Adhyay 9

puruṣasya striyāś ca-eva dharme vartmani tiṣṭhatoḥ | saṃyoge viprayoge ca dharmān vakṣyāmi śāśvatān || 1 ||

asvatantrāḥ striyaḥ kāryāḥ puruṣaiḥ svair divā.niśam | viṣayeṣu ca sajjantyaḥ saṃsthāpyā ātmano vaśe || 2 ||

pitā rakṣati kaumāre bhartā rakṣati yauvane | rakṣanti sthavire putrā na strī svātantryam arhati || 3 ||

kāle '.dātā pitā vācyo vācyaś ca-an.upayan patiḥ | mṛte bhartari putras tu vācyo mātur arakṣitā || 4 ||

sūkṣmebhyo 'pi prasaṅgebhyaḥ striyo rakṣyā viśeṣataḥ | dvayor hi kulayoḥ śokam āvaheyur a.rakṣitāḥ || 5 ||

imaṃ hi sarvavarṇānāṃ paśyanto dharmam uttamam | yatante rakṣituṃ bhāryāṃ bhartāro durbalā api || 6 ||

svāṃ prasūtiṃ caritraṃ ca kulam ātmānam eva ca | svaṃ ca dharmaṃ prayatnena jāyāṃ rakṣan hi rakṣati || 7 ||

patir bhāryāṃ sampraviśya garbho bhūtvā-iha jāyate | jāyāyās tadd hi jāyātvaṃ yad asyāṃ jāyate punaḥ || 8 ||

yādṛśaṃ bhajate hi strī sutaṃ sūte tathāvidham | tasmāt prajāviśuddhi.arthaṃ striyaṃ rakṣet prayatnataḥ || 9 ||

na kaś cid yoṣitaḥ śaktaḥ prasahya parirakṣitum | etair upāyayogais tu śakyās tāḥ parirakṣitum || 10 ||

arthasya saṅgrahe ca-enāṃ vyaye ca-eva niyojayet | śauce dharme 'nnapaktyāṃ ca pāriṇāhyasya vekṣaṇe || 11 ||

a.rakṣitā gṛhe ruddhāḥ puruṣair āptakāribhiḥ | ātmānam ātmanā yās tu rakṣeyus tāḥ surakṣitāḥ || 12 ||

pānaṃ durjanasaṃsargaḥ patyā ca viraho 'ṭanam | svapno 'nyagehavāsaś ca nārīsandūṣaṇāni ṣaṭ || 13 ||

na-etā rūpaṃ parīkṣante na-āsāṃ vayasi saṃsthitiḥ | surūpaṃ vā virūpaṃ vā pumān ity eva bhuñjate || 14 ||

pauṃścalyāc calacittāc ca naisnehyāc ca svabhāvataḥ | rakṣitā yatnato 'pi-iha bhartṛṣv etā vikurvate || 15 ||

evaṃ svabhāvaṃ jñātvā-āsāṃ prajāpatinisargajam | paramaṃ yatnam ātiṣṭhet puruṣo rakṣaṇaṃ prati || 16 ||

śayyā.āsanam alaṅkāraṃ kāmaṃ krodham anārjavam | drohabhāvaṃ kucaryāṃ ca strībhyo manur akalpayat || 17 ||

na-asti strīṇāṃ kriyā mantrair iti dharme vyavasthitiḥ nir.indriyā hy a.mantrāś ca strībhyo 'nṛtam iti sthitiḥ || 18 ||

tathā ca śrutayo bahvyo nigītā nigameṣv api | svālakṣaṇyaparīkṣārthaṃ tāsāṃ śṛṇuta niṣkṛtīḥ || 19 ||

yan me mātā pralulubhe vicaranty a.pativratā | tan me retaḥ pitā vṛṅktām ity asya-etan nidarśanam || 20 ||

dhyāyaty aniṣṭaṃ yat kiṃ cit pāṇigrāhasya cetasā | tasya-eṣa vyabhicārasya nihnavaḥ samyag ucyate || 21 ||

yādṛg.guṇena bhartrā strī saṃyujyeta yathāvidhi | tādṛg.guṇā sā bhavati samudreṇa-iva nimnagā || 22 ||

akṣamālā vasiṣṭhena saṃyuktā-adhamayonijā | śāraṅgī mandapālena jagāma-abhyarhaṇīyatām || 23 ||

etāś ca-anyāś ca loke 'sminn apakṛṣṭaprasūtayaḥ | utkarṣaṃ yoṣitaḥ prāptāḥ svaiḥ svair bhartṛguṇaiḥ śubhaiḥ || 24 ||

eṣā-uditā lokayātrā nityaṃ strī.puṃsayoḥ śubhā | pretya-iha ca sukha.udarkān prajādharmān nibodhata || 25 ||

prajanārthaṃ mahā.bhāgāḥ pūja.arhā gṛhadīptayaḥ | striyaḥ śriyaś ca geheṣu na viśeṣo 'sti kaś cana || 26 ||

utpādanam apatyasya jātasya paripālanam | pratyahaṃ lokayātrāyāḥ pratyakṣaṃ strī nibandhanam || 27 ||

apatyaṃ dharmakāryāṇi śuśrūṣā ratir uttamā | dārā.adhīnas tathā svargaḥ pitṝṇām ātmanaś ca ha || 28 ||

patiṃ yā na-abhicarati mano.vāg.dehasaṃyatā | sā bhartṛlokān āpnoti sadbhiḥ sādhvī-iti ca-ucyate || 29 ||

vyabhicārāt tu bhartuḥ strī loke prāpnoti nindyatām | sṛgālayoniṃ ca-āpnoti pāparogaiś ca pīḍyate || 30 ||

putraṃ pratyuditaṃ sadbhiḥ pūrvajaiś ca maharṣibhiḥ | viśvajanyam imaṃ puṇyam upanyāsaṃ nibodhata || 31 ||

bhartari putraṃ vijānanti śrutidvaidhaṃ tu kartari | āhur utpādakaṃ ke cid apare kṣetriṇaṃ viduḥ || 32 ||

kṣetrabhūtā smṛtā nārī bījabhūtaḥ smṛtaḥ pumān | kṣetra.bījasamāyogāt sambhavaḥ sarvadehinām || 33 ||

viśiṣṭaṃ kutra cid bījaṃ strīyonis tv eva kutra cit | ubhayaṃ tu samaṃ yatra sā prasūtiḥ praśasyate || 34 ||

bījasya ca-eva yonyāś ca bījam utkṛṣṭam ucyate | sarvabhūtaprasūtir hi bījalakṣaṇalakṣitā || 35 ||

yādṛśaṃ tu-upyate bījaṃ kṣetre kāla.upapādite | tādṛg rohati tat tasmin bījaṃ svair vyañjitaṃ guṇaiḥ || 36 ||

iyaṃ bhūmir hi bhūtānāṃ śāśvatī yonir ucyate | na ca yoniguṇān kāṃś cid bījaṃ puṣyati puṣṭiṣu || 37 ||

bhūmāv apy ekakedāre kāla.uptāni kṛṣīvalaiḥ | nānārūpāṇi jāyante bījāni-iha svabhāvataḥ || 38 ||

vrīhayaḥ śālayo mudgās tilā māṣās tathā yavāḥ | yathābījaṃ prarohanti laśunāni-ikṣavas tathā || 39 ||

anyad uptaṃ jātam anyad ity etat-na-upapadyate | upyate yadd hi yad bījaṃ tat tad eva prarohati || 40 ||

tat prājñena vinītena jñāna.vijñānavedinā | āyuṣkāmena vaptavyaṃ na jātu parayoṣiti || 41 ||

atra gāthā vāyugītāḥ kīrtayanti purāvidaḥ | yathā bījaṃ na vaptavyaṃ puṃsā paraparigrahe || 42 ||

naśyati-iṣur yathā viddhaḥ khe viddham anuvidhyataḥ | tathā naśyati vai kṣipraṃ bījaṃ paraparigrahe || 43 ||

