Adhyay 6

evaṃ gṛhāśrame sthitvā vidhivat snātako dvijaḥ | vane vaset tu niyato yathāvad vijita.indriyaḥ || 1 ||

gṛhasthas tu yathā paśyed valī.palitam ātmanaḥ | apatyasya-eva ca-apatyaṃ tadā-araṇyaṃ samāśrayet || 2 ||

santyajya grāmyam āhāraṃ sarvaṃ ca-eva paricchadam | putreṣu bhāryāṃ nikṣipya vanaṃ gacchet saha-eva vā || 3 ||

agnihotraṃ samādāya gṛhyaṃ ca-agniparicchadam | grāmād araṇyaṃ niḥsṛtya nivasen niyata.indriyaḥ || 4 ||

muni.annair vividhair medhyaiḥ śāka.mūla.phalena vā | etān eva mahāyajñān nirvaped vidhipūrvakam || 5 ||

vasīta carma cīraṃ vā sāyaṃ snāyāt prage tathā | jaṭāś ca bibhṛyān nityaṃ śmaśru.loma.nakhāni ca || 6 ||

yad.bhakṣyaṃ syād tato dadyād baliṃ bhikṣāṃ ca śaktitaḥ | ap.mūla.phala.bhikṣābhir arcayed āśramāgatān || 7 ||

svādhyāye nityayuktaḥ syād dānto maitraḥ samāhitaḥ | dātā nityam an.ādātā sarvabhūtānukampakaḥ || 8 ||

vaitānikaṃ ca juhuyād agnihotraṃ yathāvidhi | darśam a.skandayan parva paurṇamāsaṃ ca yogataḥ || 9 ||

ṛkṣeṣṭy.āgrayaṇaṃ ca-eva cāturmāsyāni ca-āharet | turāyaṇaṃ ca kramaśo dakṣasyāyanam eva ca || 10 ||

vāsanta.śāradair medhyair muni.annaiḥ svayam āhṛtaiḥ | puroḍāśāṃś carūṃś ca-eva vidhivat-nirvapet pṛthak || 11 ||

devatābhyas tu tadd hutvā vanyaṃ medhyataraṃ haviḥ | śeṣam ātmani yuñjīta lavaṇaṃ ca svayaṃ kṛtam || 12 ||

sthalaja.audakaśākāni puṣpa.mūla.phalāni ca | medhyavṛkṣa.udbhavāny adyāt snehāṃś ca phala.sambhavān || 13 ||

varjayen madhu māṃsaṃ ca bhaumāni kavakāni ca | bhūstṛṇaṃ śigrukaṃ ca-eva śleśmātaka.phalāni ca || 14 ||

tyajed āśvayuje māsi muni.annaṃ pūrvasañcitam | jīrṇāni ca-eva vāsāṃsi śāka.mūla.phalāni ca || 15 ||

na phālakṛṣṭam aśnīyād utsṛṣṭam api kena cit | na grāmajātāny ārto 'pi mūlāṇi ca phalāni ca || 16 ||

agnipakva.aśano vā syāt kālapakvabhuj-eva vā | aśma.kuṭṭo bhaved vā-api danta.ulūkhaliko 'pi vā || 17 ||

sadyaḥ prakṣālako vā syān māsa.sañcayiko 'pi vā | ṣaṇmāsa.nicayo vā syāt samā.nicaya eva vā || 18 ||

naktaṃ ca-annaṃ samaśnīyād divā vā-āhṛtya śaktitaḥ | caturthakāliko vā syāt syād vā-apy aṣṭama.kālikaḥ || 19 ||

cāndrāyaṇavidhānair vā śukla.kṛṣṇe ca vartayet | pakṣāntayor vā-apy aśnīyād yavāgūṃ kvathitāṃ sakṛt || 20 ||

puṣpa.mūla.phalair vā-api kevalair vartayet sadā | kālapakvaiḥ svayaṃ śīrṇair vaikhānasamate sthitaḥ || 21 ||

bhūmau viparivarteta tiṣṭhed vā prapadair dinam | sthāna.āsanābhyāṃ viharet savaneṣu-upayann apaḥ || 22 ||

grīṣme pañca.tapās tu syād varṣāsv abhra.avakāśikaḥ | ārdra.vāsās tu hemante kramaśo vardhayaṃs tapaḥ || 23 ||

upaspṛśaṃs triṣavaṇaṃ pitṝn devāṃś ca tarpayet | tapas-caraṃś ca-ugrataraṃ śoṣayed deham ātmanaḥ || 24 ||

