१९ वार्षागिराः ऋज्रा श्वाऽम्बरीष-सहदेव-भयमान-सुराधसः। इन्द्रः। त्रिष्टुप्।
स यो वृषा॒ वृष्ण्ये॑भि॒: समो॑का म॒हो दि॒वः पृ॑थि॒व्याश्च॑ स॒म्राट् ।
स॒ती॒नस॑त्वा॒ हव्यो॒ भरे॑षु म॒रुत्वा॑न् नो भव॒त्विन्द्र॑ ऊ॒ती ॥१॥
यस्याना॑प्त॒: सूर्य॑स्येव॒ यामो॒ भरे॑भरे वृत्र॒हा शुष्मो॒ अस्ति॑ ।
वृष॑न्तम॒: सखि॑भि॒: स्वेभि॒रेवै॑र्म॒रुत्वा॑न् नो भव॒त्विन्द्र॑ ऊ॒ती ॥२॥
दि॒वो न यस्य॒ रेत॑सो॒ दुघा॑ना॒: पन्था॑सो॒ यन्ति॒ शव॒साप॑रीताः ।
त॒रद्द्वे॑षाः सास॒हिः पौंस्ये॑भिर्म॒रुत्वा॑न् नो भव॒त्विन्द्र॑ ऊ॒ती ॥३॥
सो अङ्गि॑रोभि॒रङ्गि॑रस्तमो भू॒द् वृषा॒ वृष॑भि॒: सखि॑भि॒: सखा॒ सन् ।
ऋ॒ग्मिभि॑र्ऋग्मी गा॒तुभि॒र्ज्येष्ठो॑ म॒रुत्वा॑न् नो भव॒त्विन्द्र॑ ऊ॒ती ॥४॥
स सू॒नुभि॒र्न रु॒द्रेभि॒र्ऋभ्वा॑ नृ॒षाह्ये॑ सास॒ह्वाँ अ॒मित्रा॑न् ।
सनी॑ळेभिः श्रव॒स्या॑नि॒ तूर्व॑न् म॒रुत्वा॑न् नो भव॒त्विन्द्र॑ ऊ॒ती ॥५॥
स म॑न्यु॒मीः स॒मद॑नस्य क॒र्ता ऽस्माके॑भि॒र्नृभि॒: सूर्यं॑ सनत् ।
अ॒स्मिन्नह॒न्त्सत्प॑तिः पुरुहू॒तो म॒रुत्वा॑न् नो भव॒त्विन्द्र॑ ऊ॒ती ॥६॥
तमू॒तयो॑ रणय॒ञ्छूर॑सातौ॒ तं क्षेम॑स्य क्षि॒तय॑: कृण्वत॒ त्राम् ।
स विश्व॑स्य क॒रुण॑स्येश॒ एको॑ म॒रुत्वा॑न् नो भव॒त्विन्द्र॑ ऊ॒ती ॥७॥
तम॑प्सन्त॒ शव॑स उत्स॒वेषु॒ नरो॒ नर॒मव॑से॒ तं धना॑य ।
सो अ॒न्धे चि॒त् तम॑सि॒ ज्योति॑र्विदन् म॒रुत्वा॑न् नो भव॒त्विन्द्र॑ ऊ॒ती ॥८॥
स स॒व्येन॑ यमति॒ व्राध॑तश्चि॒त् स द॑क्षि॒णे संगृ॑भीता कृ॒तानि॑ ।
स की॒रिणा॑ चि॒त् सनि॑ता॒ धना॑नि म॒रुत्वा॑न् नो भव॒त्विन्द्र॑ ऊ॒ती ॥९॥
स ग्रामे॑भि॒: सनि॑ता॒ स रथे॑भिर्वि॒दे विश्वा॑भिः कृ॒ष्टिभि॒र्न्व१द्य ।
स पौंस्ये॑भिरभि॒भूरश॑स्तीर्म॒रुत्वा॑न् नो भव॒त्विन्द्र॑ ऊ॒ती ॥१०॥
स जा॒मिभि॒र्यत् स॒मजा॑ति मी॒ह्ले ऽजा॑मिभिर्वा पुरुहू॒त एवै॑: ।
अ॒पां तो॒कस्य॒ तन॑यस्य जे॒षे म॒रुत्वा॑न् नो भव॒त्विन्द्र॑ ऊ॒ती ॥
स व॑ज्र॒भृद् द॑स्यु॒हा भी॒म उ॒ग्रः स॒हस्र॑चेताः श॒तनी॑थ॒ ऋभ्वा॑ ।
च॒म्री॒षो न शव॑सा॒ पाञ्च॑जन्यो म॒रुत्वा॑न् नो भव॒त्विन्द्र॑ ऊ॒ती ॥१२॥
तस्य॒ वज्र॑: क्रन्दति॒ स्मत् स्व॒र्षा दि॒वो न त्वे॒षो र॒वथ॒: शिमी॑वान् ।
तं स॑चन्ते स॒नय॒स्तं धना॑नि म॒रुत्वा॑न् नो भव॒त्विन्द्र॑ ऊ॒ती ॥१३॥
