१५ कक्षीवान् दैर्घतमस औशिजः। इन्द्रो विश्वे देवा वा। त्रिष्टुप्।
कदि॒त्था नॄँ: पात्रं॑ देवय॒तां श्रव॒द् गिरो॒ अङ्गि॑रसां तुर॒ण्यन् ।
प्र यदान॒ड्विश॒ आ ह॒र्म्यस्यो॒रु क्रं॑सते अध्व॒रे यज॑त्रः ॥१॥
स्तम्भी॑द्ध॒ द्यां स ध॒रुणं॑ प्रुषायदृ॒भुर्वाजा॑य॒ द्रवि॑णं॒ नरो॒ गोः ।
अनु॑ स्व॒जां म॑हि॒षश्च॑क्षत॒ व्रां मेना॒मश्व॑स्य॒ परि॑ मा॒तरं॒ गोः ॥२॥
नक्ष॒द्धव॑मरु॒णीः पू॒र्व्यं राट् तु॒रो वि॒शामङ्गि॑रसा॒मनु॒ द्यून् ।
तक्ष॒द् वज्रं॒ नियु॑तं त॒स्तम्भ॒द् द्यां चतु॑ष्पदे॒ नर्या॑य द्वि॒पादे॑ ॥३॥
अ॒स्य मदे॑ स्व॒र्यं॑ दा ऋ॒तायापी॑वृतमु॒स्रिया॑णा॒मनी॑कम् ।
यद्ध॑ प्र॒सर्गे॑ त्रिक॒कुम्नि॒वर्त॒दप॒ द्रुहो॒ मानु॑षस्य॒ दुरो॑ वः ॥४॥
तुभ्यं॒ पयो॒ यत् पि॒तरा॒वनी॑तां॒ राध॑: सु॒रेत॑स्तु॒रणे॑ भुर॒ण्यू ।
शुचि॒ यत् ते रेक्ण॒ आय॑जन्त सब॒र्दुघा॑या॒: पय॑ उ॒स्रिया॑याः ॥५॥
अध॒ प्र ज॑ज्ञे त॒रणि॑र्ममत्तु॒ प्र रो॑च्य॒स्या उ॒षसो॒ न सूर॑: ।
इन्दु॒र्येभि॒राष्ट॒ स्वेदु॑हव्यैः स्रु॒वेण॑ सि॒ञ्चञ्ज॒रणा॒भि धाम॑ ॥६॥
स्वि॒ध्मा यद् व॒नधि॑तिरप॒स्यात् सूरो॑ अध्व॒रे परि॒ रोध॑ना॒ गोः ।
यद्ध॑ प्र॒भासि॒ कृत्व्याँ॒ अनु॒ द्यूनन॑र्विशे प॒श्विषे॑ तु॒राय॑ ॥७॥
अ॒ष्टा म॒हो दि॒व आदो॒ हरी॑ इ॒ह द्यु॑म्ना॒साह॑म॒भि यो॑धा॒न उत्स॑म् ।
हरिं॒ यत्ते॑ म॒न्दिनं॑ दु॒क्षन् वृ॒धे गोर॑भस॒मद्रि॑भिर्वा॒ताप्य॑म् ॥८॥
त्वमा॑य॒सं प्रति॑ वर्तयो॒ गोर्दि॒वो अश्मा॑न॒मुप॑नीत॒मृभ्वा॑ ।
कुत्सा॑य॒ यत्र॑ पुरुहूत व॒न्वञ्छुष्ण॑मन॒न्तैः प॑रि॒यासि॑ व॒धैः ॥९॥
पु॒रा यत् सूर॒स्तम॑सो॒ अपी॑ते॒स्तम॑द्रिवः फलि॒गं हे॒तिम॑स्य ।
शुष्ण॑स्य चि॒त् परि॑हितं॒ यदोजो॑ दि॒वस्परि॒ सुग्र॑थितं॒ तदाद॑: ॥१०॥
अनु॑ त्वा म॒ही पाज॑सी अच॒क्रे द्यावा॒क्षामा॑ मदतामिन्द्र॒ कर्म॑न् ।
त्वं वृ॒त्रमा॒शया॑नं सि॒रासु॑ म॒हो वज्रे॑ण सिष्वपो व॒राहु॑म् ॥११॥
त्वमि॑न्द्र॒ नर्यो॒ याँ अवो॒ नॄन् तिष्ठा॒ वात॑स्य सु॒युजो॒ वहि॑ष्ठान् ।
यं ते॑ का॒व्य उ॒शना॑ म॒न्दिनं॒ दाद् वृ॑त्र॒हणं॒ पार्यं॑ ततक्ष॒ वज्र॑म् ॥१२॥
त्वं सूरो॑ ह॒रितो॑ रामयो॒ नॄन् भर॑च्च॒क्रमेत॑शो॒ नायमि॑न्द्र ।
प्रास्य॑ पा॒रं न॑व॒तिं ना॒व्या॑ना॒मपि॑ क॒र्तम॑वर्त॒योऽय॑ज्यून् ॥१३॥
त्वं नो॑ अ॒स्या इ॑न्द्र दु॒र्हणा॑याः पा॒हि व॑ज्रिवो दुरि॒ताद॒भीके॑ ।
प्र नो॒ वाजा॑न् र॒थ्यो॒ ३ अश्व॑बुध्यानि॒षे य॑न्धि॒ श्रव॑से सू॒नृता॑यै ॥१४॥
मा सा ते॑ अ॒स्मत् सु॑म॒तिर्वि द॑स॒द् वाज॑प्रमह॒: समिषो॑ वरन्त ।
आ नो॑ भज मघव॒न् गोष्व॒र्यो मंहि॑ष्ठास्ते सध॒माद॑: स्याम ॥१५॥
