Adhyay 3

ṣaṭtriṃśad.ābdikaṃ caryaṃ gurau traivedikaṃ vratam | tadardhikaṃ pādikaṃ vā grahaṇāntikam eva vā || 1 ||

vedān adhītya vedau vā vedaṃ vā-api yathākramam | a.vipluta.brahmacaryo gṛhasthāśramam āvaset || 2 ||

taṃ pratītaṃ svadharmeṇa brahmadāyaharaṃ pituḥ | sragviṇaṃ talpa āsīnam arhayet prathamaṃ gavā || 3 ||

guruṇānumataḥ snātvā samāvṛtto yathāvidhi | udvaheta dvijo bhāryāṃ sa.varṇāṃ lakṣaṇānvitām || 4 ||

a.sapiṇḍā ca yā mātur a.sagotrā ca yā pituḥ | sā praśastā dvijātīnāṃ dārakarmaṇi maithune || 5 ||

mahānty api samṛddhāni go.'ja.avi.dhana.dhānyataḥ | strīsambandhe daśa-etāni kulāni parivarjayet || 6 ||

hīna.kriyaṃ niṣ.puruṣaṃ niś.chando romaśa.arśasam | kṣaya.āmayāvy.apasmāri.śvitri.kuṣṭhi.kulāni ca || 7 ||

na-udvahet kapilāṃ kanyāṃ na-adhikāṅgīṃ na rogiṇīm | na-a.lomikāṃ na-ati.lomāṃ na vācāṭāṃ na piṅgalām || 8 ||

na-ṛkṣa.vṛkṣa.nadī.nāmnīṃ na-antya.parvata.nāmikām | na pakṣi.ahi.preṣya.nāmnīṃ na ca bhīṣana.nāmikām || 9 ||

a.vyaṅga.aṅgīṃ saumya.nāmnīṃ haṃsa.vāraṇa.gāminīm | tanuloma.keśa.daśanāṃ mṛdv.aṅgīm udvahet striyam || 10 ||

yasyās tu na bhaved bhrātā na vijñāyeta vā pitā | na-upayaccheta tāṃ prājñaḥ putrikā.adharmaśaṅkayā || 11 ||

savarṇā-agre dvijātīnāṃ praśastā dārakarmaṇi | kāmatas tu pravṛttānām imāḥ syuḥ kramaśo 'varāḥ || 12 ||

śūdrā-eva bhāryā śūdrasya sā ca svā ca viśaḥ smṛte | te ca svā ca-eva rājñaś ca tāś ca svā ca-agra.janmanaḥ || 13 ||

na brāhmaṇa.kṣatriyayor āpady api hi tiṣṭhatoḥ | kasmiṃś cid api vṛttānte śūdrā bhāryā-upadiśyate || 14 ||

hīnajāti.striyaṃ mohād udvahanto dvijātayaḥ | kulāny eva nayanty āśu sa.santānāni śūdratām || 15 ||

śūdrāvedī pataty atrer utathyatanayasya ca | śaunakasya suta.utpattyā tad.apatyatayā bhṛgoḥ || 16 ||

śūdrāṃ śayanam āropya brāhmaṇo yāty adhogatim | janayitvā sutaṃ tasyāṃ brāhmaṇyād eva hīyate || 17 ||

daiva.pitrya.ātitheyāni tat.pradhānāni yasya tu | na-aśnanti pitṛ.devās tan na ca svargaṃ sa gacchati || 18 ||

vṛṣalīphena.pītasya niḥśvāsa.upahatasya ca | tasyāṃ ca-eva prasūtasya niṣkṛtir na vidhīyate || 19 ||

caturṇām api varṇānaṃ pretya ca-iha hita.ahitān | aṣṭāv imān samāsena strīvivāhān nibodhata || 20 ||

brāhmo daivas tathā-eva-ārṣaḥ prājāpatyas tathā-asuraḥ | gāndharvo rākṣasaś ca-eva paiśācaś ca-aṣṭamo 'dhamaḥ || 21 ||

yo yasya dharmyo varṇasya guṇa.doṣau ca yasya yau | tad vaḥ sarvaṃ pravakṣyāmi prasave ca guṇa.aguṇān || 22 ||

ṣaḍ ānupūrvyā viprasya kṣatrasya caturo 'varān | viś.śūdrayos tu tān eva vidyād dharmyān a.rākṣasān || 23 ||

caturo brāhmaṇasya-ādyān praśastān kavayo viduḥ | rākṣasaṃ kṣatriyasya-ekam āsuraṃ vaiśya.śūdrayoḥ || 24 ||

pañcānāṃ tu trayo dharmyā dvāv adharmyau smṛtāv iha | paiśācaś ca-asuraś ca-eva na kartavyau kadā cana || 25 ||

pṛthak pṛthag vā miśrau vā vivāhau pūrvacoditau | gāndharvo rākṣasaś ca-eva dharmyau kṣatrasya tau smṛtau || 26 ||

ācchādya ca-arcayitvā ca śruta.śīlavate svayam | āhūya dānaṃ kanyāyā brāhmo dharmaḥ prakīrtitaḥ || 27 ||

yajñe tu vitate samyag ṛtvije karma kurvate | alaṅkṛtya sutādānaṃ daivaṃ dharmaṃ pracakṣate || 28 ||

ekaṃ gomithunaṃ dve vā varād ādāya dharmataḥ | kanyāpradānaṃ vidhivad ārṣo dharmaḥ sa ucyate || 29 ||

saha-ubhau caratāṃ dharmam iti vācā-anubhāṣya ca | kanyāpradānam abhyarcya prājāpatyo vidhiḥ smṛtaḥ || 30 ||

jñātibhyo draviṇaṃ dattvā kanyāyai ca-eva śaktitaḥ | kanyāpradānaṃ svācchandyād āsuro dharma ucyate || 31 ||

icchayā-anyonyasaṃyogaḥ kanyāyāś ca varasya ca | gāndharvaḥ sa tu vijñeyo maithunyaḥ kāma.sambhavaḥ || 32 ||

hatvā chittvā ca bhittvā ca krośantīṃ rudantīṃ gṛhāt | prasahya kanyāharaṇaṃ rākṣaso vidhir ucyate || 33 ||

suptāṃ mattāṃ pramattāṃ vā raho yatra-upagacchati | sa pāpiṣṭho vivāhānāṃ paiśācaś ca-aṣṭamo 'dhamaḥ || 34 ||

adbhir eva dvija.agryāṇāṃ kanyādānaṃ viśiṣyate | itareṣāṃ tu varṇānām itaretarakāmyayā || 35 ||

