१५ हिरण्यस्तूप आङ्गिरसः। इन्द्रः। त्रिष्टुप्।
इन्द्र॑स्य॒ नु वी॒र्या॑णि॒ प्र वो॑चं॒ यानि॑ च॒कार॑ प्रथ॒मानि॑ व॒ज्री ।
अह॒न्नहि॒मन्व॒पस्त॑तर्द॒ प्र व॒क्षणा॑ अभिन॒त् पर्व॑तानाम् ॥१॥
अह॒न्नहिं॒ पर्व॑ते शिश्रिया॒णं त्वष्टा॑स्मै॒ वज्रं॑ स्व॒र्यं॑ ततक्ष ।
वा॒श्रा इ॑व धे॒नव॒: स्यन्द॑माना॒ अञ्ज॑: समु॒द्रमव॑ जग्मु॒राप॑: ॥२॥
वृ॒षा॒यमा॑णो ऽवृणीत॒ सोमं॒ त्रिक॑द्रुकेष्वपिबत् सु॒तस्य॑ ।
आ साय॑कं म॒घवा॑दत्त॒ वज्र॒मह॑न्नेनं प्रथम॒जामही॑नाम् ॥३॥
यदि॒न्द्राह॑न् प्रथम॒जामही॑ना॒मान्मा॒यिना॒ममि॑ना॒: प्रोत मा॒याः ।
आत् सूर्यं॑ ज॒नय॒न् द्यामु॒षासं॑ ता॒दीत्ना॒ शत्रुं॒ न किला॑ विवित्से ॥४॥
अह॑न् वृ॒त्रं वृ॑त्र॒तरं॒ व्यं॑स॒मिन्द्रो॒ वज्रे॑ण मह॒ता व॒धेन॑ ।
स्कन्धां॑सीव॒ कुलि॑शेना॒ विवृ॒क्णाऽहि॑: शयत उप॒पृक् पृ॑थि॒व्याः ॥५॥
अ॒यो॒द्धेव॑ दु॒र्मद॒ आ हि जु॒ह्वे म॑हावी॒रं तु॑विबा॒धमृ॑जी॒षम् ।
नाता॑रीदस्य॒ समृ॑तिं व॒धानां॒ सं रु॒जाना॑: पिपिष॒ इन्द्र॑शत्रुः ॥६॥
अ॒पाद॑ह॒स्तो अ॑पृतन्य॒दिन्द्र॒मास्य॒ वज्र॒मधि॒ सानौ॑ जघान ।
वृष्णो॒ वध्रि॑: प्रति॒मानं॒ बुभू॑षन् पुरु॒त्रा वृ॒त्रो अ॑शय॒द्व्य॑ व्य॑स्तः ॥७॥
न॒दं न भि॒न्नम॑मु॒या शया॑नं॒ मनो॒ रुहा॑णा॒ अति॑ य॒न्त्याप॑: ।
याश्चि॑द् वृ॒त्रो म॑हि॒ना प॒र्यति॑ष्ठ॒त् तासा॒महि॑: पत्सुत॒:शीर्ब॑भूव ॥८॥
नी॒चाव॑या अभवद् वृ॒त्रपु॒त्रेन्द्रो॑ अस्या॒ अव॒ वध॑र्जभार ।
उत्त॑रा॒ सूरध॑रः पु॒त्र आ॑सी॒द् दानु॑: शये स॒हव॑त्सा॒ न धे॒नुः ॥९॥
अति॑ष्ठन्तीनामनिवेश॒नानां॒ काष्ठा॑नां॒ मध्ये॒ निहि॑तं॒ शरी॑रम् ।
वृ॒त्रस्य॑ नि॒ण्यं वि च॑र॒न्त्यापो॑ दी॒र्घं तम॒ आश॑य॒दिन्द्र॑शत्रुः ॥१०॥
दा॒सप॑त्नी॒रहि॑गोपा अतिष्ठ॒न् निरु॑द्धा॒ आप॑: प॒णिने॑व॒ गाव॑: ।
अ॒पां बिल॒मपि॑हितं॒ यदासी॑द् वृ॒त्रं ज॑घ॒न्वाँ अप॒ तद् व॑वार ॥११॥
अश्व्यो॒ वारो॑ अभव॒स्तदि॑न्द्र सृ॒के यत् त्वा॑ प्र॒त्यह॑न् देव एक॑: ।
अज॑यो॒ गा अज॑यः शूर॒ सोम॒मवा॑सृज॒: सर्त॑वे स॒प्त सिन्धू॑न् ॥१२॥
नास्मै॑ वि॒द्युन्न त॑न्य॒तुः सि॑षेध॒ न यां मिह॒मकि॑रद् ध्रा॒दुनिं॑ च ।
इन्द्र॑श्च॒ यद् यु॑यु॒धाते॒ अहि॑श्चो॒ताप॒रीभ्यो॑ म॒घवा॒ वि जि॑ग्ये ॥१३॥
अहे॑र्या॒तारं॒ कम॑पश्य इन्द्र हृ॒दि यत्ते॑ ज॒घ्नुषो॒ भीरग॑च्छत् ।
नव॑ च॒ यन् न॑व॒तिं च॒ स्रव॑न्तीः श्ये॒नो न भी॒तो अत॑रो॒ रजां॑सि ॥१४॥
इन्द्रो॑ या॒तोऽव॑सितस्य॒ राजा॒ शम॑स्य च शृ॒ङ्गिणो॒ वज्र॑बाहुः ।
सेदु॒ राजा॑ क्षयति चर्षणी॒नाम॒रान् न ने॒मिः परि॒ ता ब॑भूव ॥१५॥
