Adhyay 7

rājadharmān pravakṣyāmi yathāvṛtto bhaven nṛpaḥ | sambhavaś ca yathā tasya siddhiś ca paramā yathā || 1 ||

brāhmaṃ prāptena saṃskāraṃ kṣatriyeṇa yathāvidhi | sarvasya-asya yathānyāyaṃ kartavyaṃ parirakṣaṇam || 2 ||

a.rājake hi loke 'smin sarvato vidruto bhayāt | rakṣārtham asya sarvasya rājānam asṛjat prabhuḥ || 3 ||

indra.anila.yama.arkāṇām agneś ca varuṇasya ca | candra.vitteśayoś ca-eva mātrā nirhṛtya śāśvatīḥ || 4 ||

yasmād eṣāṃ surendrāṇāṃ mātrābhyo nirmito nṛpaḥ | tasmād abhibhavaty eṣa sarvabhūtāni tejasā || 5 ||

tapaty ādityavac ca-eṣa cakṣūṃṣi ca manāṃsi ca | na ca-enaṃ bhuvi śaknoti kaś cid apy abhivīkṣitum || 6 ||

so 'gnir bhavati vāyuś ca so 'rkaḥ somaḥ sa dharmarāṭ | sa kuberaḥ sa varuṇaḥ sa mahendraḥ prabhāvataḥ || 7 ||

bālo 'pi na-avamāntavyo manuṣya iti bhūmipaḥ | mahatī devatā hy eṣā nararūpeṇa tiṣṭhati || 8 ||

ekam eva dahaty agnir naraṃ durupasarpiṇam | kulaṃ dahati rājā-agniḥ sa.paśu.dravyasañcayam || 9 ||

kāryaṃ so 'vekṣya śaktiṃ ca deśa.kālau ca tattvataḥ | kurute dharmasiddhyarthaṃ viśvarūpaṃ punaḥ punaḥ || 10 ||

yasya prasāde padmā śrīr vijayaś ca parākrame | mṛtyuś ca vasati krodhe sarvatejomayo hi saḥ || 11 ||

taṃ yas tu dveṣṭi sammohāt sa vinaśyaty asaṃśayam | tasya hy āśu vināśāya rājā prakurute manaḥ || 12 ||

tasmād dharmaṃ yam iṣṭeṣu sa vyavasyen narādhipaḥ | aniṣṭaṃ ca-apy aniṣṭeṣu taṃ dharmaṃ na vicālayet || 13 ||

tasyārthe sarvabhūtānāṃ goptāraṃ dharmam ātmajam | brahmatejomayaṃ daṇḍam asṛjat pūrvam īśvaraḥ || 14 ||

tasya sarvāṇi bhūtāni sthāvarāṇi carāṇi ca | bhayād bhogāya kalpante svadharmāt-na calanti ca || 15 ||

taṃ deśa.kālau śaktiṃ ca vidyāṃ ca-avekṣya tattvataḥ | yathārhataḥ sampraṇayen nareṣv anyāya.vartiṣu || 16 ||

sa rājā puruṣo daṇḍaḥ sa netā śāsitā ca saḥ | caturṇām āśramāṇāṃ ca dharmasya pratibhūḥ smṛtaḥ || 17 ||

daṇḍaḥ śāsti prajāḥ sarvā daṇḍa eva-abhirakṣati | daṇḍaḥ supteṣu jāgarti daṇḍaṃ dharmaṃ vidur budhāḥ || 18 ||

samīkṣya sa dhṛtaḥ samyak sarvā rañjayati prajāḥ | a.samīkṣya praṇītas tu vināśayati sarvataḥ || 19 ||

yadi na praṇayed rājā daṇḍaṃ daṇḍyeṣv atandritaḥ | śūle matsyān iva-apakṣyan durbalān balavattarāḥ || 20 ||

adyāt kākaḥ puroḍāśaṃ śvā ca lihyādd havis tathā | svāmyaṃ ca na syāt kasmiṃś cit pravarteta-adhara.uttaram || 21 ||

sarvo daṇḍajito loko durlabho hi śucir naraḥ | daṇḍasya hi bhayāt sarvaṃ jagad bhogāya kalpate || 22 ||

deva.dānava.gandharvā rakṣāṃsi pataga.uragāḥ | te 'pi bhogāya kalpante daṇḍena-eva nipīḍitāḥ || 23 ||

duṣyeyuḥ sarvavarṇāś ca bhidyeran sarvasetavaḥ | sarvalokaprakopaś ca bhaved daṇḍasya vibhramāt || 24 ||

yatra śyāmo lohita.akṣo daṇḍaś carati pāpahā | prajās tatra na muhyanti netā cet sādhu paśyati || 25 ||

tasya-āhuḥ sampraṇetāraṃ rājānaṃ satyavādinam | samīkṣyakāriṇaṃ prājñaṃ dharma.kāma.artha.kovidam || 26 ||

taṃ rājā praṇayan samyak trivargeṇa-abhivardhate | kāma.ātmā viṣamaḥ kṣudro daṇḍena-eva nihanyate || 27 ||

daṇḍo hi sumahat.tejo durdharaś ca-akṛta.ātmabhiḥ | dharmād vicalitaṃ hanti nṛpam eva sa.bāndhavam || 28 ||

tato durgaṃ ca rāṣṭraṃ ca lokaṃ ca sa.cara.acaram | antarikṣagatāṃś ca-eva munīn devāṃś ca pīḍayet || 29 ||

so 'sahāyena mūḍhena lubdhena-akṛta.buddhinā | na śakyo nyāyato netuṃ saktena viṣayeṣu ca || 30 ||

