१० परुच्छेपो दैवोदासिः । इन्द्रः। अत्यष्टिः, १० त्रिष्टुप्।
एन्द्र॑ या॒ह्युप॑ नः परा॒वतो॒ नायमच्छा॑ वि॒दथा॑नीव॒ सत्प॑ति॒रस्तं॒ राजे॑व॒ सत्प॑तिः ।
हवा॑महे त्वा व॒यं प्रय॑स्वन्तः सु॒ते सचा॑ ।
पु॒त्रासो॒ न पि॒तरं॒ वाज॑सातये॒ मंहि॑ष्ठं॒ वाज॑सातये ॥१॥
पिबा॒ सोम॑मिन्द्र सुवा॒नमद्रि॑भि॒: कोशे॑न सि॒क्तम॑व॒तं न वंस॑गस्तातृषा॒णो न वंस॑गः ।
मदा॑य हर्य॒ताय॑ ते तु॒विष्ट॑माय॒ धाय॑से ।
आ त्वा॑ यच्छन्तु ह॒रितो॒ न सूर्य॒महा॒ विश्वे॑व॒ सूर्य॑म् ॥२॥
अवि॑न्दद् दि॒वो निहि॑तं॒ गुहा॑ नि॒धिं वेर्न गर्भं॒ परि॑वीत॒मश्म॑न्यन॒न्ते अ॒न्तरश्म॑नि ।
व्र॒जं व॒ज्री गवा॑मिव॒ सिषा॑स॒न्नङ्गि॑रस्तमः ।
अपा॑वृणो॒दिष॒ इन्द्र॒: परी॑वृता॒ द्वार॒ इष॒: परी॑वृताः ॥३॥
दा॒दृ॒हा॒णो वज्र॒मिन्द्रो॒ गभ॑स्त्यो॒: क्षद्मे॑व ति॒ग्ममस॑नाय॒ सं श्य॑दहि॒हत्या॑य॒ सं श्य॑त् ।
सं॒वि॒व्या॒न ओज॑सा॒ शवो॑भिरिन्द्र म॒ज्मना॑ ।
तष्टे॑व वृ॒क्षं व॒निनो॒ नि वृ॑श्चसि पर॒श्वेव॒ नि वृ॑श्चसि ॥४॥
त्वं वृथा॑ न॒द्य॑ इन्द्र॒ सर्त॒वे ऽच्छा॑ समु॒द्रम॑सृजो॒ रथाँ॑ इव वाजय॒तो रथाँ॑ इव ।
इ॒त ऊ॒तीर॑युञ्जत समा॒नमर्थ॒मक्षि॑तम् ।
धे॒नूरि॑व॒ मन॑वे वि॒श्वदो॑हसो॒ जना॑य वि॒श्वदो॑हसः ॥५॥
इ॒मां ते॒ वाचं॑ वसू॒यन्त॑ आ॒यवो॒ रथं॒ न धीर॒: स्वपा॑ अतक्षिषुः सु॒म्नाय॒ त्वाम॑तक्षिषुः ।
शु॒म्भन्तो॒ जेन्यं॑ यथा॒ वाजे॑षु विप्र वा॒जिन॑म् ।
अत्य॑मिव॒ शव॑से सा॒तये॒ धना॒ विश्वा॒ धना॑नि सा॒तये॑ ॥६॥
भि॒नत् पुरो॑ नव॒तिमि॑न्द्र पू॒रवे॒ दिवो॑दासाय॒ महि॑ दा॒शुषे॑ नृतो॒ वज्रे॑ण दा॒शुषे॑ नृतो ।
अ॒ति॒थि॒ग्वाय॒ शम्ब॑रं गि॒रेरु॒ग्रो अवा॑भरत् ।
म॒हो धना॑नि॒ दय॑मान॒ ओज॑सा॒ विश्वा॒ धना॒न्योज॑सा ॥७॥
इन्द्र॑: स॒मत्सु॒ यज॑मान॒मार्यं॒ प्राव॒द् विश्वे॑षु श॒तमू॑तिरा॒जिषु॒ स्व॑र्मीह्लेष्वा॒जिषु॑ ।
मन॑वे॒ शास॑दव्र॒तान् त्वचं॑ कृ॒ष्णाम॑रन्धयत् ।
दक्ष॒न्न विश्वं॑ ततृषा॒णमो॑षति॒ न्य॑र्शसा॒नमो॑षति ॥८॥
सूर॑श्च॒क्रं प्र वृ॑हज्जा॒त ओज॑सा प्रपि॒त्वे वाच॑मरु॒णो मु॑षायतीशा॒न आ मु॑षायति ।
उ॒शना॒ यत् प॑रा॒वतो ऽज॑गन्नू॒तये॑ कवे ।
सु॒म्नानि॒ विश्वा॒ मनु॑षेव तु॒र्वणि॒रहा॒ विश्वे॑व तु॒र्वणि॑: ॥९॥
स नो॒ नव्ये॑भिर्वृषकर्मन्नु॒क्थैः पुरां॑ दर्तः पा॒युभि॑: पाहि श॒ग्मैः ।
दि॒वो॒दा॒सेभि॑रिन्द्र॒ स्तवा॑नो वावृधी॒था अहो॑भिरिव॒ द्यौः ॥१०॥
