११ अगस्त्यो मैत्रावरुणिः । आप्रीसूक्तं-(१ इध्मः समिद्धोऽग्निर्वा, २ तनूनपात् ३ इळः, ४ बर्हिः, ५ देवीर्द्वारः, ६ उषा सानक्ता, ७ दैव्यौ होतारौ प्रचेतसौ, ८ तिस्रो देव्यः सरस्वतीळाभारत्यः, ९ त्वष्टा, १० वनस्पतिः, ११ स्वाहाकृतयः)। गायत्री।
समि॑द्धो अ॒द्य रा॑जसि दे॒वो दे॒वैः स॑हस्रजित् । दू॒तो ह॒व्या क॒विर्व॑ह ॥१
तनू॑नपादृ॒तं य॒ते मध्वा॑ य॒ज्ञः सम॑ज्यते । दध॑त् सह॒स्रिणी॒रिष॑: ॥२
आ॒जुह्वा॑नो न॒ ईड्यो॑ दे॒वाँ आ व॑क्षि य॒ज्ञिया॑न् । अग्ने॑ सहस्र॒सा अ॑सि ॥३
प्रा॒चीनं॑ ब॒र्हिरोज॑सा स॒हस्र॑वीरमस्तृणन् । यत्रा॑दित्या वि॒राज॑थ ॥४
वि॒राट् स॒म्राड्वि॒भ्वीः प्र॒भ्वीर्ब॒ह्वीश्च॒ भूय॑सीश्च॒ याः । दुरो॑ घृ॒तान्य॑क्षरन् ॥५
सु॒रु॒क्मे हि सु॒पेश॒सा ऽधि॑ श्रि॒या वि॒राज॑तः । उ॒षासा॒वेह सी॑दताम् ॥६
प्र॒थ॒मा हि सु॒वाच॑सा॒ होता॑रा॒ दैव्या॑ क॒वी । य॒ज्ञं नो॑ यक्षतामि॒मम् ॥७
भार॒तीळे॒ सर॑स्वति॒ या व॒: सर्वा॑ उपब्रु॒वे । ता न॑श्चोदयत श्रि॒ये ॥८
त्वष्टा॑ रू॒पाणि॒ हि प्र॒भुः प॒शून् विश्वा॑न् त्समान॒जे । तेषां॑ नः स्फा॒तिमा य॑ज ॥९
उप॒ त्मन्या॑ वनस्पते॒ पाथो॑ दे॒वेभ्य॑: सृज । अ॒ग्निर्ह॒व्यानि॑ सिष्वदत् ॥१०
पु॒रो॒गा अ॒ग्निर्दे॒वानां॑ गाय॒त्रेण॒ सम॑ज्यते । स्वाहा॑कृतीषु रोचते ॥११
११ agastyo maitrāvaruṇiḥ | āprīsūktaṃ-(१ idhmaḥ samiddho’gnirvā, २ tanūnapāt ३ iḷaḥ, ४ barhiḥ, ५ devīrdvāraḥ, ६ uṣā sānaktā, ७ daivyau hotārau pracetasau, ८ tisro devyaḥ sarasvatīḷābhāratyaḥ, ९ tvaṣṭā, १० vanaspatiḥ, ११ svāhākṛtayaḥ) | gāyatrī | sami॑ddho a॒dya rā॑jasi de॒vo de॒vaiḥ sa॑hasrajit | dū॒to ha॒vyā ka॒virva॑ha || १ tanū॑napādṛ॒taṃ ya॒te madhvā॑ ya॒jñaḥ sama॑jyate | dadha॑t saha॒sriṇī॒riṣa॑: || २ ā॒juhvā॑no na॒ īḍyo॑ de॒vām̐ ā va॑kṣi ya॒jñiyā॑n | agne॑ sahasra॒sā a॑si || ३ prā॒cīnaṃ॑ ba॒rhiroja॑sā sa॒hasra॑vīramastṛṇan | yatrā॑dityā vi॒rāja॑tha || ४ vi॒rāṭ sa॒mrāḍvi॒bhvīḥ pra॒bhvīrba॒hvīśca॒ bhūya॑sīśca॒ yāḥ | duro॑ ghṛ॒tānya॑kṣaran || ५ su॒ru॒kme hi su॒peśa॒sā ’dhi॑ śri॒yā vi॒rāja॑taḥ | u॒ṣāsā॒veha sī॑datām || ६ pra॒tha॒mā hi su॒vāca॑sā॒ hotā॑rā॒ daivyā॑ ka॒vī | ya॒jñaṃ no॑ yakṣatāmi॒mam || ७ bhāra॒tīḷe॒ sara॑svati॒ yā va॒: sarvā॑ upabru॒ve | tā na॑ścodayata śri॒ye || ८ tvaṣṭā॑ rū॒pāṇi॒ hi pra॒bhuḥ pa॒śūn viśvā॑n tsamāna॒je | teṣāṃ॑ naḥ sphā॒timā ya॑ja || ९ upa॒ tmanyā॑ vanaspate॒ pātho॑ de॒vebhya॑: sṛja | a॒gnirha॒vyāni॑ siṣvadat || १० pu॒ro॒gā a॒gnirde॒vānāṃ॑ gāya॒treṇa॒ sama॑jyate | svāhā॑kṛtīṣu rocate || ११