yo yasya-eṣāṃ vivāhānāṃ manunā kīrtito guṇaḥ | sarvaṃ śṛṇuta taṃ viprāḥ sarvaṃ kīrtayato mama || 36 ||

daśa pūrvān parān vaṃśyān ātmānaṃ ca-ekaviṃśakam | brāhmīputraḥ sukṛtakṛt-mocayaty enasaḥ pitṝn || 37 ||

daiva.ūḍhājaḥ sutaś ca-eva sapta sapta para.avarān | ārṣa.ūḍhājaḥ sutas trīṃs trīn ṣaṭ ṣaṭ kāya.ūḍhajaḥ sutaḥ || 38 ||

brāhma.ādiṣu vivāheṣu caturṣv eva-anupūrvaśaḥ | brahmavarcasvinaḥ putrā jāyante śiṣṭasammatāḥ || 39 ||

rūpa.sattva.guṇa.upetā dhanavanto yaśasvinaḥ | paryāpta.bhogā dharmiṣṭhā jīvanti ca śataṃ samāḥ || 40 ||

itareṣu tu śiṣṭeṣu nṛśaṃsā.anṛtavādinaḥ | jāyante durvivāheṣu brahma.dharma.dviṣaḥ sutāḥ || 41 ||

aninditaiḥ strīvivāhair anindyā bhavati prajā | ninditair ninditā nṝṇāṃ tasmān nindyān vivarjayet || 42 ||

pāṇigrahaṇasaṃskāraḥ sa.varṇāsu-upadiśyate | a.savarṇāsv ayaṃ jñeyo vidhir udvāhakarmaṇi || 43 ||

śaraḥ kṣatriyayā grāhyaḥ pratodo vaiśyakanyayā | vasanasya daśā grāhyā śūdrayā-utkṛṣṭavedane || 44 ||

ṛtukālābhigāmī syāt svadāranirataḥ sadā | parvavarjaṃ vrajec ca-enāṃ tad.vrato ratikāmyayā || 45 ||

ṛtuḥ svābhāvikaḥ strīṇāṃ rātrayaḥ ṣoḍaśa smṛtāḥ | caturbhir itaraiḥ sārdham ahobhiḥ sadvigarhitaiḥ || 46 ||

tāsām ādyāś catasras tu ninditā-ekādaśī ca yā | trayodaśī ca śeṣās tu praśastā daśarātrayaḥ || 47 ||

yugmāsu putrā jāyante striyo 'yugmāsu rātriṣu | tasmād yugmāsu putrārthī saṃviśed ārtave striyam || 48 ||

pumān puṃso 'dhike śukre strī bhavaty adhike striyāḥ | same 'pumān puṃ.striyau vā kṣīṇe 'lpe ca viparyayaḥ || 49 ||

nindyāsv aṣṭāsu ca-anyāsu striyo rātriṣu varjayan | brahmacāry eva bhavati yatra tatra-āśrame vasan || 50 ||

na kanyāyāḥ pitā vidvān gṛhṇīyāt-śulkam aṇu-api | gṛhṇan-śulkaṃ hi lobhena syān naro 'patyavikrayī || 51 ||

strīdhanāni tu ye mohād upajīvanti bāndhavāḥ | nārī yānāni vastraṃ vā te pāpā yānty adhogatim || 52 ||

ārṣe gomithunaṃ śulkaṃ ke cid āhur mṛṣā-eva tat | alpo 'py evaṃ mahān vā-api vikrayas tāvad eva saḥ || 53 ||

yāsāṃ na-ādadate śulkaṃ jñātayo na sa vikrayaḥ | arhaṇaṃ tat kumārīṇām ānṛśaṃsyaṃ ca kevalam || 54 ||

pitṛbhir bhrātṛbhiś ca-etāḥ patibhir devarais tathā | pūjyā bhūṣayitavyāś ca bahukalyāṇam īpsubhiḥ || 55 ||

yatra nāryas tu pūjyante ramante tatra devatāḥ | yatra-etās tu na pūjyante sarvās tatra-a.phalāḥ kriyāḥ || 56 ||

śocanti jāmayo yatra vinaśyaty āśu tat kulam | na śocanti tu yatra-etā vardhate tadd hi sarvadā || 57 ||

jāmayo yāni gehāni śapanty a.pratipūjitāḥ | tāni kṛtyāhatāni-iva vinaśyanti samantataḥ || 58 ||

tasmād etāḥ sadā pūjyā bhūṣaṇa.ācchādana.aśanaiḥ | bhūti.kāmair narair nityaṃ satkareṣu-utsaveṣu ca || 59 ||

santuṣṭo bhāryayā bhartā bhartrā bhāryā tatha-eva ca | yasminn eva kule nityaṃ kalyāṇaṃ tatra vai dhruvam || 60 ||

yadi hi strī na roceta pumāṃsaṃ na pramodayet | apramodāt punaḥ puṃsaḥ prajanaṃ na pravartate || 61 ||

striyāṃ tu rocamānāyāṃ sarvaṃ tad rocate kulaṃ | tasyāṃ tv arocamānāyāṃ sarvam eva na rocate || 62 ||

ku.vivāhaiḥ kriyā.lopair vedānadhyayanena ca | kulāny akulatāṃ yānti brāhmaṇātikrameṇa ca || 63 ||

śilpena vyavahāreṇa śūdrāpatyaiś ca kevalaiḥ | gobhir aśvaiś ca yānaiś ca kṛṣyā rāja.upasevayā || 64 ||

ayājyayājanaiś ca-eva nāstikyena ca karmaṇām | kulāny āśu vinaśyanti yāni hīnāni mantrataḥ || 65 ||

mantratas tu samṛddhāni kulāny alpa.dhanāny api | kulasaṅkhyāṃ ca gacchanti karṣanti ca mahad yaśaḥ || 66 ||

vaivāhike 'gnau kurvīta gṛhyaṃ karma yathāvidhi | pañcayajñavidhānaṃ ca paktiṃ ca-anvāhikīṃ gṛhī || 67 ||

pañca sūnā gṛhasthasya cullī peṣaṇy upaskaraḥ | kaṇḍanī ca-udakumbhaś ca badhyate yās tu vāhayan || 68 ||

tāsāṃ krameṇa sarvāsāṃ niṣkṛtyarthaṃ maharṣibhiḥ | pañca kḷptā mahāyajñāḥ pratyahaṃ gṛhamedhinām || 69 ||

adhyāpanaṃ brahmayajñaḥ pitṛyajñas tu tarpaṇam | homo daivo balir bhauto nṛyajño 'tithipūjanam || 70 ||

pañca-etān yo mahāayajñān na hāpayati śaktitaḥ | sa gṛhe 'pi vasan nityaṃ sūnādoṣair na lipyate || 71 ||

