८ अगस्त्यो मैत्रावरुणः। इन्द्रः। त्रिष्टुप्, २ चतुष्पदा विराट्।
म॒हश्चि॒त् त्वमि॑न्द्र य॒त ए॒तान् म॒हश्चि॑दसि॒ त्यज॑सो वरू॒ता ।
स नो॑ वेधो म॒रुतां॑ चिकि॒त्वान् त्सु॒म्ना व॑नुष्व॒ तव॒ हि प्रेष्ठा॑ ॥१॥
अयु॑ज्र॒न्त इ॑न्द्र वि॒श्वकृ॑ष्टीर्विदा॒नासो॑ नि॒ष्षिधो॑ मर्त्य॒त्रा ।
म॒रुतां॑ पृत्सु॒तिर्हास॑माना॒ स्व॑र्मीळहस्य प्र॒धन॑स्य सा॒तौ ॥२॥
अम्य॒क् सा त॑ इन्द्र ऋ॒ष्टिर॒स्मे सने॒म्यभ्वं॑ म॒रुतो॑ जुनन्ति ।
अ॒ग्निश्चि॒द्धि ष्मा॑त॒से शु॑शु॒क्वानापो॒ न द्वी॒पं दध॑ति॒ प्रयां॑सि ॥३॥
त्वं तू न॑ इन्द्र॒ तं र॒यिं दा॒ ओजि॑ष्ठया॒ दक्षि॑णयेव रा॒तिम् ।
स्तुत॑श्च॒ यास्ते॑ च॒कन॑न्त वा॒योः स्तनं॒ न मध्व॑: पीपयन्त॒ वाजै॑: ॥४॥
त्वे राय॑ इन्द्र तो॒शत॑माः प्रणे॒तार॒: कस्य॑ चिदृता॒योः ।
ते षु णो॑ म॒रुतो॑ मृळयन्तु॒ ये स्मा॑ पु॒रा गा॑तू॒यन्ती॑व दे॒वाः ॥५॥
प्रति॒ प्र या॑हीन्द्र मी॒ळहुषो॒ नॄन् म॒हः पार्थि॑वे॒ सद॑ने यतस्व ।
अध॒ यदे॑षां पृथुबु॒ध्नास॒ एता॑स्ती॒र्थे नार्यः पौंस्या॑नि त॒स्थुः ॥६॥
प्रति॑ घो॒राणा॒मेता॑नाम॒यासां॑ म॒रुतां॑ शृण्व आय॒तामु॑प॒ब्दिः ।
ये मर्त्यं॑ पृतना॒यन्त॒मूमै॑र्ऋणा॒वानं॒ न प॒तय॑न्त॒ सर्गै॑: ॥७॥
त्वं माने॑भ्य इन्द्र वि॒श्वज॑न्या॒ रदा॑ म॒रुद्भि॑: शु॒रुधो॒ गोअ॑ग्राः ।
स्तवा॑नेभिः स्तवसे देव दे॒वैर्वि॒द्यामे॒षं वृ॒जनं॑ जी॒रदा॑नुम् ॥८॥
८ agastyo maitrāvaruṇaḥ | indraḥ | triṣṭup, २ catuṣpadā virāṭ | ma॒haści॒t tvami॑ndra ya॒ta e॒tān ma॒haści॑dasi॒ tyaja॑so varū॒tā | sa no॑ vedho ma॒rutāṃ॑ ciki॒tvān tsu॒mnā va॑nuṣva॒ tava॒ hi preṣṭhā॑ || १ || ayu॑jra॒nta i॑ndra vi॒śvakṛ॑ṣṭīrvidā॒nāso॑ ni॒ṣṣidho॑ martya॒trā | ma॒rutāṃ॑ pṛtsu॒tirhāsa॑mānā॒ sva॑rmīḷahasya pra॒dhana॑sya sā॒tau || २ || amya॒k sā ta॑ indra ṛ॒ṣṭira॒sme sane॒myabhvaṃ॑ ma॒ruto॑ junanti | a॒gniści॒ddhi ṣmā॑ta॒se śu॑śu॒kvānāpo॒ na dvī॒paṃ dadha॑ti॒ prayāṃ॑si || ३ || tvaṃ tū na॑ indra॒ taṃ ra॒yiṃ dā॒ oji॑ṣṭhayā॒ dakṣi॑ṇayeva rā॒tim | stuta॑śca॒ yāste॑ ca॒kana॑nta vā॒yoḥ stanaṃ॒ na madhva॑: pīpayanta॒ vājai॑: || ४ || tve rāya॑ indra to॒śata॑māḥ praṇe॒tāra॒: kasya॑ cidṛtā॒yoḥ | te ṣu ṇo॑ ma॒ruto॑ mṛḷayantu॒ ye smā॑ pu॒rā gā॑tū॒yantī॑va de॒vāḥ || ५ || prati॒ pra yā॑hīndra mī॒ḷahuṣo॒ nṝn ma॒haḥ pārthi॑ve॒ sada॑ne yatasva | adha॒ yade॑ṣāṃ pṛthubu॒dhnāsa॒ etā॑stī॒rthe nāryaḥ pauṃsyā॑ni ta॒sthuḥ || ६ || prati॑ gho॒rāṇā॒metā॑nāma॒yāsāṃ॑ ma॒rutāṃ॑ śṛṇva āya॒tāmu॑pa॒bdiḥ | ye martyaṃ॑ pṛtanā॒yanta॒mūmai॑rṛṇā॒vānaṃ॒ na pa॒taya॑nta॒ sargai॑: || ७ || tvaṃ māne॑bhya indra vi॒śvaja॑nyā॒ radā॑ ma॒rudbhi॑: śu॒rudho॒ goa॑grāḥ | stavā॑nebhiḥ stavase deva de॒vairvi॒dyāme॒ṣaṃ vṛ॒janaṃ॑ jī॒radā॑num || ८ ||