यस्याज॑स्रं॒ शव॑सा॒ मान॑मु॒क्थं प॑रिभु॒जद् रोद॑सी वि॒श्वत॑: सीम् ।
स पा॑रिष॒त् क्रतु॑भिर्मन्दसा॒नो म॒रुत्वा॑न् नो भव॒त्विन्द्र॑ ऊ॒ती ॥१४॥
न यस्य॑ दे॒वा दे॒वता॒ न मर्ता॒ आप॑श्च॒न शव॑सो॒ अन्त॑मा॒पुः ।
स प्र॒रिक्वा॒ त्वक्ष॑सा॒ क्ष्मो दि॒वश्च॑ म॒रुत्वा॑न् नो भव॒त्विन्द्र॑ ऊ॒ती ॥१५॥
रो॒हिच्छ्या॒वा सु॒मदं॑शुर्लला॒मीर्द्यु॒क्षा रा॒य ऋ॒ज्राश्व॑स्य ।
वृष॑ण्वन्तं॒ बिभ्र॑ती धू॒र्षु रथं॑ म॒न्द्रा चि॑केत॒ नाहु॑षीषु वि॒क्षु ॥१६॥
ए॒तत् त्यत् त॑ इन्द्र॒ वृष्ण॑ उ॒क्थं वा॑र्षागि॒रा अ॒भि गृ॑णन्ति॒ राध॑: ।
ऋ॒ज्राश्व॒: प्रष्टि॑भिरम्ब॒रीष॑: स॒हदे॑वो॒ भय॑मानः सु॒राधा॑: ॥१७॥
दस्यू॒ञ्छिम्यूँ॑श्च पुरुहू॒त एवै॑र्ह॒त्वा पृ॑थि॒व्यां शर्वा॒ नि ब॑र्हीत् ।
सन॒त् क्षेत्रं॒ सखि॑भिः श्वि॒त्न्येभि॒: सन॒त् सूर्यं॒ सन॑द॒पः सु॒वज्र॑: ॥१८॥
वि॒श्वाहेन्द्रो॑ अधिव॒क्ता नो॑ अ॒स्त्वप॑रिह्वृताः सनुयाम॒ वाज॑म् ।
तन्नो॑ मि॒त्रो वरु॑णो मामहन्ता॒मदि॑ति॒: सिन्धु॑: पृथि॒वी उ॒त द्यौः ॥१९॥
१९ vārṣāgirāḥ ṛjrā śvā’mbarīṣa-sahadeva-bhayamāna-surādhasaḥ | indraḥ | triṣṭup | sa yo vṛṣā॒ vṛṣṇye॑bhi॒: samo॑kā ma॒ho di॒vaḥ pṛ॑thi॒vyāśca॑ sa॒mrāṭ | sa॒tī॒nasa॑tvā॒ havyo॒ bhare॑ṣu ma॒rutvā॑n no bhava॒tvindra॑ ū॒tī || १ || yasyānā॑pta॒: sūrya॑syeva॒ yāmo॒ bhare॑bhare vṛtra॒hā śuṣmo॒ asti॑ | vṛṣa॑ntama॒: sakhi॑bhi॒: svebhi॒revai॑rma॒rutvā॑n no bhava॒tvindra॑ ū॒tī || २ || di॒vo na yasya॒ reta॑so॒ dughā॑nā॒: panthā॑so॒ yanti॒ śava॒sāpa॑rītāḥ | ta॒raddve॑ṣāḥ sāsa॒hiḥ pauṃsye॑bhirma॒rutvā॑n no bhava॒tvindra॑ ū॒tī || ३ || so aṅgi॑robhi॒raṅgi॑rastamo bhū॒d vṛṣā॒ vṛṣa॑bhi॒: sakhi॑bhi॒: sakhā॒ san | ṛ॒gmibhi॑rṛgmī gā॒tubhi॒rjyeṣṭho॑ ma॒rutvā॑n no bhava॒tvindra॑ ū॒tī || ४ || sa sū॒nubhi॒rna ru॒drebhi॒rṛbhvā॑ nṛ॒ṣāhye॑ sāsa॒hvām̐ a॒mitrā॑n | sanī॑ḷebhiḥ śrava॒syā॑ni॒ tūrva॑n ma॒rutvā॑n no bhava॒tvindra॑ ū॒tī || ५ || sa ma॑nyu॒mīḥ sa॒mada॑nasya ka॒rtā ’smāke॑bhi॒rnṛbhi॒: sūryaṃ॑ sanat | a॒sminnaha॒ntsatpa॑tiḥ puruhū॒to ma॒rutvā॑n no bhava॒tvindra॑ ū॒tī || ६ || tamū॒tayo॑ raṇaya॒ñchūra॑sātau॒ taṃ kṣema॑sya kṣi॒taya॑: kṛṇvata॒ trām | sa