११ परुच्छेपो दैवोदासिः । १ विश्वे देवाः, २ मित्रा वरुणौ, ३-५ अश्विनौ, ६ इन्द्रः, ७ अग्निः, ८ मरुतः, ९ इन्द्राग्नी, १० बृहस्पतिः, ११ विश्वे देवाः। अत्यष्टिः, ५ बृहती, ११ त्रिष्टुप्
अस्तु॒ श्रौष॑ट् पु॒रो अ॒ग्निं धि॒या द॑ध॒ आ नु तच्छर्धो॑ दि॒व्यं वृ॑णीमह इन्द्रवा॒यू वृ॑णीमहे ।
यद्ध॑ क्रा॒णा वि॒वस्व॑ति॒ नाभा॑ सं॒दायि॒ नव्य॑सी ।
अध॒ प्र सू न॒ उप॑ यन्तु धी॒तयो॑ दे॒वाँ अच्छा॒ न धी॒तय॑: ॥१॥
यद्ध॒ त्यन्मि॑त्रावरुणावृ॒तादध्या॑द॒दाथे॒ अनृ॑तं॒ स्वेन॑ म॒न्युना॒ दक्ष॑स्य॒ स्वेन॑ म॒न्युना॑ ।
यु॒वोरि॒त्थाधि॒ सद्म॒स्वप॑श्याम हिर॒ण्यय॑म् ।
धी॒भिश्च॒न मन॑सा॒ स्वेभि॑र॒क्षभि॒: सोम॑स्य॒ स्वेभि॑र॒क्षभि॑: ॥२॥
यु॒वां स्तोमे॑भिर्देव॒यन्तो॑ अश्विना ऽऽश्रा॒वय॑न्त इव॒ श्लोक॑मा॒यवो॑ यु॒वां ह॒व्याभ्या॒ ३ यव॑: ।
यु॒वोर्विश्वा॒ अधि॒ श्रिय॒: पृक्ष॑श्च विश्ववेदसा ।
प्रु॒षा॒यन्ते॑ वां प॒वयो॑ हिर॒ण्यये॒ रथे॑ दस्रा हिर॒ण्यये॑ ॥३॥
अचे॑ति दस्रा॒ व्यु १ नाक॑मृण्वथो यु॒ञ्जते॑ वां रथ॒युजो॒ दिवि॑ष्टिष्वध्व॒स्मानो॒ दिवि॑ष्टिषु ।
अधि॑ वां॒ स्थाम॑ व॒न्धुरे॒ रथे॑ दस्रा हिर॒ण्यये॑ ।
प॒थेव॒ यन्ता॑वनु॒शास॑ता॒ रजो ऽञ्ज॑सा॒ शास॑ता॒ रज॑: ॥४॥
शची॑भिर्नः शचीवसू॒ दिवा॒ नक्तं॑ दशस्यतम् ।
मा वां॑ रा॒तिरुप॑ दस॒त् कदा॑ च॒नास्मद्रा॒तिः कदा॑ च॒न ॥५॥
वृष॑न्निन्द्र वृष॒पाणा॑स॒ इन्द॑व इ॒मे सु॒ता अद्रि॑षुतास उ॒द्भिद॒स्तुभ्यं॑ सु॒तास॑ उ॒द्भिद॑: ।
ते त्वा॑ मन्दन्तु दा॒वने॑ म॒हे चि॒त्राय॒ राध॑से ।
गी॒र्भिर्गि॑र्वाह॒: स्तव॑मान॒ आ ग॑हि सुमृळी॒को न॒ आ ग॑हि ॥६॥
ओ षू णो॑ अग्ने शृणुहि॒ त्वमी॑ळि॒तो दे॒वेभ्यो॑ ब्रवसि य॒ज्ञिये॑भ्यो॒ राज॑भ्यो य॒ज्ञिये॑भ्यः ।
यद्ध॒ त्यामङ्गि॑रोभ्यो धे॒नुं दे॑वा॒ अद॑त्तन ।
वि तां दु॑ह्रे अर्य॒मा क॒र्तरी॒ सचाँ॑ ए॒ष तां वे॑द मे॒ सचा॑ ॥
मो षु वो॑ अ॒स्मद॒भि तानि॒ पौंस्या॒ सना॑ भूवन्द्यु॒म्नानि॒ मोत जा॑रिषुर॒स्मत् पु॒रोत जा॑रिषुः ।
