(१५) १,२,४,६,८,१०-१२ इन्द्रः, ३,५,७,९ मरुतः, १३-१५ अगस्त्यो मैत्रावरुणिः। मरुत्वानिन्द्रः।त्रिष्टुप्।
कया॑ शु॒भा सव॑यस॒: सनी॑ळाः समा॒न्या म॒रुत॒: सं मि॑मिक्षुः ।
कया॑ म॒ती कुत॒ एता॑स ए॒ते ऽर्च॑न्ति॒ शुष्मं॒ वृष॑णो वसू॒या ॥१॥
कस्य॒ ब्रह्मा॑णि जुजुषु॒र्युवा॑न॒: को अ॑ध्व॒रे म॒रुत॒ आ व॑वर्त ।
श्ये॒नाँ इ॑व॒ ध्रज॑तो अ॒न्तरि॑क्षे॒ केन॑ म॒हा मन॑सा रीरमाम ॥२॥
कुत॒स्त्वमि॑न्द्र॒ माहि॑न॒: सन्नेको॑ यासि सत्पते॒ किं त॑ इ॒त्था ।
सं पृ॑च्छसे समरा॒णः शु॑भा॒नैर्वो॒चेस्तन्नो॑ हरिवो॒ यत्ते॑ अ॒स्मे ॥३॥
ब्रह्मा॑णि मे म॒तय॒: शं सु॒तास॒: शुष्म॑ इयर्ति॒ प्रभृ॑तो मे॒ अद्रि॑: ।
आ शा॑सते॒ प्रति॑ हर्यन्त्यु॒क्थेमा हरी॑ वहत॒स्ता नो॒ अच्छ॑ ॥४॥
अतो॑ व॒यम॑न्त॒मेभि॑र्युजा॒नाः स्वक्ष॑त्रेभिस्त॒न्व१ शुम्भ॑मानाः ।
महो॑भि॒रेताँ॒ उप॑ युज्महे॒ न्विन्द्र॑ स्व॒धामनु॒ हि नो॑ ब॒भूथ॑ ॥५॥
क्व१ स्या वो॑ मरुतः स्व॒धासी॒द् यन्मामेकं॑ स॒मध॑त्ताहि॒हत्ये॑ ।
अ॒हं ह्यु१ग्रस्त॑वि॒षस्तुवि॑ष्मा॒न् विश्व॑स्य॒ शत्रो॒रन॑मं वध॒स्नैः ॥६॥
भूरि॑ चकर्थ॒ युज्ये॑भिर॒स्मे स॑मा॒नेभि॑र्वृषभ॒ पौंस्ये॑भिः ।
भूरी॑णि॒ हि कृ॒णवा॑मा शवि॒ष्ठेन्द्र॒ क्रत्वा॑ मरुतो॒ यद् वशा॑म ॥७॥
वधीं॑ वृ॒त्रं म॑रुत इन्द्रि॒येण॒ स्वेन॒ भामे॑न तवि॒षो ब॑भू॒वान् ।
अ॒हमे॒ता मन॑वे वि॒श्वश्च॑न्द्राः सु॒गा अ॒पश्च॑कर॒ वज्र॑बाहुः ॥८॥
अनु॑त्त॒मा ते॑ मघव॒न्नकि॒र्नु न त्वावाँ॑ अस्ति दे॒वता॒ विदा॑नः ।
न जाय॑मानो॒ नश॑ते॒ न जा॒तो यानि॑ करि॒ष्या कृ॑णु॒हि प्र॑वृद्ध ॥९॥
एक॑स्य चिन्मे वि॒भ्व१स्त्वोजो॒ या नु द॑धृ॒ष्वान् कृ॒णवै॑ मनी॒षा ।
अ॒हं ह्यु१ग्रो म॑रुतो॒ विदा॑नो॒ यानि॒ च्यव॒मिन्द्र॒ इदी॑श एषाम् ॥१०॥
अम॑न्दन्मा मरुत॒: स्तोमो॒ अत्र॒ यन्मे॑ नर॒: श्रुत्यं॒ ब्रह्म॑ च॒क्र ।
इन्द्रा॑य॒ वृष्णे॒ सुम॑खाय॒ मह्यं॒ सख्ये॒ सखा॑यस्त॒न्वे॑ त॒नूभि॑: ॥११॥
ए॒वेदे॒ते प्रति॑ मा॒ रोच॑माना॒ अने॑द्य॒: श्रव॒ एषो॒ दधा॑नाः ।
सं॒चक्ष्या॑ मरुतश्च॒न्द्रव॑र्णा॒ अच्छा॑न्त मे छ॒दया॑था च नू॒नम् ॥१२॥
को न्वत्र॑ मरुतो मामहे व॒: प्र या॑तन॒ सखीँ॒रच्छा॑ सखायः ।
मन्मा॑नि चित्रा अपिवा॒तय॑न्त ए॒षां भू॑त॒ नवे॑दा म ऋ॒ताना॑म् ॥१३॥
आ यद् दु॑व॒स्याद् दु॒वसे॒ न का॒रुर॒स्माञ्च॒क्रे मा॒न्यस्य॑ मे॒धा ।
ओ षु व॑र्त्त मरुतो॒ विप्र॒मच्छे॒मा ब्रह्मा॑णि जरि॒ता वो॑ अर्चत् ॥१४॥
ए॒ष व॒: स्तोमो॑ मरुत इ॒यं गीर्मा॑न्दा॒र्यस्य॑ मा॒न्यस्य॑ का॒रोः ।
एषा या॑सीष्ट त॒न्वे॑ व॒यां वि॒द्यामे॒षं वृ॒जनं॑ जी॒रदा॑नुम् ॥१५॥