pṛthor api-imāṃ pṛthivīṃ bhāryāṃ pūrvavido viduḥ | sthāṇu.cchedasya kedāram āhuḥ śālyavato mṛgam || 44 ||

etāvān eva puruṣo yat-jāyā-ātmā prajā-iti ha | viprāḥ prāhus tathā ca-etad yo bhartā sā smṛta.aṅganā || 45 ||

na niṣkraya.visargābhyāṃ bhartur bhāryā vimucyate | evaṃ dharmaṃ vijānīmaḥ prāk prajāpatinirmitam || 46 ||

sakṛd aṃśo nipatati sakṛt kanyā pradīyate | sakṛd āha dadāni-iti trīṇy etāni satāṃ sakṛt || 47 ||

yathā go.'śva.uṣṭra.dāsīṣu mahiṣy.ajā.avikāsu ca | na-utpādakaḥ prajābhāgī tathā-eva-anyāṅganāsv api || 48 ||

ye 'kṣetriṇo bījavantaḥ parakṣetrapravāpiṇaḥ | te vai sasyasya jātasya na labhante phalaṃ kva cit || 49 ||

yad anyagoṣu vṛṣabho vatsānāṃ janayet-śatam | gominām eva te vatsā moghaṃ skanditam ārṣabham || 50 ||

tathā-eva-akṣetriṇo bījaṃ parakṣetrapravāpiṇaḥ | kurvanti kṣetriṇām arthaṃ na bījī labhate phalam || 51 ||

phalaṃ tv an.abhisandhāya kṣetriṇāṃ bījinām tathā | pratyakṣaṃ kṣetriṇām artho bījād yonir galīyasī || 52 ||

kriyābhyupagamāt tv etad bījārthaṃ yat pradīyate | tasya-iha bhāginau dṛṣṭau bījī kṣetrika eva ca || 53 ||

ogha.vātāhṛtaṃ bījaṃ yasya kṣetre prarohati | kṣetrikasya-eva tad bījaṃ na vaptā labhate phalam || 54 ||

eṣa dharmo gava.aśvasya dāsy.uṣṭra.aja.avikasya ca | vihaṅga.mahiṣīṇāṃ ca vijñeyaḥ prasavaṃ prati || 55 ||

etad vaḥ sāraphalgutvaṃ bīja.yonyoḥ prakīrtitam | ataḥ paraṃ pravakṣyāmi yoṣitāṃ dharmam āpadi || 56 ||

bhrātur jyeṣṭhasya bhāryā yā gurupatny anujasya sā | yavīyasas tu yā bhāryā snuṣā jyeṣṭhasya sā smṛtā || 57 ||

jyeṣṭho yavīyaso bhāryāṃ yavīyān vā-agrajastriyam | patitau bhavato gatvā niyuktāv apy anāpadi || 58 ||

devarād vā sapiṇḍād vā striyā samyak-niyuktayā | prajā-īpsitāa-adhigantavyā santānasya parikṣaye || 59 ||

vidhavāyāṃ niyuktas tu ghṛtākto vāgyato niśi | ekam utpādayet putraṃ na dvitīyaṃ kathaṃ cana || 60 ||

dvitīyam eke prajanaṃ manyante strīṣu tadvidaḥ | a.nirvṛtaṃ niyogārthaṃ paśyanto dharmatas tayoḥ || 61 ||

vidhavāyāṃ niyogārthe nirvṛtte tu yathāvidhi | guruvat-ca snuṣāvat-ca varteyātāṃ parasparam || 62 ||

niyuktau yau vidhiṃ hitvā varteyātāṃ tu kāmataḥ | tāv ubhau patitau syātāṃ snuṣāga.gurutalpagau || 63 ||

na-anyasmin vidhavā nārī niyoktavyā dvijātibhiḥ | anyasmin hi niyuñjānā dharmaṃ hanyuḥ sanātanam || 64 ||

na-udvāhikeṣu mantreṣu niyogaḥ kīrtyate kva cit | na vivāhavidhāv uktaṃ vidhavāvedanaṃ punaḥ || 65 ||

ayaṃ dvijair hi vidvadbhiḥ paśudharmo vigarhitaḥ | manuṣyāṇām api prokto vene rājyaṃ praśāsati || 66 ||

sa mahīm akhilāṃ bhuñjan rājarṣipravaraḥ purā | varṇānāṃ saṅkaraṃ cakre kāma.upahata.cetanaḥ || 67 ||

tataḥ prabhṛti yo mohāt pramīta.patikāṃ striyam | niyojayaty apatyārthaṃ taṃ vigarhanti sādhavaḥ || 68 ||

yasyā mriyeta kanyāyā vācā satye kṛte patiḥ | tām anena vidhānena nijo vindeta devaraḥ || 69 ||

yathāvidhi-adhigamya-enāṃ śukla.vastrāṃ śuci.vratām | mitho bhajeta-ā prasavāt sakṛt.sakṛd ṛtāv.ṛtau || 70 ||

na dattvā kasya cit kanyāṃ punar dadyād vicakṣaṇaḥ | dattvā punaḥ prayacchan hi prāpnoti puruṣānṛtam || 71 ||

vidhivat pratigṛhya-api tyajet kanyāṃ vigarhitām | vyādhitāṃ vipraduṣṭāṃ vā chadmanā ca-upapāditām || 72 ||

yas tu doṣavatīṃ kanyām an.ākhyāya-upapādayet | tasya tad vitathaṃ kuryāt kanyādātur durātmanaḥ || 73 ||

vidhāya vṛttiṃ bhāryāyāḥ pravaset kāryavān naraḥ | avṛttikarśitā hi strī praduṣyet sthitimaty api || 74 ||

vidhāya proṣite vṛttiṃ jīven niyamam āsthitā | proṣite tv a.vidhāya-eva jīvet-śilpair agarhitaiḥ || 75 ||

proṣito dharmakāryārthaṃ pratīkṣyo 'ṣṭau naraḥ samāḥ | vidyārthaṃ ṣaḍ yaśo.'rthaṃ vā kāmārthaṃ trīṃs tu vatsarān || 76 ||

saṃvatsaraṃ pratīkṣeta dviṣantīṃ yoṣitaṃ patiḥ | ūrdhvaṃ saṃvatsarāt tv enāṃ dāyaṃ hṛtvā na saṃvaset || 77 ||

atikrāmet pramattaṃ yā mattaṃ rogārtam eva vā | sā trīn māsān parityājyā vibhūṣaṇa.paricchadā || 78 ||

unmattaṃ patitaṃ klībam a.bījaṃ pāparogiṇam | na tyāgo 'sti dviṣantyāś ca na ca dāyāpavartanam || 79 ||

madyapā-asādhuvṛttā ca pratikūlā ca yā bhavet | vyādhitā vā-adhivettavyā hiṃsrā-arthaghnī ca sarvadā || 80 ||

vandhyāṣṭame 'dhivedyā-'bde daśame tu mṛta.prajā | ekādaśe strījananī sadyas tv apriyavādinī || 81 ||

yā rogiṇī syāt tu hitā sampannā ca-eva śīlataḥ | sā-anujñāpya-adhivettavyā na-avamānyā ca karhi cit || 82 ||

adhivinnā tu yā nārī nirgacched ruṣitā gṛhāt | sā sadyaḥ sanniroddhavyā tyājyā vā kulasannidhau || 83 ||

pratiṣiddhā-api ced yā tu madyam abhyudayeṣv api | prekṣā.samājaṃ gacched vā sā daṇḍyā kṛṣṇalāni ṣaṭ || 84 ||

yadi svāś ca-aparāś ca-eva vinderan yoṣito dvijāḥ | tāsāṃ varṇakrameṇa syāj jyeṣṭhyaṃ pūjā ca veśma ca || 85 ||