१५ kakṣīvān dairghatamasa auśijaḥ | indro viśve devā vā | triṣṭup | kadi॒tthā nṝm̐: pātraṃ॑ devaya॒tāṃ śrava॒d giro॒ aṅgi॑rasāṃ tura॒ṇyan | pra yadāna॒ḍviśa॒ ā ha॒rmyasyo॒ru kraṃ॑sate adhva॒re yaja॑traḥ || १ || stambhī॑ddha॒ dyāṃ sa dha॒ruṇaṃ॑ pruṣāyadṛ॒bhurvājā॑ya॒ dravi॑ṇaṃ॒ naro॒ goḥ | anu॑ sva॒jāṃ ma॑hi॒ṣaśca॑kṣata॒ vrāṃ menā॒maśva॑sya॒ pari॑ mā॒taraṃ॒ goḥ || २ || nakṣa॒ddhava॑maru॒ṇīḥ pū॒rvyaṃ rāṭ tu॒ro vi॒śāmaṅgi॑rasā॒manu॒ dyūn | takṣa॒d vajraṃ॒ niyu॑taṃ ta॒stambha॒d dyāṃ catu॑ṣpade॒ naryā॑ya dvi॒pāde॑ || ३ || a॒sya made॑ sva॒ryaṃ॑ dā ṛ॒tāyāpī॑vṛtamu॒sriyā॑ṇā॒manī॑kam | yaddha॑ pra॒sarge॑ trika॒kumni॒varta॒dapa॒ druho॒ mānu॑ṣasya॒ duro॑ vaḥ || ४ || tubhyaṃ॒ payo॒ yat pi॒tarā॒vanī॑tāṃ॒ rādha॑: su॒reta॑stu॒raṇe॑ bhura॒ṇyū | śuci॒ yat te rekṇa॒ āya॑janta saba॒rdughā॑yā॒: paya॑ u॒sriyā॑yāḥ || ५ || adha॒ pra ja॑jñe ta॒raṇi॑rmamattu॒ pra ro॑cya॒syā u॒ṣaso॒ na sūra॑: | indu॒ryebhi॒rāṣṭa॒ svedu॑havyaiḥ sru॒veṇa॑ si॒ñcañja॒raṇā॒bhi dhāma॑ || ६ || svi॒dhmā yad va॒nadhi॑tirapa॒syāt sūro॑ adhva॒re pari॒ rodha॑nā॒ goḥ | yaddha॑ pra॒bhāsi॒ kṛtvyām॒̐ anu॒ dyūnana॑rviśe pa॒śviṣe॑ tu॒rāya॑ || ७ || a॒ṣṭā ma॒ho di॒va ādo॒ harī॑ i॒ha dyu॑mnā॒sāha॑ma॒bhi yo॑dhā॒na utsa॑m | hariṃ॒ yatte॑ ma॒ndinaṃ॑ du॒kṣan vṛ॒dhe gora॑bhasa॒madri॑bhirvā॒tāpya॑m || ८ || tvamā॑ya॒saṃ prati॑ vartayo॒ gordi॒vo aśmā॑na॒mupa॑nīta॒mṛbhvā॑ | kutsā॑ya॒ yatra॑ puruhūta va॒nvañchuṣṇa॑mana॒ntaiḥ pa॑ri॒yāsi॑ va॒dhaiḥ || ९ || pu॒rā yat sūra॒stama॑so॒ apī॑te॒stama॑drivaḥ phali॒gaṃ he॒tima॑sya | śuṣṇa॑sya ci॒t pari॑hitaṃ॒ yadojo॑ di॒vaspari॒ sugra॑thitaṃ॒ tadāda॑: || १० || anu॑ tvā ma॒hī pāja॑sī aca॒kre dyāvā॒kṣāmā॑ madatāmindra॒ karma॑n | tvaṃ vṛ॒tramā॒śayā॑naṃ si॒rāsu॑ ma॒ho vajre॑ṇa siṣvapo va॒rāhu॑m || ११ || tvami॑ndra॒ naryo॒ yām̐ avo॒ nṝn tiṣṭhā॒ vāta॑sya su॒yujo॒ vahi॑ṣṭhān | yaṃ te॑ kā॒vya u॒śanā॑ ma॒ndinaṃ॒ dād vṛ॑tra॒haṇaṃ॒ pāryaṃ॑ tatakṣa॒ vajra॑m || १२ || tvaṃ sūro॑ ha॒rito॑ rāmayo॒ nṝn bhara॑cca॒krameta॑śo॒ nāyami॑ndra | prāsya॑ pā॒raṃ na॑va॒tiṃ nā॒vyā॑nā॒mapi॑ ka॒rtama॑varta॒yo’ya॑jyūn || १३ || tvaṃ no॑ a॒syā i॑ndra du॒rhaṇā॑yāḥ pā॒hi va॑jrivo duri॒tāda॒bhīke॑ | pra no॒ vājā॑n ra॒thyo॒ ३ aśva॑budhyāni॒ṣe ya॑ndhi॒ śrava॑se sū॒nṛtā॑yai || १४ || mā sā te॑ a॒smat su॑ma॒tirvi da॑sa॒d vāja॑pramaha॒: samiṣo॑ varanta | ā no॑ bhaja maghava॒n goṣva॒ryo maṃhi॑ṣṭhāste sadha॒māda॑: syāma || १५ ||