१५ आजीगर्तिः शुनः शेपः स कृत्रिमो वैश्वामित्रो देवरातः।१ कः (प्रजापतिः), २ अग्निः, ३-५ सविता, ५ भगो वा, ६-१५ वरुणः।१, २, ६-१५ त्रिष्टुप्, ३-५ गायत्री।
कस्य॑ नू॒नं क॑त॒मस्या॒मृता॑नां॒ मना॑महे॒ चारु॑ दे॒वस्य॒ नाम॑ ।
को नो॑ म॒ह्या अदि॑तये॒ पुन॑र्दात् पि॒तरं॑ च दृ॒शेयं॑ मा॒तरं॑ च ॥१॥
अ॒ग्नेर्व॒यं प्र॑थ॒मस्या॒मृता॑नां॒ मना॑महे॒ चारु॑ दे॒वस्य॒ नाम॑ ।
स नो॑ म॒ह्या अदि॑तये॒ पुन॑र्दात् पि॒तरं॑ च दृ॒शेयं॑ मा॒तरं॑ च ॥२॥
अ॒भि त्वा॑ देव सवित॒रीशा॑नं॒ वार्या॑णाम् । सदा॑वन्भा॒गमी॑महे ॥३॥
यश्चि॒द्धि त॑ इ॒त्था भग॑: शशमा॒नः पु॒रा नि॒दः । अ॒द्वे॒षो हस्त॑योर्द॒धे ॥४॥
भग॑भक्तस्य ते व॒यमुद॑शेम॒ तवाव॑सा । मू॒र्धानं॑ रा॒य आ॒रभे॑ ॥५॥
न॒हि ते॑ क्ष॒त्रं न सहो॒ न म॒न्युं वय॑श्च॒नामी प॒तय॑न्त आ॒पुः ।
नेमा आपो॑ अनिमि॒षं चर॑न्ती॒र्न ये वात॑स्य प्रमि॒नन्त्यभ्व॑म् ॥६॥
अ॒बु॒ध्ने राजा॒ वरु॑णो॒ वन॑स्यो॒र्ध्वं स्तूपं॑ ददते पू॒तद॑क्षः ।
नी॒चीना॑: स्थुरु॒परि॑ बु॒ध्न ए॑षाम॒स्मे अ॒न्तर्निहि॑ताः के॒तव॑: स्युः ॥७॥
उ॒रुं हि राजा॒ वरु॑णश्च॒कार॒ सूर्या॑य॒ पन्था॒मन्वे॑त॒वा उ॑ ।
अ॒पदे॒ पादा॒ प्रति॑धातवेऽकरु॒ताप॑व॒क्ता हृ॑दया॒विध॑श्चित् ॥८॥
श॒तं ते॑ राजन् भि॒षज॑: स॒हस्र॑मु॒र्वी ग॑भी॒रा सु॑म॒तिष्टे॑ अस्तु ।
बाध॑स्व दू॒रे निऋ॑तिं परा॒चैः कृ॒तं चि॒देन॒: प्र मु॑मुग्ध्य॒स्मत् ॥९॥
अ॒मी य ऋक्षा॒ निहि॑तास उ॒च्चा नक्तं॒ ददृ॑श्रे॒ कुह॑ चि॒द् दिवे॑युः ।
अद॑ब्धानि॒ वरु॑णस्य व्र॒तानि॑ वि॒चाक॑शच्च॒न्द्रमा॒ नक्त॑मेति ॥१०॥॥
तत्त्वा॑ यामि॒ ब्रह्म॑णा॒ वन्द॑मान॒स् तदा शा॑स्ते॒ यज॑मानो ह॒विर्भि॑: ।
अहे॑ळमानो वरुणे॒ह बो॒ध्युरु॑शंस॒ मा न॒ आयु॒: प्र मो॑षीः ॥११॥॥
तदिन्नक्तं॒ तद् दिवा॒ मह्य॑माहु॒स् तद॒यं केतो॑ हृ॒द आ वि च॑ष्टे ।
शुन॒:शेपो॒ यमह्व॑द् गृभी॒तः सो अ॒स्मान् राजा॒ वरु॑णो मुमोक्तु ॥१२॥
शुन॒:शेपो॒ ह्यह्व॑द् गृभी॒तस् त्रि॒ष्वा॑दि॒त्यं द्रु॑प॒देषु॑ ब॒द्धः ।
अवै॑नं॒ राजा॒ वरु॑णः ससृज्याद् वि॒द्वाँ अद॑ब्धो॒ वि मु॑मोक्तु॒ पाशा॑न् ॥१३॥
अव॑ ते॒ हेळो॑ वरुण॒ नमो॑भि॒रव॑ य॒ज्ञेभि॑रीमहे ह॒विर्भि॑: ।
क्षय॑न्न॒स्मभ्य॑मसुर प्रचेता॒ राज॒न्नेनां॑सि शिश्रथः कृ॒तानि॑ ॥१४॥
उदु॑त्त॒मं व॑रुण॒ पाश॑म॒स्मदवा॑ध॒मं वि म॑ध्य॒मं श्र॑थाय ।
अथा॑ व॒यमा॑दित्य व्र॒ते तवाना॑गसो॒ अदि॑तये स्याम ॥१५॥