bhartuḥ śarīraśuśrūṣāṃ dharmakāryaṃ ca naityakam | svā ca-eva kuryāt sarveṣāṃ na-asvajātiḥ kathaṃ cana || 86 ||

yas tu tat kārayen mohāt sa.jātyā sthitayā-anyayā | yathā brāhmaṇacāṇḍālaḥ pūrvadṛṣṭas tathā-eva saḥ || 87 ||

utkṛṣṭāya-abhirūpāya varāya sadṛśāya ca | aprāptām api tāṃ tasmai kanyāṃ dadyād yathāvidhi || 88 ||

kāmam ā maraṇāt tiṣṭhed gṛhe kanyā-ṛtumaty api | na ca-eva-enāṃ prayaccet tu guṇa.hīnāya karhi cit || 89 ||

trīṇi varṣāṇy udīkṣeta kumāry ṛtumatī satī | ūrdhvaṃ tu kālād etasmād vindeta sadṛśaṃ patim || 90 ||

a.dīyamānā bhartāram adhigacched yadi svayam | na-enaḥ kiṃ cid avāpnoti na ca yaṃ sā-adhigacchati || 91 ||

alaṅkāraṃ na-ādadīta pitryaṃ kanyā svayaṃvarā | mātṛkaṃ bhrātṛdattaṃ vā stenā syād yadi taṃ haret || 92 ||

pitre na dadyāt-śulkaṃ tu kanyām ṛtumatīṃ haran | sa ca svāmyād atikrāmed ṛtūnāṃ pratirodhanāt || 93 ||

triṃśadvarṣo vahet kanyāṃ hṛdyāṃ dvādaśavārṣikīm | tryaṣṭavarṣo 'ṣṭavarṣāṃ vā dharme sīdati satvaraḥ || 94 ||

devadattāṃ patir bhāryāṃ vindate na-icchayā-ātmanaḥ | tāṃ sādhvīṃ bibhṛyān nityaṃ devānāṃ priyam ācaran || 95 ||

prajanārthaṃ striyaḥ sṛṣṭāḥ santānārthaṃ ca mānavaḥ | tasmāt sādhāraṇo dharmaḥ śrutau patnyā saha.uditaḥ || 96 ||

kanyāyāṃ datta.śulkāyāṃ mriyeta yadi śulkadaḥ | devarāya pradātavyā yadi kanyā-anumanyate || 97 ||

ādadīta na śūdro 'pi śulkaṃ duhitaraṃ dadan | śulkaṃ hi gṛhṇan kurute channaṃ duhitṛvikrayam || 98 ||

etat tu na pare cakrur na-apare jātu sādhavaḥ | yad anyasya pratijñāya punar anyasya dīyate || 99 ||

na-anuśuśruma jātu-etat pūrveṣv api hi janmasu | śulka.sañjñena mūlyena channaṃ duhitṛvikrayam || 100 ||

anyonyasya-avyabhicāro bhaved ā.maraṇāntikaḥ | eṣa dharmaḥ samāsena jñeyaḥ strī.puṃsayoḥ paraḥ || 101 ||

tathā nityaṃ yateyātāṃ strī.puṃsau tu kṛta.kriyau | yathā nābhicaretāṃ tau viyuktāv itaretaram || 102 ||

eṣa strī.puṃsayor ukto dharmo vo ratisaṃhitaḥ | āpady apatyaprāptiś ca dāyadharmaṃ nibodhata || 103 ||

ūrdhvaṃ pituś ca mātuś ca sametya bhrātaraḥ samam | bhajeran paitṛkaṃ riktham anīśās te hi jīvatoḥ || 104 ||

jyeṣṭha eva tu gṛhṇīyāt pitryaṃ dhanam aśeṣataḥ | śeṣās tam upajīveyur yathā-eva pitaraṃ tathā || 105 ||

jyeṣṭhena jātamātreṇa putrī bhavati mānavaḥ | pitṝṇām an.ṛṇaś ca-eva sa tasmāt sarvam arhati || 106 ||

yasminn ṛṇaṃ sannayati yena ca-anantyam aśnute | sa eva dharmajaḥ putraḥ kāmajān itarān viduḥ || 107 ||

pitā-iva pālayet pūtrān jyeṣṭho bhrātṝṇ yavīyasaḥ | putravat-ca-api varteran jyeṣṭhe bhrātari dharmataḥ || 108 ||

jyeṣṭhaḥ kulaṃ vardhayati vināśayati vā punaḥ | jyeṣṭhaḥ pūjyatamo loke jyeṣṭhaḥ sadbhir a.garhitaḥ || 109 ||

yo jyeṣṭho jyeṣṭha.vṛttiḥ syān mātā-iva sa pitā-iva saḥ | a.jyeṣṭhavṛttir yas tu syāt sa sampūjyas tu bandhuvat || 110 ||

evaṃ saha vaseyur vā pṛthag vā dharmakāmyayā | pṛthag vivardhate dharmas tasmād dharmyā pṛthakkriyā || 111 ||

jyeṣṭhasya viṃśa uddhāraḥ sarvadravyāc ca yad varam | tato 'rdhaṃ madhyamasya syāt turīyaṃ tu yavīyasaḥ || 112 ||

jyeṣṭhaś ca-eva kaniṣṭhaś ca saṃharetāṃ yathā.uditam | ye 'nye jyeṣṭha.kaniṣṭhābhyāṃ teṣāṃ syān madhyamaṃ dhanam || 113 ||

sarveṣāṃ dhanajātānām ādadīta-agryam agrajaḥ | yac ca sātiśayaṃ kiṃ cid daśataś ca-āpnuyād varam || 114 ||

uddhāro na daśasv asti sampannānāṃ svakarmasu | yat kiṃ cid eva deyaṃ tu jyāyase māna.vardhanam || 115 ||

evaṃ samuddhṛta.uddhāre samān aṃśān prakalpayet | uddhāre 'n.uddhṛte tv eṣām iyaṃ syād aṃśakalpanā || 116 ||

ekādhikaṃ harej jyeṣṭhaḥ putro 'dhyardhaṃ tato 'nujaḥ | aṃśam aṃśaṃ yavīyāṃsa iti dharmo vyavasthitaḥ || 117 ||

svebhyo 'ṃśebhyas tu kanyābhyaḥ pradadyur bhrātaraḥ pṛthak | svāt svād aṃśāc caturbhāgaṃ patitāḥ syur aditsavaḥ || 118 ||

aja.āvikaṃ sa.ekaśaphaṃ na jātu viṣamaṃ bhajet | aja.āvikaṃ tu viṣamaṃ jyeṣṭhasya-eva vidhīyate || 119 ||

yavīyān-jyeṣṭhabhāryāyāṃ putram utpādayed yadi | samas tatra vibhāgaḥ syād iti dharmo vyavasthitaḥ || 120 ||

upasarjanaṃ pradhānasya dharmato na-upapadyate | pitā pradhānaṃ prajane tasmād dharmeṇa taṃ bhajet || 121 ||

putraḥ kaniṣṭho jyeṣṭhāyāṃ kaniṣṭhāyāṃ ca pūrvajaḥ | kathaṃ tatra vibhāgaḥ syād iti cet saṃśayo bhavet || 122 ||

ekaṃ vṛṣabham uddhāraṃ saṃhareta sa pūrvajaḥ | tato 'pare jyeṣṭhavṛṣās tad.ūnānāṃ svamātṛtaḥ || 123 ||

jyeṣṭhas tu jāto jyeṣṭhāyāṃ hared vṛṣabha.ṣoḍaśāḥ | tataḥ svamātṛtaḥ śeṣā bhajerann iti dhāraṇā || 124 ||

sadṛśastrīṣu jātānāṃ putrāṇām aviśeṣataḥ | na mātṛto jyaiṣṭhyam asti janmato jyaiṣṭhyam ucyate || 125 ||

janmajyeṣṭhena ca-āhvānaṃ subrahmaṇyāsv api smṛtam | yamayoś ca-eva garbheṣu janmato jyeṣṭhatā smṛtā || 126 ||

