३ परुच्छेपो दैवोदासिः। मित्रावरुणौ।अतिशक्वरी।
सु॒षु॒मा या॑त॒मद्रि॑भि॒र्गोश्री॑ता मत्स॒रा इ॒मे सोमा॑सो मत्स॒रा इ॒मे ।
आ रा॑जाना दिविस्पृशा ऽस्म॒त्रा ग॑न्त॒मुप॑ नः ।
इ॒मे वां॑ मित्रावरुणा॒ गवा॑शिर॒: सोमा॑: शु॒क्रा गवा॑शिरः ॥१॥
इ॒म आ या॑त॒मिन्द॑व॒: सोमा॑सो॒ दध्या॑शिरः सु॒तासो॒ दध्या॑शिरः ।
उ॒त वा॑मु॒षसो॑ बु॒धि सा॒कं सूर्य॑स्य र॒श्मिभि॑: ।
सु॒तो मि॒त्राय॒ वरु॑णाय पी॒तये॒ चारु॑र्ऋ॒ताय॑ पी॒तये॑ ॥२॥
तां वां॑ धे॒नुं न वा॑स॒रीमं॒शुं दु॑ह॒न्त्यद्रि॑भि॒: सोमं॑ दुह॒न्त्यद्रि॑भिः ।
अ॒स्म॒त्रा ग॑न्त॒मुप॑ नो॒ऽर्वाञ्चा॒ सोम॑पीतये ।
अ॒यं वां॑ मित्रावरुणा॒ नृभि॑: सु॒तः सोम॒ आ पी॒तये॑ सु॒तः ॥३॥
३ parucchepo daivodāsiḥ | mitrāvaruṇau | atiśakvarī | su॒ṣu॒mā yā॑ta॒madri॑bhi॒rgośrī॑tā matsa॒rā i॒me somā॑so matsa॒rā i॒me | ā rā॑jānā divispṛśā ’sma॒trā ga॑nta॒mupa॑ naḥ | i॒me vāṃ॑ mitrāvaruṇā॒ gavā॑śira॒: somā॑: śu॒krā gavā॑śiraḥ || १ || i॒ma ā yā॑ta॒minda॑va॒: somā॑so॒ dadhyā॑śiraḥ su॒tāso॒ dadhyā॑śiraḥ | u॒ta vā॑mu॒ṣaso॑ bu॒dhi sā॒kaṃ sūrya॑sya ra॒śmibhi॑: | su॒to mi॒trāya॒ varu॑ṇāya pī॒taye॒ cāru॑rṛ॒tāya॑ pī॒taye॑ || २ || tāṃ vāṃ॑ dhe॒nuṃ na vā॑sa॒rīmaṃ॒śuṃ du॑ha॒ntyadri॑bhi॒: somaṃ॑ duha॒ntyadri॑bhiḥ | a॒sma॒trā ga॑nta॒mupa॑ no॒’rvāñcā॒ soma॑pītaye | a॒yaṃ vāṃ॑ mitrāvaruṇā॒ nṛbhi॑: su॒taḥ soma॒ ā pī॒taye॑ su॒taḥ || ३ ||