११ अगस्त्यो मैत्रावरुणिः । विश्वे देवाः। त्रिष्टुप्।
आ न॒ इळा॑भिर्वि॒दथे॑ सुश॒स्ति वि॒श्वान॑रः सवि॒ता दे॒व ए॑तु ।
अपि॒ यथा॑ युवानो॒ मत्स॑था नो॒ विश्वं॒ जग॑दभिपि॒त्वे म॑नी॒षा ॥१
आ नो॒ विश्व॒ आस्क्रा॑ गमन्तु दे॒वा मि॒त्रो अ॑र्य॒मा वरु॑णः स॒जोषा॑: ।
भुव॒न् यथा॑ नो॒ विश्वे॑ वृ॒धास॒: कर॑न्त्सु॒षाहा॑ विथु॒रं न शव॑: ॥२
प्रेष्ठं॑ वो॒ अति॑थिं गृणीषे॒ ऽग्निं श॒स्तिभि॑स्तु॒र्वणि॑: स॒जोषा॑: ।
अस॒द् यथा॑ नो॒ वरु॑णः सुकी॒र्तिरिष॑श्च पर्षदरिगू॒र्तः सू॒रिः ॥३
उप॑ व॒ एषे॒ नम॑सा जिगी॒षोषासा॒नक्ता॑ सु॒दुघे॑व धे॒नुः ।
स॒मा॒ने अह॑न् वि॒मिमा॑नो अ॒र्कं विषु॑रूपे॒ पय॑सि॒ सस्मि॒न्नूध॑न् ॥४
उ॒त नो ऽहि॑र्बु॒ध्न्यो॒३ मय॑स्क॒: शिशुं॒ न पि॒प्युषी॑व वेति॒ सिन्धु॑: ।
येन॒ नपा॑तम॒पां जु॒नाम॑ मनो॒जुवो॒ वृष॑णो॒ यं वह॑न्ति ॥५
उ॒त न॑ ईं॒ त्वष्टा ग॒न्त्वच्छा॒ स्मत् सू॒रिभि॑रभिपि॒त्वे स॒जोषा॑: ।
आ वृ॑त्र॒हेन्द्र॑श्चर्षणि॒प्रास्तु॒विष्ट॑मो न॒रां न॑ इ॒ह ग॑म्याः ॥६
उ॒त न॑ ईं म॒तयोऽश्व॑योगा॒: शिशुं॒ न गाव॒स्तरु॑णं रिहन्ति ।
तमीं॒ गिरो॒ जन॑यो॒ न पत्नी॑: सुर॒भिष्ट॑मं न॒रां न॑सन्त ॥७
उ॒त न॑ ईं म॒रुतो॑ वृ॒द्धसे॑ना॒: स्मद् रोद॑सी॒ सम॑नसः सदन्तु ।
पृष॑दश्वासो॒ऽवन॑यो॒ न रथा॑ रि॒शाद॑सो मित्र॒युजो॒ न दे॒वाः ॥८
प्र नु यदे॑षां महि॒ना चि॑कि॒त्रे प्र यु॑ञ्जते प्र॒युज॒स्ते सु॑वृ॒क्ति ।
अध॒ यदे॑षां सु॒दिने॒ न शरु॒र्विश्व॒मेरि॑णं प्रुषा॒यन्त॒ सेना॑: ॥९
प्रो अ॒श्विना॒वव॑से कृणुध्वं॒ प्र पू॒षणं॒ स्वत॑वसो॒ हि सन्ति॑ ।
अ॒द्वे॒षो विष्णु॒र्वात॑ ऋभु॒क्षा अच्छा॑ सु॒म्नाय॑ ववृतीय दे॒वान् ॥१०
इ॒यं सा वो॑ अ॒स्मे दीधि॑तिर्यजत्रा अपि॒प्राणी॑ च॒ सद॑नी च भूयाः ।
नि या दे॒वेषु॒ यत॑ते वसू॒युर्वि॒द्यामे॒षं वृ॒जनं॑ जी॒रदा॑नुम् ॥११
