१० कक्षीवान् दैर्घतमस औशिजः। अश्विनौ। जगती।
आ वां॒ रथं॑ पुरुमा॒यं म॑नो॒जुवं॑ जी॒राश्वं॑ य॒ज्ञियं॑ जी॒वसे॑ हुवे ।
स॒हस्र॑केतुं व॒निनं॑ श॒तद्व॑सुं श्रुष्टी॒वानं॑ वरिवो॒धाम॒भि प्रय॑: ॥१॥
ऊ॒र्ध्वा धी॒तिः प्रत्य॑स्य॒ प्रया॑म॒न्यधा॑यि॒ शस्म॒न्त्सम॑यन्त॒ आ दिश॑: ।
स्वदा॑मि घ॒र्मं प्रति॑ यन्त्यू॒तय॒ आ वा॑मू॒र्जानी॒ रथ॑मश्विनारुहत् ॥२॥
सं यन्मि॒थः प॑स्पृधा॒नासो॒ अग्म॑त शु॒भे म॒खा अमि॑ता जा॒यवो॒ रणे॑ ।
यु॒वोरह॑ प्रव॒णे चे॑किते॒ रथो॒ यद॑श्विना॒ वह॑थः सू॒रिमा वर॑म् ॥३॥
यु॒वं भु॒ज्युं भु॒रमा॑णं॒ विभि॑र्ग॒तं स्वयु॑क्तिभिर्नि॒वह॑न्ता पि॒तृभ्य॒ आ ।
या॒सि॒ष्टं व॒र्तिर्वृ॑षणा विजे॒न्यं१ दिवो॑दासाय॒ महि॑ चेति वा॒मव॑: ॥४॥
यु॒वोर॑श्विना॒ वपु॑षे युवा॒युजं॒ रथं॒ वाणी॑ येमतुरस्य॒ शर्ध्य॑म् ।
आ वां॑ पति॒त्वं स॒ख्याय॑ ज॒ग्मुषी॒ योषा॑वृणीत॒ जेन्या॑ यु॒वां पती॑ ॥५॥
यु॒वं रे॒भं परि॑षूतेरुरुष्यथो हि॒मेन॑ घ॒र्मं परि॑तप्त॒मत्र॑ये ।
यु॒वं श॒योर॑व॒सं पि॑प्यथु॒र्गवि॒ प्र दी॒र्घेण॒ वन्द॑नस्ता॒र्यायु॑षा ॥६॥
यु॒वं वन्द॑नं॒ निर्ऋ॑तं जर॒ण्यया॒ रथं॒ न द॑स्रा कर॒णा समि॑न्वथः ।
क्षेत्रा॒दा विप्रं॑ जनथो विप॒न्यया॒ प्र वा॒मत्र॑ विध॒ते दं॒सना॑ भुवत् ॥७॥
अग॑च्छतं॒ कृप॑माणं परा॒वति॑ पि॒तुः स्वस्य॒ त्यज॑सा॒ निबा॑धितम् ।
स्व॑र्वतीरि॒त ऊ॒तीर्यु॒वोरह॑ चि॒त्रा अ॒भीके॑ अभवन्न॒भिष्ट॑यः ॥८॥
उ॒त स्या वां॒ मधु॑म॒न्मक्षि॑कारप॒न्मदे॒ सोम॑स्यौशि॒जो हु॑वन्यति ।
यु॒वं द॑धी॒चो मन॒ आ वि॑वास॒थो ऽथा॒ शिर॒: प्रति॑ वा॒मश्व्यं॑ वदत् ॥९॥
यु॒वं पे॒दवे॑ पुरु॒वार॑मश्विना स्पृ॒धां श्वे॒तं त॑रु॒तारं॑ दुवस्यथः ।
शर्यै॑र॒भिद्युं॒ पृत॑नासु दु॒ष्टरं॑ च॒र्कृत्य॒मिन्द्र॑मिव चर्षणी॒सह॑म् ॥१०॥