a.putro 'nena vidhinā sutāṃ kurvīta putrikām | yad apatyaṃ bhaved asyāṃ tan mama syāt svadhākaram || 127 ||

anena tu vidhānena purā cakre 'tha putrikāḥ | vivṛddhyarthaṃ svavaṃśasya svayaṃ dakṣaḥ prajāpatiḥ || 128 ||

dadau sa daśa dharmāya kaśyapāya trayodaśa | somāya rājñe satkṛtya prīta.ātmā saptaviṃśatim || 129 ||

yathā-eva-ātmā tathā putraḥ putreṇa duhitā samā | tasyām ātmani tiṣṭhantyāṃ katham anyo dhanaṃ haret || 130 ||

mātus tu yautakaṃ yat syāt kumārībhāga eva saḥ | dauhitra eva ca hared a.putrasya-akhilaṃ dhanam || 131 ||

dauhitro hy a.khilaṃ riktham a.putrasya pitur haret | sa eva dadyād dvau piṇḍau pitre mātāmahāya ca || 132 ||

pautra.dauhitrayor loke na viśeṣo 'sti dharmataḥ | tayor hi mātā.pitarau sambhūtau tasya dehataḥ || 133 ||

putrikāyāṃ kṛtāyāṃ tu yadi putro 'nujāyate | samas tatra vibhāgaḥ syāt-jyeṣṭhatā na-asti hi striyāḥ || 134 ||

a.putrāyāṃ mṛtāyāṃ tu putrikāyāṃ kathaṃ cana | dhanaṃ tat putrikābhartā hareta-eva-a.vicārayan || 135 ||

akṛtā vā kṛtā vā-api yaṃ vindet sadṛśāt sutam | pautrī mātāmahas tena dadyāt piṇḍaṃ hared dhanam || 136 ||

putreṇa lokān-jayati pautreṇa-ānantyam aśnute | atha putrasya pautreṇa bradhnasya-āpnoti viṣṭapam || 137 ||

put.nāmno narakād yasmāt trāyate pitaraṃ sutaḥ | tasmāt putra iti proktaḥ svayam eva svayambhuvā || 138 ||

pautra.dauhitrayor loke viśeṣo na-upapadyate | dauhitro 'pi hy amutra-enaṃ santārayati pautravat || 139 ||

mātuḥ prathamataḥ piṇḍaṃ nirvapet putrikāsutaḥ | dvitīyaṃ tu pitus tasyās tṛtīyaṃ tatpituḥ pituḥ || 140 ||

upapanno guṇaiḥ sarvaiḥ putro yasya tu dattrimaḥ | sa hareta-eva tadrikthaṃ samprāpto 'py anyagotrataḥ || 141 ||

gotra.rikthe janayitur na hared dattrimaḥ kva cit | gotra.rikthānugaḥ piṇḍo vyapaiti dadataḥ svadhā || 142 ||

aniyuktāsutaś ca-eva putriṇyā-āptaś ca devarāt | ubhau tau na-arhato bhāgaṃ jārajātaka.kāmajau || 143 ||

niyuktāyām api pumān nāryāṃ jāto 'vidhānataḥ | na-eva-arhaḥ paitṛkaṃ rikthaṃ patita.utpādito hi saḥ || 144 ||

haret tatra niyuktāyāṃ jātaḥ putro yathā-aurasaḥ | kṣetrikasya tu tad bījaṃ dharmataḥ prasavaś ca saḥ || 145 ||

dhanaṃ yo bibhṛyād bhrātur mṛtasya striyam eva ca | so 'patyaṃ bhrātur utpādya dadyāt tasya-eva taddhanam || 146 ||

yā niyuktā-anyataḥ putraṃ devarād vā-apy avāpnuyāt | taṃ kāmajam a.rikthīyaṃ vṛthā.utpannaṃ pracakṣate || 147 ||

etad vidhānaṃ vijñeyaṃ vibhāgasya-ekayoniṣu | bahvīṣu ca-ekajātānāṃ nānāstrīṣu nibodhata || 148 ||

brāhmaṇasya-anupūrvyeṇa catasras tu yadi striyaḥ | tāsāṃ putreṣu jāteṣu vibhāge 'yaṃ vidhiḥ smṛtaḥ || 149 ||

kīnāśo govṛṣo yānam alaṅkāraś ca veśma ca | viprasya-auddhārikaṃ deyam ekāṃśaś ca pradhānataḥ || 150 ||

tryaṃśaṃ dāyādd hared vipro dvāv aṃśau kṣatriyāsutaḥ | vaiśyājaḥ sa.ardham eva-aṃśam aṃśaṃ śūdrāsuto haret || 151 ||

sarvaṃ vā rikthajātaṃ tad daśadhā parikalpya ca | dharmyaṃ vibhāgaṃ kurvīta vidhinā-anena dharmavit || 152 ||

caturo 'ṃśān hared vipras trīn aṃśān kṣatriyāsutaḥ | vaiśyāputro hared dvyaṃśaṃ aṃśaṃ śūdrāsuto haret || 153 ||

yady api syāt tu sat.putro 'py asat.putro 'pi vā bhavet | na-adhikaṃ daśamād dadyāt-śūdrāputrāya dharmataḥ || 154 ||

brāhmaṇa.kṣatriya.viśāṃ śūdrāputro na rikthabhāk | yad eva-asya pitā dadyāt tad eva-asya dhanaṃ bhavet || 155 ||

sama.varṇāsu vā jātāḥ sarve putrā dvijanmanām | uddhāraṃ jyāyase dattvā bhajerann itare samam || 156 ||

śūdrasya tu savarṇā-eva na-anyā bhāryā vidhīyate | tasyāṃ jātāḥ sama.aṃśāḥ syur yadi putraśataṃ bhavet || 157 ||

putrān dvādaśa yān āha nṝṇāṃ svāyambhuvo manuḥ | teṣāṃ ṣaḍ bandhu.dāyādāḥ ṣaḍ adāyāda.bāndhavāḥ || 158 ||

aurasaḥ kṣetrajaś ca-eva dattaḥ kṛtrima eva ca | gūḍha.utpanno 'paviddhaś ca dāyādā bāndhavāś ca ṣaṭ || 159 ||

kānīnaś ca sahoḍhaś ca krītaḥ paunarbhavas tathā | svayandattaś ca śaudraś ca ṣaḍ adāyāda.bāndhavāḥ || 160 ||

yādṛśaṃ phalam āpnoti kuplavaiḥ santaran-jalam | tādṛśaṃ phalam āpnoti kuputraiḥ santaraṃs tamaḥ || 161 ||

yady ekarikthinau syātām aurasa.kṣetrajau sutau | yasya yat paitṛkaṃ rikthaṃ sa tad gṛhṇīta na-itaraḥ || 162 ||

eka eva-aurasaḥ putraḥ pitryasya vasunaḥ prabhuḥ | śeṣāṇām ānṛśaṃsyārthaṃ pradadyāt tu prajīvanam || 163 ||