śucinā satyasandhena yathāśāstra.anusāriṇā | praṇetuṃ śakyate daṇḍaḥ susahāyena dhīmatā || 31 ||

svarāṣṭre nyāyavṛttaḥ syād bhṛśa.daṇḍaś ca śatruṣu | suhṛtsv ajihmaḥ snigdheṣu brāhmaṇeṣu kṣamānvitaḥ || 32 ||

evaṃvṛttasya nṛpateḥ śilā.uñchena-api jīvataḥ | vistīryate yaśo loke tailabindur iva-ambhasi || 33 ||

atas tu viparītasya nṛpater ajita.ātmanaḥ | saṅkṣipyate yaśo loke ghṛtabindur iva-ambhasi || 34 ||

sve sve dharme niviṣṭānāṃ sarveṣām anupūrvaśaḥ | varṇānām āśramāṇāṃ ca rājā sṛṣṭo 'bhirakṣitā || 35 ||

tena yad yat sa.bhṛtyena kartavyaṃ rakṣatā prajāḥ | tat tad vo 'haṃ pravakṣyāmi yathāvad anupūrvaśaḥ || 36 ||

brāhmaṇān paryupāsīta prātar utthāya pārthivaḥ | traividyavṛddhān viduṣas tiṣṭhet teṣāṃ ca śāsane || 37 ||

vṛddhāṃś ca nityaṃ seveta viprān vedavidaḥ śucīn | vṛddhasevī hi satataṃ rakṣobhir api pūjyate || 38 ||

tebhyo 'dhigacched vinayaṃ vinīta.ātmā-api nityaśaḥ | vinīta.ātmā hi nṛpatir na vinaśyati karhi cit || 39 ||

bahavo 'vinayāt-naṣṭā rājānaḥ sa.paricchadāḥ | vanasthā api rājyāni vinayāt pratipedire || 40 ||

veno vinaṣṭo 'vinayāt-nahuṣaś ca-eva pārthivaḥ | sudāḥ paijavanaś ca-eva sumukho nimir eva ca || 41 ||

pṛthus tu vinayād rājyaṃ prāptavān manur eva ca | kuberaś ca dhanaiśvaryaṃ brāhmaṇyaṃ ca-eva gādhijaḥ || 42 ||

traividyebhyas trayīṃ vidyāṃ daṇḍanītiṃ ca śāśvatīm | ānvīkṣikīṃ ca-ātmavidyāṃ vārtārambhāṃś ca lokataḥ || 43 ||

indriyāṇāṃ jaye yogaṃ samātiṣṭhed divā.niśam | jita.indriyo hi śaknoti vaśe sthāpayituṃ prajāḥ || 44 ||

daśa kāma.samutthāni tathā-aṣṭau krodhajāni ca | vyasanāni dur.antāni prayatnena vivarjayet || 45 ||

kāmajeṣu prasakto hi vyasaneṣu mahīpatiḥ | viyujyate 'rtha.dharmābhyāṃ krodhajeṣv ātmanā-eva tu || 46 ||

mṛgayā-akṣo divāsvapnaḥ parivādaḥ striyo madaḥ | tauryatrikaṃ vṛthāṭyā ca kāmajo daśako gaṇaḥ || 47 ||

paiśunyaṃ sāhasaṃ droha īrṣyā.asūyā.arthadūṣaṇam | vāgdaṇḍajaṃ ca pāruṣyaṃ krodhajo 'pi gaṇo 'ṣṭakaḥ || 48 ||

dvayor apy etayor mūlaṃ yaṃ sarve kavayo viduḥ | taṃ yatnena jayet-lobhaṃ tajjāv etāv ubhau gaṇau || 49 ||

pānam akṣāḥ striyaś ca-eva mṛgayā ca yathākramam | etat kaṣṭatamaṃ vidyāt-catuṣkaṃ kāmaje gaṇe || 50 ||

daṇḍasya pātanaṃ ca-eva vākpāruṣya.arthadūṣaṇe | krodhaje 'pi gaṇe vidyāt kaṣṭam etat trikaṃ sadā || 51 ||

saptakasya-asya vargasya sarvatra-eva-anuṣaṅgiṇaḥ | pūrvaṃ pūrvaṃ gurutaraṃ vidyād vyasanam ātmavān || 52 ||

vyasanasya ca mṛtyoś ca vyasanaṃ kaṣṭam ucyate | vyasany adho 'dho vrajati svar yāty avyasanī mṛtaḥ || 53 ||

maulān-śāstravidaḥ śūrān-labdha.lakṣān kula.udbhavān | sacivān sapta ca-aṣṭau vā prakurvīta parīkṣitān || 54 ||

api yat sukaraṃ karma tad apy ekena duṣkaram | viśeṣato 'sahāyena kiṃ tu rājyaṃ mahā.udayam || 55 ||

taiḥ sārdhaṃ cintayen nityaṃ sāmānyaṃ sandhi.vigraham | sthānaṃ samudayaṃ guptiṃ labdhapraśamanāni ca || 56 ||