devatā.atithi.bhṛtyānāṃ pitṝṇām ātmanaś ca yaḥ | na nirvapati pañcānām ucchvasan na sa jīvati || 72 ||

a.hutaṃ ca hutaṃ ca-eva tathā prahutam eva ca | brāhmyaṃ hutaṃ prāśitaṃ ca pañcayajñān pracakṣate || 73 ||

japo 'huto huto homaḥ prahuto bhautiko baliḥ | brāhmyaṃ hutaṃ dvijāgryārcā prāśitaṃ pitṛtarpaṇam || 74 ||

svādhyāye nityayuktaḥ syād daive ca-eva-iha karmaṇi | daivakarmaṇi yukto hi bibharti-idaṃ cara.acaram || 75 ||

agnau prāstā-āhutiḥ samyag ādityam upatiṣṭhate | ādityāj jāyate vṛṣtir vṛṣter annaṃ tataḥ prajāḥ || 76 ||

yathā vāyuṃ samāśritya vartante sarvajantavaḥ | tathā gṛhastham āśritya vartante sarva āśramāḥ || 77 ||

yasmāt trayo 'py āśramiṇo jñānena-annena ca-anvaham | gṛhasthena-eva dhāryante tasmāj jyeṣṭhāśramo gṛhī || 78 ||

sa sandhāryaḥ prayatnena svargam akṣayam icchatā | sukhaṃ ca-iha-icchatā-atyantaṃ yo 'dhāryo durbala.indriyaiḥ || 79 ||

ṛṣayaḥ pitaro devā bhūtāny atithayas tathā | āśāsate kuṭumbibhyas tebhyaḥ kāryaṃ vijānatā || 80 ||

svādhyāyena-arcayeta-ṛṣīn homair devān yathāvidhi | pitṝn-śrāddhaiś ca nṝn annair bhūtāni balikarmaṇā || 81 ||

kuryād ahar.ahaḥ śrāddham annādyena-udakena vā | payo.mūla.phalair vā-api pitṛbhyaḥ prītim āvahan || 82 ||

ekam apy āśayed vipraṃ pitṛ.arthe pāñcayajñike | na ca-eva-atra-āśayet kiṃ cid vaiśvadevaṃ prati dvijam || 83 ||

vaiśvadevasya siddhasya gṛhye 'gnau vidhipūrvakam | ābhyaḥ kuryād devatābhyo brāhmaṇo homam anvaham || 84 ||

agneḥ somasya ca-eva-ādau tayoś ca-eva samastayoḥ | viśvebhyaś ca-eva devebhyo dhanvantaraya eva ca || 85 ||

kuhvai ca-eva-anumatyai ca prajāpataya eva ca | saha dyāvāpṛthivyoś ca tathā sviṣṭakṛte 'ntataḥ || 86 ||

evaṃ samyagg havir hutvā sarvadikṣu pradakṣiṇam | indra.antaka.appati.indubhyaḥ sa.anugebhyo baliṃ haret || 87 ||

marudbhya iti tu dvāri kṣiped apsv adbhya ity api | vanaspatibhya ity evaṃ musala.ulūkhale haret || 88 ||

ucchīrṣake śriyai kuryād bhadrakālyai ca pādataḥ | brahma.vāstoṣpatibhyāṃ tu vāstumadhye baliṃ haret || 89 ||

viśvebhyaś ca-eva devebhyo balim ākāśa utkṣipet | divācarebhyo bhūtebhyo naktañcāribhya eva ca || 90 ||

pṛṣṭhavāstuni kurvīta baliṃ sarvātmabhūtaye | pitṛbhyo baliśeṣaṃ tu sarvaṃ dakṣiṇato haret || 91 ||

śūnāṃ ca patitānāṃ ca śvapacāṃ pāpa.rogiṇām | vayasānāṃ kṛmīṇāṃ ca śanakair nirvaped bhuvi || 92 ||

evaṃ yaḥ sarvabhūtāni brāhmaṇo nityam arcati | sa gacchati paraṃ sthānaṃ tejomūrtiḥ pathā-ṛjunā || 93 ||

kṛtvā-etad balikarma-evam atithiṃ pūrvam āśayet | bhikṣāṃ ca bhikṣave dadyād vidhivad brahmacāriṇe || 94 ||

yat puṇyaphalam āpnoti gāṃ dattvā vidhivad guroḥ | tat puṇyaphalam āpnoti bhikṣāṃ dattvā dvijo gṛhī || 95 ||

bhikṣām apy udapātraṃ vā satkṛtya vidhipūrvakam | vedatattvārthaviduṣe brāhmaṇāya-upapādayet || 96 ||

naśyanti havya.kavyāni narāṇām a.vijānatām | bhasmībhūteṣu vipreṣu mohād dattāni dātṛbhiḥ || 97 ||

vidyā.tapaḥ.samṛddheṣu hutaṃ vipramukhāgniṣu | nistārayati durgāc ca mahataś ca-eva kilbiṣāt || 98 ||

samprāptāya tv atithaye pradadyād āsana.udake | annaṃ ca-eva yathāśakti satkṛtya vidhipūrvakam || 99 ||

śilān apy uñchato nityaṃ pañcāgnīn api juhvataḥ | sarvaṃ sukṛtam ādatte brāhmaṇo 'narcito vasan || 100 ||

tṛṇāni bhūmir udakaṃ vāk caturthī ca sūnṛtā | etāny api satāṃ gehe na-ucchidyante kadā cana || 101 ||

ekarātraṃ tu nivasann atithir brāhmaṇaḥ smṛtaḥ | anityaṃ hi sthito yasmāt tasmād atithir ucyate || 102 ||

na-ekagrāmīṇam atithiṃ vipraṃ sāṅgatikaṃ tathā | upasthitaṃ gṛhe vidyād bhāryā yatra-agnayo 'pi vā || 103 ||

upāsate ye gṛhasthāḥ parapākam a.buddhayaḥ | tena te pretya paśutāṃ vrajanty annādidāyinaḥ || 104 ||

a.praṇodyo 'tithiḥ sāyaṃ sūrya.ūḍho gṛhamedhinā | kāle prāptas tv akāle vā na-asya-an.aśnan gṛhe vaset || 105 ||

na vai svayaṃ tad aśnīyād atithiṃ yan na bhojayet | dhanyaṃ yaśasyam āyuṣyaṃ svargyaṃ vā-atithipūjanam || 106 ||