ṣaṣṭhaṃ tu kṣetrajasya-aṃśaṃ pradadyāt paitṛkād dhanāt | auraso vibhajan dāyaṃ pitryaṃ pañcamam eva vā || 164 ||

aurasa.kṣetrajau putrau pitṛrikthasya bhāginau | daśa-apare tu kramaśo gotra.rikthāṃśabhāginaḥ || 165 ||

svakṣetre saṃskṛtāyāṃ tu svayam utpādayedd hi yam | tam aurasaṃ vijānīyāt putraṃ prāthamakalpikam || 166 ||

yas talpajaḥ pramītasya klībasya vyādhitasya vā | svadharmeṇa niyuktāyāṃ sa putraḥ kṣetrajaḥ smṛtaḥ || 167 ||

mātā pitā vā dadyātāṃ yam adbhiḥ putram āpadi | sadṛśaṃ prītisaṃyuktaṃ sa jñeyo dattrimaḥ sutaḥ || 168 ||

sadṛśaṃ tu prakuryād yaṃ guṇa.doṣa.vicakṣaṇam | putraṃ putraguṇair yuktaṃ sa vijñeyaś ca kṛtrimaḥ || 169 ||

utpadyate gṛhe yas tu na ca jñāyeta kasya saḥ | sa gṛhe gūḍha utpannas tasya syād yasya talpajaḥ || 170 ||

mātā.pitṛbhyām utsṛṣṭaṃ tayor anyatareṇa vā | yaṃ putraṃ parigṛhṇīyād apaviddhaḥ sa ucyate || 171 ||

pitṛveśmani kanyā tu yaṃ putraṃ janayed rahaḥ | taṃ kānīnaṃ vaden nāmnā voḍhuḥ kanyā.samudbhavam || 172 ||

yā garbhiṇī saṃskriyate jñātā.ajñātā-api vā satī | voḍhuḥ sa garbho bhavati sahoḍha iti ca-ucyate || 173 ||

krīṇīyād yas tv apatyārthaṃ mātā.pitror yam antikāt | sa krītakaḥ sutas tasya sadṛśo 'sadṛśo 'pi vā || 174 ||

yā patyā vā parityaktā vidhavā vā svayā-icchayā | utpādayet punar bhūtvā sa paunarbhava ucyate || 175 ||

sā ced akṣata.yoniḥ syād gata.pratyāgatā-api vā | paunarbhavena bhartrā sā punaḥ saṃskāram arhati || 176 ||

mātā.pitṛ.vihīno yas tyakto vā syād akāraṇāt | ātmānam arpayed yasmai svayandattas tu sa smṛtaḥ || 177 ||

yaṃ brāhmaṇas tu śūdrāyāṃ kāmād utpādayet sutam | sa pārayann eva śavas tasmāt pāraśavaḥ smṛtaḥ || 178 ||

dāsyāṃ vā dāsadāsyāṃ vā yaḥ śūdrasya suto bhavet | so 'nujñāto hared aṃśam iti dharmo vyavasthitaḥ || 179 ||

kṣetraja.ādīn sutān etān ekādaśa yathā.uditān | putrapratinidhīn āhuḥ kriyālopān manīṣiṇaḥ || 180 ||

ya ete 'bhihitāḥ putrāḥ prasaṅgād anyabījajāḥ | yasya te bījato jātās tasya te na-itarasya tu || 181 ||

bhrātṝṇām ekajātānām ekaś cet putravān bhavet | sarvāṃs tāṃs tena putreṇa putriṇo manur abravīt || 182 ||

sarvāsām eka.patnīnām ekā cet putriṇī bhavet | sarvās tās tena putreṇa prāha putravatīr manuḥ || 183 ||

śreyasaḥ śreyaso 'lābhe pāpīyān riktham arhati | bahavaś cet tu sadṛśāḥ sarve rikthasya bhāginaḥ || 184 ||

na bhrātaro na pitaraḥ putrā rikthaharāḥ pituḥ | pitā hared a.putrasya rikthaṃ bhrātara eva ca || 185 ||

trayāṇām udakaṃ kāryaṃ triṣu piṇḍaḥ pravartate | caturthaḥ sampradātā-eṣāṃ pañcamo na-upapadyate || 186 ||

anantaraḥ sapiṇḍād yas tasya tasya dhanaṃ bhavet | ata ūrdhvaṃ sakulyaḥ syād ācāryaḥ śiṣya eva vā || 187 ||

sarveṣām apy abhāve tu brāhmaṇā rikthabhāginaḥ | traividyāḥ śucayo dāntās tathā dharmo na hīyate || 188 ||

a.hāryaṃ brāhmaṇadravyaṃ rājñā nityam iti sthitiḥ | itareṣāṃ tu varṇānāṃ sarva.abhāve haren nṛpaḥ || 189 ||

saṃsthitasya-an.apatyasya sagotrāt putram āharet | tatra yad rikthajātaṃ syāt tat tasmin pratipādayet || 190 ||

dvau tu yau vivadeyātāṃ dvābhyāṃ jātau striyā dhane | tayor yad yasya pitryaṃ syāt tat sa gṛhṇīta na-itaraḥ || 191 ||

jananyāṃ saṃsthitāyāṃ tu samaṃ sarve saha.udarāḥ | bhajeran mātṛkaṃ rikthaṃ bhaginyaś ca sa.nābhayaḥ || 192 ||

yās tāsāṃ syur duhitaras tāsām api yathārhataḥ | mātāmahyā dhanāt kiṃ cit pradeyaṃ prītipūrvakam || 193 ||

adhyagni.adhyāvāhanikaṃ dattaṃ ca prītikarmaṇi | bhrātṛ.mātṛ.pitṛprāptaṃ ṣaḍvidhaṃ strīdhanaṃ smṛtam || 194 ||

anvādheyaṃ ca yad dattaṃ patyā prītena ca-eva yat | patyau jīvati vṛttāyāḥ prajāyās tad dhanaṃ bhavet || 195 ||

brāhma.daiva.ārṣa.gāndharva.prājāpatyeṣu yad vasu | a.prajāyām atītāyāṃ bhartur eva tad iṣyate || 196 ||

yat tv asyāḥ syād dhanaṃ dattaṃ vivāheṣv āsura.ādiṣu | a.prajāyām atītāyāṃ mātā.pitros tad iṣyate || 197 ||

striyāṃ tu yad bhaved vittaṃ pitrā dattaṃ kathaṃ cana | brāhmaṇī tadd haret kanyā tadapatyasya vā bhavet || 198 ||

na nirhāraṃ striyaḥ kuryuḥ kuṭumbād bahumadhyagāt | svakād api ca vittādd hi svasya bhartur anājñayā || 199 ||

patyau jīvati yaḥ strībhir alaṅkāro dhṛto bhavet | na taṃ bhajeran dāyādā bhajamānāḥ patanti te || 200 ||

an.aṃśau klība.patitau jātyandha.badhirau tathā | unmatta.jaḍa.mūkāś ca ye ca ke cin nir.indriyāḥ || 201 ||

sarveṣām api tu nyāyyaṃ dātuṃ śaktyā manīṣiṇā | grāsa.ācchādanam atyantaṃ patito hy a.dadad bhavet || 202 ||

yady arthitā tu dāraiḥ syāt klībādīnāṃ kathaṃ cana | teṣām utpanna.tantūnām apatyaṃ dāyam arhati || 203 ||

yat kiṃ cit pitari prete dhanaṃ jyeṣṭho 'dhigacchati | bhāgo yavīyasāṃ tatra yadi vidyānupālinaḥ || 204 ||

a.vidyānāṃ tu sarveṣāṃ īhātaś ced dhanaṃ bhavet | samas tatra vibhāgaḥ syād apitrya iti dhāraṇā || 205 ||

vidyādhanaṃ tu yady asya tat tasya-eva dhanaṃ bhavet | maitryam audvāhikaṃ ca-eva mādhuparkikam eva ca || 206 ||

bhrātṝṇāṃ yas tu na-īheta dhanaṃ śaktaḥ svakarmaṇā | sa nirbhājyaḥ svakād aṃśāt kiṃ cid dattvā-upajīvanam || 207 ||

an.upaghnan pitṛdravyaṃ śrameṇa yad upārjitam | svayam īhitalabdhaṃ tan na-a.kāmo dātum arhati || 208 ||

paitṛkaṃ tu pitā dravyam anavāptaṃ yad āpnuyāt | na tat putrair bhajet sārdham a.kāmaḥ svayam arjitam || 209 ||

vibhaktāḥ saha jīvanto vibhajeran punar yadi | samas tatra vibhāgaḥ syāj jyaiṣṭhyaṃ tatra na vidyate || 210 ||

yeṣāṃ jyeṣṭhaḥ kaniṣṭho vā hīyeta-aṃśapradānataḥ | mriyeta-anyataro vā-api tasya bhāgo na lupyate || 211 ||

sodaryā vibhajeraṃs taṃ sametya sahitāḥ samam | bhrātaro ye ca saṃsṛṣṭā bhāginyaś ca sa.nābhayaḥ || 212 ||

yo jyeṣṭho vinikurvīta lobhād bhrātṝn yavīyasaḥ | so 'jyeṣṭhaḥ syād a.bhāgaś ca niyantavyaś ca rājabhiḥ || 213 ||

sarva eva vikarmasthā na-arhanti bhrātaro dhanam | na ca-a.dattvā kaniṣṭhebhyo jyeṣṭhaḥ kurvīta yautakam || 214 ||

bhrātṝṇām a.vibhaktānāṃ yady utthānaṃ bhavet saha | na putrabhāgaṃ viṣamaṃ pitā dadyāt kathaṃ cana || 215 ||

