya॒ yaji॑ṣṭhaṃ havyavāhana || ५ || su॒śaṃso॑ bodhi gṛṇa॒te ya॑viṣṭhya॒ madhu॑jihva॒: svā॑hutaḥ | praska॑ṇvasya prati॒rannāyu॑rjī॒vase॑ nama॒syā daivyaṃ॒ jana॑m || ६ || hotā॑raṃ vi॒śvave॑dasaṃ॒ saṃ hi tvā॒ viśa॑ i॒ndhate॑ | sa ā va॑ha puruhūta॒ prace॑ta॒so ’gne॑ de॒vām̐ i॒ha dra॒vat || ७ || sa॒vi॒tāra॑mu॒ṣasa॑ma॒śvinā॒ bhaga॑ma॒gniṃ vyu॑ṣṭiṣu॒ kṣapa॑: | kaṇvā॑sastvā su॒taso॑māsa indhate havya॒vāhaṃ॑ svadhvara || ८ || pati॒rhya॑dhva॒rāṇā॒magne॑ dū॒to vi॒śāmasi॑ | u॒ṣa॒rbudha॒ ā va॑ha॒ soma॑pītaye de॒vām̐ a॒dya sva॒rdṛśa॑: || ९ || agne॒ pūrvā॒ anū॒ṣaso॑ vibhāvaso dī॒detha॑ vi॒śvada॑rśataḥ | asi॒ grāme॑ṣvavi॒tā pu॒rohi॒to ’si॑ ya॒jñeṣu॒ mānu॑ṣaḥ || १० || ni tvā॑ ya॒jñasya॒ sādha॑na॒magne॒ hotā॑ramṛ॒tvija॑m | ma॒nu॒ṣvad de॑va dhīmahi॒ prace॑tasaṃ jī॒raṃ dū॒tamama॑rtyam || ११ || yad de॒vānāṃ॑ mitramahaḥ pu॒rohi॒to ’nta॑ro॒ yāsi॑ dū॒tya॑m | sindho॑riva॒ prasva॑nitāsa ū॒rmayo॒ ’gnerbhrā॑jante a॒rcaya॑: || १२ || śru॒dhi śru॑tkarṇa॒ vahni॑bhirde॒vaira॑gne sa॒yāva॑bhiḥ | ā sī॑dantu ba॒rhiṣi॑ mi॒tro a॑rya॒mā prā॑ta॒ryāvā॑ṇo adhva॒ram || १३ || śṛ॒ṇvantu॒ stomaṃ॑ ma॒ruta॑: su॒dāna॑vo ’gniji॒hvā ṛ॑tā॒vṛdha॑: | piba॑tu॒ somaṃ॒ varu॑ṇo dhṛ॒tavra॑to॒ ’śvibhyā॑mu॒ṣasā॑ sa॒jūḥ || १४ ||