१३ कक्षीवान् दैर्घतमस औशिजः। उषाः । त्रिष्टुप्।
उ॒षा उ॒च्छन्ती॑ समिधा॒ने अ॒ग्ना उ॒द्यन्त्सूर्य॑ उर्वि॒या ज्योति॑रश्रेत् ।
दे॒वो नो॒ अत्र॑ सवि॒ता न्वर्थं॒ प्रासा॑वीद् द्वि॒पत् प्र चतु॑ष्पदि॒त्यै ॥१॥
अमि॑नती॒ दैव्या॑नि व्र॒तानि॑ प्रमिन॒ती म॑नु॒ष्या॑ यु॒गानि॑ ।
ई॒युषी॑णामुप॒मा शश्व॑तीनामायती॒नां प्र॑थ॒मोषा व्य॑द्यौत् ॥२॥
ए॒षा दि॒वो दु॑हि॒ता प्रत्य॑दर्शि॒ ज्योति॒र्वसा॑ना सम॒ना पु॒रस्ता॑त् ।
ऋ॒तस्य॒ पन्था॒मन्वे॑ति सा॒धु प्र॑जान॒तीव॒ न दिशो॑ मिनाति ॥३॥
उपो॑ अदर्शि शु॒न्ध्युवो॒ न वक्षो॑ नो॒धा इ॑वा॒विर॑कृत प्रि॒याणि॑ ।
अ॒द्म॒सन्न स॑स॒तो बो॒धय॑न्ती शश्वत्त॒मागा॒त् पुन॑रे॒युषी॑णाम् ॥४॥
पूर्वे॒ अर्धे॒ रज॑सो अ॒प्त्यस्य॒ गवां॒ जनि॑त्र्यकृत॒ प्र के॒तुम् ।
व्यु॑ प्रथते वित॒रं वरी॑य॒ ओभा पृ॒णन्ती॑ पि॒त्रोरु॒पस्था॑ ॥५॥
ए॒वेदे॒षा पु॑रु॒तमा॑ दृ॒शे कं नाजा॑मिं॒ न परि॑ वृणक्ति जा॒मिम् ।
अ॒रे॒पसा॑ त॒न्वा॒ ३ शाश॑दाना॒ नार्भा॒दीष॑ते॒ न म॒हो वि॑भा॒ती ॥६॥
अ॒भ्रा॒तेव॑ पुं॒स ए॑ति प्रती॒ची ग॑र्ता॒रुगि॑व स॒नये॒ धना॑नाम् ।
जा॒येव॒ पत्य॑ उश॒ती सु॒वासा॑ उ॒षा ह॒स्रेव॒ नि रि॑णीते॒ अप्स॑: ॥७॥
स्वसा॒ स्वस्रे॒ ज्याय॑स्यै॒ योनि॑मारै॒गपै॑त्यस्याः प्रति॒चक्ष्ये॑व ।
व्यु॒च्छन्ती॑ र॒श्मिभि॒: सूर्य॑स्या॒ञ्ज्य॑ङ्क्ते समन॒गा इ॑व॒ व्राः ॥८॥
आ॒सां पूर्वा॑सा॒मह॑सु॒ स्वसॄ॑णा॒मप॑रा॒ पूर्वा॑म॒भ्ये॑ति प॒श्चात् ।
ताः प्र॑त्न॒वन्नव्य॑सीर्नू॒नम॒स्मे रे॒वदु॑च्छन्तु सु॒दिना॑ उ॒षास॑: ॥९॥
प्र बो॑धयोषः पृण॒तो म॑घो॒न्यबु॑ध्यमानाः प॒णय॑: ससन्तु ।
रे॒वदु॑च्छ म॒घव॑द्भ्यो मघोनि रे॒वत् स्तो॒त्रे सू॑नृते जा॒रय॑न्ती ॥१०॥
अवे॒यम॑श्वैद् युव॒तिः पु॒रस्ता॑द् यु॒ङ्क्ते गवा॑मरु॒णाना॒मनी॑कम् ।
वि नू॒नमु॑च्छा॒दस॑ति॒ प्र के॒तुर्गृ॒हंगृ॑ह॒मुप॑ तिष्ठाते अ॒ग्निः ॥११॥
उत् ते॒ वय॑श्चिद् वस॒तेर॑पप्त॒न् नर॑श्च॒ ये पि॑तु॒भाजो॒ व्यु॑ष्टौ ।
अ॒मा स॒ते व॑हसि॒ भूरि॑ वा॒ममुषो॑ देवि दा॒शुषे॒ मर्त्या॑य ॥१२॥
अस्तो॑ढ्वं स्तोम्या॒ ब्रह्म॑णा॒ मे ऽवी॑वृधध्वमुश॒तीरु॑षासः ।
यु॒ष्माकं॑ देवी॒रव॑सा सनेम सह॒स्रिणं॑ च श॒तिनं॑ च॒ वाज॑म् ॥१३॥