ūrdhvaṃ vibhāgāt-jātas tu pitryam eva hared dhanam | saṃsṛṣṭās tena vā ye syur vibhajeta sa taiḥ saha || 216 ||

an.apatyasya putrasya mātā dāyam avāpnuyāt | mātary api ca vṛttāyāṃ pitur mātā hared dhanam || 217 ||

ṛṇe dhane ca sarvasmin pravibhakte yathāvidhi | paścād dṛśyeta yat kiṃ cit tat sarvaṃ samatāṃ nayet || 218 ||

vastraṃ patram alaṅkāraṃ kṛtānnam udakaṃ striyaḥ | yogakṣemaṃ pracāraṃ ca na vibhājyaṃ pracakṣate || 219 ||

ayam ukto vibhāgo vaḥ putrāṇāṃ ca kriyāvidhiḥ | kramaśaḥ kṣetrajādīnāṃ dyūtadharmaṃ nibodhata || 220 ||

dyūtaṃ samāhvayaṃ ca-eva rājā rāṣṭrāt-nivārayet | rājāntakaraṇāv etau dvau doṣau pṛthivīkṣitām || 221 ||

prakāśam etat tāskaryaṃ yad devana.samāhvayau | tayor nityaṃ pratīghāte nṛpatir yatnavān bhavet || 222 ||

aprāṇibhir yat kriyate tat-loke dyūtam ucyate | prāṇibhiḥ kriyate yas tu sa vijñeyaḥ samāhvayaḥ || 223 ||

dyūtaṃ samāhvayaṃ ca-eva yaḥ kuryāt kārayeta vā | tān sarvān ghātayed rājā śūdrāṃś ca dvijaliṅginaḥ || 224 ||

kitavān kuśīlavān krūrān pāṣaṇḍasthāṃś ca mānavān | vikarmasthān śauṇḍikāṃś ca kṣipraṃ nirvāsayet purāt || 225 ||

ete rāṣṭre vartamānā rājñaḥ prachannataskarāḥ | vikarmakriyayā nityaṃ bādhante bhadrikāḥ prajāḥ || 226 ||

dyūtam etat purā kalpe dṛṣṭaṃ vairakaraṃ mahat | tasmād dyūtaṃ na seveta hāsyārtham api buddhimān || 227 ||

pracchannaṃ vā prakāśaṃ vā tat-niṣeveta yo naraḥ | tasya daṇḍavikalpaḥ syād yathā.iṣṭaṃ nṛpates tathā || 228 ||

kṣatra.viś.śūdrayonis tu daṇḍaṃ dātum aśaknuvan | ānṛṇyaṃ karmaṇā gacched vipro dadyāt-śanaiḥ śanaiḥ || 229 ||

strī.bāla.unmatta.vṛddhānāṃ daridrāṇāṃ ca rogiṇām | śiphā.vidala.rajju.ādyair vidadhyāt-nṛpatir damam || 230 ||

ye niyuktās tu kāryeṣu hanyuḥ kāryāṇi kāryiṇām | dhana.uṣmaṇā pacyamānās tān niḥ.svān kārayen nṛpaḥ || 231 ||

kūṭaśāsanakartṝṃś ca prakṛtīnāṃ ca dūṣakān | strī.bāla.brāhmaṇaghnāṃś ca hanyād dviṣ.sevinas tathā || 232 ||

tīritaṃ ca-anuśiṣṭaṃ ca yatra kva cana yad bhavet | kṛtaṃ tad dharmato vidyāt-na tad bhūyo nivartayet || 233 ||

amātyāḥ prāḍvivāko vā yat kuryuḥ kāryam anyathā | tat svayaṃ nṛpatiḥ kuryāt tān sahasraṃ ca daṇḍayet || 234 ||

brahmahā ca surāpaś ca steyī ca gurutalpagaḥ | ete sarve pṛthag jñeyā mahāpātakino narāḥ || 235 ||

caturṇām api ca-eteṣāṃ prāyaścittam a.kurvatām | śārīraṃ dhanasaṃyuktaṃ daṇḍaṃ dharmyaṃ prakalpayet || 236 ||

gurutalpe bhagaḥ kāryaḥ surāpāne surādhvajaḥ | steye ca śvapadaṃ kāryaṃ brahmahaṇy a.śirāḥ pumān || 237 ||

a.sambhojyā hy a.saṃyājyā a.sampāṭhyā '.vivāhinaḥ | careyuḥ pṛthivīṃ dīnāḥ sarvadharmabahiṣkṛtāḥ || 238 ||

jñāti.sambandhibhis tv ete tyaktavyāḥ kṛta.lakṣaṇāḥ | nir.dayā nir.namaskārās tan manor anuśāsanam || 239 ||

prāyaścittaṃ tu kurvāṇāḥ sarvavarṇā yathoditam | na-aṅkyā rājñā lalāṭe syur dāpyās tu-uttamasāhasam || 240 ||

āgaḥsu brāhmaṇasya-eva kāryo madhyamasāhasaḥ | vivāsyo vā bhaved rāṣṭrāt sa.dravyaḥ sa.paricchadaḥ || 241 ||

itare kṛtavantas tu pāpāny etāny akāmataḥ | sarvasvahāram arhanti kāmatas tu pravāsanam || 242 ||

na-ādadīta nṛpaḥ sādhur mahāpātakino dhanam | ādadānas tu tat-lobhāt tena doṣeṇa lipyate || 243 ||

apsu praveśya taṃ daṇḍaṃ varuṇāya-upapādayet | śruta.vṛtta.upapanne vā brāhmaṇe pratipādayet || 244 ||

īśo daṇḍasya varuṇo rājñāṃ daṇḍadharo hi saḥ | īśaḥ sarvasya jagato brāhmaṇo vedapāragaḥ || 245 ||

yatra varjayate rājā pāpakṛdbhyo dhanāgamam | tatra kālena jāyante mānavā dīrghajīvinaḥ || 246 ||

niṣpadyante ca sasyāni yathā.uptāni viśāṃ pṛthak | bālāś ca na pramīyante vikṛtaṃ ca na jāyate || 247 ||

brāhmaṇān bādhamānaṃ tu kāmād avaravarṇajam | hanyāc citrair vadha.upāyair udvejanakarair nṛpaḥ || 248 ||

yāvān a.vadhyasya vadhe tāvān vadhyasya mokṣaṇe | adharmo nṛpater dṛṣṭo dharmas tu viniyacchataḥ || 249 ||

udito 'yaṃ vistaraśo mitho vivādamānayoḥ | aṣṭādaśasu mārgeṣu vyavahārasya nirṇayaḥ || 250 ||

evaṃ dharmyāṇi kāryāṇi samyak kurvan mahīpatiḥ | deśān alabdhān-lipseta labdhāṃś ca paripālayet || 251 ||

samyak.niviṣṭa.deśas tu kṛta.durgaś ca śāstrataḥ | kaṇṭaka.uddharaṇe nityam ātiṣṭhed yatnam uttamam || 252 ||

