९ दीर्घतमा औचथ्यः। १ मित्रः, २-९ मित्रावरुणौ। जगती।
मि॒त्रं न यं शिम्या॒ गोषु॑ ग॒व्यव॑: स्वा॒ध्यो॑ वि॒दथे॑ अ॒प्सु जीज॑नन् ।
अरे॑जेतां॒ रोद॑सी॒ पाज॑सा गि॒रा प्रति॑ प्रि॒यं य॑ज॒तं ज॒नुषा॒मव॑: ॥१॥
यद्ध॒ त्यद् वां॑ पुरुमी॒ळहस्य॑ सो॒मिन॒: प्र मि॒त्रासो॒ न द॑धि॒रे स्वा॒भुव॑: ।
अध॒ क्रतुं॑ विदतं गा॒तुमर्च॑त उ॒त श्रु॑तं वृषणा प॒स्त्या॑वतः ॥२॥
आ वां॑ भूषन् क्षि॒तयो॒ जन्म॒ रोद॑स्योः प्र॒वाच्यं॑ वृषणा॒ दक्ष॑से म॒हे ।
यदी॑मृ॒ताय॒ भर॑थो॒ यदर्व॑ते॒ प्र होत्र॑या॒ शिम्या॑ वीथो अध्व॒रम् ॥३॥
प्र सा क्षि॒तिर॑सुर॒ या महि॑ प्रि॒य ऋता॑वानावृ॒तमा घो॑षथो बृ॒हत् ।
यु॒वं दि॒वो बृ॑ह॒तो दक्ष॑मा॒भुवं॒ गां न धु॒र्युप॑ युञ्जाथे अ॒पः ॥४॥
म॒ही अत्र॑ महि॒ना वार॑मृण्वथो ऽरे॒णव॒स्तुज॒ आ सद्म॑न् धे॒नव॑: ।
स्वर॑न्ति॒ ता उ॑प॒रता॑ति॒ सूर्य॒मा नि॒म्रुच॑ उ॒षस॑स्तक्व॒वीरि॑व ॥५॥
आ वा॑मृ॒ताय॑ के॒शिनी॑रनूषत॒ मित्र॒ यत्र॒ वरु॑ण गा॒तुमर्च॑थः ।
अव॒ त्मना॑ सृ॒जतं॒ पिन्व॑तं॒ धियो॑ यु॒वं विप्र॑स्य॒ मन्म॑नामिरज्यथः ॥६॥
यो वां॑ य॒ज्ञैः श॑शमा॒नो ह॒ दाश॑ति क॒विर्होता॒ यज॑ति मन्म॒साध॑नः ।
उपाह॒ तं गच्छ॑थो वी॒थो अ॑ध्व॒रमच्छा॒ गिर॑: सुम॒तिं ग॑न्तमस्म॒यू ॥७॥
यु॒वां य॒ज्ञैः प्र॑थ॒मा गोभि॑रञ्जत॒ ऋता॑वाना॒ मन॑सो॒ न प्रयु॑क्तिषु ।
भर॑न्ति वां॒ मन्म॑ना सं॒यता॒ गिरो ऽदृ॑प्यता॒ मन॑सा रे॒वदा॑शाथे ॥८॥
रे॒वद् वयो॑ दधाथे रे॒वदा॑शाथे॒ नरा॑ मा॒याभि॑रि॒तऊ॑ति॒ माहि॑नम् ।
न वां॒ द्यावोऽह॑भि॒र्नोत सिन्ध॑वो॒ न दे॑व॒त्वं प॒णयो॒ नान॑शुर्म॒घम् ॥९॥
९ dīrghatamā aucathyaḥ | १ mitraḥ, २-९ mitrāvaruṇau | jagatī | mi॒traṃ na yaṃ śimyā॒ goṣu॑ ga॒vyava॑: svā॒dhyo॑ vi॒dathe॑ a॒psu jīja॑nan | are॑jetāṃ॒ roda॑sī॒ pāja॑sā gi॒rā prati॑ pri॒yaṃ ya॑ja॒taṃ ja॒nuṣā॒mava॑: || १ || yaddha॒ tyad vāṃ॑ purumī॒ḷahasya॑ so॒mina॒: pra mi॒trāso॒ na da॑dhi॒re svā॒bhuva॑: | adha॒ kratuṃ॑ vidataṃ gā॒tumarca॑ta u॒ta śru॑taṃ vṛṣaṇā pa॒styā॑vataḥ || २ || ā vāṃ॑ bhūṣan kṣi॒tayo॒ janma॒ roda॑syoḥ pra॒vācyaṃ॑ vṛṣaṇā॒ dakṣa॑se ma॒he | yadī॑mṛ॒tāya॒ bhara॑tho॒ yadarva॑te॒ pra hotra॑yā॒ śimyā॑ vītho adhva॒ram || ३ || pra sā kṣi॒tira॑sura॒ yā mahi॑ pri॒ya ṛtā॑vānāvṛ॒tamā gho॑ṣatho bṛ॒hat | yu॒vaṃ di॒vo bṛ॑ha॒to dakṣa॑mā॒bhuvaṃ॒ gāṃ na dhu॒ryupa॑ yuñjāthe a॒paḥ || ४ || ma॒hī atra॑ mahi॒nā vāra॑mṛṇvatho ’re॒ṇava॒stuja॒ ā sadma॑n dhe॒nava॑: | svara॑nti॒ tā u॑pa॒ratā॑ti॒ sūrya॒mā ni॒mruca॑ u॒ṣasa॑stakva॒vīri॑va || ५ || ā vā॑mṛ॒tāya॑ ke॒śinī॑ranūṣata॒ mitra॒ yatra॒ varu॑ṇa gā॒tumarca॑thaḥ | ava॒ tmanā॑ sṛ॒jataṃ॒ pinva॑taṃ॒ dhiyo॑ yu॒vaṃ vipra॑sya॒ manma॑nāmirajyathaḥ || ६ || yo vāṃ॑ ya॒jñaiḥ śa॑śamā॒no ha॒ dāśa॑ti ka॒virhotā॒ yaja॑ti manma॒sādha॑naḥ | upāha॒ taṃ gaccha॑tho vī॒tho a॑dhva॒ramacchā॒ gira॑: suma॒tiṃ ga॑ntamasma॒yū || ७ || yu॒vāṃ ya॒jñaiḥ pra॑tha॒mā gobhi॑rañjata॒ ṛtā॑vānā॒ mana॑so॒ na prayu॑ktiṣu | bhara॑nti vāṃ॒ manma॑nā saṃ॒yatā॒ giro ’dṛ॑pyatā॒ mana॑sā re॒vadā॑śāthe || ८ || re॒vad vayo॑ dadhāthe re॒vadā॑śāthe॒ narā॑ mā॒yābhi॑ri॒taū॑ti॒ māhi॑nam | na vāṃ॒ dyāvo’ha॑bhi॒rnota sindha॑vo॒ na de॑va॒tvaṃ pa॒ṇayo॒ nāna॑śurma॒gham || ९ ||