viśva॑sya ka॒ruṇa॑syeśa॒ eko॑ ma॒rutvā॑n no bhava॒tvindra॑ ū॒tī || ७ || tama॑psanta॒ śava॑sa utsa॒veṣu॒ naro॒ nara॒mava॑se॒ taṃ dhanā॑ya | so a॒ndhe ci॒t tama॑si॒ jyoti॑rvidan ma॒rutvā॑n no bhava॒tvindra॑ ū॒tī || ८ || sa sa॒vyena॑ yamati॒ vrādha॑taści॒t sa da॑kṣi॒ṇe saṃgṛ॑bhītā kṛ॒tāni॑ | sa kī॒riṇā॑ ci॒t sani॑tā॒ dhanā॑ni ma॒rutvā॑n no bhava॒tvindra॑ ū॒tī || ९ || sa grāme॑bhi॒: sani॑tā॒ sa rathe॑bhirvi॒de viśvā॑bhiḥ kṛ॒ṣṭibhi॒rnva१dya | sa pauṃsye॑bhirabhi॒bhūraśa॑stīrma॒rutvā॑n no bhava॒tvindra॑ ū॒tī || १० || sa jā॒mibhi॒ryat sa॒majā॑ti mī॒hle ’jā॑mibhirvā puruhū॒ta evai॑: | a॒pāṃ to॒kasya॒ tana॑yasya je॒ṣe ma॒rutvā॑n no bhava॒tvindra॑ ū॒tī || sa va॑jra॒bhṛd da॑syu॒hā bhī॒ma u॒graḥ sa॒hasra॑cetāḥ śa॒tanī॑tha॒ ṛbhvā॑ | ca॒mrī॒ṣo na śava॑sā॒ pāñca॑janyo ma॒rutvā॑n no bhava॒tvindra॑ ū॒tī || १२ || tasya॒ vajra॑: krandati॒ smat sva॒rṣā di॒vo na tve॒ṣo ra॒vatha॒: śimī॑vān | taṃ sa॑cante sa॒naya॒staṃ dhanā॑ni ma॒rutvā॑n no bhava॒tvindra॑ ū॒tī || १३ || yasyāja॑sraṃ॒ śava॑sā॒ māna॑mu॒kthaṃ pa॑ribhu॒jad roda॑sī vi॒śvata॑: sīm | sa pā॑riṣa॒t kratu॑bhirmandasā॒no ma॒rutvā॑n no bhava॒tvindra॑ ū॒tī || १४ || na yasya॑ de॒vā de॒vatā॒ na martā॒ āpa॑śca॒na śava॑so॒ anta॑mā॒puḥ | sa pra॒rikvā॒ tvakṣa॑sā॒ kṣmo di॒vaśca॑ ma॒rutvā॑n no bhava॒tvindra॑ ū॒tī || १५ || ro॒hicchyā॒vā su॒madaṃ॑śurlalā॒mīrdyu॒kṣā rā॒ya ṛ॒jrāśva॑sya | vṛṣa॑ṇvantaṃ॒ bibhra॑tī dhū॒rṣu rathaṃ॑ ma॒ndrā ci॑keta॒ nāhu॑ṣīṣu vi॒kṣu || १६ || e॒tat tyat ta॑ indra॒ vṛṣṇa॑ u॒kthaṃ vā॑rṣāgi॒rā a॒bhi gṛ॑ṇanti॒ rādha॑: | ṛ॒jrāśva॒: praṣṭi॑bhiramba॒rīṣa॑: sa॒hade॑vo॒ bhaya॑mānaḥ su॒rādhā॑: || १७ || dasyū॒ñchimyūm̐॑śca puruhū॒ta evai॑rha॒tvā pṛ॑thi॒vyāṃ śarvā॒ ni ba॑rhīt | sana॒t kṣetraṃ॒ sakhi॑bhiḥ śvi॒tnyebhi॒: sana॒t sūryaṃ॒ sana॑da॒paḥ su॒vajra॑: || १८ || vi॒śvāhendro॑ adhiva॒ktā no॑ a॒stvapa॑rihvṛtāḥ sanuyāma॒ vāja॑m | tanno॑ mi॒tro varu॑ṇo māmahantā॒madi॑ti॒: sindhu॑: pṛthi॒vī u॒ta dyauḥ || १९ ||