२२ दीर्घतमा औचथ्यः। अश्वः। त्रिष्टुप्, ३-६ जगती।
मा नो॑ मि॒त्रो वरु॑णो अर्य॒मायुरिन्द्र॑ ऋभु॒क्षा म॒रुत॒: परि॑ ख्यन् ।
यद् वा॒जिनो॑ दे॒वजा॑तस्य॒ सप्ते॑: प्रव॒क्ष्यामो॑ वि॒दथे॑ वी॒र्या॑णि ॥१॥
यन्नि॒र्णिजा॒ रेक्ण॑सा॒ प्रावृ॑तस्य रा॒तिं गृ॑भी॒तां मु॑ख॒तो नय॑न्ति ।
सुप्रा॑ङ॒जो मेम्य॑द् विश्वरू॑प इन्द्रापू॒ष्णोः प्रि॒यमप्ये॑ति॒ पाथ॑: ॥२॥
ए॒ष च्छाग॑: पु॒रो अश्वे॑न वा॒जिना॑ पू॒ष्णो भा॒गो नी॑यते वि॒श्वदे॑व्यः ।
अ॒भि॒प्रियं॒ यत्पु॑रो॒ळाश॒मर्व॑ता॒ त्वष्टेदे॑नं सौश्रव॒साय॑ जिन्वति ॥३॥
यद्ध॑वि॒ष्य॑मृतु॒शो दे॑व॒यानं॒ त्रिर्मानु॑षा॒: पर्यश्वं॒ नय॑न्ति ।
अत्रा॑ पू॒ष्णः प्र॑थ॒मो भा॒ग ए॑ति य॒ज्ञं दे॒वेभ्य॑: प्रतिवे॒दय॑न्न॒जः ॥४॥
होता॑ध्व॒र्युराव॑या अग्निमि॒न्धो ग्रा॑वग्रा॒भ उ॒त शंस्ता॒ सुवि॑प्रः ।
तेन॑ य॒ज्ञेन॒ स्व॑रंकृतेन॒ स्वि॑ष्टेन व॒क्षणा॒ आ पृ॑णध्वम् ॥५॥
यू॒प॒व्र॒स्का उ॒त ये यू॑पवा॒हाश्च॒षालं॒ ये अ॑श्वयू॒पाय॒ तक्ष॑ति ।
ये चार्व॑ते॒ पच॑नं स॒म्भर॑न्त्यु॒तो तेषा॑म॒भिगू॑र्तिर्न इन्वतु ॥६॥
उप॒ प्रागा॑त् सु॒मन्मे॑ऽधायि॒ मन्म॑ दे॒वाना॒माशा॒ उप॑ वी॒तपृ॑ष्ठः ।
अन्वे॑नं॒ विप्रा॒ ऋष॑यो मदन्ति दे॒वानां॑ पु॒ष्टे च॑कृमा सु॒बन्धु॑म् ॥७॥
यद् वा॒जिनो॒ दाम॑ सं॒दान॒मर्व॑तो॒ या शी॑र्ष॒ण्या॑ रश॒ना रज्जु॑रस्य ।
यद् वा॑ घास्य॒ प्रभृ॑तमा॒स्ये॒ ३ तृणं॒ सर्वा॒ ता ते॒ अपि॑ दे॒वेष्व॑स्तु ॥८॥
यदश्व॑स्य क्र॒विषो॒ मक्षि॒काश॒ यद् वा स्वरौ॒ स्वधि॑तौ रि॒प्तमस्ति॑ ।
यद्धस्त॑योः शमि॒तुर्यन्न॒खेषु॒ सर्वा॒ ता ते॒ अपि॑ दे॒वेष्व॑स्तु ॥९॥
यदूव॑ध्यमु॒दर॑स्याप॒वाति॒ य आ॒मस्य॑ क्र॒विषो॑ ग॒न्धो अस्ति॑ ।
सु॒कृ॒ता तच्छ॑मि॒तार॑: कृण्वन्तू॒त मेधं॑ शृत॒पाकं॑ पचन्तु ॥१०॥
यत् ते॒ गात्रा॑द॒ग्निना॑ प॒च्यमा॑नाद॒भि शूलं॒ निह॑तस्याव॒धाव॑ति ।
मा तद् भूम्या॒मा श्रि॑ष॒न्मा तृणे॑षु दे॒वेभ्य॒स्तदु॒शद्भ्यो॑ रा॒तम॑स्तु ॥११॥
ये वा॒जिनं॑ परि॒पश्य॑न्ति प॒क्वं य ई॑मा॒हुः सु॑र॒भिर्निर्ह॒रेति॑ ।