agnīn ātmani vaitānān samāropya yathāvidhi | an.agnir a.niketaḥ syān munir mūla.phala.aśanaḥ || 25 ||

aprayatnaḥ sukhārtheṣu brahmacārī dharā.āśayaḥ | śaraṇeṣv a.mamaś ca-eva vṛkṣamūla.niketanaḥ || 26 ||

tāpaseṣv eva vipreṣu yātrikaṃ bhaikṣam āharet | gṛhamedhiṣu ca-anyeṣu dvijeṣu vanavāsiṣu || 27 ||

grāmād āhṛtya vā-aśnīyād aṣṭau grāsān vane vasan | pratigṛhya puṭena-eva pāṇinā śakalena vā || 28 ||

etāś ca-anyāś ca seveta dīkṣā vipro vane vasan | vividhāś ca-aupaniṣadīr ātmasaṃsiddhaye śrutīḥ || 29 ||

ṛṣibhir brāhmaṇaiś ca-eva gṛhasthair eva sevitāḥ | vidyā.tapo.vivṛddhyarthaṃ śarīrasya ca śuddhaye || 30 ||

aparājitāṃ vā-āsthāya vrajed diśam ajihmagaḥ | ā nipātāt-śarīrasya yukto vāri.anila.aśanaḥ || 31 ||

āsāṃ maharṣicaryāṇāṃ tyaktvā-anyatamayā tanum | vīta.śoka.bhayo vipro brahmaloke mahīyate || 32 ||

vaneṣu ca vihṛtya-evaṃ tṛtīyaṃ bhāgam āyuṣaḥ | caturtham āyuṣo bhāgaṃ tyakvā saṅgān parivrajet || 33 ||

āśramād āśramaṃ gatvā huta.homo jita.indriyaḥ | bhikṣā.bali.pariśrāntaḥ pravrajan pretya vardhate || 34 ||

ṛṇāni trīṇy apākṛtya mano mokṣe niveśayet | an.apākṛtya mokṣaṃ tu sevamāno vrajaty adhaḥ || 35 ||

adhītya vidhivad vedān putrāṃś ca-utpādya dharmataḥ | iṣṭvā ca śaktito yajñair mano mokṣe niveśayet || 36 ||

an.adhītya dvijo vedān an.utpādya tathā sutān | an.iṣṭvā ca-eva yajñaiś ca mokṣam icchan vrajaty adhaḥ || 37 ||

prājāpatyaṃ nirupya-iṣṭiṃ sarvavedasa.dakṣiṇām | ātmany agnīn samāropya brāhmaṇaḥ pravrajed gṛhāt || 38 ||

yo dattvā sarvabhūtebhyaḥ pravrajaty abhayaṃ gṛhāt | tasya tejomayā lokā bhavanti brahmavādinaḥ || 39 ||

yasmād aṇu-api bhūtānāṃ dvijān na-utpadyate bhayam | tasya dehād vimuktasya bhayaṃ na-asti kutaś cana || 40 ||

agārād abhiniṣkrāntaḥ pavitra.upacito muniḥ | samupoḍheṣu kāmeṣu nir.apekṣaḥ parivrajet || 41 ||

eka eva caren nityaṃ siddhyartham asahāyavān | siddhim ekasya sampaśyan na jahāti na hīyate || 42 ||

an.agnir a.niketaḥ syād grāmam annārtham āśrayet | upekṣako '.saṅkusuko munir bhāvasamāhitaḥ || 43 ||

kapālaṃ vṛkṣamūlāni kucelam asahāyatā | samatā ca-eva sarvasminn etat-muktasya lakṣaṇam || 44 ||

na-abhinandeta maraṇaṃ na-abhinandeta jīvitam | kālam eva pratīkṣeta nirveśaṃ bhṛtako yathā || 45 ||

dṛṣṭipūtaṃ nyaset pādaṃ vastrapūtaṃ jalaṃ pibet | satyapūtāṃ vaded vācaṃ manaḥpūtaṃ samācaret || 46 ||

ativādāṃs titikṣeta na-avamanyeta kaṃ cana | na ca-imaṃ deham āśritya vairaṃ kurvīta kena cit || 47 ||

kruddhyantaṃ na pratikrudhyed ākruṣṭaḥ kuśalaṃ vadet | saptadvārāvakīrṇāṃ ca na vācam anṛtāṃ vadet || 48 ||

adhyātma.ratir āsīno nir.apekṣo nir.āmiṣaḥ | ātmanā-eva sahāyena sukhārthī vicared iha || 49 ||