११ agastyo maitrāvaruṇiḥ | viśve devāḥ | triṣṭup | ā na॒ iḷā॑bhirvi॒dathe॑ suśa॒sti vi॒śvāna॑raḥ savi॒tā de॒va e॑tu | api॒ yathā॑ yuvāno॒ matsa॑thā no॒ viśvaṃ॒ jaga॑dabhipi॒tve ma॑nī॒ṣā || १ ā no॒ viśva॒ āskrā॑ gamantu de॒vā mi॒tro a॑rya॒mā varu॑ṇaḥ sa॒joṣā॑: | bhuva॒n yathā॑ no॒ viśve॑ vṛ॒dhāsa॒: kara॑ntsu॒ṣāhā॑ vithu॒raṃ na śava॑: || २ preṣṭhaṃ॑ vo॒ ati॑thiṃ gṛṇīṣe॒ ’gniṃ śa॒stibhi॑stu॒rvaṇi॑: sa॒joṣā॑: | asa॒d yathā॑ no॒ varu॑ṇaḥ sukī॒rtiriṣa॑śca parṣadarigū॒rtaḥ sū॒riḥ || ३ upa॑ va॒ eṣe॒ nama॑sā jigī॒ṣoṣāsā॒naktā॑ su॒dughe॑va dhe॒nuḥ | sa॒mā॒ne aha॑n vi॒mimā॑no a॒rkaṃ viṣu॑rūpe॒ paya॑si॒ sasmi॒nnūdha॑n || ४ u॒ta no ’hi॑rbu॒dhnyo॒३ maya॑ska॒: śiśuṃ॒ na pi॒pyuṣī॑va veti॒ sindhu॑: | yena॒ napā॑tama॒pāṃ ju॒nāma॑ mano॒juvo॒ vṛṣa॑ṇo॒ yaṃ vaha॑nti || ५ u॒ta na॑ īṃ॒ tvaṣṭā ga॒ntvacchā॒ smat sū॒ribhi॑rabhipi॒tve sa॒joṣā॑: | ā vṛ॑tra॒hendra॑ścarṣaṇi॒prāstu॒viṣṭa॑mo na॒rāṃ na॑ i॒ha ga॑myāḥ || ६ u॒ta na॑ īṃ ma॒tayo’śva॑yogā॒: śiśuṃ॒ na gāva॒staru॑ṇaṃ rihanti | tamīṃ॒ giro॒ jana॑yo॒ na patnī॑: sura॒bhiṣṭa॑maṃ na॒rāṃ na॑santa || ७ u॒ta na॑ īṃ ma॒ruto॑ vṛ॒ddhase॑nā॒: smad roda॑sī॒ sama॑nasaḥ sadantu | pṛṣa॑daśvāso॒’vana॑yo॒ na rathā॑ ri॒śāda॑so mitra॒yujo॒ na de॒vāḥ || ८ pra nu yade॑ṣāṃ mahi॒nā ci॑ki॒tre pra yu॑ñjate pra॒yuja॒ste su॑vṛ॒kti | adha॒ yade॑ṣāṃ su॒dine॒ na śaru॒rviśva॒meri॑ṇaṃ pruṣā॒yanta॒ senā॑: || ९ pro a॒śvinā॒vava॑se kṛṇudhvaṃ॒ pra pū॒ṣaṇaṃ॒ svata॑vaso॒ hi santi॑ | a॒dve॒ṣo viṣṇu॒rvāta॑ ṛbhu॒kṣā acchā॑ su॒mnāya॑ vavṛtīya de॒vān || १० i॒yaṃ sā vo॑ a॒sme dīdhi॑tiryajatrā api॒prāṇī॑ ca॒ sada॑nī ca bhūyāḥ | ni yā de॒veṣu॒ yata॑te vasū॒yurvi॒dyāme॒ṣaṃ vṛ॒janaṃ॑ jī॒radā॑num || ११