१५ hiraṇyastūpa āṅgirasaḥ | indraḥ | triṣṭup | indra॑sya॒ nu vī॒ryā॑ṇi॒ pra vo॑caṃ॒ yāni॑ ca॒kāra॑ pratha॒māni॑ va॒jrī | aha॒nnahi॒manva॒pasta॑tarda॒ pra va॒kṣaṇā॑ abhina॒t parva॑tānām || १ || aha॒nnahiṃ॒ parva॑te śiśriyā॒ṇaṃ tvaṣṭā॑smai॒ vajraṃ॑ sva॒ryaṃ॑ tatakṣa | vā॒śrā i॑va dhe॒nava॒: syanda॑mānā॒ añja॑: samu॒dramava॑ jagmu॒rāpa॑: || २ || vṛ॒ṣā॒yamā॑ṇo ’vṛṇīta॒ somaṃ॒ trika॑drukeṣvapibat su॒tasya॑ | ā sāya॑kaṃ ma॒ghavā॑datta॒ vajra॒maha॑nnenaṃ prathama॒jāmahī॑nām || ३ || yadi॒ndrāha॑n prathama॒jāmahī॑nā॒mānmā॒yinā॒mami॑nā॒: prota mā॒yāḥ | āt sūryaṃ॑ ja॒naya॒n dyāmu॒ṣāsaṃ॑ tā॒dītnā॒ śatruṃ॒ na kilā॑ vivitse || ४ || aha॑n vṛ॒traṃ vṛ॑tra॒taraṃ॒ vyaṃ॑sa॒mindro॒ vajre॑ṇa maha॒tā va॒dhena॑ | skandhāṃ॑sīva॒ kuli॑śenā॒ vivṛ॒kṇā’hi॑: śayata upa॒pṛk pṛ॑thi॒vyāḥ || ५ || a॒yo॒ddheva॑ du॒rmada॒ ā hi ju॒hve ma॑hāvī॒raṃ tu॑vibā॒dhamṛ॑jī॒ṣam | nātā॑rīdasya॒ samṛ॑tiṃ va॒dhānāṃ॒ saṃ ru॒jānā॑: pipiṣa॒ indra॑śatruḥ || ६ || a॒pāda॑ha॒sto a॑pṛtanya॒dindra॒māsya॒ vajra॒madhi॒ sānau॑ jaghāna | vṛṣṇo॒ vadhri॑: prati॒mānaṃ॒ bubhū॑ṣan puru॒trā vṛ॒tro a॑śaya॒dvya॑ vya॑staḥ || ७ || na॒daṃ na bhi॒nnama॑mu॒yā śayā॑naṃ॒ mano॒ ruhā॑ṇā॒ ati॑ ya॒ntyāpa॑: | yāści॑d vṛ॒tro ma॑hi॒nā pa॒ryati॑ṣṭha॒t tāsā॒mahi॑: patsuta॒:śīrba॑bhūva || ८ || nī॒cāva॑yā abhavad vṛ॒trapu॒trendro॑ asyā॒ ava॒ vadha॑rjabhāra | utta॑rā॒ sūradha॑raḥ pu॒tra ā॑sī॒d dānu॑: śaye sa॒hava॑tsā॒ na dhe॒nuḥ || ९ || ati॑ṣṭhantīnāmaniveśa॒nānāṃ॒ kāṣṭhā॑nāṃ॒ madhye॒ nihi॑taṃ॒ śarī॑ram | vṛ॒trasya॑ ni॒ṇyaṃ vi ca॑ra॒ntyāpo॑ dī॒rghaṃ tama॒ āśa॑ya॒dindra॑śatruḥ || १० || dā॒sapa॑tnī॒rahi॑gopā atiṣṭha॒n niru॑ddhā॒ āpa॑: pa॒ṇine॑va॒ gāva॑: | a॒pāṃ bila॒mapi॑hitaṃ॒ yadāsī॑d vṛ॒traṃ ja॑gha॒nvām̐ apa॒ tad va॑vāra || ११ || aśvyo॒ vāro॑ abhava॒stadi॑ndra sṛ॒ke yat tvā॑ pra॒tyaha॑n deva eka॑: | aja॑yo॒ gā aja॑yaḥ śūra॒ soma॒mavā॑sṛja॒: sarta॑ve sa॒pta sindhū॑n || १२ || nāsmai॑ vi॒dyunna ta॑nya॒tuḥ si॑ṣedha॒ na yāṃ miha॒maki॑rad dhrā॒duniṃ॑ ca | indra॑śca॒ yad yu॑yu॒dhāte॒ ahi॑śco॒tāpa॒rībhyo॑ ma॒ghavā॒ vi ji॑gye || १३ || ahe॑ryā॒tāraṃ॒ kama॑paśya indra hṛ॒di yatte॑ ja॒ghnuṣo॒ bhīraga॑cchat | nava॑ ca॒ yan na॑va॒tiṃ ca॒ srava॑ntīḥ śye॒no na bhī॒to ata॑ro॒ rajāṃ॑si || १४ || indro॑ yā॒to’va॑sitasya॒ rājā॒ śama॑sya ca śṛ॒ṅgiṇo॒ vajra॑bāhuḥ | sedu॒ rājā॑ kṣayati carṣaṇī॒nāma॒rān na ne॒miḥ pari॒ tā ba॑bhūva || १५ ||