५ दीर्घतमा औचथ्यः। द्यावापृथिवी। जगती।
प्र द्यावा॑ य॒ज्ञैः पृ॑थि॒वी ऋ॑ता॒वृधा॑ म॒ही स्तु॑षे वि॒दथे॑षु॒ प्रचे॑तसा ।
दे॒वेभि॒र्ये दे॒वपु॑त्रे सु॒दंस॑से॒त्था धि॒या वार्या॑णि प्र॒भूष॑तः ॥१॥
उ॒त म॑न्ये पि॒तुर॒द्रुहो॒ मनो॑ मा॒तुर्महि॒ स्वत॑व॒स्तद्धवी॑मभिः ।
सु॒रेत॑सा पि॒तरा॒ भूम॑ चक्रतुरु॒रु प्र॒जाया॑ अ॒मृतं॒ वरी॑मभिः ॥२॥
ते सू॒नव॒: स्वप॑सः सु॒दंस॑सो म॒ही ज॑ज्ञुर्मा॒तरा॑ पू॒र्वचि॑त्तये ।
स्था॒तुश्च॑ स॒त्यं जग॑तश्च॒ धर्म॑णि पु॒त्रस्य॑ पाथः प॒दमद्व॑याविनः ॥३॥
ते मा॒यिनो॑ ममिरे सु॒प्रचे॑तसो जा॒मी सयो॑नी मिथु॒ना समो॑कसा ।
नव्यं॑नव्यं॒ तन्तु॒मा त॑न्वते दि॒वि स॑मु॒द्रे अ॒न्तः क॒वय॑: सुदी॒तय॑: ॥४॥
तद् राधो॑ अ॒द्य स॑वि॒तुर्वरे॑ण्यं व॒यं दे॒वस्य॑ प्रस॒वे म॑नामहे ।
अ॒स्मभ्यं॑ द्यावापृथिवी सुचे॒तुना॑ र॒यिं ध॑त्तं॒ वसु॑मन्तं शत॒ग्विन॑म् ॥५॥
५ dīrghatamā aucathyaḥ | dyāvāpṛthivī | jagatī | pra dyāvā॑ ya॒jñaiḥ pṛ॑thi॒vī ṛ॑tā॒vṛdhā॑ ma॒hī stu॑ṣe vi॒dathe॑ṣu॒ prace॑tasā | de॒vebhi॒rye de॒vapu॑tre su॒daṃsa॑se॒tthā dhi॒yā vāryā॑ṇi pra॒bhūṣa॑taḥ || १ || u॒ta ma॑nye pi॒tura॒druho॒ mano॑ mā॒turmahi॒ svata॑va॒staddhavī॑mabhiḥ | su॒reta॑sā pi॒tarā॒ bhūma॑ cakraturu॒ru pra॒jāyā॑ a॒mṛtaṃ॒ varī॑mabhiḥ || २ || te sū॒nava॒: svapa॑saḥ su॒daṃsa॑so ma॒hī ja॑jñurmā॒tarā॑ pū॒rvaci॑ttaye | sthā॒tuśca॑ sa॒tyaṃ jaga॑taśca॒ dharma॑ṇi pu॒trasya॑ pāthaḥ pa॒damadva॑yāvinaḥ || ३ || te mā॒yino॑ mamire su॒prace॑taso jā॒mī sayo॑nī mithu॒nā samo॑kasā | navyaṃ॑navyaṃ॒ tantu॒mā ta॑nvate di॒vi sa॑mu॒dre a॒ntaḥ ka॒vaya॑: sudī॒taya॑: || ४ || tad rādho॑ a॒dya sa॑vi॒turvare॑ṇyaṃ va॒yaṃ de॒vasya॑ prasa॒ve ma॑nāmahe | a॒smabhyaṃ॑ dyāvāpṛthivī suce॒tunā॑ ra॒yiṃ dha॑ttaṃ॒ vasu॑mantaṃ śata॒gvina॑m || ५ ||