९ मधुच्छन्दा वैश्वामित्रः । अग्निः। गायत्री।
अ॒ग्निमी॑ळे पु॒रोहि॑तं य॒ज्ञस्य॑ दे॒वमृ॒त्विज॑म्। होता॑रं रत्न॒धात॑मम्॥१॥
अ॒ग्निः पूर्वे॑भि॒र्ऋषि॑भि॒रीड्यो॒ नूत॑नैरु॒त। स दे॒वाँ एह व॑क्षति॥२॥
अ॒ग्निना॑ र॒यिम॑श्नव॒त् पोष॑मे॒व दि॒वेदि॑वे। य॒शसं॑ वी॒रव॑त्तमम्॥३॥
अग्ने॒ यं य॒ज्ञम॑ध्व॒रं वि॒श्वत॑: परि॒भूरसि॑। स इद् दे॒वेषु॑ गच्छति॥४॥
अ॒ग्निर्होता॑ क॒विक्र॑तुः स॒त्यश्चि॒त्रश्र॑वस्तमः। दे॒वो दे॒वेभि॒रा ग॑मत्॥५॥
यद॒ङ्ग दा॒शुषे॒ त्वमग्ने॑ भ॒द्रं क॑रि॒ष्यसि॑। तवेत् तत् स॒त्यम॑ङ्गिरः॥६॥
उप॑ त्वाग्ने दि॒वेदि॑वे॒ दोषा॑वस्तर्धि॒या व॒यम्। नमो॒ भर॑न्त॒ एम॑सि॥७॥
राज॑न्तमध्व॒राणां॑ गो॒पामृ॒तस्य॒ दीदि॑विम्। वर्ध॑मानं॒ स्वे दमे॑॥८॥
स न॑: पि॒तेव॑ सू॒नवे ऽग्ने॑ सूपाय॒नो भ॑व। सच॑स्वा नः स्व॒स्तये॑॥९॥
९ madhucchandā vaiśvāmitraḥ | agniḥ | gāyatrī | a॒gnimī॑ḷe pu॒rohi॑taṃ ya॒jñasya॑ de॒vamṛ॒tvija॑m | hotā॑raṃ ratna॒dhāta॑mam || १ || a॒gniḥ pūrve॑bhi॒rṛṣi॑bhi॒rīḍyo॒ nūta॑nairu॒ta | sa de॒vām̐ eha va॑kṣati || २ || a॒gninā॑ ra॒yima॑śnava॒t poṣa॑me॒va di॒vedi॑ve | ya॒śasaṃ॑ vī॒rava॑ttamam || ३ || agne॒ yaṃ ya॒jñama॑dhva॒raṃ vi॒śvata॑: pari॒bhūrasi॑ | sa id de॒veṣu॑ gacchati || ४ || a॒gnirhotā॑ ka॒vikra॑tuḥ sa॒tyaści॒traśra॑vastamaḥ | de॒vo de॒vebhi॒rā ga॑mat || ५ || yada॒ṅga dā॒śuṣe॒ tvamagne॑ bha॒draṃ ka॑ri॒ṣyasi॑ | tavet tat sa॒tyama॑ṅgiraḥ || ६ || upa॑ tvāgne di॒vedi॑ve॒ doṣā॑vastardhi॒yā va॒yam | namo॒ bhara॑nta॒ ema॑si || ७ || rāja॑ntamadhva॒rāṇāṃ॑ go॒pāmṛ॒tasya॒ dīdi॑vim | vardha॑mānaṃ॒ sve dame॑ || ८ || sa na॑: pi॒teva॑ sū॒nave ’gne॑ sūpāya॒no bha॑va | saca॑svā naḥ sva॒staye॑ || ९ ||