teṣāṃ svaṃ svam abhiprāyam upalabhya pṛthak pṛthak | samastānāṃ ca kāryeṣu vidadhyādd hitam ātmanaḥ || 57 ||

sarveṣāṃ tu viśiṣṭena brāhmaṇena vipaścitā | mantrayet paramaṃ mantraṃ rājā ṣāḍguṇyasaṃyutam || 58 ||

nityaṃ tasmin samāśvastaḥ sarvakāryāṇi niḥkṣipet | tena sārdhaṃ viniścitya tataḥ karma samārabhet || 59 ||

anyān api prakurvīta śucīn prājñān avasthitān | samyag arthasamāhartṝn amātyān suparīkṣitān || 60 ||

nirvarteta-asya yāvadbhir itikartavyatā nṛbhiḥ | tāvato 'tandritān dakṣān prakurvīta vicakṣaṇān || 61 ||

teṣām arthe niyuñjīta śūrān dakṣān kula.udgatān | śucīn ākara.karmānte bhīrūn antarniveśane || 62 ||

dūtaṃ ca-eva prakurvīta sarvaśāstra.viśāradam | iṅgita.ākāra.ceṣṭajñaṃ śuciṃ dakṣaṃ kula.udgatam || 63 ||

anuraktaḥ śucir dakṣaḥ smṛtimān deśa.kālavit | vapuṣmān vītabhīr vāgmī dūto rājñaḥ praśasyate || 64 ||

amātye daṇḍa āyatto daṇḍe vainayikī kriyā | nṛpatau kośa.rāṣṭre ca dūte sandhi.viparyayau || 65 ||

dūta eva hi sandhatte bhinatty eva ca saṃhatān | dūtas tat kurute karma bhidyante yena mānavaḥ || 66 ||

sa vidyād asya kṛtyeṣu nirgūḍha.iṅgita.ceṣṭitaiḥ | ākāram iṅgitaṃ ceṣṭāṃ bhṛtyeṣu ca cikīrṣitam || 67 ||

buddhvā ca sarvaṃ tattvena pararājacikīrṣitam | tathā prayatnam ātiṣṭhed yathā-ātmānaṃ na pīḍayet || 68 ||

jāṅgalaṃ sasyasampannam ārya.prāyam an.āvilam | ramyam ānata.sāmantaṃ svājīvyaṃ deśam āvaset || 69 ||

dhanva.durgaṃ mahī.durgam ab.durgaṃ vārkṣam eva vā | nṛdurgaṃ giridurgaṃ vā samāśritya vaset puram || 70 ||

sarveṇa tu prayatnena giridurgaṃ samāśrayet | eṣāṃ hi bāhuguṇyena giridurgaṃ viśiṣyate || 71 ||

triṇy ādyāny āśritās tv eṣāṃ mṛga.gartāśraya.apcarāḥ | trīṇy uttarāṇi kramaśaḥ plavaṅgama.nara.amarāḥ || 72 ||

yathā durgāśritān etān na-upahiṃsanti śatravaḥ | tathā-arayo na hiṃsanti nṛpaṃ durgasamāśritam || 73 ||

ekaḥ śataṃ yodhayati prākārastho dhanurdharaḥ | śataṃ daśasahasrāṇi tasmād durgaṃ vidhīyate || 74 ||

tat syād āyudhasampannaṃ dhana.dhānyena vāhanaiḥ | brāhmaṇaiḥ śilpibhir yantrair yavasena-udakena ca || 75 ||

tasya madhye suparyāptaṃ kārayed gṛham ātmanaḥ | guptaṃ sarva.ṛtukaṃ śubhraṃ jala.vṛkṣasamanvitam || 76 ||

tad adhyāsya-udvahed bhāryāṃ sa.varṇāṃ lakṣaṇānvitām | kule mahati sambhūtāṃ hṛdyāṃ rūpa.guṇānvītām || 77 ||

purohitaṃ ca kurvīta vṛṇuyād eva ca-ṛtvijaḥ | te 'sya gṛhyāṇi karmāṇi kuryur vaitānikāni ca || 78 ||

yajeta rājā kratubhir vividhair āpta.dakṣiṇaiḥ | dharmārthaṃ ca-eva viprebhyo dadyād bhogān dhanāni ca || 79 ||

sāṃvatsarikam āptaiś ca rāṣṭrād āhārayed balim | syāc ca-āmnāya.paro loke varteta pitṛvat-nṛṣu || 80 ||

adhyakṣān vividhān kuryāt tatra tatra vipaścitaḥ | te 'sya sarvāṇy avekṣeran nṛṇāṃ kāryāṇi kurvatām || 81 ||

āvṛttānāṃ gurukulād viprāṇāṃ pūjako bhavet | nṛpāṇām akṣayo hy eṣa nidhir brāhmo 'bhidhīyate || 82 ||

na taṃ stenā na ca-amitrā haranti na ca naśyati | tasmād rājñā nidhātavyo brāhmaṇeṣv akṣayo nidhiḥ || 83 ||

na skandate na vyathate na vinaśyati karhi cit | variṣṭham agnihotrebhyo brāhmaṇasya mukhe hutam || 84 ||

samam abrāhmaṇe dānaṃ dviguṇaṃ brāhmaṇabruve | prādhīte śatasāhasram anantaṃ vedapārage || 85 ||

pātrasya hi viśeṣeṇa śraddadhānatayā-eva ca | alpaṃ vā bahu vā pretya dānasya phalam aśnute || 86 ||

sama.uttama.adhamai rājā tv āhūtaḥ pālayan prajāḥ | na nivarteta saṅgrāmāt kṣātraṃ dharmam anusmaran || 87 ||

saṅgrāmeṣv anivartitvaṃ prajānāṃ ca-eva pālanam | śuśrūṣā brāhmaṇānāṃ ca rājñāṃ śreyaskaraṃ param || 88 ||

