३ कुत्स आङ्गिरसः। विश्वे देवाः। त्रिष्टुप्।
य॒ज्ञो दे॒वानां॒ प्रत्ये॑ति सु॒म्नमादि॑त्यासो॒ भव॑ता मृळ॒यन्त॑: ।
आ वो॒ऽर्वाची॑ सुम॒तिर्व॑वृत्यादं॒होश्चि॒द्या व॑रिवो॒वित्त॒रास॑त् ॥१॥
उप॑ नो दे॒वा अव॒सा ग॑म॒न्त्वङ्गि॑रसां॒ साम॑भिः स्तू॒यमा॑नाः ।
इन्द्र॑ इन्द्रि॒यैर्म॒रुतो॑ म॒रुद्भि॑रादि॒त्यैर्नो॒ अदि॑ति॒: शर्म॑ यंसत् ॥२॥
तन्न॒ इन्द्र॒स्तद् वरु॑ण॒स्तद॒ग्निस्तद॑र्य॒मा तत् स॑वि॒ता चनो॑ धात् ।
तन्नो॑ मि॒त्रो वरु॑णो मामहन्ता॒मदि॑ति॒: सिन्धु॑: पृथि॒वी उ॒त द्यौः ॥३॥
३ kutsa āṅgirasaḥ | viśve devāḥ | triṣṭup | ya॒jño de॒vānāṃ॒ pratye॑ti su॒mnamādi॑tyāso॒ bhava॑tā mṛḷa॒yanta॑: | ā vo॒’rvācī॑ suma॒tirva॑vṛtyādaṃ॒hości॒dyā va॑rivo॒vitta॒rāsa॑t || १ || upa॑ no de॒vā ava॒sā ga॑ma॒ntvaṅgi॑rasāṃ॒ sāma॑bhiḥ stū॒yamā॑nāḥ | indra॑ indri॒yairma॒ruto॑ ma॒rudbhi॑rādi॒tyairno॒ adi॑ti॒: śarma॑ yaṃsat || २ || tanna॒ indra॒stad varu॑ṇa॒stada॒gnistada॑rya॒mā tat sa॑vi॒tā cano॑ dhāt | tanno॑ mi॒tro varu॑ṇo māmahantā॒madi॑ti॒: sindhu॑: pṛthi॒vī u॒ta dyauḥ || ३ ||