६ दीर्घतमा औचथ्यः। अश्विनौ। जगती, ५-६ त्रिष्टुप्।
अबो॑ध्य॒ग्निर्ज्म उदे॑ति॒ सूर्यो॒ व्यु १षाश्च॒न्द्रा म॒ह्या॑वो अ॒र्चिषा॑ ।
आयु॑क्षाताम॒श्विना॒ यात॑वे॒ रथं॒ प्रासा॑वीद् दे॒वः स॑वि॒ता जग॒त् पृथ॑क् ॥१॥
यद् यु॒ञ्जाथे॒ वृष॑णमश्विना॒ रथं॑ घृ॒तेन॑ नो॒ मधु॑ना क्ष॒त्रमु॑क्षतम् ।
अ॒स्माकं॒ ब्रह्म॒ पृत॑नासु जिन्वतं व॒यं धना॒ शूर॑साता भजेमहि ॥२॥
अ॒र्वाङ् त्रि॑च॒क्रो म॑धु॒वाह॑नो॒ रथो॑ जी॒राश्वो॑ अ॒श्विनो॑र्यातु॒ सुष्टु॑तः ।
त्रि॒व॒न्धु॒रो म॒घवा॑ वि॒श्वसौ॑भग॒: शं न॒ आ व॑क्षद् द्वि॒पदे॒ चतु॑ष्पदे ॥३॥
आ न॒ ऊर्जं॑ वहतमश्विना यु॒वं मधु॑मत्या न॒: कश॑या मिमिक्षतम् ।
प्रायु॒स्तारि॑ष्टं॒ नी रपां॑सि मृक्षतं॒ सेध॑तं॒ द्वेषो॒ भव॑तं सचा॒भुवा॑ ॥४॥
यु॒वं ह॒ गर्भं॒ जग॑तीषु धत्थो यु॒वं विश्वे॑षु॒ भुव॑नेष्व॒न्तः ।
यु॒वम॒ग्निं च॑ वृषणाव॒पश्च॒ वन॒स्पतीँ॑रश्विना॒वैर॑येथाम् ॥५॥
यु॒वं ह॑ स्थो भि॒षजा॑ भेष॒जेभि॒रथो॑ ह स्थो र॒थ्या॒ ३ राथ्ये॑भिः ।
अथो॑ ह क्ष॒त्रमधि॑ धत्थ उग्रा॒ यो वां॑ ह॒विष्मा॒न् मन॑सा द॒दाश॑ ॥६॥
६ dīrghatamā aucathyaḥ | aśvinau | jagatī, ५-६ triṣṭup | abo॑dhya॒gnirjma ude॑ti॒ sūryo॒ vyu १ṣāśca॒ndrā ma॒hyā॑vo a॒rciṣā॑ | āyu॑kṣātāma॒śvinā॒ yāta॑ve॒ rathaṃ॒ prāsā॑vīd de॒vaḥ sa॑vi॒tā jaga॒t pṛtha॑k || १ || yad yu॒ñjāthe॒ vṛṣa॑ṇamaśvinā॒ rathaṃ॑ ghṛ॒tena॑ no॒ madhu॑nā kṣa॒tramu॑kṣatam | a॒smākaṃ॒ brahma॒ pṛta॑nāsu jinvataṃ va॒yaṃ dhanā॒ śūra॑sātā bhajemahi || २ || a॒rvāṅ tri॑ca॒kro ma॑dhu॒vāha॑no॒ ratho॑ jī॒rāśvo॑ a॒śvino॑ryātu॒ suṣṭu॑taḥ | tri॒va॒ndhu॒ro ma॒ghavā॑ vi॒śvasau॑bhaga॒: śaṃ na॒ ā va॑kṣad dvi॒pade॒ catu॑ṣpade || ३ || ā na॒ ūrjaṃ॑ vahatamaśvinā yu॒vaṃ madhu॑matyā na॒: kaśa॑yā mimikṣatam | prāyu॒stāri॑ṣṭaṃ॒ nī rapāṃ॑si mṛkṣataṃ॒ sedha॑taṃ॒ dveṣo॒ bhava॑taṃ sacā॒bhuvā॑ || ४ || yu॒vaṃ ha॒ garbhaṃ॒ jaga॑tīṣu dhattho yu॒vaṃ viśve॑ṣu॒ bhuva॑neṣva॒ntaḥ | yu॒vama॒gniṃ ca॑ vṛṣaṇāva॒paśca॒ vana॒spatīm̐॑raśvinā॒vaira॑yethām || ५ || yu॒vaṃ ha॑ stho bhi॒ṣajā॑ bheṣa॒jebhi॒ratho॑ ha stho ra॒thyā॒ ३ rāthye॑bhiḥ | atho॑ ha kṣa॒tramadhi॑ dhattha ugrā॒ yo vāṃ॑ ha॒viṣmā॒n mana॑sā da॒dāśa॑ || ६ ||