१० kakṣīvān dairghatamasa auśijaḥ | aśvinau | jagatī | ā vāṃ॒ rathaṃ॑ purumā॒yaṃ ma॑no॒juvaṃ॑ jī॒rāśvaṃ॑ ya॒jñiyaṃ॑ jī॒vase॑ huve | sa॒hasra॑ketuṃ va॒ninaṃ॑ śa॒tadva॑suṃ śruṣṭī॒vānaṃ॑ varivo॒dhāma॒bhi praya॑: || १ || ū॒rdhvā dhī॒tiḥ pratya॑sya॒ prayā॑ma॒nyadhā॑yi॒ śasma॒ntsama॑yanta॒ ā diśa॑: | svadā॑mi gha॒rmaṃ prati॑ yantyū॒taya॒ ā vā॑mū॒rjānī॒ ratha॑maśvināruhat || २ || saṃ yanmi॒thaḥ pa॑spṛdhā॒nāso॒ agma॑ta śu॒bhe ma॒khā ami॑tā jā॒yavo॒ raṇe॑ | yu॒voraha॑ prava॒ṇe ce॑kite॒ ratho॒ yada॑śvinā॒ vaha॑thaḥ sū॒rimā vara॑m || ३ || yu॒vaṃ bhu॒jyuṃ bhu॒ramā॑ṇaṃ॒ vibhi॑rga॒taṃ svayu॑ktibhirni॒vaha॑ntā pi॒tṛbhya॒ ā | yā॒si॒ṣṭaṃ va॒rtirvṛ॑ṣaṇā vije॒nyaṃ१ divo॑dāsāya॒ mahi॑ ceti vā॒mava॑: || ४ || yu॒vora॑śvinā॒ vapu॑ṣe yuvā॒yujaṃ॒ rathaṃ॒ vāṇī॑ yematurasya॒ śardhya॑m | ā vāṃ॑ pati॒tvaṃ sa॒khyāya॑ ja॒gmuṣī॒ yoṣā॑vṛṇīta॒ jenyā॑ yu॒vāṃ patī॑ || ५ || yu॒vaṃ re॒bhaṃ pari॑ṣūteruruṣyatho hi॒mena॑ gha॒rmaṃ pari॑tapta॒matra॑ye | yu॒vaṃ śa॒yora॑va॒saṃ pi॑pyathu॒rgavi॒ pra dī॒rgheṇa॒ vanda॑nastā॒ryāyu॑ṣā || ६ || yu॒vaṃ vanda॑naṃ॒ nirṛ॑taṃ jara॒ṇyayā॒ rathaṃ॒ na da॑srā kara॒ṇā sami॑nvathaḥ | kṣetrā॒dā vipraṃ॑ janatho vipa॒nyayā॒ pra vā॒matra॑ vidha॒te daṃ॒sanā॑ bhuvat || ७ || aga॑cchataṃ॒ kṛpa॑māṇaṃ parā॒vati॑ pi॒tuḥ svasya॒ tyaja॑sā॒ nibā॑dhitam | sva॑rvatīri॒ta ū॒tīryu॒voraha॑ ci॒trā a॒bhīke॑ abhavanna॒bhiṣṭa॑yaḥ || ८ || u॒ta syā vāṃ॒ madhu॑ma॒nmakṣi॑kārapa॒nmade॒ soma॑syauśi॒jo hu॑vanyati | yu॒vaṃ da॑dhī॒co mana॒ ā vi॑vāsa॒tho ’thā॒ śira॒: prati॑ vā॒maśvyaṃ॑ vadat || ९ || yu॒vaṃ pe॒dave॑ puru॒vāra॑maśvinā spṛ॒dhāṃ śve॒taṃ ta॑ru॒tāraṃ॑ duvasyathaḥ | śaryai॑ra॒bhidyuṃ॒ pṛta॑nāsu du॒ṣṭaraṃ॑ ca॒rkṛtya॒mindra॑miva carṣaṇī॒saha॑m || १० ||