āsana.āvasathau śayyām anuvrajyām upāsanām | uttameṣu-uttamaṃ kuryādd hīine hīnaṃ same samam || 107 ||

vaiśvadeve tu nirvṛtte yady anyo 'tithir āvrajet | tasya-apy annaṃ yathāśakti pradadyān na baliṃ haret || 108 ||

na bhojanārthaṃ sve vipraḥ kula.gotre nivedayet | bhojanārthaṃ hi te śaṃsan vāntāśī-ity ucyate budhaiḥ || 109 ||

na brāhmaṇasya tv atithir gṛhe rājanya ucyate | vaiśya.śūdrau sakhā ca-eva jñātayo gurur eva ca || 110 ||

yadi tv atithidharmeṇa kṣatriyo gṛham āvrajet | bhuktavatsu ca vipreṣu kāmaṃ tam api bhojayet || 111 ||

vaiśya.śūdrāv api prāptau kuṭumbe 'tithi.dharmiṇau | bhojayet saha bhṛtyais tāv ānṛśaṃsyaṃ prayojayan || 112 ||

itarān api sakhi.ādīn samprītyā gṛham āgatān | prakṛtya-annaṃ yathāśakti bhojayet saha bhāryayā || 113 ||

suvāsinīḥ kumārīś ca rogiṇo garbhiṇīḥ striyaḥ | atithibhyo 'gra eva-etān bhojayed avicārayan || 114 ||

a.dattvā tu ya etebhyaḥ pūrvaṃ bhuṅkte '.vicakṣaṇaḥ | sa bhuñjāno na jānāti śva.gṛdhrair jagdhim ātmanaḥ || 115 ||

bhuktavatsv atha vipreṣu sveṣu bhṛtyeṣu ca-eva hi | bhuñjīyātāṃ tataḥ paścād avaśiṣṭaṃ tu dampatī || 116 ||

devān ṛṣīn manuṣyāṃś ca pitṝn gṛhyāś ca devatāḥ | pūjayitvā tataḥ paścād gṛhasthaḥ śeṣabhug bhavet || 117 ||

aghaṃ sa kevalaṃ bhuṅkte yaḥ pacaty ātmakāraṇāt | yajñaśiṣṭāśanaṃ hy etat satām annaṃ vidhīyate || 118 ||

rāja.ṛtvij.snātaka.gurūn priya.śvaśura.mātulān | arhayen madhuparkeṇa parisaṃvatsarāt punaḥ || 119 ||

rājā ca śrotriyaś ca-eva yajñakarmaṇy upasthitau | madhuparkeṇa sampūjyau na tv ayajña iti sthitiḥ || 120 ||

sāyaṃ tv annasya siddhasya patny a.mantraṃ baliṃ haret | vaiśvadevaṃ hi nāma-etat sāyaṃ prātar vidhīyate || 121 ||

pitṛyajñaṃ tu nirvartya vipraś candrakṣaye 'gnimān | piṇḍānvāhāryakaṃ śrāddhaṃ kuryān māsa.anumāsikam || 122 ||

pitṝṇāṃ māsikaṃ śrāddham anvāhāryaṃ vidur budhāḥ | tac ca-āmiṣeṇā kartavyaṃ praśastena prayatnataḥ || 123 ||

tatra ye bhojanīyāḥ syur ye ca varjyā dvijottamāḥ | yāvantaś ca-eva yaiś ca-annais tān pravakṣyāmy aśeṣataḥ || 124 ||

dvau daive pitṛkārye trīn ekaikam ubhayatra vā | bhojayet su.samṛddho 'pi na prasajjeta vistare || 125 ||

satkriyāṃ deśa.kālau ca śaucaṃ brāhmaṇasampadaḥ | pañca-etān vistaro hanti tasmān na-īheta vistaram || 126 ||

prathitā pretakṛtyā-eṣā pitryaṃ nāma vidhukṣaye | tasmin yuktasya-eti nityaṃ pretakṛtyā-eva laukikī || 127 ||

śrotriyāya-eva deyāni havya.kavyāni dātṛbhiḥ | arhattamāya viprāya tasmai dattaṃ mahāphalam || 128 ||

ekaikam api vidvāṃsaṃ daive pitrye ca bhojayet | puṣkalaṃ phalam āpnoti na-amantrajñān bahūn api || 129 ||

dūrād eva parīkṣeta brāhmaṇaṃ vedapāragam | tīrthaṃ tadd havya.kavyānāṃ pradāne so 'tithiḥ smṛtaḥ || 130 ||

sahasraṃ hi sahasrāṇām an.ṛcāṃ yatra bhuñjate | ekas tān mantravit prītaḥ sarvān arhati dharmataḥ || 131 ||

jñāna.utkṛṣṭāya deyāni kavyāni ca havīṃṣi ca | na hi hastāv asṛgdigdhau rudhireṇa-eva śudhyataḥ || 132 ||

yāvato grasate grāsān havya.kavyeṣv a.mantravit | tāvato grasate preto dīptaśūla.ṛṣṭi.ayoguḍān || 133 ||

jñānaniṣṭhā dvijāḥ ke cit taponiṣṭhās tathā-apare | tapaḥ.svādhyāyaniṣṭhāś ca karmaniṣṭhās tathā-apare || 134 ||

jñānaniṣṭheṣu kavyāni pratiṣṭhāpyāni yatnataḥ | havyāni tu yathānyāyaṃ sarveṣv eva caturṣv api || 135 ||

aśrotriyaḥ pitā yasya putraḥ syād vedapāragaḥ | aśrotriyo vā putraḥ syāt pitā syād vedapāragaḥ || 136 ||

jyāyāṃsam anayor vidyād yasya syāt-śrotriyaḥ pitā | mantrasampūjanārthaṃ tu satkāram itaro 'rhati || 137 ||

na śrāddhe bhojayen mitraṃ dhanaiḥ kāryo 'sya saṅgrahaḥ | nāriṃ na mitraṃ yaṃ vidyāt taṃ śrāddhe bhojayed dvijam || 138 ||

yasya mitra.pradhānāni śrāddhāni ca havīṃṣi ca | tasya pretya phalaṃ na-asti śrāddheṣu ca haviḥṣu ca || 139 ||

yaḥ saṅgatāni kurute mohāt-śrāddhena mānavaḥ | sa svargāc cyavate lokāt-śrāddha.mitro dvijādhamaḥ || 140 ||

sambhojāni sā-abhihitā paiśācī dakṣiṇā dvijaiḥ | iha-eva-āste tu sā loke gaur andhā-iva-ekaveśmani || 141 ||

yathā-iriṇe bījam uptvā na vaptā labhate phalam | tathā-an.ṛce havir dattvā na dātā labhate phalam || 142 ||

dātṝn pratigrahītṝṃś ca kurute phalabhāginaḥ | viduṣe dakṣiṇāṃ dattvā vidhivat pretya ca-iha ca || 143 ||

