६ अगस्त्यो मैत्रावरुणिः । इन्द्रः। १ स्कंधोग्रीवी बृहती, २-५ अनुष्टुप्, ६ त्रिष्टुप्।
मत्स्यपा॑यि ते॒ मह॒: पात्र॑स्येव हरिवो मत्स॒रो मद॑: ।
वृषा॑ ते॒ वृष्ण॒ इन्दु॑र्वा॒जी स॑हस्र॒सात॑मः ॥१॥
आ न॑स्ते गन्तु मत्स॒रो वृषा॒ मदो॒ वरे॑ण्यः । स॒हावाँ॑ इन्द्र सान॒सिः पृ॑तना॒षाळम॑र्त्यः ॥२॥
त्वं हि शूर॒: सनि॑ता चो॒दयो॒ मनु॑षो॒ रथ॑म् । स॒हावा॒न् दस्यु॑मव्र॒तमोष॒: पात्रं॒ न शो॒चिषा॑ ॥३॥
मु॒षा॒य सूर्यं॑ कवे च॒क्रमीशा॑न॒ ओज॑सा । वह॒ शुष्णा॑य व॒धं कुत्सं॒ वात॒स्याश्वै॑: ॥४॥
शु॒ष्मिन्त॑मो॒ हि ते॒ मदो॑ द्यु॒म्निन्त॑म उ॒त क्रतु॑: । वृ॒त्र॒घ्ना व॑रिवो॒विदा॑ मंसी॒ष्ठा अ॑श्व॒सात॑मः ॥५॥
यथा॒ पूर्वे॑भ्यो जरि॒तृभ्य॑ इन्द्र॒ मय॑ इ॒वापो॒ न तृष्य॑ते ब॒भूथ॑ ।
तामनु॑ त्वा नि॒विदं॑ जोहवीमि वि॒द्यामे॒षं वृ॒जनं॑ जी॒रदा॑नुम् ॥६॥
६ agastyo maitrāvaruṇiḥ | indraḥ | १ skaṃdhogrīvī bṛhatī, २-५ anuṣṭup, ६ triṣṭup | matsyapā॑yi te॒ maha॒: pātra॑syeva harivo matsa॒ro mada॑: | vṛṣā॑ te॒ vṛṣṇa॒ indu॑rvā॒jī sa॑hasra॒sāta॑maḥ || १ || ā na॑ste gantu matsa॒ro vṛṣā॒ mado॒ vare॑ṇyaḥ | sa॒hāvām̐॑ indra sāna॒siḥ pṛ॑tanā॒ṣāḷama॑rtyaḥ || २ || tvaṃ hi śūra॒: sani॑tā co॒dayo॒ manu॑ṣo॒ ratha॑m | sa॒hāvā॒n dasyu॑mavra॒tamoṣa॒: pātraṃ॒ na śo॒ciṣā॑ || ३ || mu॒ṣā॒ya sūryaṃ॑ kave ca॒kramīśā॑na॒ oja॑sā | vaha॒ śuṣṇā॑ya va॒dhaṃ kutsaṃ॒ vāta॒syāśvai॑: || ४ || śu॒ṣminta॑mo॒ hi te॒ mado॑ dyu॒mninta॑ma u॒ta kratu॑: | vṛ॒tra॒ghnā va॑rivo॒vidā॑ maṃsī॒ṣṭhā a॑śva॒sāta॑maḥ || ५ || yathā॒ pūrve॑bhyo jari॒tṛbhya॑ indra॒ maya॑ i॒vāpo॒ na tṛṣya॑te ba॒bhūtha॑ | tāmanu॑ tvā ni॒vidaṃ॑ johavīmi vi॒dyāme॒ṣaṃ vṛ॒janaṃ॑ jī॒radā॑num || ६ ||