Adhyay 2

vidvadbhiḥ sevitaḥ sadbhir nityam a.dveṣa.rāgibhiḥ | hṛdayena-abhyanujñāto yo dharmas taṃ nibodhata || 1 ||

kāmātmatā na praśastā na ca-eva-iha-asty akāmatā | kāmyo hi vedādhigamaḥ karmayogaś ca vaidikaḥ || 2 ||

saṅkalpa.mūlaḥ kāmo vai yajñāḥ saṅkalpa.sambhavāḥ | vratāni yamadharmāś ca sarve saṅkalpajāḥ smṛtāḥ || 3 ||

a.kāmasya kriyā kā cid dṛśyate na-iha karhi cit | yad yadd hi kurute kiṃ cit tat tat kāmasya ceṣṭitam || 4 ||

teṣu samyag vartamāno gacchaty amaralokatām | yathā saṅkalpitāṃś ca-iha sarvān kāmān samaśnute || 5 ||

vedo 'khilo dharmamūlaṃ smṛti.śīle ca tadvidām | ācāraś ca-eva sādhūnām ātmanas tuṣṭir eva ca || 6 ||

yaḥ kaś cit kasya cid dharmo manunā parikīrtitaḥ | sa sarvo 'bhihito vede sarvajñānamayo hi saḥ || 7 ||

sarvaṃ tu samavekṣya-idaṃ nikhilaṃ jñānacakṣuṣā | śrutiprāmāṇyato vidvān svadharme niviśeta vai || 8 ||

śruti.smṛti.uditaṃ dharmam anutiṣṭhan hi mānavaḥ | iha kīrtim avāpnoti pretya ca-anuttamaṃ sukham || 9 ||

śrutis tu vedo vijñeyo dharmaśāstraṃ tu vai smṛtiḥ | te sarvārtheṣv a.mīmāṃsye tābhyāṃ dharmo hi nirbabhau || 10 ||

yo 'vamanyeta te mūle hetuśāstrāśrayād dvijaḥ | sa sādhubhir bahiṣkāryo nāstiko vedanindakaḥ || 11 ||

vedaḥ smṛtiḥ sadācāraḥ svasya ca priyam ātmanaḥ | etac caturvidhaṃ prāhuḥ sākṣād dharmasya lakṣaṇam || 12 ||

artha.kāmeṣv a.saktānāṃ dharmajñānaṃ vidhīyate | dharmaṃ jijñāsamānānāṃ pramāṇaṃ paramaṃ śrutiḥ || 13 ||

śrutidvaidhaṃ tu yatra syāt tatra dharmāv ubhau smṛtau | ubhāv api hi tau dharmau samyag uktau manīṣibhiḥ || 14 ||

udite 'nudite ca-eva samayādhyuṣite tathā | sarvathā vartate yajña iti-iyaṃ vaidikī śrutiḥ || 15 ||

niṣeka.ādi.śmaśāna.anto mantrair yasya-udito vidhiḥ | tasya śāstre 'dhikāro 'smiñ jñeyo na-anyasya kasya cit || 16 ||

sarasvatī.dṛśadvatyor devanadyor yad antaram | taṃ devanirmitaṃ deśaṃ brahmāvartaṃ pracakṣate || 17 ||

tasmin deśe ya ācāraḥ pāramparyakramāgataḥ | varṇānāṃ sa.antarālānāṃ sa sadācāra ucyate || 18 ||

kurukṣetraṃ ca matsyāś ca pañcālāḥ śūrasenakāḥ | eṣa brahmarṣideśo vai brahmāvartād anantaraḥ || 19 ||

etad deśaprasūtasya sakāśād agrajanmanaḥ | svaṃ svaṃ caritraṃ śikṣeran pṛthivyāṃ sarvamānavāḥ || 20 ||

himavad.vindhyayor madhyaṃ yat prāg vinaśanād api | pratyag eva prayāgāc ca madhyadeśaḥ prakīrtitaḥ || 21 ||