ये चार्व॑तो मांसभि॒क्षामु॒पास॑त उ॒तो तेषा॑म॒भिगू॑र्तिर्न इन्वतु ॥१२॥
यन्नीक्ष॑णं मां॒स्पच॑न्या उ॒खाया॒ या पात्रा॑णि यू॒ष्ण आ॒सेच॑नानि ।
ऊ॒ष्म॒ण्या॑पि॒धाना॑ चरू॒णाम॒ङ्काः सू॒नाः परि॑ भूष॒न्त्यश्व॑म् ॥१३॥
नि॒क्रम॑णं नि॒षद॑नं वि॒वर्त॑नं॒ यच्च॒ पड्बी॑श॒मर्व॑तः ।
यच्च॑ प॒पौ यच्च॑ घा॒सिं ज॒घास॒ सर्वा॒ ता ते॒ अपि॑ दे॒वेष्व॑स्तु ॥१४॥
मा त्वा॒ग्निर्ध्व॑नयीद्धू॒मग॑न्धि॒र्मोखा भ्राज॑न्त्य॒भि वि॑क्त॒ जघ्रि॑: ।
इ॒ष्टं वी॒तम॒भिगू॑र्तं॒ वष॑ट्कृतं॒ तं दे॒वास॒: प्रति॑ गृभ्ण॒न्त्यश्व॑म् ॥१५॥
यदश्वा॑य॒ वास॑ उपस्तृ॒णन्त्य॑धीवा॒सं या हिर॑ण्यान्यस्मै ।
सं॒दान॒मर्व॑न्तं॒ पड्बी॑शं प्रि॒या दे॒वेष्वा या॑मयन्ति ॥१६॥
यत् ते॑ सा॒दे मह॑सा॒ शूकृ॑तस्य॒ पार्ष्ण्या॑ वा॒ कश॑या वा तु॒तोद॑ ।
स्रु॒चेव॒ ता ह॒विषो॑ अध्व॒रेषु॒ सर्वा॒ ता ते॒ ब्रह्म॑णा सूदयामि ॥१७॥
चतु॑स्त्रिंशद् वा॒जिनो॑ दे॒वब॑न्धो॒र्वङ्क्री॒रश्व॑स्य॒ स्वधि॑ति॒: समे॑ति ।
अच्छि॑द्रा॒ गात्रा॑ व॒युना॑ कृणोत॒ परु॑ष्परुरनु॒घुष्या॒ वि श॑स्त ॥१८॥
एक॒स्त्वष्टु॒रश्व॑स्या विश॒स्ता द्वा य॒न्तारा॑ भवत॒स्तथ॑ ऋ॒तुः ।
या ते॒ गात्रा॑णामृतु॒था कृ॒णोमि॒ ताता॒ पिण्डा॑नां॒ प्र जु॑होम्य॒ग्नौ ॥१९॥
मा त्वा॑ तपत् प्रि॒य आ॒त्मापि॒यन्तं॒ मा स्वधि॑तिस्त॒न्व १ आ ति॑ष्ठिपत्ते ।
मा ते॑ गृ॒ध्नुर॑विश॒स्ताति॒हाय॑ छि॒द्रा गात्रा॑ण्य॒सिना॒ मिथू॑ कः ॥२०॥
न वा उ॑ ए॒तन्म्रि॑यसे॒ न रि॑ष्यसि दे॒वाँ इदे॑षि प॒थिभि॑: सु॒गेभि॑: ।
हरी॑ ते॒ युञ्जा॒ पृष॑ती अभूता॒मुपा॑स्थाद् वा॒जी धु॒रि रास॑भस्य ॥२१॥
सु॒गव्यं॑ नो वा॒जी स्वश्व्यं॑ पुं॒सः पु॒त्राँ उ॒त वि॑श्वा॒पुषं॑ र॒यिम् ।
अ॒ना॒गा॒स्त्वं नो॒ अदि॑तिः कृणोतु क्ष॒त्रं नो॒ अश्वो॑ वनतां ह॒विष्मा॑न् ॥२२॥