āhaveṣu mitho 'nyonyaṃ jighāṃsanto mahīkṣitaḥ | yudhyamānāḥ paraṃ śaktyā svargaṃ yānty a.parāṅmukhāḥ || 89 ||

na kūṭair āyudhair hanyād yudhyamāno raṇe ripūn | na karṇibhir na-api digdhair na-agnijvalita.tejanaiḥ || 90 ||

na ca hanyāt sthalārūḍhaṃ na klībaṃ na kṛta.añjalim | na mukta.keśaṃ na-āsīnaṃ na tava-asmi-iti vādinam || 91 ||

na suptaṃ na vi.sannāhaṃ na nagnaṃ na nir.āyudham | na-ayudhyamānaṃ paśyantaṃ na pareṇa samāgatam || 92 ||

na-āyudhavyasanaprāptaṃ na-ārtaṃ na-atiparikṣataṃ | na bhītaṃ na parāvṛttaṃ satāṃ dharmam anusmaran || 93 ||

yas tu bhītaḥ parāvṛttaḥ saṅgrāme hanyate paraiḥ | bhartur yad duṣkṛtaṃ kiṃ cit tat sarvaṃ pratipadyate || 94 ||

yat-ca-asya sukṛtaṃ kiṃ cid amutrārtham upārjitam | bhartā tat sarvam ādatte parāvṛttahatasya tu || 95 ||

ratha.aśvaṃ hastinaṃ chatraṃ dhanaṃ dhānyaṃ paśūn striyaḥ | sarvadravyāṇi kupyaṃ ca yo yaj jayati tasya tat || 96 ||

rājñaś ca dadyur uddhāram ity eṣā vaidikī śrutiḥ | rājñā ca sarvayodhebhyo dātavyam apṛthagjitam || 97 ||

eṣo 'nupaskṛtaḥ prokto yodhadharmaḥ sanātanaḥ | asmād dharmān na cyaveta kṣatriyo ghnan raṇe ripūn || 98 ||

alabdhaṃ ca-eva lipseta labdhaṃ rakṣet prayatnataḥ | rakṣitaṃ vardhayec ca-eva vṛddhaṃ pātreṣu nikṣipet || 99 ||

etac caturvidhaṃ vidyāt puruṣārthaprayojanam | asya nityam anuṣṭhānaṃ samyak kuryād atandritaḥ || 100 ||

alabdham icched daṇḍena labdhaṃ rakṣed avekṣayā | rakṣitaṃ vardhayed vṛddhyā vṛddhaṃ pātreṣu nikṣipet || 101 ||

nityam udyata.daṇḍaḥ syān nityaṃ vivṛta.pauruṣaḥ | nityaṃ saṃvṛta.saṃvāryo nityaṃ chidrānusāry areḥ || 102 ||

nityam udyata.daṇḍasya kṛtsnam udvijate jagat | tasmāt sarvāṇi bhūtāni daṇḍena-eva prasādhayet || 103 ||

a.māyayā-eva varteta na kathaṃ cana māyayā | budhyeta-ariprayuktāṃ ca māyāṃ nityaṃ susaṃvṛtaḥ || 104 ||

na-asya chidraṃ paro vidyād vidyāt-chidraṃ parasya ca | gūhet kūrma iva-aṅgāni rakṣed vivaram ātmanaḥ || 105 ||

bakavat-cintayed arthān siṃhavat-ca parākrame | vṛkavat-ca-avalumpeta śaśavat-ca viniṣpatet || 106 ||

evam vijayamānasya ye 'sya syuḥ paripanthinaḥ | tān ānayed vaśaṃ sarvān sāmādibhir upakramaiḥ || 107 ||

yadi te tu na tiṣṭheyur upāyaiḥ prathamais tribhiḥ | daṇḍena-eva prasahya-etān-śanakair vaśam ānayet || 108 ||

sāma.adīnām upāyānāṃ caturṇām api paṇḍitāḥ | sāma.daṇḍau praśaṃsanti nityaṃ rāṣṭrābhivṛddhaye || 109 ||

yathā-uddharati nirdātā kakṣaṃ dhānyaṃ ca rakṣati | tathā rakṣen nṛpo rāṣṭraṃ hanyāc ca paripanthinaḥ || 110 ||

mohād rājā svarāṣṭraṃ yaḥ karṣayaty anavekṣayā | so 'cirād bhraśyate rājyāt-jīvitāt-ca sa.bāndhavaḥ || 111 ||