ā samudrāt tu vai pūrvād ā samudrāc ca paścimāt | tayor eva-antaraṃ giryor āryāvartaṃ vidur budhāḥ || 22 ||

kṛṣṇasāras tu carati mṛgo yatra svabhāvataḥ | sa jñeyo yajñiyo deśo mlecchadeśas tv ataḥ paraḥ || 23 ||

etāṇ dvijātayo deśān saṃśrayeran prayatnataḥ | śūdras tu yasmin kasmin vā nivased vṛttikarśitaḥ || 24 ||

eṣā dharmasya vo yoniḥ samāsena prakīrtitā | sambhavaś ca-asya sarvasya varṇadharmān nibodhata || 25 ||

vaidikaiḥ karmabhiḥ puṇyair niṣekādir dvijanmanām | kāryaḥ śarīrasaṃskāraḥ pāvanaḥ pretya ca-iha ca || 26 ||

gārbhair homair jātakarma.cauḍa.mauñjī.nibandhanaiḥ | baijikaṃ gārbhikaṃ ca-eno dvijānām apamṛjyate || 27 ||

svādhyāyena vratair homais traividyena-ijyayā sutaiḥ | mahāyajñaiś ca yajñaiś ca brāhmī-iyaṃ kriyate tanuḥ || 28 ||

prāṅ nābhivardhanāt puṃso jātakarma vidhīyate | mantravat prāśanaṃ ca-asya hiraṇya.madhu.sarpiṣām || 29 ||

nāmadheyaṃ daśamyāṃ tu dvādaśyāṃ vā-asya kārayet | puṇye tithau muhūrte vā nakṣatre vā guṇānvite || 30 ||

maṅgalyaṃ brāhmaṇasya syāt kṣatriyasya balānvitam | vaiśyasya dhanasaṃyuktaṃ śūdrasya tu jugupsitam || 31 ||

śarmavad brāhmaṇasya syād rājño rakṣāsamanvitam | vaiśyasya puṣṭi.saṃyuktaṃ śūdrasya preṣyasaṃyutam || 32 ||

strīṇāṃ sukha.udyam a.krūraṃ vispaṣṭa.arthaṃ manoharam | maṅgalyaṃ dīrghavarṇa.antam āśīrvāda.abhidhānavat || 33 ||

caturthe māsi kartavyaṃ śiśor niṣkramaṇaṃ gṛhāt | ṣaṣṭhe 'nnaprāśanaṃ māsi yad vā-iṣṭaṃ maṅgalaṃ kule || 34 ||

cūḍākarma dvijātīnāṃ sarveṣām eva dharmataḥ | prathame 'bde tṛtīye vā kartavyaṃ śruticodanāt || 35 ||

garbhāṣṭame 'bde kurvīta brāhmaṇasya-upanāyanam | garbhād ekādaśe rājño garbhāt tu dvādaśe viśaḥ || 36 ||

brahmavarcasa.kāmasya kāryo viprasya pañcame | rājño bala.arthinaḥ ṣaṣṭhe vaiśyasya-iha-arthino 'ṣṭame || 37 ||

ā ṣodaśād brāhmaṇasya sāvitrī na-ativartate | ā dvāviṃśāt kṣatrabandhor ā caturviṃśater viśaḥ || 38 ||

ata ūrdhvaṃ trayo 'py ete yathākālam a.saṃskṛtāḥ | sāvitrīpatitā vrātyā bhavanty āryavigarhitāḥ || 39 ||

na-etair a.pūtair vidhivad āpady api hi karhi cit | brāhmān yaunāṃś ca sambandhān na-ācared brāhmaṇaḥ saha || 40 ||

kārṣṇa.raurava.bāstāni carmāṇi brahmacāriṇaḥ | vasīrann ānupūrvyeṇa śāṇa.kṣauma.āvikāni ca || 41 ||