२२ dīrghatamā aucathyaḥ | aśvaḥ | triṣṭup, ३-६ jagatī | mā no॑ mi॒tro varu॑ṇo arya॒māyurindra॑ ṛbhu॒kṣā ma॒ruta॒: pari॑ khyan | yad vā॒jino॑ de॒vajā॑tasya॒ sapte॑: prava॒kṣyāmo॑ vi॒dathe॑ vī॒ryā॑ṇi || १ || yanni॒rṇijā॒ rekṇa॑sā॒ prāvṛ॑tasya rā॒tiṃ gṛ॑bhī॒tāṃ mu॑kha॒to naya॑nti | suprā॑ṅa॒jo memya॑d viśvarū॑pa indrāpū॒ṣṇoḥ pri॒yamapye॑ti॒ pātha॑: || २ || e॒ṣa cchāga॑: pu॒ro aśve॑na vā॒jinā॑ pū॒ṣṇo bhā॒go nī॑yate vi॒śvade॑vyaḥ | a॒bhi॒priyaṃ॒ yatpu॑ro॒ḷāśa॒marva॑tā॒ tvaṣṭede॑naṃ sauśrava॒sāya॑ jinvati || ३ || yaddha॑vi॒ṣya॑mṛtu॒śo de॑va॒yānaṃ॒ trirmānu॑ṣā॒: paryaśvaṃ॒ naya॑nti | atrā॑ pū॒ṣṇaḥ pra॑tha॒mo bhā॒ga e॑ti ya॒jñaṃ de॒vebhya॑: prative॒daya॑nna॒jaḥ || ४ || hotā॑dhva॒ryurāva॑yā agnimi॒ndho grā॑vagrā॒bha u॒ta śaṃstā॒ suvi॑praḥ | tena॑ ya॒jñena॒ sva॑raṃkṛtena॒ svi॑ṣṭena va॒kṣaṇā॒ ā pṛ॑ṇadhvam || ५ || yū॒pa॒vra॒skā u॒ta ye yū॑pavā॒hāśca॒ṣālaṃ॒ ye a॑śvayū॒pāya॒ takṣa॑ti | ye cārva॑te॒ paca॑naṃ sa॒mbhara॑ntyu॒to teṣā॑ma॒bhigū॑rtirna invatu || ६ || upa॒ prāgā॑t su॒manme॑’dhāyi॒ manma॑ de॒vānā॒māśā॒ upa॑ vī॒tapṛ॑ṣṭhaḥ | anve॑naṃ॒ viprā॒ ṛṣa॑yo madanti de॒vānāṃ॑ pu॒ṣṭe ca॑kṛmā su॒bandhu॑m || ७ || yad vā॒jino॒ dāma॑ saṃ॒dāna॒marva॑to॒ yā śī॑rṣa॒ṇyā॑ raśa॒nā rajju॑rasya | yad vā॑ ghāsya॒ prabhṛ॑tamā॒sye॒ ३ tṛṇaṃ॒ sarvā॒ tā te॒ api॑ de॒veṣva॑stu || ८ || yadaśva॑sya kra॒viṣo॒ makṣi॒kāśa॒ yad vā svarau॒ svadhi॑tau ri॒ptamasti॑ | yaddhasta॑yoḥ śami॒turyanna॒kheṣu॒ sarvā॒ tā te॒ api॑ de॒veṣva॑stu || ९ || yadūva॑dhyamu॒dara॑syāpa॒vāti॒ ya ā॒masya॑ kra॒viṣo॑ ga॒ndho asti॑ | su॒kṛ॒tā taccha॑mi॒tāra॑: kṛṇvantū॒ta medhaṃ॑ śṛta॒pākaṃ॑ pacantu || १० || yat te॒ gātrā॑da॒gninā॑ pa॒cyamā॑nāda॒bhi śūlaṃ॒ niha॑tasyāva॒dhāva॑ti | mā tad bhūmyā॒mā śri॑ṣa॒nmā tṛṇe॑ṣu de॒vebhya॒stadu॒śadbhyo॑ rā॒tama॑stu || ११ || ye vā॒jinaṃ॑ pari॒paśya॑nti