१२ मेधातिथिः काण्वः। अग्निः,६ प्रथमपादस्य (निर्मथ्याहवनीयौ) अग्नी। गायत्री।
अ॒ग्निं दू॒तं वृ॑णीमहे॒ होता॑रं वि॒श्ववे॑दसम् । अ॒स्य य॒ज्ञस्य॑ सु॒क्रतु॑म् ॥१॥
अ॒ग्निम॑ग्निं॒ हवी॑मभि॒: सदा॑ हवन्त वि॒श्पति॑म् । ह॒व्य॒वाहं॑ पुरुप्रि॒यम् ॥२॥
अग्ने॑ दे॒वाँ इ॒हा व॑ह जज्ञा॒नो वृ॒क्तब॑र्हिषे । असि॒ होता॑ न॒ ईड्य॑: ॥३॥
ताँ उ॑श॒तो वि बो॑धय॒ यद॑ग्ने॒ यासि॑ दू॒त्य॑म् । दे॒वैरा स॑त्सि ब॒र्हिषि॑ ॥४॥
घृता॑हवन दीदिव॒: प्रति॑ ष्म॒ रिष॑तो दह । अग्ने॒ त्वं र॑क्ष॒स्विन॑: ॥५॥
अ॒ग्निना॒ग्निः समि॑ध्यते क॒विर्गृ॒हप॑ति॒र्युवा॑ । ह॒व्य॒वाड् जु॒ह्वा॑स्यः ॥६॥
क॒विम॒ग्निमुप॑ स्तुहि स॒त्यध॑र्माणमध्व॒रे । दे॒वम॑मीव॒चात॑नम् ॥७॥
यस्त्वाम॑ग्ने ह॒विष्प॑तिर्दू॒तं दे॑व सप॒र्यति॑ । तस्य॑ स्म प्रावि॒ता भ॑व ॥८॥
यो अ॒ग्निं दे॒ववी॑तये ह॒विष्माँ॑ आ॒विवा॑सति । तस्मै॑ पावक मृळय ॥९॥
स न॑: पावक दीदि॒वो ऽग्ने॑ दे॒वाँ इ॒हा व॑ह । उप॑ य॒ज्ञं ह॒विश्च॑ नः ॥१०॥
स न॒: स्तवा॑न॒ आ भ॑र गाय॒त्रेण॒ नवी॑यसा । र॒यिं वी॒रव॑ती॒मिष॑म् ॥११॥
अग्ने॑ शु॒क्रेण॑ शो॒चिषा॒ विश्वा॑भिर्दे॒वहू॑तिभिः । इ॒मं स्तोमं॑ जुषस्व नः ॥१२॥
१२ medhātithiḥ kāṇvaḥ | agniḥ,६ prathamapādasya (nirmathyāhavanīyau) agnī | gāyatrī | a॒gniṃ dū॒taṃ vṛ॑ṇīmahe॒ hotā॑raṃ vi॒śvave॑dasam | a॒sya ya॒jñasya॑ su॒kratu॑m || १ || a॒gnima॑gniṃ॒ havī॑mabhi॒: sadā॑ havanta vi॒śpati॑m | ha॒vya॒vāhaṃ॑ purupri॒yam || २ || agne॑ de॒vām̐ i॒hā va॑ha jajñā॒no vṛ॒ktaba॑rhiṣe | asi॒ hotā॑ na॒ īḍya॑: || ३ || tām̐ u॑śa॒to vi bo॑dhaya॒ yada॑gne॒ yāsi॑ dū॒tya॑m | de॒vairā sa॑tsi ba॒rhiṣi॑ || ४ || ghṛtā॑havana dīdiva॒: prati॑ ṣma॒ riṣa॑to daha | agne॒ tvaṃ ra॑kṣa॒svina॑: || ५ || a॒gninā॒gniḥ sami॑dhyate ka॒virgṛ॒hapa॑ti॒ryuvā॑ | ha॒vya॒vāḍ ju॒hvā॑syaḥ || ६ || ka॒vima॒gnimupa॑ stuhi sa॒tyadha॑rmāṇamadhva॒re | de॒vama॑mīva॒cāta॑nam || ७ || yastvāma॑gne ha॒viṣpa॑tirdū॒taṃ de॑va sapa॒ryati॑ | tasya॑ sma prāvi॒tā bha॑va || ८ || yo a॒gniṃ de॒vavī॑taye ha॒viṣmām̐॑ ā॒vivā॑sati | tasmai॑ pāvaka mṛḷaya || ९ || sa na॑: pāvaka dīdi॒vo ’gne॑ de॒vām̐ i॒hā va॑ha | upa॑ ya॒jñaṃ ha॒viśca॑ naḥ || १० || sa na॒: stavā॑na॒ ā bha॑ra gāya॒treṇa॒ navī॑yasā | ra॒yiṃ vī॒rava॑tī॒miṣa॑m || ११ || agne॑ śu॒kreṇa॑ śo॒ciṣā॒ viśvā॑bhirde॒vahū॑tibhiḥ | i॒maṃ stomaṃ॑ juṣasva naḥ || १२ ||