rakṣanād āryavṛttānāṃ kaṇṭakānāṃ ca śodhanāt | narendrās tridivaṃ yānti prajāpālana.tatparāḥ || 253 ||

a.śāsaṃs taskarān yas tu baliṃ gṛhṇāti pārthivaḥ | tasya prakṣubhyate rāṣṭraṃ svargāc ca parihīyate || 254 ||

nirbhayaṃ tu bhaved yasya rāṣṭraṃ bāhu.balāśritam | tasya tad vardhate nityaṃ sicyamāna iva drumaḥ || 255 ||

dvividhāṃs taskarān vidyāt paradravyāpahārakān | prakāśāṃś ca-aprakāśāṃś ca cāra.cakṣur mahīpatiḥ || 256 ||

prakāśavañcakās teṣāṃ nānāpaṇya-upajīvinaḥ | pracchannavañcakās tv ete ye stena.aṭavikādayaḥ || 257 ||

utkocakāś ca-aupadhikā vañcakāḥ kitavās tathā | maṅgalādeśa.vṛttāś ca bhadrāś ca-īkṣaṇikaiḥ saha || 258 ||

asamyakkāriṇaś ca-eva mahāmātrāś cikitsakāḥ | śilpa.upacārayuktāś ca nipuṇāḥ paṇyayoṣitaḥ || 259 ||

evamādīn vijānīyāt prakāśāṃl lokakaṇṭakān | nigūḍhacāriṇaś ca-anyān anāryān āryaliṅginaḥ || 260 ||

tān viditvā sucaritair gūḍhais tatkarmakāribhiḥ | cāraiś ca-aneka.saṃsthānaiḥ protsādya vaśam ānayet || 261 ||

teṣāṃ doṣān abhikhyāpya sve sve karmaṇi tattvataḥ | kurvīta śāsanaṃ rājā samyak sāra.aparādhataḥ || 262 ||

na hi daṇḍād ṛte śakyaḥ kartuṃ pāpa.vinigrahaḥ | stenānāṃ pāpabuddhīnāṃ nibhṛtaṃ caratāṃ kṣitau || 263 ||

sabhā.prapā.apūpa.śālāveśa.madya.anna.vikrayāḥ | catuṣpathāṃś caityavṛkṣāḥ samājāḥ prekṣaṇāni ca || 264 ||

jīrṇa.udyānāny araṇyāni kārukāveśanāni ca | śūnyāni ca-apy agārāṇi vanāny upavanāni ca || 265 ||

evaṃvidhān nṛpo deśān gulmaiḥ sthāvara.jaṅgamaiḥ | taskarapratiṣedhārthaṃ cāraiś ca-apy anucārayet || 266 ||

tatsahāyair anugatair nānākarmapravedibhiḥ | vidyād utsādayec ca-eva nipuṇaiḥ pūrvataskaraiḥ || 267 ||

bhakṣya.bhojya.upadeśaiś ca brāhmaṇānāṃ ca darśanaiḥ | śauryakarmāpadeśaiś ca kuryus teṣāṃ samāgamam || 268 ||

ye tatra na-upasarpeyur mūlapraṇihitāś ca ye | tān prasahya nṛpo hanyāt sa.mitra.jñāti.bāndhavān || 269 ||

na ha-ūḍhena vinā cauraṃ ghātayed dhārmiko nṛpaḥ | saha-ūḍhaṃ sa.upakaraṇaṃ ghātayed a.vicārayan || 270 ||

grāmeṣv api ca ye ke cic caurāṇāṃ bhaktadāyakāḥ | bhāṇḍa.avakāśadāś ca-eva sarvāṃs tān api ghātayet || 271 ||

rāṣṭreṣu rakṣādhikṛtān sāmantāṃś ca-eva coditān | abhyāghāteṣu madhyasthāñ śiṣyāc caurān iva drutam || 272 ||

yaś ca-api dharmasamayāt pracyuto dharma.jīvanaḥ | daṇḍena-eva tam apy oṣet svakād dharmādd hi vicyutam || 273 ||

grāmaghāte hitābhaṅge pathi moṣābhidarśane | śaktito na-abhidhāvanto nirvāsyāḥ sa.paricchadāḥ || 274 ||

rājñaḥ kośāpahartṝṃś ca pratikūleṣu ca sthitān | ghātayed vividhair daṇḍair arīṇāṃ ca-upajāpakān || 275 ||

sandhiṃ chittvā tu ye cauryaṃ rātrau kurvanti taskarāḥ | teṣāṃ chittvā nṛpo hastau tīkṣṇe śūle niveśayet || 276 ||

aṅgulīr granthibhedasya chedayet prathame grahe | dvitīye hasta.caraṇau tṛtīye vadham arhati || 277 ||

agnidān bhaktadāṃś ca-eva tathā śastra.avakāśadān | sannidhātṝṃś ca moṣasya hanyāc cauram iva-īśvaraḥ || 278 ||

taḍāgabhedakaṃ hanyād apsu śuddhavadhena vā | yad vā-api pratisaṃskuryād dāpyas tu-uttamasāhasam || 279 ||

koṣṭhāgāra.āyudhāgāra.devatāgāra.bhedakān | hasti.aśva.rathahartṝṃś ca hanyād eva-a.vicārayan || 280 ||

yas tu pūrvaniviṣṭasya taḍāgasya-udakaṃ haret | āgamaṃ vā-apy apāṃ bhindyāt sa dāpyaḥ pūrvasāhasam || 281 ||

samutsṛjed rājamārge yas tv amedhyam anāpadi | sa dvau kārṣāpaṇau dadyād amedhyaṃ ca-āśu śodhayet || 282 ||

āpadgato 'tha vā vṛddhā garbhiṇī bāla eva vā | paribhāṣaṇam arhanti tac ca śodhyam iti sthitiḥ || 283 ||

cikitsakānāṃ sarveṣāṃ mithyāpracaratāṃ damaḥ | amānuṣeṣu prathamo mānuṣeṣu tu madhyamaḥ || 284 ||

saṅkrama.dhvaja.yaṣṭīnāṃ pratimānāṃ ca bhedakaḥ | pratikuryāc ca tat sarvaṃ pañca dadyāt-śatāni ca || 285 ||

adūṣitānāṃ dravyāṇāṃ dūṣaṇe bhedane tathā | maṇīnām apavedhe ca daṇḍaḥ prathamasāhasaḥ || 286 ||

samair hi viṣamaṃ yas tu cared vai mūlyato 'pi vā | samāpnuyād damaṃ pūrvaṃ naro madhyamam eva vā || 287 ||

bandhanāni ca sarvāṇi rājā mārge niveśayet | duḥkhitā yatra dṛśyeran vikṛtāḥ pāpakāriṇah || 288 ||

prākārasya ca bhettāraṃ parikhāṇāṃ ca pūrakam | dvārāṇāṃ ca-eva bhaṅktāraṃ kṣipram eva pravāsayet || 289 ||

abhicāreṣu sarveṣu kartavyo dviśato damaḥ | mūlakarmaṇi ca-anāpteḥ kṛtyāsu vividhāsu ca || 290 ||

abījavikrayī ca-eva bīja.utkṛṣṭā tathā-eva ca | maryādābhedakaś ca-eva vikṛtaṃ prāpnuyād vadham || 291 ||

sarvakaṇṭakapāpiṣṭhaṃ hemakāraṃ tu pārthivaḥ | pravartamānam anyāye chedayet-lavaśaḥ kṣuraiḥ || 292 ||

sītā.dravyāpaharaṇe śastrāṇām auṣadhasya ca | kālam āsādya kāryaṃ ca rājā daṇḍaṃ prakalpayet || 293 ||

svāmy.amātyau puraṃ rāṣṭraṃ kośa.daṇḍau suhṛt tathā | sapta prakṛtayo hy etāḥ saptāṅgaṃ rājyam ucyate || 294 ||

saptānāṃ prakṛtīnāṃ tu rājyasya-āsāṃ yathākramam | pūrvaṃ pūrvaṃ gurutaraṃ jānīyād vyasanaṃ mahat || 295 ||

sapta.aṅgasya-iha rājyasya viṣṭabdhasya tridaṇḍavat | anyonyaguṇavaiśeṣyāt-na kiṃ cid atiricyate || 296 ||

teṣu teṣu tu kṛtyeṣu tat tad aṅgaṃ viśiṣyate | yena yat sādhyate kāryaṃ tat tasmin-śreṣṭham ucyate || 297 ||

cāreṇa-utsāhayogena kriyayā-eva ca karmaṇām | svaśaktiṃ paraśaktiṃ ca nityaṃ vidyāt-mahīpatiḥ || 298 ||

pīḍanāni ca sarvāṇi vyasanāni tathā-eva ca | ārabheta tataḥ kāryaṃ sañcintya guru.lāghavam || 299 ||