pa॒kvaṃ ya ī॑mā॒huḥ su॑ra॒bhirnirha॒reti॑ | ye cārva॑to māṃsabhi॒kṣāmu॒pāsa॑ta u॒to teṣā॑ma॒bhigū॑rtirna invatu || १२ || yannīkṣa॑ṇaṃ māṃ॒spaca॑nyā u॒khāyā॒ yā pātrā॑ṇi yū॒ṣṇa ā॒seca॑nāni | ū॒ṣma॒ṇyā॑pi॒dhānā॑ carū॒ṇāma॒ṅkāḥ sū॒nāḥ pari॑ bhūṣa॒ntyaśva॑m || १३ || ni॒krama॑ṇaṃ ni॒ṣada॑naṃ vi॒varta॑naṃ॒ yacca॒ paḍbī॑śa॒marva॑taḥ | yacca॑ pa॒pau yacca॑ ghā॒siṃ ja॒ghāsa॒ sarvā॒ tā te॒ api॑ de॒veṣva॑stu || १४ || mā tvā॒gnirdhva॑nayīddhū॒maga॑ndhi॒rmokhā bhrāja॑ntya॒bhi vi॑kta॒ jaghri॑: | i॒ṣṭaṃ vī॒tama॒bhigū॑rtaṃ॒ vaṣa॑ṭkṛtaṃ॒ taṃ de॒vāsa॒: prati॑ gṛbhṇa॒ntyaśva॑m || १५ || yadaśvā॑ya॒ vāsa॑ upastṛ॒ṇantya॑dhīvā॒saṃ yā hira॑ṇyānyasmai | saṃ॒dāna॒marva॑ntaṃ॒ paḍbī॑śaṃ pri॒yā de॒veṣvā yā॑mayanti || १६ || yat te॑ sā॒de maha॑sā॒ śūkṛ॑tasya॒ pārṣṇyā॑ vā॒ kaśa॑yā vā tu॒toda॑ | sru॒ceva॒ tā ha॒viṣo॑ adhva॒reṣu॒ sarvā॒ tā te॒ brahma॑ṇā sūdayāmi || १७ || catu॑striṃśad vā॒jino॑ de॒vaba॑ndho॒rvaṅkrī॒raśva॑sya॒ svadhi॑ti॒: same॑ti | acchi॑drā॒ gātrā॑ va॒yunā॑ kṛṇota॒ paru॑ṣparuranu॒ghuṣyā॒ vi śa॑sta || १८ || eka॒stvaṣṭu॒raśva॑syā viśa॒stā dvā ya॒ntārā॑ bhavata॒statha॑ ṛ॒tuḥ | yā te॒ gātrā॑ṇāmṛtu॒thā kṛ॒ṇomi॒ tātā॒ piṇḍā॑nāṃ॒ pra ju॑homya॒gnau || १९ || mā tvā॑ tapat pri॒ya ā॒tmāpi॒yantaṃ॒ mā svadhi॑tista॒nva १ ā ti॑ṣṭhipatte | mā te॑ gṛ॒dhnura॑viśa॒stāti॒hāya॑ chi॒drā gātrā॑ṇya॒sinā॒ mithū॑ kaḥ || २० || na vā u॑ e॒tanmri॑yase॒ na ri॑ṣyasi de॒vām̐ ide॑ṣi pa॒thibhi॑: su॒gebhi॑: | harī॑ te॒ yuñjā॒ pṛṣa॑tī abhūtā॒mupā॑sthād vā॒jī dhu॒ri rāsa॑bhasya || २१ || su॒gavyaṃ॑ no vā॒jī svaśvyaṃ॑ puṃ॒saḥ pu॒trām̐ u॒ta vi॑śvā॒puṣaṃ॑ ra॒yim | a॒nā॒gā॒stvaṃ no॒ adi॑tiḥ kṛṇotu kṣa॒traṃ no॒ aśvo॑ vanatāṃ ha॒viṣmā॑n || २२ ||