kāmaṃ śrāddhe 'rcayen mitraṃ na-abhirūpam api tv arim | dviṣatā hi havir bhuktaṃ bhavati pretya niṣ.phalam || 144 ||

yatnena bhojayet-śrāddhe bahvṛcaṃ vedapāragam | śākhāntagam atha-adhvaryuṃ chandogaṃ tu samāptikam || 145 ||

eṣām anyatamo yasya bhuñjīta śrāddham arcitaḥ | pitṝṇāṃ tasya tṛptiḥ syāt-śāśvatī sāptapauruṣī || 146 ||

eṣa vai prathamaḥ kalpaḥ pradāne havya.kavyayoḥ | anukalpas tv ayaṃ jñeyaḥ sadā sadbhir anuṣṭhitaḥ || 147 ||

mātāmahaṃ mātulaṃ ca svasrīyaṃ śvaśuraṃ gurum | dauhitraṃ viṭpatiṃ bandhum ṛtvig yājyau ca bhojayet || 148 ||

na brāhmaṇaṃ parīkṣeta daive karmaṇi dharmavit | pitrye karmaṇi tu prāpte parīkṣeta prayatnataḥ || 149 ||

ye stena.patita.klībā ye ca nāstikavṛttayaḥ | tān havya.kavyayor viprān anarhān manur abravīt || 150 ||

jaṭilaṃ ca-anadhīyānaṃ durbālaṃ kitavaṃ tathā | yājayanti ca ye pūgāṃs tāṃś ca śrāddhe na bhojayet || 151 ||

cikitsakān devalakān māṃsavikrayiṇas tathā | vipaṇena ca jīvanto varjyāḥ syur havya.kavyayoḥ || 152 ||

preṣyo grāmasya rājñaś ca kunakhī śyāvadantakaḥ | pratiroddhā guroś ca-eva tyakta.agnir vārdhuṣis tathā || 153 ||

yakṣmī ca paśupālaś ca parivettā nirākṛtiḥ | brahmadviṣ-parivittiś ca gaṇābhyantara eva ca || 154 ||

kuśīlavo 'vakīrṇī ca vṛṣalīpatir eva ca | paunarbhavaś ca kāṇaś ca yasya ca-upapatir gṛhe || 155 ||

bhṛtakādhyāpako yaś ca bhṛtakādhyāpitas tathā | śūdra.śiṣyo guruś ca-eva vāgduṣṭaḥ kuṇḍa.golakau || 156 ||

akāraṇe parityaktā mātā.pitror guros tathā | brāhmair yaunaiś ca sambandhaiḥ saṃyogaṃ patitair gataḥ || 157 ||

agāradāhī garadaḥ kuṇḍāśī somavikrayī | samudrayāyī bandī ca tailikaḥ kūṭakārakaḥ || 158 ||

pitrā vivadamānaś ca kitavo madyapas tathā | pāparogy abhiśastaś ca dāmbhiko rasavikrayī || 159 ||

dhanuḥ.śarāṇāṃ kartā ca yaś ca-agredidhiṣūpatiḥ | mitradhrug dyūta.vṛttiś ca putra.ācāryas tathā-eva ca || 160 ||

bhrāmarī ganḍamālī ca śvitry atho piśunas tathā | unmatto 'ndhaś ca varjyāḥ syur vedanindaka eva ca || 161 ||

hasti.go.'śva.uṣṭradamako nakṣatrair yaś ca jīvati | pakṣiṇāṃ poṣako yaś ca yuddhācāryas tathā-eva ca || 162 ||

srotasāṃ bhedako yaś ca teṣāṃ ca-āvaraṇe rataḥ | gṛhasaṃveśako dūto vṛkṣāropaka eva ca || 163 ||

śvakrīḍī śyenajīvī ca kanyādūṣaka eva ca | hiṃsro vṛṣala.vṛttiś ca gaṇānāṃ ca-eva yājakaḥ || 164 ||

ācāra.hīnaḥ klībaś ca nityaṃ yācanakas tathā | kṛṣijīvī ślīpadī ca sadbhir nindita eva ca || 165 ||

aurabhriko māhiṣikaḥ parapūrvāpatis tathā | pretaniryāpakaś ca-eva varjanīyāḥ prayatnataḥ || 166 ||

etān vigarhita.ācārān apāṅkteyān dvijādhamān | dvijātipravaro vidvān ubhayatra vivarjayet || 167 ||

brāhmaṇo tv an.adhīyānas tṛṇāgnir iva śāmyati | tasmai havyaṃ na dātavyaṃ na hi bhasmani hūyate || 168 ||

apāṅktadāne yo dātur bhavaty ūrdhvaṃ phala.udayaḥ | daive haviṣi pitrye vā taṃ pravaksyāmy aśeṣataḥ || 169 ||

a.vratair yad dvijair bhuktaṃ parivetṛ.ādibhis tathā | apāṅkteyair yad anyaiś ca tad vai rakṣāṃsi bhuñjate || 170 ||

dārāgnihotrasaṃyogaṃ kurute yo 'graje sthite | parivettā sa vijñeyaḥ parivittis tu pūrvajaḥ || 171 ||

parivittiḥ parivettā yayā ca parividyate | sarve te narakaṃ yānti dātṛyājaka.pañcamāḥ || 172 ||

bhrātur mṛtasya bhāryāyāṃ yo 'nurajyeta kāmataḥ | dharmeṇa-api niyuktāyāṃ sa jñeyo didhiṣūpatiḥ || 173 ||

paradāreṣu jāyete dvau sutau kuṇḍa.golakau | patyau jīvati kuṇḍaḥ syān mṛte bhartari golakaḥ || 174 ||

tau tu jātau parakṣetre prāṇinau pretya ca-iha ca | dattāni havya.kavyāni nāśayanti pradāyinām || 175 ||

apāṅktyo yāvataḥ paṅktyān bhuñjānān anupaśyati | tāvatāṃ na phalaṃ tatra dātā prāpnoti bāliśaḥ || 176 ||

vīkṣya-andho navateḥ kāṇaḥ ṣaṣṭeḥ śvitrī śatasya tu | pāparogī sahasrasya dātur nāśayate phalam || 177 ||

yāvataḥ saṃspṛśed aṅgair brāhmaṇān-śūdrayājakaḥ | tāvatāṃ na bhaved dātuḥ phalaṃ dānasya paurtikam || 178 ||

vedavid-ca-api vipro 'sya lobhāt kṛtvā pratigraham | vināśaṃ vrajati kṣipram āmapātram iva-ambhasi || 179 ||

