(५) १,३,४ इन्द्रः, (४अगस्त्यो वा,) २,५ अगस्त्यो मैत्रावरुणिः । इन्द्रः। १बृहती, २-४ अनुष्टुप्, ५ त्रिष्टुप्।
न नू॒नमस्ति॒ नो श्वः कस्तद् वे॑द॒ यदद्भु॑तम् ।
अ॒न्यस्य॑ चि॒त्तम॒भि सं॑च॒रेण्य॑मु॒ताधी॑तं॒ वि न॑श्यति ॥१॥
किं न॑ इन्द्र जिघांससि॒ भ्रात॑रो म॒रुत॒स्तव॑ ।
तेभि॑: कल्पस्व साधु॒या मा न॑: स॒मर॑णे वधीः ॥२॥
किं नो॑ भ्रातरगस्त्य॒ सखा॒ सन्नति॑ मन्यसे ।
वि॒द्मा हि ते॒ यथा॒ मनो॒ ऽस्मभ्य॒मिन्न दि॑त्ससि ॥३॥
अरं॑ कृण्वन्तु॒ वेदिं॒ सम॒ग्निमि॑न्धतां पु॒रः ।
तत्रा॒मृत॑स्य॒ चेत॑नं य॒ज्ञं ते॑ तनवावहै ॥४॥
त्वमी॑शिषे वसुपते॒ वसू॑नां॒ त्वं मि॒त्राणां॑ मित्रपते॒ धेष्ठ॑: ।
इन्द्र॒ त्वं म॒रुद्भि॒: सं व॑द॒स्वाध॒ प्राशा॑न ऋतु॒था ह॒वींषि॑ ॥५॥
(५) १,३,४ indraḥ, (४agastyo vā,) २,५ agastyo maitrāvaruṇiḥ | indraḥ | १bṛhatī, २-४ anuṣṭup, ५ triṣṭup | na nū॒namasti॒ no śvaḥ kastad ve॑da॒ yadadbhu॑tam | a॒nyasya॑ ci॒ttama॒bhi saṃ॑ca॒reṇya॑mu॒tādhī॑taṃ॒ vi na॑śyati || १ || kiṃ na॑ indra jighāṃsasi॒ bhrāta॑ro ma॒ruta॒stava॑ | tebhi॑: kalpasva sādhu॒yā mā na॑: sa॒mara॑ṇe vadhīḥ || २ || kiṃ no॑ bhrātaragastya॒ sakhā॒ sannati॑ manyase | vi॒dmā hi te॒ yathā॒ mano॒ ’smabhya॒minna di॑tsasi || ३ || araṃ॑ kṛṇvantu॒ vediṃ॒ sama॒gnimi॑ndhatāṃ pu॒raḥ | tatrā॒mṛta॑sya॒ ceta॑naṃ ya॒jñaṃ te॑ tanavāvahai || ४ || tvamī॑śiṣe vasupate॒ vasū॑nāṃ॒ tvaṃ mi॒trāṇāṃ॑ mitrapate॒ dheṣṭha॑: | indra॒ tvaṃ ma॒rudbhi॒: saṃ va॑da॒svādha॒ prāśā॑na ṛtu॒thā ha॒vīṃṣi॑ || ५ ||