na ca-utpāta.nimittābhyāṃ na nakṣatra.aṅgavidyayā | na-anuśāsana.vādābhyāṃ bhikṣāṃ lipseta karhi cit || 50 ||

na tāpasair brāhmaṇair vā vayobhir api vā śvabhiḥ | ākīrṇaṃ bhikṣukair vā-anyair agāram upasaṃvrajet || 51 ||

kḷpta.keśa.nakha.śmaśruḥ pātrī daṇḍī kusumbhavān | vicaren niyato nityaṃ sarvabhūtāny a.pīḍayan || 52 ||

ataijasāni pātrāṇi tasya syur nir.vraṇāni ca | teṣām adbhiḥ smṛtaṃ śaucaṃ camasānām iva-adhvare || 53 ||

alābuṃ dārupātraṃ ca mṛṇmayaṃ vaidalaṃ tathā | etāṇi yatipātrāṇi manuḥ svāyambhuvo 'bravīt || 54 ||

ekakālaṃ cared bhaikṣaṃ na prasajjeta vistare | bhaikṣe prasakto hi yatir viṣayeṣv api sajjati || 55 ||

vi.dhūme sanna.musale vy.aṅgāre bhuktavaj.jane | vṛtte śarāvasampāte bhikṣāṃ nityaṃ yatiś caret || 56 ||

alābhe na viṣadī syāt-lābhe ca-eva na harṣayet | prāṇayātrika.mātraḥ syāt-mātrāsaṅgād vinirgataḥ || 57 ||

abhipūjitalābhāṃs tu jugupseta-eva sarvaśaḥ | abhipūjitalābhaiś ca yatir mukto 'pi badhyate || 58 ||

alpānnābhyavahāreṇa rahaḥsthāna.āsanena ca | hriyamāṇāni viṣayair indriyāṇi nivartayet || 59 ||

indriyāṇāṃ nirodhena rāga.dveśa.kṣayeṇa ca | ahiṃsayā ca bhūtānām amṛtatvāya kalpate || 60 ||

avekṣeta gatīr nṝṇāṃ karmadoṣa.samudbhavāḥ | niraye ca-eva patanaṃ yātanāś ca yamakṣaye || 61 ||

viprayogaṃ priyaiś ca-eva saṃyogaṃ ca tathā-apriyaiḥ | jarayā ca-abhibhavanaṃ vyādhibhiś ca-upapīḍanaṃ || 62 ||

dehād utkramaṇaṃ ca-aṣmāt punar garbhe ca sambhavam | yonikoṭisahasreṣu sṛtīś ca-asya-antarātmanaḥ || 63 ||

adharma.prabhavaṃ ca-eva duḥkhayogaṃ śarīriṇām | dharmārtha.prabhavaṃ ca-eva sukhasaṃyogam akṣayam || 64 ||

sūkṣmatāṃ ca-anvavekṣeta yogena paramātmanaḥ | deheṣu ca samutpattim uttameṣv adhameṣu ca || 65 ||

dūṣito 'pi cared dharmaṃ yatra tatra-āśrame rataḥ | samaḥ sarveṣu bhūteṣu na liṅgaṃ dharmakāraṇam || 66 ||

phalaṃ katakavṛkṣasya yady apy ambuprasādakam | na nāmagrahaṇād eva tasya vāri prasīdati || 67 ||

saṃrakṣaṇārthaṃ jantūnāṃ rātrāv ahani vā sadā | śarīrasya-atyaye ca-eva samīkṣya vasudhāṃ caret || 68 ||

ahnā rātryā ca yāñ jantūn hinasty ajñānato yatiḥ | teṣāṃ snātvā viśuddhyarthaṃ prāṇāyāmān ṣaḍ ācaret || 69 ||

prāṇāyāmā brāhmaṇasya trayo 'pi vidhivat kṛtāḥ | vyāhṛti.praṇavair yuktā vijñeyaṃ paramaṃ tapaḥ || 70 ||

dahyante dhmāyamānānāṃ dhātūnāṃ hi yathā malāḥ | tathā-indriyāṇāṃ dahyante doṣāḥ prāṇasya nigrahāt || 71 ||

prāṇāyamair dahed doṣān dhāraṇābhiś ca kilbiṣam | pratyāhāreṇa saṃsargān dhyānena-an.īśvarān guṇān || 72 ||