somavikrayiṇe viṣṭhā bhiṣaje pūya.śoṇitam | naṣṭaṃ devalake dattam a.pratiṣṭhaṃ tu vārdhuṣau || 180 ||

yat tu vāṇijake dattaṃ na-iha na-amutra tad bhavet | bhasmani-iva hutaṃ dravyaṃ tathā paunarbhave dvije || 181 ||

itareṣu tv apāṅktyeṣu yathā.uddiṣṭeṣv a.sādhuṣu | medo.'sṛṅ.māṃsa.majjā.asthi vadanty annaṃ manīṣiṇaḥ || 182 ||

apāṅktya.upahatā paṅktiḥ pāvyate yair dvijottamaiḥ | tān nibodhata kārtsnyena dvijāgryān paṅktipāvanān || 183 ||

agryāḥ sarveṣu vedeṣu sarvapravacaneṣu ca | śrotriyānvayajāś ca-eva vijñeyāḥ paṅktipāvanāḥ || 184 ||

triṇāciketaḥ pañca.agnis trisuparṇaḥ ṣaḍaṅgavit | brahmadeyātmasantāno jyeṣṭhasāmaga eva ca || 185 ||

vedārtha.vit pravaktā ca brahmacārī sahasradaḥ | śatāyuś ca-eva vijñeyā brāhmaṇāḥ paṅktipāvanāḥ || 186 ||

pūrvedyur aparedyur vā śrāddhakarmaṇy upasthite | nimantrayeta try.avarān samyag viprān yathā.uditān || 187 ||

nimantrito dvijaḥ pitrye niyatātmā bhavet sadā | na ca chandāṃsy adhīyīta yasya śrāddhaṃ ca tad bhavet || 188 ||

nimantritān hi pitara upatiṣṭhanti tān dvijān | vāyuvat-ca-anugacchanti tathā-āsīnān upāsate || 189 ||

ketitas tu yathānyāyaṃ havye kavye dvijottamaḥ | kathaṃ cid apy atikrāman pāpaḥ sūkaratāṃ vrajet || 190 ||

āmantritas tu yaḥ śrāddhe vṛśalyā saha modate | dātur yad duṣkṛtaṃ kiṃ cit tat sarvaṃ pratipadyate || 191 ||

a.krodhanāḥ śauca.parāḥ satataṃ brahmacāriṇaḥ | nyasta.śastrā mahā.bhāgāḥ pitaraḥ pūrvadevatāḥ || 192 ||

yasmād utpattir eteṣāṃ sarveṣām apy aśeṣataḥ | ye ca yair upacaryāḥ syur niyamais tān nibodhata || 193 ||

manor hairaṇyagarbhasya ye marīci.ādayaḥ sutāḥ | teṣām ṛṣīṇāṃ sarveṣāṃ putrāḥ pitṛgaṇāḥ smṛtāḥ || 194 ||

virāj.sutāḥ somasadaḥ sādhyānāṃ pitaraḥ smṛtāḥ | agniṣvāttāś ca devānāṃ mārīcā lokaviśrutāḥ || 195 ||

daitya.dānava.yakṣāṇāṃ gandharva.uraga.rakṣasām | suparṇa.kinnarāṇāṃ ca smṛtā barhiṣado 'trijāḥ || 196 ||

somapā nāma viprāṇāṃ kṣatriyāṇāṃ havirbhujaḥ | vaiśyānām ājyapā nāma śūdrāṇāṃ tu sukālinaḥ || 197 ||

somapās tu kaveḥ putrā haviṣmanto 'ṅgiraḥsutāḥ | pulastyasya-ājyapāḥ putrā vasiṣṭhasya sukālinaḥ || 198 ||

agnidagdha.anagnidagdhān kāvyān barhiṣadas tathā | agniṣvāttāṃś ca saumyāṃś ca viprāṇām eva nirdiśet || 199 ||

ya ete tu gaṇā mukhyāḥ pitṝṇāṃ parikīrtitāḥ | teṣām api-iha vijñeyaṃ putra.pautram an.antakam || 200 ||

ṛṣibhyaḥ pitaro jātāḥ pitṛbhyo deva.mānavāḥ | devebhyas tu jagat sarvaṃ caraṃ sthāṇv anupūrvaśaḥ || 201 ||

rājatair bhājanair eṣām atho vā rajatānvitaiḥ | vāry api śraddhayā dattam akṣayāya-upakalpate || 202 ||

daivakāryād dvijātīnāṃ pitṛkāryaṃ viśiṣyate | daivaṃ hi pitṛkāryasya pūrvam āpyāyanaṃ smṛtam || 203 ||

teṣām ārakṣabhūtaṃ tu pūrvaṃ daivaṃ niyojayet | raksāṃsi vipralumpanti śrāddham ārakṣavarjitam || 204 ||

daiva.ādyantaṃ tad īheta pitṛ.ādyantaṃ na tad bhavet | pitṛ.ādyantaṃ tv īhamānaḥ kṣipraṃ naśyati sa.anvayaḥ || 205 ||

śuciṃ deśaṃ viviktaṃ ca gomayena-upalepayet | dakṣinā.pravaṇaṃ ca-eva prayatnena-upapādayet || 206 ||

avakāśeṣu cokṣeṣu jalatīreṣu ca-eva hi | vivikteṣu ca tuṣyanti dattena pitaraḥ sadā || 207 ||

āsaneṣu-upakḷpteṣu barhiṣmatsu pṛthak.pṛthak | upaspṛṣṭa.udakān samyag viprāṃs tān upaveśayet || 208 ||

upaveśya tu tān viprān āsaneṣv ajugupsitān | gandha.mālyaiḥ surabhibhir arcayed daivapūrvakam || 209 ||

teṣām udakam ānīya sa.pavitrāṃs tilān api | agnau kuryād anujñāto brāhmaṇo brāhmaṇaiḥ saha || 210 ||

agneḥ soma.yamābhyāṃ ca kṛtvā-āpyāyanam āditaḥ | havirdānena vidhivat paścāt santarpayet pitṝn || 211 ||

agni.abhāve tu viprasya pāṇāv eva-upapādayet | yo hy agniḥ sa dvijo viprair mantradarśibhir ucyate || 212 ||

a.krodhanān su.prasādān vadanty etān purātanān | lokasya-āpyāyane yuktān śrāddha.devān dvijottamān || 213 ||

apasavyam agnau kṛtvā sarvam āvṛtya vikramam | apasavyena hastena nirvaped udakaṃ bhuvi || 214 ||

trīṃs tu tasmādd haviḥśeṣāt piṇḍān kṛtvā samāhitaḥ | audakena-eva vidhinā nirvaped dakṣiṇā.mukhaḥ || 215 ||

nyupya piṇḍāṃs tatas tāṃs tu prayato vidhipūrvakam | teṣu darbheṣu taṃ hastaṃ nirmṛjyāt-lepabhāginām || 216 ||

