१३ कक्षीवान् दैर्घतमस औशिजः। उषाः । त्रिष्टुप्।
पृ॒थू रथो॒ दक्षि॑णाया अयो॒ज्यैनं॑ दे॒वासो॑ अ॒मृता॑सो अस्थुः ।
कृ॒ष्णादुद॑स्थाद॒र्या॒ ३ विहा॑या॒श्चिकि॑त्सन्ती॒ मानु॑षाय॒ क्षया॑य ॥१॥
पूर्वा॒ विश्व॑स्मा॒द् भुव॑नादबोधि॒ जय॑न्ती॒ वाजं॑ बृह॒ती सनु॑त्री ।
उ॒च्चा व्य॑ख्यद् युव॒तिः पु॑न॒र्भूरोषा अ॑गन् प्रथ॒मा पू॒र्वहू॑तौ ॥२॥
यद॒द्य भा॒गं वि॒भजा॑सि॒ नृभ्य॒ उषो॑ देवि मर्त्य॒त्रा सु॑जाते ।
दे॒वो नो॒ अत्र॑ सवि॒ता दमू॑ना॒ अना॑गसो वोचति॒ सूर्या॑य ॥३॥
गृ॒हंगृ॑हमह॒ना या॒त्यच्छा॑ दि॒वेदि॑वे॒ अधि॒ नामा॒ दधा॑ना ।
सिषा॑सन्ती द्योत॒ना शश्व॒दागा॒दग्र॑मग्र॒मिद् भ॑जते॒ वसू॑नाम् ॥४॥
भग॑स्य॒ स्वसा॒ वरु॑णस्य जा॒मिरुष॑: सूनृते प्रथ॒मा ज॑रस्व ।
प॒श्चा स द॑घ्या॒ यो अ॒घस्य॑ धा॒ता जये॑म॒ तं दक्षि॑णया॒ रथे॑न ॥५॥
उदी॑रतां सू॒नृता॒ उत् पुर॑न्धी॒रुद॒ग्नय॑: शुशुचा॒नासो॑ अस्थुः ।
स्पा॒र्हा वसू॑नि॒ तम॒साप॑गूह्ल॒विष्कृ॑ण्वन्त्यु॒षसो॑ विभा॒तीः ॥६॥
अपा॒न्यदेत्य॒भ्य १ न्यदे॑ति॒ विषु॑रूपे॒ अह॑नी॒ सं च॑रेते ।
प॒रि॒क्षितो॒स्तमो॑ अ॒न्या गुहा॑क॒रद्यौ॑दु॒षाः शोशु॑चता॒ रथे॑न ॥७॥
स॒दृशी॑र॒द्य स॒दृशी॒रिदु॒ श्वो दी॒र्घं स॑चन्ते॒ वरु॑णस्य॒ धाम॑ ।
अ॒न॒व॒द्यास्त्रिं॒शतं॒ योज॑ना॒न्येकै॑का॒ क्रतुं॒ परि॑ यन्ति स॒द्यः ॥८॥
जा॒न॒त्यह्न॑: प्रथ॒मस्य॒ नाम॑ शु॒क्रा कृ॒ष्णाद॑जनिष्ट श्विती॒ची ।
ऋ॒तस्य॒ योषा॒ न मि॑नाति॒ धामाह॑रहर्निष्कृ॒तमा॒चर॑न्ती ॥९॥
क॒न्ये॑व त॒न्वा॒ ३ शाश॑दानाँ॒ एषि॑ देवि दे॒वमिय॑क्षमाणम् ।
सं॒स्मय॑माना युव॒तिः पु॒रस्ता॑दा॒विर्वक्षां॑सि कृणुषे विभा॒ती ॥१०॥
सु॒सं॒का॒शा मा॒तृमृ॑ष्टेव॒ योषा॒विस्त॒न्वं॑ कृणुषे दृ॒शे कम् ।
भ॒द्रा त्वमु॑षो वित॒रं व्यु॑च्छ॒ न तत्ते॑ अ॒न्या उ॒षसो॑ नशन्त ॥११॥
अश्वा॑वती॒र्गोम॑तीर्वि॒श्ववा॑रा॒ यत॑माना र॒श्मिभि॒: सूर्य॑स्य ।
परा॑ च॒ यन्ति॒ पुन॒रा च॑ यन्ति भ॒द्रा नाम॒ वह॑माना उ॒षास॑: ॥१२॥
ऋ॒तस्य॑ र॒श्मिम॑नु॒यच्छ॑माना भ॒द्रम्भ॑द्रं॒ क्रतु॑म॒स्मासु॑ धेहि ।
उषो॑ नो अ॒द्य सु॒हवा॒ व्यु॑च्छा॒स्मासु॒ रायो॑ म॒घव॑त्सु च स्युः ॥१३॥
