१५ कण्वो घौरः। मरुतः। गायत्री।
क्री॒ळं व॒: शर्धो॒ मारु॑तमन॒र्वाणं॑ रथे॒शुभ॑म् । कण्वा॑ अ॒भि प्र गा॑यत ॥१॥
ये पृष॑तीभिर्ऋ॒ष्टिभि॑: सा॒कं वाशी॑भिर॒ञ्जिभि॑: । अजा॑यन्त॒ स्वभा॑नवः ॥२॥
इ॒हेव॑ शृण्व एषां॒ कशा॒ हस्ते॑षु॒ यद् वदा॑न् । नि याम॑ञ्चि॒त्रमृ॑ञ्जते ॥३॥
प्र व॒: शर्धा॑य॒ घृष्व॑ये त्वे॒षद्यु॑म्नाय शु॒ष्मिणे॑ । दे॒वत्तं॒ ब्रह्म॑ गायत ॥४॥
प्र शं॑सा॒ गोष्वघ्न्यं॑ क्री॒ळं यच्छर्धो॒ मारु॑तम् । जम्भे॒ रस॑स्य वावृधे ॥५॥
को वो॒ वर्षि॑ष्ठ॒ आ न॑रो दि॒वश्च॒ ग्मश्च॑ धूतयः । यत्सी॒मन्तं॒ न धू॑नु॒थ ॥६॥
नि वो॒ यामा॑य॒ मानु॑षो द॒ध्र उ॒ग्राय॑ म॒न्यवे॑ । जिही॑त॒ पर्व॑तो गि॒रिः ॥७॥
येषा॒मज्मे॑षु पृथि॒वी जु॑जु॒र्वाँ इ॑व वि॒श्पति॑: । भि॒या यामे॑षु॒ रेज॑ते ॥८॥
स्थि॒रं हि जान॑मेषां॒ वयो॑ मा॒तुर्निरे॑तवे । यत् सी॒मनु॑ द्वि॒ता शव॑: ॥९॥
उदु॒ त्ये सू॒नवो॒ गिर॒: काष्ठा॒ अज्मे॑ष्वत्नत । वा॒श्रा अ॑भि॒ज्ञु यात॑वे ॥१०॥
त्यं चि॑द् घा दी॒र्घं पृ॒थुं मि॒हो नपा॑त॒ममृ॑ध्रम् । प्र च्या॑वयन्ति॒ याम॑भिः ॥११॥
मरु॑तो॒ यद्ध॑ वो॒ बलं॒ जनाँ॑ अचुच्यवीतन । गि॒रीँर॑चुच्यवीतन ॥१२॥
यद्ध॒ यान्ति॑ म॒रुत॒: सं ह॑ ब्रुव॒तेऽध्व॒न्ना । शृ॒णोति॒ कश्चि॑देषाम् ॥१३॥
प्र या॑त॒ शीभ॑मा॒शुभि॒: सन्ति॒ कण्वे॑षु वो॒ दुव॑: । तत्रो॒ षु मा॑दयाध्वै ॥१४॥
अस्ति॒ हि ष्मा॒ मदा॑य व॒: स्मसि॑ ष्मा व॒यमे॑षाम् । विश्वं॑ चि॒दायु॑र्जी॒वसे॑ ॥१५॥
१५ kaṇvo ghauraḥ | marutaḥ | gāyatrī | krī॒ḷaṃ va॒: śardho॒ māru॑tamana॒rvāṇaṃ॑ rathe॒śubha॑m | kaṇvā॑ a॒bhi pra gā॑yata || १ || ye pṛṣa॑tībhirṛ॒ṣṭibhi॑: sā॒kaṃ vāśī॑bhira॒ñjibhi॑: | ajā॑yanta॒ svabhā॑navaḥ || २ || i॒heva॑ śṛṇva eṣāṃ॒ kaśā॒ haste॑ṣu॒ yad vadā॑n | ni yāma॑ñci॒tramṛ॑ñjate || ३ || pra va॒: śardhā॑ya॒ ghṛṣva॑ye tve॒ṣadyu॑mnāya śu॒ṣmiṇe॑ | de॒vattaṃ॒ brahma॑ gāyata || ४ || pra śaṃ॑sā॒ goṣvaghnyaṃ॑ krī॒ḷaṃ yacchardho॒ māru॑tam | jambhe॒ rasa॑sya vāvṛdhe || ५ || ko vo॒ varṣi॑ṣṭha॒ ā na॑ro di॒vaśca॒ gmaśca॑ dhūtayaḥ | yatsī॒mantaṃ॒ na dhū॑nu॒tha || ६ || ni vo॒ yāmā॑ya॒ mānu॑ṣo da॒dhra u॒grāya॑ ma॒nyave॑ | jihī॑ta॒ parva॑to gi॒riḥ || ७ || yeṣā॒majme॑ṣu pṛthi॒vī ju॑ju॒rvām̐ i॑va vi॒śpati॑: | bhi॒yā yāme॑ṣu॒ reja॑te || ८ || sthi॒raṃ hi jāna॑meṣāṃ॒ vayo॑ mā॒turnire॑tave | yat sī॒manu॑ dvi॒tā śava॑: || ९ || udu॒ tye sū॒navo॒ gira॒: kāṣṭhā॒ ajme॑ṣvatnata | vā॒śrā a॑bhi॒jñu yāta॑ve || १० || tyaṃ ci॑d ghā dī॒rghaṃ pṛ॒thuṃ mi॒ho napā॑ta॒mamṛ॑dhram | pra cyā॑vayanti॒ yāma॑bhiḥ || ११ || maru॑to॒ yaddha॑ vo॒ balaṃ॒ janām̐॑ acucyavītana | gi॒rīm̐ra॑cucyavītana || १२ || yaddha॒ yānti॑ ma॒ruta॒: saṃ ha॑ bruva॒te’dhva॒nnā | śṛ॒ṇoti॒ kaści॑deṣām || १३ || pra yā॑ta॒ śībha॑mā॒śubhi॒: santi॒ kaṇve॑ṣu vo॒ duva॑: | tatro॒ ṣu mā॑dayādhvai || १४ || asti॒ hi ṣmā॒ madā॑ya va॒: smasi॑ ṣmā va॒yame॑ṣām | viśvaṃ॑ ci॒dāyu॑rjī॒vase॑ || १५ ||