ācamya-udakparāvṛtya trir āyamya śanair asūn | ṣaḍ ṛtūṃś ca namaskuryāt pitṝn eva ca mantravat || 217 ||

udakaṃ ninayet-śeṣaṃ śanaiḥ piṇḍāntike punaḥ | avajighrec ca tān piṇḍān yathānyuptān samāhitaḥ || 218 ||

piṇḍebhyas tv alpikāṃ mātrāṃ samādāya-anupūrvaśaḥ | tān eva viprān āsīnān vidhivat pūrvam āśayet || 219 ||

dhriyamāṇe tu pitari pūrveṣām eva nirvapet | vipravad vā-api taṃ śrāddhe svakaṃ pitaram āśayet || 220 ||

pitā yasya nivṛttaḥ syāj jīvec ca-api pitāmahaḥ | pituḥ sa nāma saṅkīrtya kīrtayet prapitāmaham || 221 ||

pitāmaho vā tat.śrāddhaṃ bhuñjīta-ity abravīn manuḥ | kāmaṃ vā samanujñātaḥ svayam eva samācaret || 222 ||

teṣāṃ dattvā tu hasteṣu sa.pavitraṃ tila.udakam | tatpiṇḍāgraṃ prayaccheta svadhā-eṣām astv iti bruvan || 223 ||

pāṇibhyāṃ tu-upasaṅgṛhya svayam annasya vardhitam | viprāntike pitṝn dhyāyan śanakair upanikṣipet || 224 ||

ubhayor hastayor muktaṃ yad annam upanīyate | tad vipralumpanty asurāḥ sahasā duṣṭa.cetasaḥ || 225 ||

guṇāṃś ca sūpa.śākādyān payo dadhi ghṛtaṃ madhu | vinyaset prayataḥ pūrvaṃ bhūmāv eva samāhitaḥ || 226 ||

bhakṣyaṃ bhojyaṃ ca vividhaṃ mūlāni ca phalāni ca | hṛdyāni ca-eva māṃsāni pānāni su.rabhīṇi ca || 227 ||

upanīya tu tat sarvaṃ śanakaiḥ susamāhitaḥ | pariveṣayeta prayato guṇān sarvān pracodayan || 228 ||

na-asram āpātayej jātu na kupyen na-anṛtaṃ vadet | na pādena spṛśed annaṃ na ca-etad avadhūnayet || 229 ||

asraṃ gamayati pretān kopo 'rīn anṛtaṃ śunaḥ | pādasparśas tu rakṣāṃsi duṣkṛtīn avadhūnanam || 230 ||

yad yad roceta viprebhyas tat tad dadyād a.matsaraḥ | brahmodyāś ca kathāḥ kuryāt pitṝṇām etad īpsitam || 231 ||

svādhyāyaṃ śrāvayet pitrye dharmaśāstrāṇi ca-eva hi | ākhyānāni-itihāsāṃś ca purāṇāni khilāni ca || 232 ||

harṣayed brāhmaṇāṃs tuṣṭo bhojayec ca śanaiḥ.śanaiḥ | annādyena-asakṛc ca-etān guṇaiś ca paricodayet || 233 ||

vratastham api dauhitraṃ śrāddhe yatnena bhojayet | kutapaṃ ca.āsanaṃ dadyāt tilaiś ca vikiren mahīm || 234 ||

trīṇi śrāddhe pavitrāṇi dauhitraḥ kutapas tilāḥ | trīṇi ca-atra praśaṃsanti śaucam a.krodham a.tvarām || 235 ||

atyuṣṇaṃ sarvam annaṃ syād bhuñjīraṃs te ca vāgyatāḥ | na ca dvijātayo brūyur dātrā pṛṣṭā havirguṇān || 236 ||

yāvad uṣmā bhavaty annaṃ yāvad aśnanti vāgyatāḥ | pitaras tāvad aśnanti yāvat-na-uktā havirguṇāḥ || 237 ||

yad veṣṭita.śirā bhuṅkte yad bhuṅkte dakṣiṇā.mukhaḥ | sa.upānatkaś ca yad bhuṅkte tad vai rakṣāṃsi bhuñjate || 238 ||

cāṇḍālaś ca varāhaś ca kukkuṭaḥ śvā tathā-eva ca | rajasvalā ca ṣaṇḍhaś ca na-īkṣerann aśnato dvijān || 239 ||

home pradāne bhojye ca yad ebhir abhivīkṣyate | daive haviṣi pitrye vā tad gacchaty ayathātatham || 240 ||

ghrāṇena sūkaro hanti pakṣavātena kukkuṭaḥ | śvā tu dṛṣṭinipātena sparśeṇa-avaravarṇajaḥ || 241 ||

khañjo vā yadi vā kāṇo dātuḥ preṣyo 'pi vā bhavet | hīna.atirikta.gātro vā tam apy apanayet punaḥ || 242 ||

brāhmaṇaṃ bhikṣukaṃ vā-api bhojanārtham upasthitam | brāhmaṇair abhyanujñātaḥ śaktitaḥ pratipūjayet || 243 ||

sārvavarṇikam annādyaṃ sannīya-āplāvya vāriṇā | samutsṛjed bhuktavatām agrato vikiran bhuvi || 244 ||

asaṃskṛta.pramītānāṃ tyāgināṃ kulayoṣitām | ucchiṣṭaṃ bhāgadheyaṃ syād darbheṣu vikiraś ca yaḥ || 245 ||

uccheṣaṇāṃ bhūmigatam a.jihmasya-a.śaṭhasya ca | dāsavargasya tat pitrye bhāgadheyaṃ pracakṣate || 246 ||

ā.sapiṇḍakriyākarma dvijāteḥ saṃsthitasya tu | a.daivaṃ bhojayet-śrāddhaṃ piṇḍam ekaṃ ca nirvapet || 247 ||

sahapiṇḍakriyāyāṃ tu kṛtāyām asya dharmataḥ | anayā-eva-āvṛtā kāryaṃ piṇḍanirvapanaṃ sutaiḥ || 248 ||

śrāddhaṃ bhuktvā ya ucchiṣṭaṃ vṛṣalāya prayacchati | sa mūḍho narakaṃ yāti kālasūtram a.vākśirāḥ || 249 ||