१३ kakṣīvān dairghatamasa auśijaḥ | uṣāḥ | triṣṭup | pṛ॒thū ratho॒ dakṣi॑ṇāyā ayo॒jyainaṃ॑ de॒vāso॑ a॒mṛtā॑so asthuḥ | kṛ॒ṣṇāduda॑sthāda॒ryā॒ ३ vihā॑yā॒ściki॑tsantī॒ mānu॑ṣāya॒ kṣayā॑ya || १ || pūrvā॒ viśva॑smā॒d bhuva॑nādabodhi॒ jaya॑ntī॒ vājaṃ॑ bṛha॒tī sanu॑trī | u॒ccā vya॑khyad yuva॒tiḥ pu॑na॒rbhūroṣā a॑gan pratha॒mā pū॒rvahū॑tau || २ || yada॒dya bhā॒gaṃ vi॒bhajā॑si॒ nṛbhya॒ uṣo॑ devi martya॒trā su॑jāte | de॒vo no॒ atra॑ savi॒tā damū॑nā॒ anā॑gaso vocati॒ sūryā॑ya || ३ || gṛ॒haṃgṛ॑hamaha॒nā yā॒tyacchā॑ di॒vedi॑ve॒ adhi॒ nāmā॒ dadhā॑nā | siṣā॑santī dyota॒nā śaśva॒dāgā॒dagra॑magra॒mid bha॑jate॒ vasū॑nām || ४ || bhaga॑sya॒ svasā॒ varu॑ṇasya jā॒miruṣa॑: sūnṛte pratha॒mā ja॑rasva | pa॒ścā sa da॑ghyā॒ yo a॒ghasya॑ dhā॒tā jaye॑ma॒ taṃ dakṣi॑ṇayā॒ rathe॑na || ५ || udī॑ratāṃ sū॒nṛtā॒ ut pura॑ndhī॒ruda॒gnaya॑: śuśucā॒nāso॑ asthuḥ | spā॒rhā vasū॑ni॒ tama॒sāpa॑gūhla॒viṣkṛ॑ṇvantyu॒ṣaso॑ vibhā॒tīḥ || ६ || apā॒nyadetya॒bhya १ nyade॑ti॒ viṣu॑rūpe॒ aha॑nī॒ saṃ ca॑rete | pa॒ri॒kṣito॒stamo॑ a॒nyā guhā॑ka॒radyau॑du॒ṣāḥ śośu॑catā॒ rathe॑na || ७ || sa॒dṛśī॑ra॒dya sa॒dṛśī॒ridu॒ śvo dī॒rghaṃ sa॑cante॒ varu॑ṇasya॒ dhāma॑ | a॒na॒va॒dyāstriṃ॒śataṃ॒ yoja॑nā॒nyekai॑kā॒ kratuṃ॒ pari॑ yanti sa॒dyaḥ || ८ || jā॒na॒tyahna॑: pratha॒masya॒ nāma॑ śu॒krā kṛ॒ṣṇāda॑janiṣṭa śvitī॒cī | ṛ॒tasya॒ yoṣā॒ na mi॑nāti॒ dhāmāha॑raharniṣkṛ॒tamā॒cara॑ntī || ९ || ka॒nye॑va ta॒nvā॒ ३ śāśa॑dānām॒̐ eṣi॑ devi de॒vamiya॑kṣamāṇam | saṃ॒smaya॑mānā yuva॒tiḥ pu॒rastā॑dā॒virvakṣāṃ॑si kṛṇuṣe vibhā॒tī || १० || su॒saṃ॒kā॒śā mā॒tṛmṛ॑ṣṭeva॒ yoṣā॒vista॒nvaṃ॑ kṛṇuṣe dṛ॒śe kam | bha॒drā tvamu॑ṣo vita॒raṃ vyu॑ccha॒ na tatte॑ a॒nyā u॒ṣaso॑ naśanta || ११ || aśvā॑vatī॒rgoma॑tīrvi॒śvavā॑rā॒ yata॑mānā ra॒śmibhi॒: sūrya॑sya | parā॑ ca॒ yanti॒ puna॒rā ca॑ yanti bha॒drā nāma॒ vaha॑mānā u॒ṣāsa॑: || १२ || ṛ॒tasya॑ ra॒śmima॑nu॒yaccha॑mānā bha॒drambha॑draṃ॒ kratu॑ma॒smāsu॑ dhehi | uṣo॑ no a॒dya su॒havā॒ vyu॑cchā॒smāsu॒ rāyo॑ ma॒ghava॑tsu ca syuḥ || १३ ||