१-१० अगस्त्यो मैत्रावरुणिः। अश्विनौ। त्रिष्टुप्।
यु॒वो रजां॑सि सु॒यमा॑सो॒ अश्वा॒ रथो॒ यद्वां॒ पर्यर्णां॑सि॒ दीय॑त् ।
हि॒र॒ण्यया॑ वां प॒वय॑: प्रुषाय॒न् मध्व॒: पिब॑न्ता उ॒षस॑: सचेथे ॥१॥
यु॒वमत्य॒स्याव॑ नक्षथो॒ यद् विप॑त्मनो॒ नर्य॑स्य॒ प्रय॑ज्योः ।
स्वसा॒ यद् वां विश्वगूर्ती॒ भरा॑ति॒ वाजा॒येट्टे॑ मधुपावि॒षे च॑ ॥२॥
यु॒वं पय॑ उ॒स्रिया॑यामधत्तं प॒क्वमा॒माया॒मव॒ पूर्व्यं॒ गोः ।
अ॒न्तर्यद् व॒निनो॑ वामृतप्सू ह्वा॒रो न शुचि॒र्यज॑ते ह॒विष्मा॑न् ॥३॥
यु॒वं ह॑ घ॒र्मं मधु॑मन्त॒मत्र॑ये॒ ऽपो न क्षोदो॑ऽवृणीतमे॒षे ।
तद् वां॑ नरावश्विना॒ पश्व॑इष्टी॒ रथ्ये॑व च॒क्रा प्रति॑ यन्ति॒ मध्व॑: ॥४॥
आ वां॑ दा॒नाय॑ ववृतीय दस्रा॒ गोरोहे॑ण तौ॒ग्र्यो न जिव्रि॑: ।
अ॒पः क्षो॒णी स॑चते॒ माहि॑ना वां जू॒र्णो वा॒मक्षु॒रंह॑सो यजत्रा ॥५॥
नि यद् यु॒वेथे॑ नि॒युत॑: सुदानू॒ उप॑ स्व॒धाभि॑: सृजथ॒: पुरं॑धिम् ।
प्रेष॒द् वेष॒द् वातो॒ न सू॒रिरा म॒हे द॑दे सुव्र॒तो न वाज॑म् ॥६॥
व॒यं चि॒द्धि वां॑ जरि॒तार॑: स॒त्या वि॑प॒न्याम॑हे॒ वि प॒णिर्हि॒तावा॑न् ।
अधा॑ चि॒द्धि ष्मा॑श्विनावनिन्द्या पा॒थो हि ष्मा॑ वृषणा॒वन्ति॑देवम् ॥७॥
यु॒वां चि॒द्धि ष्मा॑श्विना॒वनु॒ द्यून् विरु॑द्रस्य प्र॒स्रव॑णस्य सा॒तौ ।
अ॒गस्त्यो॑ न॒रां नृषु॒ प्रश॑स्त॒: कारा॑धुनीव चितयत् स॒हस्रै॑: ॥८॥
प्र यद् वहे॑थे महि॒ना रथ॑स्य॒ प्र स्य॑न्द्रा याथो॒ मनु॑षो॒ न होता॑ ।
ध॒त्तं सू॒रिभ्य॑ उ॒त वा॒ स्वश्व्यं॒ नास॑त्या रयि॒षाच॑: स्याम ॥९॥
तं वां॒ रथं॑ व॒यम॒द्या हु॑वेम॒ स्तोमै॑रश्विना सुवि॒ताय॒ नव्य॑म् ।
अरि॑ष्टनेमिं॒ परि॒ द्यामि॑या॒नं वि॒द्यामे॒षं वृ॒जनं॑ जी॒रदा॑नुम् ॥१०॥
१-१० agastyo maitrāvaruṇiḥ | aśvinau | triṣṭup | yu॒vo rajāṃ॑si su॒yamā॑so॒ aśvā॒ ratho॒ yadvāṃ॒ paryarṇāṃ॑si॒ dīya॑t | hi॒ra॒ṇyayā॑ vāṃ pa॒vaya॑: pruṣāya॒n madhva॒: piba॑ntā u॒ṣasa॑: sacethe || १ || yu॒vamatya॒syāva॑ nakṣatho॒ yad vipa॑tmano॒ narya॑sya॒ praya॑jyoḥ | svasā॒ yad vāṃ viśvagūrtī॒ bharā॑ti॒ vājā॒yeṭṭe॑ madhupāvi॒ṣe ca॑ || २ || yu॒vaṃ paya॑ u॒sriyā॑yāmadhattaṃ pa॒kvamā॒māyā॒mava॒ pūrvyaṃ॒ goḥ | a॒ntaryad va॒nino॑ vāmṛtapsū hvā॒ro na śuci॒ryaja॑te ha॒viṣmā॑n || ३ || yu॒vaṃ ha॑ gha॒rmaṃ madhu॑manta॒matra॑ye॒ ’po na kṣodo॑’vṛṇītame॒ṣe | tad vāṃ॑ narāvaśvinā॒ paśva॑iṣṭī॒ rathye॑va ca॒krā prati॑ yanti॒ madhva॑: || ४ || ā vāṃ॑ dā॒nāya॑ vavṛtīya dasrā॒ gorohe॑ṇa tau॒gryo na jivri॑: | a॒paḥ kṣo॒ṇī sa॑cate॒ māhi॑nā vāṃ jū॒rṇo vā॒makṣu॒raṃha॑so yajatrā || ५ || ni yad yu॒vethe॑ ni॒yuta॑: sudānū॒ upa॑ sva॒dhābhi॑: sṛjatha॒: puraṃ॑dhim | preṣa॒d veṣa॒d vāto॒ na sū॒rirā ma॒he da॑de suvra॒to na vāja॑m || ६ || va॒yaṃ ci॒ddhi vāṃ॑ jari॒tāra॑: sa॒tyā vi॑pa॒nyāma॑he॒ vi pa॒ṇirhi॒tāvā॑n | adhā॑ ci॒ddhi ṣmā॑śvināvanindyā pā॒tho hi ṣmā॑ vṛṣaṇā॒vanti॑devam || ७ || yu॒vāṃ ci॒ddhi ṣmā॑śvinā॒vanu॒ dyūn viru॑drasya pra॒srava॑ṇasya sā॒tau | a॒gastyo॑ na॒rāṃ nṛṣu॒ praśa॑sta॒: kārā॑dhunīva citayat sa॒hasrai॑: || ८ || pra yad vahe॑the mahi॒nā ratha॑sya॒ pra sya॑ndrā yātho॒ manu॑ṣo॒ na hotā॑ | dha॒ttaṃ sū॒ribhya॑ u॒ta vā॒ svaśvyaṃ॒ nāsa॑tyā rayi॒ṣāca॑: syāma || ९ || taṃ vāṃ॒ rathaṃ॑ va॒yama॒dyā hu॑vema॒ stomai॑raśvinā suvi॒tāya॒ navya॑m | ari॑ṣṭanemiṃ॒ pari॒ dyāmi॑yā॒naṃ vi॒dyāme॒ṣaṃ vṛ॒janaṃ॑ jī॒radā॑num || १० ||