१० parucchepo daivodāsiḥ | indraḥ | atyaṣṭiḥ, १० triṣṭup | endra॑ yā॒hyupa॑ naḥ parā॒vato॒ nāyamacchā॑ vi॒dathā॑nīva॒ satpa॑ti॒rastaṃ॒ rāje॑va॒ satpa॑tiḥ | havā॑mahe tvā va॒yaṃ praya॑svantaḥ su॒te sacā॑ | pu॒trāso॒ na pi॒taraṃ॒ vāja॑sātaye॒ maṃhi॑ṣṭhaṃ॒ vāja॑sātaye || १ || pibā॒ soma॑mindra suvā॒namadri॑bhi॒: kośe॑na si॒ktama॑va॒taṃ na vaṃsa॑gastātṛṣā॒ṇo na vaṃsa॑gaḥ | madā॑ya harya॒tāya॑ te tu॒viṣṭa॑māya॒ dhāya॑se | ā tvā॑ yacchantu ha॒rito॒ na sūrya॒mahā॒ viśve॑va॒ sūrya॑m || २ || avi॑ndad di॒vo nihi॑taṃ॒ guhā॑ ni॒dhiṃ verna garbhaṃ॒ pari॑vīta॒maśma॑nyana॒nte a॒ntaraśma॑ni | vra॒jaṃ va॒jrī gavā॑miva॒ siṣā॑sa॒nnaṅgi॑rastamaḥ | apā॑vṛṇo॒diṣa॒ indra॒: parī॑vṛtā॒ dvāra॒ iṣa॒: parī॑vṛtāḥ || ३ || dā॒dṛ॒hā॒ṇo vajra॒mindro॒ gabha॑styo॒: kṣadme॑va ti॒gmamasa॑nāya॒ saṃ śya॑dahi॒hatyā॑ya॒ saṃ śya॑t | saṃ॒vi॒vyā॒na oja॑sā॒ śavo॑bhirindra ma॒jmanā॑ | taṣṭe॑va vṛ॒kṣaṃ va॒nino॒ ni vṛ॑ścasi para॒śveva॒ ni vṛ॑ścasi || ४ || tvaṃ vṛthā॑ na॒dya॑ indra॒ sarta॒ve ’cchā॑ samu॒drama॑sṛjo॒ rathām̐॑ iva vājaya॒to rathām̐॑ iva | i॒ta ū॒tīra॑yuñjata samā॒namartha॒makṣi॑tam | dhe॒nūri॑va॒ mana॑ve vi॒śvado॑haso॒ janā॑ya vi॒śvado॑hasaḥ || ५ || i॒māṃ te॒ vācaṃ॑ vasū॒yanta॑ ā॒yavo॒ rathaṃ॒ na dhīra॒: svapā॑ atakṣiṣuḥ su॒mnāya॒ tvāma॑takṣiṣuḥ | śu॒mbhanto॒ jenyaṃ॑ yathā॒ vāje॑ṣu vipra vā॒jina॑m | atya॑miva॒ śava॑se sā॒taye॒ dhanā॒ viśvā॒ dhanā॑ni sā॒taye॑ || ६ || bhi॒nat puro॑ nava॒timi॑ndra pū॒rave॒ divo॑dāsāya॒ mahi॑ dā॒śuṣe॑ nṛto॒ vajre॑ṇa dā॒śuṣe॑ nṛto | a॒ti॒thi॒gvāya॒ śamba॑raṃ gi॒reru॒gro avā॑bharat | ma॒ho dhanā॑ni॒ daya॑māna॒ oja॑sā॒ viśvā॒ dhanā॒nyoja॑sā || ७ || indra॑: sa॒matsu॒ yaja॑māna॒māryaṃ॒ prāva॒d viśve॑ṣu śa॒tamū॑tirā॒jiṣu॒ sva॑rmīhleṣvā॒jiṣu॑ | mana॑ve॒ śāsa॑davra॒tān tvacaṃ॑ kṛ॒ṣṇāma॑randhayat | dakṣa॒nna viśvaṃ॑ tatṛṣā॒ṇamo॑ṣati॒ nya॑rśasā॒namo॑ṣati || ८ || sūra॑śca॒kraṃ pra vṛ॑hajjā॒ta oja॑sā prapi॒tve vāca॑maru॒ṇo mu॑ṣāyatīśā॒na ā mu॑ṣāyati | u॒śanā॒ yat pa॑rā॒vato ’ja॑gannū॒taye॑ kave | su॒mnāni॒ viśvā॒ manu॑ṣeva tu॒rvaṇi॒rahā॒ viśve॑va tu॒rvaṇi॑: || ९ || sa no॒ navye॑bhirvṛṣakarmannu॒kthaiḥ purāṃ॑ dartaḥ pā॒yubhi॑: pāhi śa॒gmaiḥ | di॒vo॒dā॒sebhi॑rindra॒ stavā॑no vāvṛdhī॒thā aho॑bhiriva॒ dyauḥ || १० ||