१० कण्वौ घौरः। मरुतः। प्रगाथः – विषमा बृहत्यः, समाः सतोबृहत्यः।
प्र यदि॒त्था प॑रा॒वत॑: शो॒चिर्न मान॒मस्य॑थ ।
कस्य॒ क्रत्वा॑ मरुत॒: कस्य॒ वर्प॑सा॒ कं या॑थ॒ कं ह॑ धूतयः ॥१
स्थि॒रा व॑: स॒न्त्वायु॑धा परा॒णुदे॑ वी॒ळू उ॒त प्र॑ति॒ष्कभे॑ ।
यु॒ष्माक॑मस्तु॒ तवि॑षी॒ पनी॑यसी॒ मा मर्त्य॑स्य मा॒यिन॑: ॥२
परा॑ ह॒ यत् स्थि॒रं ह॒थ नरो॑ व॒र्तय॑था गु॒रु ।
वि या॑थन व॒निन॑: पृथि॒व्या व्याशा॒: पर्व॑तानाम् ॥३
न॒हि व॒: शत्रु॑र्विवि॒दे अधि॒ द्यवि॒ न भूम्यां॑ रिशादसः ।
यु॒ष्माक॑मस्तु॒ तवि॑षी॒ तना॑ यु॒जा रुद्रा॑सो॒ नू चि॑दा॒धृषे॑ ॥४
प्र वे॑पयन्ति॒ पर्व॑ता॒न्वि वि॑ञ्चन्ति॒ वन॒स्पती॑न् ।
प्रो आ॑रत मरुतो दु॒र्मदा॑ इव॒ देवा॑स॒: सर्व॑या वि॒शा ॥५
उपो॒ रथे॑षु॒ पृष॑तीरयुग्ध्वं॒ प्रष्टि॑र्वहति॒ रोहि॑तः ।
आ वो॒ यामा॑य पृथि॒वी चि॑दश्रो॒दबी॑भयन्त॒ मानु॑षाः ॥६
आ वो॑ म॒क्षू तना॑य॒ कं रुद्रा॒ अवो॑ वृणीमहे ।
गन्ता॑ नू॒नं नोऽव॑सा॒ यथा॑ पु॒रेत्था कण्वा॑य बि॒भ्युषे॑ ॥७
यु॒ष्मेषि॑तो मरुतो॒ मर्त्ये॑षित॒ आ यो नो॒ अभ्व॒ ईष॑ते ।
वि तं यु॑योत॒ शव॑सा॒ व्योज॑सा॒ वि यु॒ष्माका॑भिरू॒तिभि॑: ॥८
असा॑मि॒ हि प्र॑यज्यव॒: कण्वं॑ द॒द प्र॑चेतसः ।
असा॑मिभिर्मरुत॒ आ न॑ ऊ॒तिभि॒र्गन्ता॑ वृ॒ष्टिं न वि॒द्युत॑: ॥९
असा॒म्योजो॑ बिभृथा सुदान॒वो ऽसा॑मि धूतय॒: शव॑: ।
ऋ॒षि॒द्विषे॑ मरुतः परिम॒न्यव॒ इषुं॒ न सृ॑जत॒ द्विष॑म् ॥१०
१० kaṇvau ghauraḥ | marutaḥ | pragāthaḥ – viṣamā bṛhatyaḥ, samāḥ satobṛhatyaḥ | pra yadi॒tthā pa॑rā॒vata॑: śo॒cirna māna॒masya॑tha | kasya॒ kratvā॑ maruta॒: kasya॒ varpa॑sā॒ kaṃ yā॑tha॒ kaṃ ha॑ dhūtayaḥ || १ sthi॒rā va॑: sa॒ntvāyu॑dhā parā॒ṇude॑ vī॒ḷū u॒ta pra॑ti॒ṣkabhe॑ | yu॒ṣmāka॑mastu॒ tavi॑ṣī॒ panī॑yasī॒ mā martya॑sya mā॒yina॑: || २ parā॑ ha॒ yat sthi॒raṃ ha॒tha naro॑ va॒rtaya॑thā gu॒ru | vi yā॑thana va॒nina॑: pṛthi॒vyā vyāśā॒: parva॑tānām || ३ na॒hi va॒: śatru॑rvivi॒de adhi॒ dyavi॒ na bhūmyāṃ॑ riśādasaḥ | yu॒ṣmāka॑mastu॒ tavi॑ṣī॒ tanā॑ yu॒jā rudrā॑so॒ nū ci॑dā॒dhṛṣe॑ || ४ pra ve॑payanti॒ parva॑tā॒nvi vi॑ñcanti॒ vana॒spatī॑n | pro ā॑rata maruto du॒rmadā॑ iva॒ devā॑sa॒: sarva॑yā vi॒śā || ५ upo॒ rathe॑ṣu॒ pṛṣa॑tīrayugdhvaṃ॒ praṣṭi॑rvahati॒ rohi॑taḥ | ā vo॒ yāmā॑ya pṛthi॒vī ci॑daśro॒dabī॑bhayanta॒ mānu॑ṣāḥ || ६ ā vo॑ ma॒kṣū tanā॑ya॒ kaṃ rudrā॒ avo॑ vṛṇīmahe | gantā॑ nū॒naṃ no’va॑sā॒ yathā॑ pu॒retthā kaṇvā॑ya bi॒bhyuṣe॑ || ७ yu॒ṣmeṣi॑to maruto॒ martye॑ṣita॒ ā yo no॒ abhva॒ īṣa॑te | vi taṃ yu॑yota॒ śava॑sā॒ vyoja॑sā॒ vi yu॒ṣmākā॑bhirū॒tibhi॑: || ८ asā॑mi॒ hi pra॑yajyava॒: kaṇvaṃ॑ da॒da pra॑cetasaḥ | asā॑mibhirmaruta॒ ā na॑ ū॒tibhi॒rgantā॑ vṛ॒ṣṭiṃ na vi॒dyuta॑: || ९ asā॒myojo॑ bibhṛthā sudāna॒vo ’sā॑mi dhūtaya॒: śava॑: | ṛ॒ṣi॒dviṣe॑ marutaḥ parima॒nyava॒ iṣuṃ॒ na sṛ॑jata॒ dviṣa॑m || १०