śrāddhabhug vṛṣalītalpaṃ tad ahar yo 'dhigacchati | tasyāḥ purīṣe taṃ māsaṃ pitaras tasya śerate || 250 ||

pṛṣṭvā svaditam ity evaṃ tṛptān ācāmayet tataḥ | ācāntāṃś ca-anujānīyād abhito ramyatām iti || 251 ||

svadhā-astv ity eva taṃ brūyur brāhmaṇās tadanantaram | svadhākāraḥ parā hy āṣīḥ sarveṣu pitṛkarmasu || 252 ||

tato bhuktavatāṃ teṣām annaśeṣaṃ nivedayet | yathā brūyus tathā kuryād anujñātas tato dvijaiḥ || 253 ||

pitrye svaditam ity eva vācyaṃ goṣṭhe tu suśṛtam | sampannam ity abhyudaye daive rucitam ity api || 254 ||

aparāhṇas tathā darbhā vāstusampādanaṃ tilāḥ | sṛṣṭir mṛṣṭir dvijāś ca-agryāḥ śrāddhakarmasu sampadaḥ || 255 ||

darbhāḥ pavitraṃ pūrvāhṇo haviṣyāṇi ca sarvaśaḥ | pavitraṃ yac ca pūrva.uktaṃ vijñeyā havyasampadaḥ || 256 ||

muni.annāni payaḥ somo māṃsaṃ yac ca-an.upaskṛtam | aksāra.lavaṇaṃ ca-eva prakṛtyā havir ucyate || 257 ||

visṛjya brāhmaṇāṃs tāṃs tu niyato vāgyataḥ śuciḥ | dakṣiṇāṃ diśam ākāṅkṣan yāceta-imān varān pitṝn || 258 ||

dātāro no 'bhivardhantāṃ vedāḥ santatir eva ca | śraddhā ca no mā vyagamad bahudeyaṃ ca no 'stv iti || 259 ||

evaṃ nirvapaṇaṃ kṛtvā piṇḍāṃs tāṃs tadanantaram | gāṃ vipram ajam agniṃ vā prāśayed apsu vā kṣipet || 260 ||

piṇḍanirvapaṇaṃ ke cit parastād eva kurvate | vayobhiḥ khādayanty anye prakṣipanty anale 'psu vā || 261 ||

pati.vratā dharmapatnī pitṛpūjana.tatparā | madhyamaṃ tu tataḥ piṇḍam adyāt samyak sutārthinī || 262 ||

āyuṣmantaṃ sutaṃ sūte yaśo.medhāsamanvitam | dhanavantaṃ prajāvantaṃ sāttvikaṃ dhārmikaṃ tathā || 263 ||

praksālya hastāv ācāmya jñātiprāyaṃ prakalpayet | jñātibhyaḥ satkṛtaṃ dattvā bāndhavān api bhojayet || 264 ||

uccheṣaṇaṃ tu tat tiṣṭhed yāvad viprā visarjitāḥ | tato gṛhabaliṃ kuryād iti dharmo vyavasthitaḥ || 265 ||

havir yac cirarātrāya yac ca-ānantyāya kalpate | pitṛbhyo vidhivad dattaṃ tat pravakṣyāmy aśeṣataḥ || 266 ||

tilair vrīhi.yavair māṣair adbhir mūla.phalena vā | dattena māsaṃ tṛpyanti vidhivat pitaro nṛnām || 267 ||

dvau māsau matsyamāṃsena trīn māsān hāriṇena tu | aurabhreṇa-atha caturaḥ śākunena-atha pañca vai || 268 ||

ṣaṇmāsāṃś chāgamāṃsena pārṣatena ca sapta vai | aṣṭāv enasya māṃsena rauraveṇa nava-eva tu || 269 ||

daśamāsāṃs tu tṛpyanti varāha.mahiṣāmiṣaiḥ | śaśa.kūrmayos tu māṃsena māsān ekādaśa-eva tu || 270 ||

saṃvatsaraṃ tu gavyena payasā pāyasena ca | vārdhrīṇasasya māṃsena tṛptir dvādaśavārṣikī || 271 ||

kālaśākaṃ mahāśalkāḥ khaṅga.lohāmiṣaṃ madhu | ānantyāya-eva kalpyante muni.annāni ca sarvaśaḥ || 272 ||

yat kiṃ cin madhunā miśraṃ pradadyāt tu trayodaśīm | tad apy akṣayam eva syād varṣāsu ca maghāsu ca || 273 ||

api naḥ sa kule bhūyād yo no dadyāt trayodaśīm | pāyasaṃ madhu.sarpirbhyāṃ prāk chāye kuñjarasya ca || 274 ||

yad yad dadāti vidhivat samyak śraddhāsamanvitaḥ | tat tat pitṝṇāṃ bhavati paratra-anantam akṣayam || 275 ||

kṛṣṇapakṣe daśamyādau varjayitvā caturdaśīm | śrāddhe praśastās tithayo yathā-etā na tathā-itarāḥ || 276 ||

yukṣu kurvan dina.ṛkṣeṣu sarvān kāmān samaśnute | ayukṣu tu pitṝn sarvān prajāṃ prāpnoti puṣkalām || 277 ||

yathā ca-eva-aparaḥ pakṣaḥ pūrvapakṣād viśiṣyate | tathā śrāddhasya pūrvāhṇād aparāhṇo viśiṣyate || 278 ||

prācīnāvītinā samyag apasavyam a.tandriṇā | pitryam ā nidhanāt kāryaṃ vidhivad darbha.pāṇinā || 279 ||

rātrau śrāddhaṃ na kurvīta rākṣasī kīrtitā hi sā | sandhyayor ubhayoś ca-eva sūrye ca-eva-acira.udite || 280 ||

anena vidhinā śrāddhaṃ trir abdasya-iha nirvapet | hemanta.grīṣma.varṣāsu pāñcayajñikam anvaham || 281 ||

na paitṛyajñiyo homo laukike 'gnau vidhīyate | na darśena vinā śrāddham āhita.agner dvijanmanaḥ || 282 ||

yad eva tarpayaty adbhiḥ pitṝn snātvā dvijottamaḥ | tena-eva kṛtsnam āpnoti pitṛyajñakriyāphalam || 283 ||

vasūn vadanti tu pitṝn rudrāṃś ca-eva pitāmahān | prapitāmahāṃs tathā-ādityān śrutir eṣā sanātanī || 284 ||

vighasāśī bhaven nityaṃ nityaṃ vā-amṛta.bhojanaḥ | vighaso bhuktaśeṣaṃ tu yajñaśeṣaṃ tathā-amṛtam || 285 ||

etad vo 'bhihitaṃ sarvaṃ vidhānaṃ pāñcayajñikam | dvijātimukhyavṛttīnāṃ vidhānaṃ śrūyatām iti || 286 ||