mauñjī trivṛt samā ślakṣṇā kāryā viprasya mekhalā | kṣatriyasya tu maurvī jyā vaiśyasya śaṇatāntavī || 42 ||

muñjālābhe tu kartavyāḥ kuśa.aśmantaka.balvajaiḥ | trivṛtā granthinā-ekena tribhiḥ pañcabhir eva vā || 43 ||

kārpāsam upavītaṃ syād viprasya-ūrdhvavṛtaṃ trivṛt | śaṇa.sūtramayaṃ rājño vaiśyasya-āvikasautrikam || 44 ||

brāhmaṇo bailva.pālāśau kṣatriyo vāṭa.khādirau | pailava.audumbarau vaiśyo daṇḍān arhanti dharmataḥ || 45 ||

keśāntiko brāhmaṇasya daṇḍaḥ kāryaḥ pramāṇataḥ | lalāṭasammito rājñaḥ syāt tu nāsāntiko viśaḥ || 46 ||

ṛjavas te tu sarve syur a.vraṇāḥ saumya.darśanāḥ | an.udvegakarā nṝṇāṃ sa.tvaco 'nagnidūṣitāḥ || 47 ||

pratigṛhya-īpsitaṃ daṇḍam upasthāya ca bhāskaram | pradakṣiṇaṃ parītya-agniṃ cared bhaikṣaṃ yathāvidhi || 48 ||

bhavat.pūrvaṃ cared bhaikṣam upanīto dvijottamaḥ | bhavan.madhyaṃ tu rājanyo vaiśyas tu bhavad.uttaram || 49 ||

mātaraṃ vā svasāraṃ vā mātur vā bhaginīṃ nijām | bhikṣeta bhikṣām prathamaṃ yā ca-enaṃ na-avamānayet || 50 ||

samāhṛtya tu tad bhaikṣaṃ yāvadannam a.māyayā | nivedya gurave 'śnīyād ācamya prāṅmukhaḥ śuciḥ || 51 ||

āyuṣyaṃ prāṅ.mukho bhuṅkte yaśasyaṃ dakṣiṇā.mukhaḥ | śriyaṃ pratyaṅ.mukho bhuṅkte ṛtaṃ bhuṅkte hy udaṅ.mukhaḥ || 52 ||

upaspṛśya dvijo nityam annam adyāt samāhitaḥ | bhuktvā ca-upaspṛśet samyag adbhiḥ khāni ca saṃspṛśet || 53 ||

pūjayed aśanaṃ nityam adyāc ca-etad a.kutsayan | dṛṣṭvā hṛṣyet prasīdec ca pratinandec ca sarvaśaḥ || 54 ||

pūjitaṃ hy aśanaṃ nityaṃ balam ūrjaṃ ca yacchati | a.pūjitaṃ tu tad bhuktam ubhayaṃ nāśayed idam || 55 ||

na-ucchiṣṭaṃ kasya cid dadyān na-adyād etat tathā-antarā | na ca-eva-atyaśanaṃ kuryān na ca-ucchiṣṭaḥ kva cid vrajet || 56 ||

an.ārogyam an.āyuṣyam a.svargyaṃ ca-atibhojanam | apuṇyaṃ lokavidviṣṭaṃ tasmāt tat parivarjayet || 57 ||

brāhmeṇa vipras tīrthena nityakālam upaspṛśet | kāya.traidaśikābhyāṃ vā na pitryeṇa kadā cana || 58 ||

aṅguṣṭhamūlasya tale brāhmaṃ tīrthaṃ pracakṣate | kāyam aṅgulimūle 'gre devaṃ pitryaṃ tayor adhaḥ || 59 ||

trir ācāmed apaḥ pūrvaṃ dviḥ pramṛjyāt tato mukham | khāni ca-eva spṛśed adbhir ātmānaṃ śira eva ca || 60 ||