śarīrakarṣaṇāt prāṇāḥ kṣīyante prāṇināṃ yathā | tathā rājñām api prāṇāḥ kṣīyante rāṣṭrakarṣaṇāt || 112 ||

rāṣṭrasya saṅgrahe nityaṃ vidhānam idam ācaret | susaṅgṛhītarāṣṭre hi pārthivaḥ sukham edhate || 113 ||

dvayos trayāṇāṃ pañcānāṃ madhye gulmam adhiṣṭhitam | tathā grāmaśatānāṃ ca kuryād rāṣṭrasya saṅgraham || 114 ||

grāmasya-adhipatiṃ kuryād daśagrāmapatiṃ tathā | viṃśatīśaṃ śata.īśaṃ ca sahasrapatim eva ca || 115 ||

grāmadoṣān samutpannān grāmikaḥ śanakaiḥ svayam | śaṃsed grāmadaśa.īśāya daśa.īśo viṃśatīśine || 116 ||

viṃśatīśas tu tat sarvaṃ śata.īśāya nivedayet | śaṃsed grāmaśata.īśas tu sahasrapataye svayam || 117 ||

yāni rājapradeyāni pratyahaṃ grāmavāsibhiḥ | anna.pāna.indhanādīni grāmikas tāny avāpnuyāt || 118 ||

daśī kulaṃ tu bhuñjīta viṃśī pañca kulāni ca | grāmaṃ grāmaśatādhyakṣaḥ sahasrādhipatiḥ puram || 119 ||

teṣāṃ grāmyāṇi kāryāni pṛthakkāryāṇi ca-eva hi | rājño 'nyaḥ sacivaḥ snigdhas tāni paśyed atandritaḥ || 120 ||

nagare nagare ca-ekaṃ kuryāt sarvārthacintakam | uccaiḥsthānaṃ ghorarūpaṃ nakṣatrāṇām iva graham || 121 ||

sa tān anuparikrāmet sarvān eva sadā svayam | teṣāṃ vṛttaṃ pariṇayet samyag rāṣṭreṣu tat.caraiḥ || 122 ||

rājño hi rakṣādhikṛtāḥ parasvādāyinaḥ śaṭhāḥ | bhṛtyā bhavanti prāyeṇa tebhyo rakṣed imāḥ prajāḥ || 123 ||

ye kāryikebhyo 'rtham eva gṛhṇīyuḥ pāpacetasaḥ | teṣāṃ sarvasvam ādāya rājā kuryāt pravāsanam || 124 ||

rājā karmasu yuktānāṃ strīṇāṃ preṣyajanasya ca | pratyahaṃ kalpayed vṛttiṃ sthānaṃ karmānurūpataḥ || 125 ||

paṇo deyo 'vakṛṣṭasya ṣaḍ utkṛṣṭasya vetanam | ṣāṇmāsikas tathā-ācchādo dhānyadroṇas tu māsikaḥ || 126 ||

kraya.vikrayam adhvānaṃ bhaktaṃ ca sa.parivyayam | yogakṣemaṃ ca samprekṣya vaṇijo dāpayet karān || 127 ||

yathā phalena yujyeta rājā kartā ca karmaṇām | tathā-avekṣya nṛpo rāṣṭre kalpayet satataṃ karān || 128 ||

yathā-alpālpam adanty ādyaṃ vāryoko.vatsa.ṣaṭpadāḥ | tathā-alpālpo grahītavyo rāṣṭrād rājñābdikaḥ karaḥ || 129 ||

pañcāśadbhāga ādeyo rājñā paśu.hiraṇyayoḥ | dhānyānām aṣṭamo bhāgaḥ ṣaṣṭho dvādaśa eva vā || 130 ||

ādadīta-atha ṣaḍbhāgaṃ dru.māṃsa.madhu.sarpiṣām | gandha.oṣadhi.rasānāṃ ca puṣpa.mūla.phalasya ca || 131 ||

patra.śāka.tṛṇānāṃ ca carmaṇāṃ vaidalasya ca | mṛnmayānāṃ ca bhāṇḍānāṃ sarvasya-aśmamayasya ca || 132 ||

mriyamāṇo 'py ādadīta na rājā śrotriyāt karam | na ca kṣudhā-asya saṃsīdet-śrotriyo viṣaye vasan || 133 ||

yasya rājñas tu viṣaye śrotriyaḥ sīdati kṣudhā | tasya-api tat kṣudhā rāṣṭram acirena-eva sīdati || 134 ||

śruta.vṛtte viditvā-asya vṛttiṃ dharmyāṃ prakalpayet | saṃrakṣet sarvataś ca-enaṃ pitā putram iva-aurasam || 135 ||

saṃrakṣyamāṇo rājñā yaṃ kurute dharmam anvaham | tena-āyur vardhate rājño draviṇaṃ rāṣṭram eva ca || 136 ||

yat kiṃ cid api varṣasya dāpayet karasañjñitam | vyavahāreṇa jīvantaṃ rājā rāṣṭre pṛthagjanam || 137 ||

kārukān-śilpinaś ca-eva śūdrāṃs cātma.upajīvinaḥ | ekaikaṃ kārayet karma māsi māsi mahīpatiḥ || 138 ||

na-ucchindyād ātmano mūlaṃ pareṣāṃ ca-atitṛṣṇayā | ucchindan hy ātmano mūlam āṭmānaṃ tāṃś ca pīdayet || 139 ||

tīkṣṇaś ca-eva mṛduś ca syāt kāryaṃ vīkṣya mahīpatiḥ | tīkṣṇaś ca-eva mṛduś ca-eva rāja bhavati sammataḥ || 140 ||

