७ दीर्घतमा औचथ्यः। अग्निः। जगती।
एति॒ प्र होता॑ व्र॒तम॑स्य मा॒ययो॒र्ध्वां दधा॑न॒: शुचि॑पेशसं॒ धिय॑म् ।
अ॒भि स्रुच॑: क्रमते दक्षिणा॒वृतो॒ या अ॑स्य॒ धाम॑ प्रथ॒मं ह॒ निंस॑ते ॥१॥
अ॒भीमृ॒तस्य॑ दो॒हना॑ अनूषत॒ योनौ॑ दे॒वस्य॒ सद॑ने॒ परी॑वृताः ।
अ॒पामु॒पस्थे॒ विभृ॑तो॒ यदाव॑स॒दध॑ स्व॒धा अ॑धय॒द् याभि॒रीय॑ते ॥२॥
युयू॑षत॒: सव॑यसा॒ तदिद् वपु॑: समा॒नमर्थं॑ वि॒तरि॑त्रता मि॒थः ।
आदीं॒ भगो॒ न हव्य॒: सम॒स्मदा वोह्लु॒र्न र॒श्मीन् त्सम॑यंस्त॒ सार॑थिः ॥३॥
यमीं॒ द्वा सव॑यसा सप॒र्यत॑: समा॒ने योना॑ मिथु॒ना समो॑कसा ।
दिवा॒ न नक्तं॑ पलि॒तो युवा॑जनि पु॒रू चर॑न्न॒जरो॒ मानु॑षा यु॒गा ॥४॥
तमीं॑ हिन्वन्ति धी॒तयो॒ दश॒ व्रिशो॑ दे॒वं मर्ता॑स ऊ॒तये॑ हवामहे ।
धनो॒रधि॑ प्र॒वत॒ आ स ऋ॑ण्वत्यभि॒व्रज॑द्भिर्व॒युना॒ नवा॑धित ॥५॥
त्वं ह्य॑ग्ने दि॒व्यस्य॒ राज॑सि॒ त्वं पार्थि॑वस्य पशु॒पा इ॑व॒ त्मना॑ ।
एनी॑ त ए॒ते बृ॑ह॒ती अ॑भि॒श्रिया॑ हिर॒ण्ययी॒ वक्व॑री ब॒र्हिरा॑शाते ॥६॥
अग्ने॑ जु॒षस्व॒ प्रति॑ हर्य॒ तद् वचो॒ मन्द्र॒ स्वधा॑व॒ ऋत॑जात॒ सुक्र॑तो ।
यो वि॒श्वत॑: प्र॒त्यङ्ङसि॑ दर्श॒तो र॒ण्वः संदृ॑ष्टौ पितु॒माँ इ॑व॒ क्षय॑: ॥७॥
७ dīrghatamā aucathyaḥ | agniḥ | jagatī | eti॒ pra hotā॑ vra॒tama॑sya mā॒yayo॒rdhvāṃ dadhā॑na॒: śuci॑peśasaṃ॒ dhiya॑m | a॒bhi sruca॑: kramate dakṣiṇā॒vṛto॒ yā a॑sya॒ dhāma॑ pratha॒maṃ ha॒ niṃsa॑te || १ || a॒bhīmṛ॒tasya॑ do॒hanā॑ anūṣata॒ yonau॑ de॒vasya॒ sada॑ne॒ parī॑vṛtāḥ | a॒pāmu॒pasthe॒ vibhṛ॑to॒ yadāva॑sa॒dadha॑ sva॒dhā a॑dhaya॒d yābhi॒rīya॑te || २ || yuyū॑ṣata॒: sava॑yasā॒ tadid vapu॑: samā॒namarthaṃ॑ vi॒tari॑tratā mi॒thaḥ | ādīṃ॒ bhago॒ na havya॒: sama॒smadā vohlu॒rna ra॒śmīn tsama॑yaṃsta॒ sāra॑thiḥ || ३ || yamīṃ॒ dvā sava॑yasā sapa॒ryata॑: samā॒ne yonā॑ mithu॒nā samo॑kasā | divā॒ na naktaṃ॑ pali॒to yuvā॑jani pu॒rū cara॑nna॒jaro॒ mānu॑ṣā yu॒gā || ४ || tamīṃ॑ hinvanti dhī॒tayo॒ daśa॒ vriśo॑ de॒vaṃ martā॑sa ū॒taye॑ havāmahe | dhano॒radhi॑ pra॒vata॒ ā sa ṛ॑ṇvatyabhi॒vraja॑dbhirva॒yunā॒ navā॑dhita || ५ || tvaṃ hya॑gne di॒vyasya॒ rāja॑si॒ tvaṃ pārthi॑vasya paśu॒pā i॑va॒ tmanā॑ | enī॑ ta e॒te bṛ॑ha॒tī a॑bhi॒śriyā॑ hira॒ṇyayī॒ vakva॑rī ba॒rhirā॑śāte || ६ || agne॑ ju॒ṣasva॒ prati॑ harya॒ tad vaco॒ mandra॒ svadhā॑va॒ ṛta॑jāta॒ sukra॑to | yo vi॒śvata॑: pra॒tyaṅṅasi॑ darśa॒to ra॒ṇvaḥ saṃdṛ॑ṣṭau pitu॒mām̐ i॑va॒ kṣaya॑: || ७ ||