यद् व॑श्चि॒त्रं यु॒गेयु॑गे॒ नव्यं॒ घोषा॒दम॑र्त्यम् ।
अ॒स्मासु॒ तन्म॑रुतो॒ यच्च॑ दु॒ष्टरं॑ दिधृ॒ता यच्च॑ दु॒ष्टर॑म् ॥८॥
द॒ध्यङ् ह॑ मे ज॒नुषं॒ पूर्वो॒ अङ्गि॑राः प्रि॒यमे॑ध॒: कण्वो॒ अत्रि॒र्मनु॑र्विदु॒स्ते मे॒ पूर्वे॒ मनु॑र्विदुः ।
तेषां॑ दे॒वेष्वाय॑तिर॒स्माकं॒ तेषु॒ नाभ॑यः ।
तेषां॑ प॒देन॒ मह्या न॑मे गि॒रेन्द्रा॒ग्नी आ न॑मे गि॒रा ॥९॥
होता॑ यक्षद् व॒निनो॑ वन्त॒ वार्यं॒ बृह॒स्पति॑र्यजति वे॒न उ॒क्षभि॑: पुरु॒वारे॑भिरु॒क्षभि॑: ।
ज॒गृ॒भ्मा दू॒रआ॑दिशं॒ श्लोक॒मद्रे॒रध॒ त्मना॑ ।
अधा॑रयदर॒रिन्दा॑नि सु॒क्रतु॑: पु॒रू सद्मा॑नि सु॒क्रतु॑: ॥१०॥
ये दे॑वासो दि॒व्येका॑दश॒ स्थ पृ॑थि॒व्यामध्येका॑दश॒ स्थ ।
अ॒प्सु॒क्षितो॑ महि॒नैका॑दश॒ स्थ ते दे॑वासो य॒ज्ञमि॒मं जु॑षध्वम् ॥११॥
११ parucchepo daivodāsiḥ | १ viśve devāḥ, २ mitrā varuṇau, ३-५ aśvinau, ६ indraḥ, ७ agniḥ, ८ marutaḥ, ९ indrāgnī, १० bṛhaspatiḥ, ११ viśve devāḥ | atyaṣṭiḥ, ५ bṛhatī, ११ triṣṭup astu॒ śrauṣa॑ṭ pu॒ro a॒gniṃ dhi॒yā da॑dha॒ ā nu tacchardho॑ di॒vyaṃ vṛ॑ṇīmaha indravā॒yū vṛ॑ṇīmahe | yaddha॑ krā॒ṇā vi॒vasva॑ti॒ nābhā॑ saṃ॒dāyi॒ navya॑sī | adha॒ pra sū na॒ upa॑ yantu dhī॒tayo॑ de॒vām̐ acchā॒ na dhī॒taya॑: || १ || yaddha॒ tyanmi॑trāvaruṇāvṛ॒tādadhyā॑da॒dāthe॒ anṛ॑taṃ॒ svena॑ ma॒nyunā॒ dakṣa॑sya॒ svena॑ ma॒nyunā॑ | yu॒vori॒tthādhi॒ sadma॒svapa॑śyāma hira॒ṇyaya॑m | dhī॒bhiśca॒na mana॑sā॒ svebhi॑ra॒kṣabhi॒: soma॑sya॒ svebhi॑ra॒kṣabhi॑: || २ || yu॒vāṃ stome॑bhirdeva॒yanto॑ aśvinā ’’śrā॒vaya॑nta iva॒ śloka॑mā॒yavo॑ yu॒vāṃ ha॒vyābhyā॒ ३ yava॑: | yu॒vorviśvā॒ adhi॒ śriya॒: pṛkṣa॑śca viśvavedasā | pru॒ṣā॒yante॑ vāṃ pa॒vayo॑ hira॒ṇyaye॒ rathe॑ dasrā hira॒ṇyaye॑ || ३ || ace॑ti dasrā॒ vyu १ nāka॑mṛṇvatho yu॒ñjate॑ vāṃ ratha॒yujo॒ divi॑ṣṭiṣvadhva॒smāno॒ divi॑ṣṭiṣu | adhi॑ vāṃ॒ sthāma॑ va॒ndhure॒ rathe॑ dasrā hira॒ṇyaye॑ | pa॒theva॒ yantā॑vanu॒śāsa॑tā॒ rajo ’ñja॑sā॒ śāsa॑tā॒ raja॑: || ४ || śacī॑bhirnaḥ śacīvasū॒ divā॒ naktaṃ॑ daśasyatam | mā vāṃ॑ rā॒tirupa॑ dasa॒t kadā॑ ca॒nāsmadrā॒tiḥ kadā॑ ca॒na || ५ || vṛṣa॑nnindra vṛṣa॒pāṇā॑sa॒ inda॑va i॒me su॒tā adri॑ṣutāsa u॒dbhida॒stubhyaṃ॑ su॒tāsa॑ u॒dbhida॑: | te tvā॑ mandantu dā॒vane॑ ma॒he ci॒trāya॒ rādha॑se | gī॒rbhirgi॑rvāha॒: stava॑māna॒ ā ga॑hi sumṛḷī॒ko na॒ ā ga॑hi || ६ || o ṣū ṇo॑ agne śṛṇuhi॒ tvamī॑ḷi॒to de॒vebhyo॑ bravasi ya॒jñiye॑bhyo॒ rāja॑bhyo ya॒jñiye॑bhyaḥ | yaddha॒ tyāmaṅgi॑robhyo dhe॒nuṃ de॑vā॒ ada॑ttana | vi tāṃ du॑hre arya॒mā ka॒rtarī॒ sacām̐॑ e॒ṣa tāṃ ve॑da me॒ sacā॑ || mo ṣu vo॑ a॒smada॒bhi tāni॒ pauṃsyā॒ sanā॑ bhūvandyu॒mnāni॒ mota jā॑riṣura॒smat pu॒rota jā॑riṣuḥ | yad va॑ści॒traṃ yu॒geyu॑ge॒ navyaṃ॒ ghoṣā॒dama॑rtyam | a॒smāsu॒ tanma॑ruto॒ yacca॑ du॒ṣṭaraṃ॑ didhṛ॒tā yacca॑ du॒ṣṭara॑m || ८ || da॒dhyaṅ ha॑ me ja॒nuṣaṃ॒ pūrvo॒ aṅgi॑rāḥ pri॒yame॑dha॒: kaṇvo॒ atri॒rmanu॑rvidu॒ste me॒ pūrve॒ manu॑rviduḥ | teṣāṃ॑ de॒veṣvāya॑tira॒smākaṃ॒ teṣu॒ nābha॑yaḥ | teṣāṃ॑ pa॒dena॒ mahyā na॑me gi॒rendrā॒gnī ā na॑me gi॒rā || ९ || hotā॑ yakṣad va॒nino॑ vanta॒ vāryaṃ॒ bṛha॒spati॑ryajati ve॒na u॒kṣabhi॑: puru॒vāre॑bhiru॒kṣabhi॑: | ja॒gṛ॒bhmā dū॒raā॑diśaṃ॒ śloka॒madre॒radha॒ tmanā॑ | adhā॑rayadara॒rindā॑ni su॒kratu॑: pu॒rū sadmā॑ni su॒kratu॑: || १० || ye de॑vāso di॒vyekā॑daśa॒ stha pṛ॑thi॒vyāmadhyekā॑daśa॒ stha | a॒psu॒kṣito॑ mahi॒naikā॑daśa॒ stha te de॑vāso ya॒jñami॒maṃ ju॑ṣadhvam || ११ ||