१५ ājīgartiḥ śunaḥ śepaḥ sa kṛtrimo vaiśvāmitro devarātaḥ | १ kaḥ (prajāpatiḥ), २ agniḥ, ३-५ savitā, ५ bhago vā, ६-१५ varuṇaḥ | १, २, ६-१५ triṣṭup, ३-५ gāyatrī | kasya॑ nū॒naṃ ka॑ta॒masyā॒mṛtā॑nāṃ॒ manā॑mahe॒ cāru॑ de॒vasya॒ nāma॑ | ko no॑ ma॒hyā adi॑taye॒ puna॑rdāt pi॒taraṃ॑ ca dṛ॒śeyaṃ॑ mā॒taraṃ॑ ca || १ || a॒gnerva॒yaṃ pra॑tha॒masyā॒mṛtā॑nāṃ॒ manā॑mahe॒ cāru॑ de॒vasya॒ nāma॑ | sa no॑ ma॒hyā adi॑taye॒ puna॑rdāt pi॒taraṃ॑ ca dṛ॒śeyaṃ॑ mā॒taraṃ॑ ca || २ || a॒bhi tvā॑ deva savita॒rīśā॑naṃ॒ vāryā॑ṇām | sadā॑vanbhā॒gamī॑mahe || ३ || yaści॒ddhi ta॑ i॒tthā bhaga॑: śaśamā॒naḥ pu॒rā ni॒daḥ | a॒dve॒ṣo hasta॑yorda॒dhe || ४ || bhaga॑bhaktasya te va॒yamuda॑śema॒ tavāva॑sā | mū॒rdhānaṃ॑ rā॒ya ā॒rabhe॑ || ५ || na॒hi te॑ kṣa॒traṃ na saho॒ na ma॒nyuṃ vaya॑śca॒nāmī pa॒taya॑nta ā॒puḥ | nemā āpo॑ animi॒ṣaṃ cara॑ntī॒rna ye vāta॑sya prami॒nantyabhva॑m || ६ || a॒bu॒dhne rājā॒ varu॑ṇo॒ vana॑syo॒rdhvaṃ stūpaṃ॑ dadate pū॒tada॑kṣaḥ | nī॒cīnā॑: sthuru॒pari॑ bu॒dhna e॑ṣāma॒sme a॒ntarnihi॑tāḥ ke॒tava॑: syuḥ || ७ || u॒ruṃ hi rājā॒ varu॑ṇaśca॒kāra॒ sūryā॑ya॒ panthā॒manve॑ta॒vā u॑ | a॒pade॒ pādā॒ prati॑dhātave’karu॒tāpa॑va॒ktā hṛ॑dayā॒vidha॑ścit || ८ || śa॒taṃ te॑ rājan bhi॒ṣaja॑: sa॒hasra॑mu॒rvī ga॑bhī॒rā su॑ma॒tiṣṭe॑ astu | bādha॑sva dū॒re niṛ॑tiṃ parā॒caiḥ kṛ॒taṃ ci॒dena॒: pra mu॑mugdhya॒smat || ९ || a॒mī ya ṛkṣā॒ nihi॑tāsa u॒ccā naktaṃ॒ dadṛ॑śre॒ kuha॑ ci॒d dive॑yuḥ | ada॑bdhāni॒ varu॑ṇasya vra॒tāni॑ vi॒cāka॑śacca॒ndramā॒ nakta॑meti || १० || || tattvā॑ yāmi॒ brahma॑ṇā॒ vanda॑māna॒s tadā śā॑ste॒ yaja॑māno ha॒virbhi॑: | ahe॑ḷamāno varuṇe॒ha bo॒dhyuru॑śaṃsa॒ mā na॒ āyu॒: pra mo॑ṣīḥ || ११ || || tadinnaktaṃ॒ tad divā॒ mahya॑māhu॒s tada॒yaṃ keto॑ hṛ॒da ā vi ca॑ṣṭe | śuna॒:śepo॒ yamahva॑d gṛbhī॒taḥ so a॒smān rājā॒ varu॑ṇo mumoktu || १२ || śuna॒:śepo॒ hyahva॑d gṛbhī॒tas tri॒ṣvā॑di॒tyaṃ dru॑pa॒deṣu॑ ba॒ddhaḥ | avai॑naṃ॒ rājā॒ varu॑ṇaḥ sasṛjyād vi॒dvām̐ ada॑bdho॒ vi mu॑moktu॒ pāśā॑n || १३ || ava॑ te॒ heḷo॑ varuṇa॒ namo॑bhi॒rava॑ ya॒jñebhi॑rīmahe ha॒virbhi॑: | kṣaya॑nna॒smabhya॑masura pracetā॒ rāja॒nnenāṃ॑si śiśrathaḥ kṛ॒tāni॑ || १४ || udu॑tta॒maṃ va॑ruṇa॒ pāśa॑ma॒smadavā॑dha॒maṃ vi ma॑dhya॒maṃ śra॑thāya | athā॑ va॒yamā॑ditya vra॒te tavānā॑gaso॒ adi॑taye syāma || १५ ||