amātyamukhyaṃ dharmajñaṃ prājñaṃ dāntaṃ kula.udgatam | sthāpayed āsane tasmin khinnaḥ kārya.īkṣaṇe nṛṇām || 141 ||

evaṃ sarvaṃ vidhāya-idam itikartavyam ātmanaḥ | yuktaś ca-eva-apramattaś ca parirakṣed imāḥ prajāḥ || 142 ||

vikrośantyo yasya rāṣṭrād hriyante dasyubhiḥ prajāḥ | sampaśyataḥ sa.bhṛtyasya mṛtaḥ sa na tu jīvati || 143 ||

kṣatriyasya paro dharmaḥ prājānām eva pālanam | nirdiṣṭaphalabhoktā hi rājā dharmeṇa yujyate || 144 ||

utthāya paścime yāme kṛta.śaucaḥ samāhitaḥ | hutāgnir brāhmaṇāṃś cārcya praviśet sa śubhāṃ sabhām || 145 ||

tatra sthitaḥ prajāḥ sarvāḥ pratinandya visarjayet | visṛjya ca prajāḥ sarvā mantrayet saha mantribhiḥ || 146 ||

giripṛṣṭhaṃ samāruhya prasādaṃ vā rahogataḥ | araṇye niḥ.śalāke vā mantrayed a.vibhāvitaḥ || 147 ||

yasya mantraṃ na jānanti samāgamya pṛthagjanāḥ | sa kṛtsnāṃ pṛthivīṃ bhuṅkte kośahīno 'pi pārthivaḥ || 148 ||

jaḍa.mūka.andha.badhirāṃs tairyagyonān vayo.'tigān | strī.mleccha.vyādhita.vyaṅgān mantrakāle 'pasārayet || 149 ||

bhindanty avamatā mantraṃ tairyagyonās tathā-eva ca | striyaś ca-eva viśeṣeṇa tasmāt tatrādṛto bhavet || 150 ||

madhyandine 'rdharātre vā viśrānto vigataklamaḥ | cintayed dharma.kāma.arthān sārdhaṃ tair eka eva vā || 151 ||

parasparaviruddhānāṃ teṣāṃ ca samupārjanam | kanyānāṃ sampradānaṃ ca kumārāṇāṃ ca rakṣaṇaṃ || 152 ||

dūtasampreṣaṇaṃ ca-eva kāryaśeṣaṃ tathā-eva ca | antaḥpurapracāraṃ ca praṇidhīnāṃ ca ceṣṭitam || 153 ||

kṛtsnaṃ ca-aṣṭavidhaṃ karma pañcavargaṃ ca tattvataḥ | anurāga.aparāgau ca pracāraṃ maṇḍalasya ca || 154 ||

madhyamasya pracāraṃ ca vijīgiṣoś ca ceṣṭitam | udāsīnapracāraṃ ca śatroś ca-eva prayatnataḥ || 155 ||

etāḥ prakṛtayo mūlaṃ maṇḍalasya samāsataḥ | aṣṭau ca-anyāḥ samākhyātā dvādaśa-eva tu tāḥ smṛtāḥ || 156 ||

amātya.rāṣṭra.durga.artha.daṇḍākhyāḥ pañca ca-aparāḥ | pratyekaṃ kathitā hy etāḥ saṅkṣepeṇa dvisaptatiḥ || 157 ||

anantaram ariṃ vidyād arisevinam eva ca | arer anantaraṃ mitram udāsīnaṃ tayoḥ param || 158 ||

tān sarvān abhisandadhyāt sāmādibhir upakramaiḥ | vyastaiś ca-eva samastaiś ca pauruṣeṇa nayena ca || 159 ||

sandhiṃ ca vigrahaṃ ca-eva yānam āsanam eva ca | dvaidhībhāvaṃ saṃśrayaṃ ca ṣaḍguṇāṃś cintayet sadā || 160 ||

āsanaṃ ca-eva yānaṃ ca sandhiṃ vigraham eva ca | kāryaṃ vīkṣya prayuñjīta dvaidhaṃ saṃśrayam eva ca || 161 ||

sandhiṃ tu dvividhaṃ vidyād rājā vigraham eva ca | ubhe yāna.āsane ca-eva dvividhaḥ saṃśrayaḥ smṛtaḥ || 162 ||

samāna.yānakarmā ca viparītas tathā-eva ca | tadā tv āyatisaṃyuktaḥ sandhir jñeyo dvilakṣaṇaḥ || 163 ||

svayaṅkṛtaś ca kāryārtham akāle kāla eva vā | mitrasya ca-eva-apakṛte dvividho vigrahaḥ smṛtaḥ || 164 ||

ekākinaś ca-ātyayike kārye prāpte yadṛcchayā | saṃhatasya ca mitreṇa dvividhaṃ yānam ucyate || 165 ||

kṣīṇasya ca-eva kramaśo daivāt pūrvakṛtena vā | mitrasya ca-anurodhena dvividhaṃ smṛtam āsanam || 166 ||

balasya svāminaś ca-eva sthitiḥ kāryārthasiddhaye | dvividhaṃ kīrtyate dvaidhaṃ ṣāḍguṇyaguṇavedibhiḥ || 167 ||

arthasampādanārthaṃ ca pīḍyamānasya śatrubhiḥ | sādhuṣu vyapadeśaś ca dvividhaḥ saṃśrayaḥ smṛtaḥ || 168 ||