ārabheta-eva karmāṇi śrāntaḥ śrāntaḥ punaḥ punaḥ | karmāṇy ārabhamāṇaṃ hi puruṣaṃ śrīr niṣevate || 300 ||

kṛtaṃ tretāyugaṃ ca-eva dvāparaṃ kalir eva ca | rājño vṛttāni sarvāṇi rājā hi yugam ucyate || 301 ||

kaliḥ prasupto bhavati sa jāgrad dvāparaṃ yugam | karmasv abhyudyatas tretā vicaraṃs tu kṛtaṃ yugam || 302 ||

indrasya-arkasya vāyoś ca yamasya varuṇasya ca | candrasya-agneḥ pṛthivyāś ca tejovṛttaṃ nṛpaś caret || 303 ||

vārṣikāṃś caturo māsān yathā-indro 'bhipravarṣati | tathā-abhivarṣet svaṃ rāṣṭraṃ kāmair indravrataṃ caran || 304 ||

aṣṭau māsān yathā-ādityas toyaṃ harati raśmibhiḥ | tathā haret karaṃ rāṣṭrāt-nityam arkavrataṃ hi tat || 305 ||

praviśya sarvabhūtāni yathā carati mārutaḥ | tathā cāraiḥ praveṣṭavyaṃ vratam etadd hi mārutam || 306 ||

yathā yamaḥ priya.dveṣyau prāpte kāle niyacchati | tathā rājñā niyantavyāḥ prajās tadd hi yamavratam || 307 ||

varuṇena yathā pāśair baddha eva-abhidṛśyate | tathā pāpān nigṛhṇīyād vratam etadd hi vāruṇam || 308 ||

paripūrṇaṃ yathā candraṃ dṛṣṭvā hṛṣyanti mānavāḥ | tathā prakṛtayo yasmin sa cāndravratiko nṛpaḥ || 309 ||

pratāpayuktas tejasvī nityaṃ syāt pāpakarmasu | duṣṭasāmantahiṃsraś ca tad āgneyaṃ vrataṃ smṛtam || 310 ||

yathā sarvāṇi bhūtāni dharā dhārayate samam | tathā sarvāṇi bhūtāni bibhrataḥ pārthivaṃ vratam || 311 ||

etair upāyair anyaiś ca yukto nityam atandritaḥ | stenān rājā nigṛhṇīyāt svarāṣṭre para eva ca || 312 ||

parām apy āpadaṃ prāpto brāhmaṇān na prakopayet | te hy enaṃ kupitā hanyuḥ sadyaḥ sa.bala.vāhanam || 313 ||

yaiḥ kṛtaḥ sarvabhakṣyo 'gnir apeyaś ca mahodadhiḥ | kṣayī ca-āpyāyitaḥ somaḥ ko na naśyet prakopya tān || 314 ||

lokān anyān sṛjeyur ye lokapālāṃś ca kopitāḥ | devān kuryur adevāṃś ca kaḥ kṣiṇvaṃs tān samṛdhnuyāt || 315 ||

yān upāśritya tiṣṭhanti lokā devāś ca sarvadā | brahma ca-eva dhanaṃ yeṣāṃ ko hiṃsyāt tāñ jijīviṣuḥ || 316 ||

a.vidvāṃś ca-eva vidvāṃś ca brāhmaṇo daivataṃ mahat | praṇītaś ca-a.praṇītaś ca yathā-agnir daivataṃ mahat || 317 ||

śmaśāneṣv api tejasvī pāvako na-eva duṣyati | hūyamānaś ca yajñeṣu bhūya eva-abhivardhate || 318 ||

evaṃ yady apy aniṣṭeṣu vartante sarvakarmasu | sarvathā brāhmaṇāḥ pūjyāḥ paramaṃ daivatam hi tat || 319 ||

kṣatrasya-atipravṛddhasya brāhmaṇān prati sarvaśaḥ | brahma-eva sanniyantṛ syāt kṣatraṃ hi brahma.sambhavam || 320 ||

adbhyo 'gnir brahmataḥ kṣatram aśmano loham utthitam | teṣāṃ sarvatragaṃ tejaḥ svāsu yoniṣu śāmyati || 321 ||

na-a.brahma kṣatram ṛdhnoti na-a.kṣatraṃ brahma vardhate | brahma kṣatraṃ ca sampṛktam iha ca-amutra vardhate || 322 ||

dattvā dhanaṃ tu viprebhyaḥ sarvadaṇḍasamutthitam | putre rājyaṃ samāsṛjya kurvīta prāyaṇaṃ raṇe || 323 ||

evaṃ caran sadā yukto rājadharmeṣu pārthivaḥ | hiteṣu ca-eva lokasya sarvān bhṛtyān niyojayet || 324 ||

eṣo '.khilaḥ karmavidhir ukto rājñaḥ sanātanaḥ | imaṃ karmavidhiṃ vidyāt kramaśo vaiśya.śūdrayoḥ || 325 ||

vaiśyas tu kṛta.saṃskāraḥ kṛtvā dāraparigraham | vārtāyāṃ nityayuktaḥ syāt paśūnāṃ ca-eva rakṣaṇe || 326 ||

prajāpatir hi vaiśyāya sṛṣṭvā paridade paśūn | brāhmaṇāya ca rājñe ca sarvāḥ paridade prajāḥ || 327 ||

na ca vaiśyasya kāmaḥ syān na rakṣeyaṃ paśūn iti | vaiśye ca-icchati na-anyena rakṣitavyāḥ kathaṃ cana || 328 ||

maṇi.muktā.pravālānāṃ lohānāṃ tāntavasya ca | gandhānāṃ ca rasānāṃ ca vidyād argha.bala.abalam || 329 ||

bījānām uptivid-ca syāt kṣetradoṣa.guṇasya ca | mānayogaṃ ca jānīyāt tulāyogāṃś ca sarvaśaḥ || 330 ||

sāra.asāraṃ ca bhāṇḍānāṃ deśānāṃ ca guṇa.aguṇān | lābha.alābhaṃ ca paṇyānāṃ paśūnāṃ parivardhanam || 331 ||

bhṛtyānāṃ ca bhṛtiṃ vidyād bhāṣāś ca vividhā nṛṇāṃ | dravyāṇāṃ sthāna.yogāṃś ca kraya.vikrayam eva ca || 332 ||

dharmeṇa ca dravyavṛddhāv ātiṣṭhed yatnam uttamam | dadyāc ca sarvabhūtānām annam eva prayatnataḥ || 333 ||

viprāṇāṃ vedaviduṣāṃ gṛhasthānāṃ yaśasvinām | śuśrūṣā-eva tu śūdrasya dharmo naiśreyasaḥ paraḥ || 334 ||

śucir utkṛṣṭaśuśrūṣur mṛdu.vāg an.ahaṅkṛtaḥ | brāhmaṇādi.āśrayo nityam utkṛṣṭāṃ jātim aśnute || 335 ||

eṣo 'nāpadi varṇānām uktaḥ karmavidhiḥ śubhaḥ | āpady api hi yas teṣāṃ kramaśas tan nibodhata || 336 ||