uccāvaceṣu bhūteṣu durjñeyām akṛta.ātmabhiḥ | dhyānayogena sampaśyed gatim asya-antarātmanaḥ || 73 ||

samyagdarśanasampannaḥ karmabhir na nibadhyate | darśanena vihīnas tu saṃsāraṃ pratipadyate || 74 ||

ahiṃsayā-indriya.a.saṅgair vaidikaiś ca-eva karmabhiḥ | tapasaś caraṇaiś ca-ugraiḥ sādhayanti-iha tatpadam || 75 ||

asthi.sthūṇaṃ snāyuyutaṃ māṃsa.śoṇita.lepanam | carmāvanaddhaṃ dur.gandhi pūrṇaṃ mūtra.purīṣayoḥ || 76 ||

jarā.śokasamāviṣṭaṃ rogāyatanam āturam | rajasvalam anityaṃ ca bhūtāvāsam imaṃ tyajet || 77 ||

nadīkūlaṃ yathā vṛkṣo vṛkṣaṃ vā śakunir yathā | tathā tyajann imaṃ dehaṃ kṛcchrād grāhād vimucyate || 78 ||

priyeṣu sveṣu sukṛtam apriyeṣu ca duṣkṛtam | visṛjya dhyānayogena brahma-abhyeti sanātanam || 79 ||

yadā bhāvena bhavati sarvabhāveṣu niḥspṛhaḥ | tadā sukham avāpnoti pretya ca-iha ca śāśvatam || 80 ||

anena vidhinā sarvāṃs tyaktvā saṅgān-śanaiḥ śanaiḥ | sarvadvandvavinirmukto brahmaṇy eva-avatiṣṭhate || 81 ||

dhyānikaṃ sarvam eva-etad yad etad abhiśabditam | na hy an.adhyātmavit kaś cit kriyāphalam upāśnute || 82 ||

adhiyajñaṃ brahma japed ādhidaivikam eva ca | ādhyātmikaṃ ca satataṃ vedāntābhihitaṃ ca yat || 83 ||

idaṃ śaraṇam ajñānām idam eva vijānatām | idam anvicchatāṃ svargam idam ānantyam icchatām || 84 ||

anena kramayogena parivrajati yo dvijaḥ | sa vidhūya-iha pāpmānaṃ paraṃ brahma-adhigacchati || 85 ||

eṣa dharmo 'nuśiṣṭo vo yatīnāṃ niyata.ātmanām | vedasannyāsikānāṃ tu karmayogaṃ nibodhata || 86 ||

brahmacārī gṛhasthaś ca vānaprastho yatis tathā | ete gṛhastha.prabhavāś catvāraḥ pṛthag āśramāḥ || 87 ||

sarve 'pi kramaśas tv ete yathāśāstraṃ niṣevitāḥ | yathā.ukta.kāriṇaṃ vipraṃ nayanti paramāṃ gatim || 88 ||

sarveṣām api ca-eteṣāṃ veda.smṛtividhānataḥ | gṛhastha ucyate śreṣṭhaḥ sa trīn etān bibharti hi || 89 ||

yathā nadī.nadāḥ sarve sāgare yānti saṃsthitim | tathā-eva-āśramiṇaḥ sarve gṛhasthe yānti saṃsthitim || 90 ||

caturbhir api ca-eva-etair nityam āśramibhir dvijaiḥ | daśa.lakṣaṇako dharmaḥ sevitavyaḥ prayatnataḥ || 91 ||

dhṛtiḥ kṣamā damo 'steyaṃ śaucam indriyanigrahaḥ | dhīr vidyā satyam akrodho daśakaṃ dharmalakṣaṇam || 92 ||

daśa lakṣaṇāni dharmasya ye viprāḥ samadhīyate | adhītya ca-anuvartante te yānti paramāṃ gatim || 93 ||

daśa.lakṣaṇakaṃ dharmam anutiṣṭhan samāhitaḥ | vedāntaṃ vidhivat-śrutvā sannyased an.ṛṇo dvijaḥ || 94 ||

sannyasya sarvakarmāṇi karmadoṣān apānudan | niyato vedam abhyasya putraiśvarye sukhaṃ vaset || 95 ||

evaṃ sannyasya karmāṇi svakārya.paramo '.spṛhaḥ | sannyāsena-apahatya-enaḥ prāpnoti paramaṃ gatim || 96 ||

eṣa vo 'bhihito dharmo brāhmaṇasya catur.vidhaḥ | puṇyo 'kṣaya.phalaḥ pretya rājñāṃ dharmaṃ nibodhata || 97 ||