yadā-avagacched āyatyām ādhikyaṃ dhruvam ātmanaḥ | tadātve ca-alpikāṃ pīḍāṃ tadā sandhiṃ samāśrayet || 169 ||

yadā prahṛṣṭā manyeta sarvās tu prakṛtīr bhṛśam | atyucchritaṃ tathātmānaṃ tadā kurvīta vigraham || 170 ||

yadā manyeta bhāvena hṛṣṭaṃ puṣṭaṃ balaṃ svakam | parasya viparītaṃ ca tadā yāyād ripuṃ prati || 171 ||

yadā tu syāt parikṣīṇo vāhanena balena ca | tadāsīta prayatnena śanakaiḥ sāntvayann arīn || 172 ||

manyeta-ariṃ yadā rājā sarvathā balavattaram | tadā dvidhā balaṃ kṛtvā sādhayet kāryam ātmanaḥ || 173 ||

yadā parabalānāṃ tu gamanīyatamo bhavet | tadā tu saṃśrayet kṣipraṃ dhārmikaṃ balinaṃ nṛpam || 174 ||

nigrahaṃ prakṛtīnāṃ ca kuryād yo 'ribalasya ca | upaseveta taṃ nityaṃ sarvayatnair guruṃ yathā || 175 ||

yadi tatra-api sampaśyed doṣaṃ saṃśrayakāritam | suyuddham eva tatra-api nirviśaṅkaḥ samācaret || 176 ||

sarva.upāyais tathā kuryān nītijñaḥ pṛthivīpatiḥ | yathā-asya-abhyadhikā na syur mitra.udāsīna.śatravaḥ || 177 ||

āyatiṃ sarvakāryāṇāṃ tadātvaṃ ca vicārayet | atītānāṃ ca sarveṣāṃ guṇa.doṣau ca tattvataḥ || 178 ||

āyatyāṃ guṇa.doṣajñas tadātve kṣipra.niścayaḥ | atīte kāryaśeṣajñaḥ śatrubhir na-abhibhūyate || 179 ||

yathā-enaṃ na-abhisandadhyur mitra.udāsīna.śatravaḥ | tathā sarvaṃ saṃvidadhyād eṣa sāmāsiko nayaḥ || 180 ||

tadā tu yānam ātiṣṭhed arirāṣṭraṃ prati prabhuḥ | tadānena vidhānena yāyād aripuraṃ śanaiḥ || 181 ||

mārgaśīrṣe śubhe māsi yāyād yātrāṃ mahīpatiḥ | phālgunaṃ vātha caitraṃ vā māsau prati yathābalam || 182 ||

anyeṣv api tu kāleṣu yadā paśyed dhruvaṃ jayam | tadā yāyād vigṛhya-eva vyasane ca-utthite ripoḥ || 183 ||

kṛtvā vidhānaṃ mūle tu yātrikaṃ ca yathāvidhi | upagṛhya-āspadaṃ ca-eva cārān samyag vidhāya ca || 184 ||

saṃśodhya trividhaṃ mārgaṃ ṣaḍvidhaṃ ca balaṃ svakam | sāmparāyikakalpena yāyād aripuraṃ prati || 185 ||

śatrusevini mitre ca gūḍhe yuktataro bhavet | gata.pratyāgate ca-eva sa hi kaṣṭataro ripuḥ || 186 ||

daṇḍavyūhena tan mārgaṃ yāyāt tu śakaṭena vā | varāha.makarābhyāṃ vā sūcyā vā garuḍena vā || 187 ||

yataś ca bhayam āśaṅket tato vistārayed balam | padmena ca-eva vyūhena niviśeta sadā svayam || 188 ||

senāpati.balādhyakṣau sarvadikṣu niveśayet | yataś ca bhayam āśaṅket prācīṃ tāṃ kalpayed diśam || 189 ||

gulmāṃś ca sthāpayed āptān kṛtasañjñān samantataḥ | sthāne yuddhe ca kuśalān abhīrūn avikāriṇaḥ || 190 ||

saṃhatān yodhayed alpān kāmaṃ vistārayed bahūn | sūcyā vajreṇa ca-eva-etān vyūhena vyūhya yodhayet || 191 ||

syandana.aśvaiḥ same yudhyed anūpe nau dvipais tathā | vṛkṣa.gulmāvṛte cāpair asi.carma.āyudhaiḥ sthale || 192 ||

kurukṣetrāṃś ca matsyāṃś ca pañcālān-śūrasenajān | dīrghāṃl laghūṃś ca-eva narān agrānīkeṣu yojayet || 193 ||

praharṣayed balaṃ vyūhya tāṃś ca samyak parīkṣayet | ceṣṭāś ca-eva vijānīyād arīn yodhayatām api || 194 ||

uparudhya-arim āsīta rāṣṭraṃ cāsya-upapīḍayet | dūṣayec cāsya satataṃ yavasa.anna.udaka.indhanam || 195 ||

bhindyāc ca-eva taḍāgāni prākāra.parikhās tathā | samavaskandayec ca-enaṃ rātrau vitrāsayet tathā || 196 ||

upajapyān upajaped budhyeta-eva ca tatkṛtam | yukte ca daive yudhyeta jayaprepsur apetabhīḥ || 197 ||

sāmnā dānena bhedena samastair atha vā pṛthak | vijetuṃ prayateta-arīn na yuddhena kadā cana || 198 ||