१३ kakṣīvān dairghatamasa auśijaḥ | uṣāḥ | triṣṭup | u॒ṣā u॒cchantī॑ samidhā॒ne a॒gnā u॒dyantsūrya॑ urvi॒yā jyoti॑raśret | de॒vo no॒ atra॑ savi॒tā nvarthaṃ॒ prāsā॑vīd dvi॒pat pra catu॑ṣpadi॒tyai || १ || ami॑natī॒ daivyā॑ni vra॒tāni॑ pramina॒tī ma॑nu॒ṣyā॑ yu॒gāni॑ | ī॒yuṣī॑ṇāmupa॒mā śaśva॑tīnāmāyatī॒nāṃ pra॑tha॒moṣā vya॑dyaut || २ || e॒ṣā di॒vo du॑hi॒tā pratya॑darśi॒ jyoti॒rvasā॑nā sama॒nā pu॒rastā॑t | ṛ॒tasya॒ panthā॒manve॑ti sā॒dhu pra॑jāna॒tīva॒ na diśo॑ mināti || ३ || upo॑ adarśi śu॒ndhyuvo॒ na vakṣo॑ no॒dhā i॑vā॒vira॑kṛta pri॒yāṇi॑ | a॒dma॒sanna sa॑sa॒to bo॒dhaya॑ntī śaśvatta॒māgā॒t puna॑re॒yuṣī॑ṇām || ४ || pūrve॒ ardhe॒ raja॑so a॒ptyasya॒ gavāṃ॒ jani॑tryakṛta॒ pra ke॒tum | vyu॑ prathate vita॒raṃ varī॑ya॒ obhā pṛ॒ṇantī॑ pi॒troru॒pasthā॑ || ५ || e॒vede॒ṣā pu॑ru॒tamā॑ dṛ॒śe kaṃ nājā॑miṃ॒ na pari॑ vṛṇakti jā॒mim | a॒re॒pasā॑ ta॒nvā॒ ३ śāśa॑dānā॒ nārbhā॒dīṣa॑te॒ na ma॒ho vi॑bhā॒tī || ६ || a॒bhrā॒teva॑ puṃ॒sa e॑ti pratī॒cī ga॑rtā॒rugi॑va sa॒naye॒ dhanā॑nām | jā॒yeva॒ patya॑ uśa॒tī su॒vāsā॑ u॒ṣā ha॒sreva॒ ni ri॑ṇīte॒ apsa॑: || ७ || svasā॒ svasre॒ jyāya॑syai॒ yoni॑mārai॒gapai॑tyasyāḥ prati॒cakṣye॑va | vyu॒cchantī॑ ra॒śmibhi॒: sūrya॑syā॒ñjya॑ṅkte samana॒gā i॑va॒ vrāḥ || ८ || ā॒sāṃ pūrvā॑sā॒maha॑su॒ svasṝ॑ṇā॒mapa॑rā॒ pūrvā॑ma॒bhye॑ti pa॒ścāt | tāḥ pra॑tna॒vannavya॑sīrnū॒nama॒sme re॒vadu॑cchantu su॒dinā॑ u॒ṣāsa॑: || ९ || pra bo॑dhayoṣaḥ pṛṇa॒to ma॑gho॒nyabu॑dhyamānāḥ pa॒ṇaya॑: sasantu | re॒vadu॑ccha ma॒ghava॑dbhyo maghoni re॒vat sto॒tre sū॑nṛte jā॒raya॑ntī || १० || ave॒yama॑śvaid yuva॒tiḥ pu॒rastā॑d yu॒ṅkte gavā॑maru॒ṇānā॒manī॑kam | vi nū॒namu॑cchā॒dasa॑ti॒ pra ke॒turgṛ॒haṃgṛ॑ha॒mupa॑ tiṣṭhāte a॒gniḥ || ११ || ut te॒ vaya॑ścid vasa॒tera॑papta॒n nara॑śca॒ ye pi॑tu॒bhājo॒ vyu॑ṣṭau | a॒mā sa॒te va॑hasi॒ bhūri॑ vā॒mamuṣo॑ devi dā॒śuṣe॒ martyā॑ya || १२ || asto॑ḍhvaṃ stomyā॒ brahma॑ṇā॒ me ’vī॑vṛdhadhvamuśa॒tīru॑ṣāsaḥ | yu॒ṣmākaṃ॑ devī॒rava॑sā sanema saha॒sriṇaṃ॑ ca śa॒tinaṃ॑ ca॒ vāja॑m || १३ ||