(१५) १,२,४,६,८,१०-१२ indraḥ, ३,५,७,९ marutaḥ, १३-१५ agastyo maitrāvaruṇiḥ | marutvānindraḥ | triṣṭup | kayā॑ śu॒bhā sava॑yasa॒: sanī॑ḷāḥ samā॒nyā ma॒ruta॒: saṃ mi॑mikṣuḥ | kayā॑ ma॒tī kuta॒ etā॑sa e॒te ’rca॑nti॒ śuṣmaṃ॒ vṛṣa॑ṇo vasū॒yā || १ || kasya॒ brahmā॑ṇi jujuṣu॒ryuvā॑na॒: ko a॑dhva॒re ma॒ruta॒ ā va॑varta | śye॒nām̐ i॑va॒ dhraja॑to a॒ntari॑kṣe॒ kena॑ ma॒hā mana॑sā rīramāma || २ || kuta॒stvami॑ndra॒ māhi॑na॒: sanneko॑ yāsi satpate॒ kiṃ ta॑ i॒tthā | saṃ pṛ॑cchase samarā॒ṇaḥ śu॑bhā॒nairvo॒cestanno॑ harivo॒ yatte॑ a॒sme || ३ || brahmā॑ṇi me ma॒taya॒: śaṃ su॒tāsa॒: śuṣma॑ iyarti॒ prabhṛ॑to me॒ adri॑: | ā śā॑sate॒ prati॑ haryantyu॒kthemā harī॑ vahata॒stā no॒ accha॑ || ४ || ato॑ va॒yama॑nta॒mebhi॑ryujā॒nāḥ svakṣa॑trebhista॒nva१ śumbha॑mānāḥ | maho॑bhi॒retām॒̐ upa॑ yujmahe॒ nvindra॑ sva॒dhāmanu॒ hi no॑ ba॒bhūtha॑ || ५ || kva१ syā vo॑ marutaḥ sva॒dhāsī॒d yanmāmekaṃ॑ sa॒madha॑ttāhi॒hatye॑ | a॒haṃ hyu१grasta॑vi॒ṣastuvi॑ṣmā॒n viśva॑sya॒ śatro॒rana॑maṃ vadha॒snaiḥ || ६ || bhūri॑ cakartha॒ yujye॑bhira॒sme sa॑mā॒nebhi॑rvṛṣabha॒ pauṃsye॑bhiḥ | bhūrī॑ṇi॒ hi kṛ॒ṇavā॑mā śavi॒ṣṭhendra॒ kratvā॑ maruto॒ yad vaśā॑ma || ७ || vadhīṃ॑ vṛ॒traṃ ma॑ruta indri॒yeṇa॒ svena॒ bhāme॑na tavi॒ṣo ba॑bhū॒vān | a॒hame॒tā mana॑ve vi॒śvaśca॑ndrāḥ su॒gā a॒paśca॑kara॒ vajra॑bāhuḥ || ८ || anu॑tta॒mā te॑ maghava॒nnaki॒rnu na tvāvām̐॑ asti de॒vatā॒ vidā॑naḥ | na jāya॑māno॒ naśa॑te॒ na jā॒to yāni॑ kari॒ṣyā kṛ॑ṇu॒hi pra॑vṛddha || ९ || eka॑sya cinme vi॒bhva१stvojo॒ yā nu da॑dhṛ॒ṣvān kṛ॒ṇavai॑ manī॒ṣā | a॒haṃ hyu१gro ma॑ruto॒ vidā॑no॒ yāni॒ cyava॒mindra॒ idī॑śa eṣām || १० || ama॑ndanmā maruta॒: stomo॒ atra॒ yanme॑ nara॒: śrutyaṃ॒ brahma॑ ca॒kra | indrā॑ya॒ vṛṣṇe॒ suma॑khāya॒ mahyaṃ॒ sakhye॒ sakhā॑yasta॒nve॑ ta॒nūbhi॑: || ११ || e॒vede॒te prati॑ mā॒ roca॑mānā॒ ane॑dya॒: śrava॒ eṣo॒ dadhā॑nāḥ | saṃ॒cakṣyā॑ marutaśca॒ndrava॑rṇā॒ acchā॑nta me cha॒dayā॑thā ca nū॒nam || १२ || ko nvatra॑ maruto māmahe va॒: pra yā॑tana॒ sakhīm॒̐racchā॑ sakhāyaḥ | manmā॑ni citrā apivā॒taya॑nta e॒ṣāṃ bhū॑ta॒ nave॑dā ma ṛ॒tānā॑m || १३ || ā yad du॑va॒syād du॒vase॒ na kā॒rura॒smāñca॒kre mā॒nyasya॑ me॒dhā | o ṣu va॑rtta maruto॒ vipra॒macche॒mā brahmā॑ṇi jari॒tā vo॑ arcat || १४ || e॒ṣa va॒: stomo॑ maruta i॒yaṃ gīrmā॑ndā॒ryasya॑ mā॒nyasya॑ kā॒roḥ | eṣā yā॑sīṣṭa ta॒nve॑ va॒yāṃ vi॒dyāme॒ṣaṃ vṛ॒janaṃ॑ jī॒radā॑num || १५ ||