anityo vijayo yasmād dṛśyate yudhyamānayoḥ | parājayaś ca saṅgrāme tasmād yuddhaṃ vivarjayet || 199 ||

trayāṇām apy upāyānāṃ pūrva.uktānām asambhave | tathā yudhyeta sampanno vijayeta ripūn yathā || 200 ||

jitvā sampūjayed devān brāhmaṇāṃś ca-eva dhārmikān | pradadyāt parihārārthaṃ khyāpayed abhayāni ca || 201 ||

sarveṣāṃ tu viditvā-eṣāṃ samāsena cikīrṣitam | sthāpayet tatra tadvaṃśyaṃ kuryāc ca samayakriyām || 202 ||

pramāṇāni ca kurvīta teṣāṃ dharmān yathā.uditān | ratnaiś ca pūjayed enaṃ pradhānapuruṣaiḥ saha || 203 ||

ādānam apriyakaraṃ dānaṃ ca priyakārakam | abhīpsitānām arthānāṃ kāle yuktaṃ || 204 ||

sarvaṃ karma-idam āyattaṃ vidhāne daiva.mānuṣe | tayor daivam acintyaṃ tu mānuṣe vidyate kriyā || 205 ||

saha vā-api vrajed yuktaḥ sandhiṃ kṛtvā prayatnataḥ | mitraṃ hiraṇyaṃ bhūmiṃ vā sampaśyaṃs trividhaṃ phalam || 206 ||

pārṣṇigrāhaṃ ca samprekṣya tathākrandaṃ ca maṇḍale | mitrād atha-apy amitrād vā yātrāphalam avāpnuyāt || 207 ||

hiraṇya.bhūmisamprāptyā pārthivo na tatha-edhate | yathā mitraṃ dhruvaṃ labdhvā kṛśam apy āyatikṣamam || 208 ||

dharmajñaṃ ca kṛtajñaṃ ca tuṣṭaprakṛtim eva ca | anuraktaṃ sthirārambhaṃ laghumitraṃ praśasyate || 209 ||

prājñaṃ kulīnaṃ śūraṃ ca dakṣaṃ dātāram eva ca | kṛtajñaṃ dhṛtimantaṃ ca kaṣṭam āhur ariṃ budhāḥ || 210 ||

āryatā puruṣajñānaṃ śauryaṃ karuṇaveditā | sthaulalakṣyaṃ ca satatam udāsīnaguṇa.udayaḥ || 211 ||

ksemyāṃ sasyapradāṃ nityaṃ paśuvṛddhikarīm api | parityajen nṛpo bhūmim ātmārtham a.vicārayan || 212 ||

āpadarthaṃ dhanaṃ rakṣed dārān rakṣed dhanair api | ātmānaṃ satataṃ rakṣed dārair api dhanair api || 213 ||

saha sarvāḥ samutpannāḥ prasamīkṣya-āpado bhṛśam | saṃyuktāṃś ca viyuktāṃś ca sarva.upāyān sṛjed budhaḥ || 214 ||

upetāram upeyaṃ ca sarva.upāyāṃś ca kṛtsnaśaḥ | etat trayaṃ samāśritya prayateta-arthasiddhaye || 215 ||

evaṃ sarvam idaṃ rājā saha sammantrya mantribhiḥ | vyāyamya-āplutya madhyāhne bhoktum antaḥpuraṃ viśet || 216 ||

tatra-ātmabhūtaiḥ kālajñair a.hāryaiḥ paricārakaiḥ | suparīkṣitam annādyam adyān mantrair viṣāpahaiḥ || 217 ||

viṣaghnair agadaiś ca-asya sarvadravyāṇi yojayet | viṣaghnāni ca ratnāni niyato dhārayet sadā || 218 ||

parīkṣitāḥ striyaś ca-enaṃ vyajana.udaka.dhūpanaiḥ | veṣābharaṇasaṃśuddhāḥ spṛśeyuḥ susamāhitāḥ || 219 ||

evaṃ prayatnaṃ kurvīta yāna.śayyā.āsana.aśane | snāne prasādhane ca-eva sarvālaṅkārakeṣu ca || 220 ||

bhuktavān viharec ca-eva strībhir antaḥpure saha | vihṛtya tu yathākālaṃ punaḥ kāryāṇi cintayet || 221 ||

alaṅkṛtaś ca sampaśyed āyudhīyaṃ punar janam | vāhanāni ca sarvāṇi śastrāṇy ābharaṇāni ca || 222 ||

sandhyāṃ ca-upāsya śṛṇuyād antarveśmani śastrabhṛt | rahasya-ākhyāyināṃ ca-eva praṇidhīnāṃ ca ceṣṭitam || 223 ||

gatvā kakṣāntaraṃ tv anyat samanujñāpya taṃ janam | praviśed bhojanārthaṃ ca strīvṛto 'ntaḥpuraṃ punaḥ || 224 ||

tatra bhuktvā punaḥ kiṃ cit tūryaghoṣaiḥ praharṣitaḥ | saṃviśet taṃ yathākālam uttiṣṭhec ca gataklamaḥ || 225 ||

etadvidhānam ātiṣṭhed arogaḥ pṛthivīpatiḥ | asvasthaḥ sarvam etat tu bhṛtyeṣu viniyojayet || 226 ||