an.uṣṇābhir a.phenābhir adbhis tīrthena dharmavit | śauca.īpsuḥ sarvadā-ācāmed ekānte prāg.udaṅ.mukhaḥ || 61 ||

hṛdgābhiḥ pūyate vipraḥ kaṇṭhagābhis tu bhūmipaḥ | vaiśyo 'dbhiḥ prāśitābhis tu śūdraḥ spṛṣṭābhir antataḥ || 62 ||

uddhṛte dakṣine pāṇāv upavītī-ucyate dvijaḥ | savye prācīnāvītī nivītī kaṇṭhasajjane || 63 ||

mekhalām ajinaṃ daṇḍam upavītaṃ kamaṇḍalum | apsu prāsya vinaṣṭāni gṛhṇīta-anyāni mantravat || 64 ||

keśāntaḥ ṣoḍaśe varṣe brāhmaṇasya vidhīyate | rājanyabandhor dvāviṃśe vaiśyasya dvyadhike mataḥ || 65 ||

a.mantrikā tu kāryā-iyaṃ strīṇām āvṛd aśeṣataḥ | saṃskārārthaṃ śarīrasya yathākālaṃ yathākramam || 66 ||

vaivāhiko vidhiḥ strīṇāṃ saṃskāro vaidikaḥ smṛtaḥ | patisevā gurau vāso gṛhārtho 'gni.parikriyā || 67 ||

eṣa prokto dvijātīnām aupanāyaniko vidhiḥ | utpatti.vyañjakaḥ puṇyaḥ karmayogaṃ nibodhata || 68 ||

upanīya guruḥ śiṣyaṃ śikṣayet-śaucam āditaḥ | ācāram agnikāryaṃ ca sandhyā.upāsanam eva ca || 69 ||

adhyeṣyamāṇas tv ācānto yathāśāstram udaṅ.mukhaḥ | brahmāñjali.kṛto 'dhyāpyo laghu.vāsā jita.indriyaḥ || 70 ||

brahmārambhe 'vasāne ca pādau grāhyau guroḥ sadā | saṃhatya hastāv adhyeyaṃ sa hi brahmāñjaliḥ smṛtaḥ || 71 ||

vyatyasta.pāṇinā kāryam upasaṅgrahaṇaṃ guroḥ | savyena savyaḥ spraṣṭavyo dakṣiṇena ca dakṣiṇaḥ || 72 ||

adhyeṣyamāṇaṃ tu gurur nityakālam a.tandritaḥ | adhīṣva bho iti brūyād virāmo 'stv iti ca-āramet || 73 ||

brahmanaḥ praṇavaṃ kuryād ādāv ante ca sarvadā | sravaty an.oṅkṛtaṃ pūrvaṃ parastāc ca viśīryati || 74 ||

prāk.kūlān paryupāsīnaḥ pavitraiś ca-eva pāvitaḥ | prāṇāyāmais tribhiḥ pūtas tata oṃ.kāram arhati || 75 ||

a.kāraṃ ca-apy u.kāraṃ ca ma.kāraṃ ca prajāpatiḥ | vedatrayāt-niraduhad bhūr bhuvaḥ svar iti-iti ca || 76 ||

tribhya eva tu vedebhyaḥ pādaṃ pādam adūduhat | tad ity ṛco 'syāḥ sāvitryāḥ parameṣṭhī prajāpatiḥ || 77 ||

etad akṣaram etāṃ ca japan vyāhṛti.pūrvikām | sandhyayor vedavid vipro vedapuṇyena yujyate || 78 ||

sahasrakṛtvas tv abhyasya bahir etat trikaṃ dvijaḥ | mahato 'py enaso māsāt tvacā-iva-ahir vimucyate || 79 ||

etayā-ṛcā visaṃyuktaḥ kāle ca kriyayā svayā | brahma.kṣatriya.viś.yonir garhaṇāṃ yāti sādhuṣu || 80 ||

oṃ.kāra.pūrvikās tisro mahāvyāhṛtayo 'vyayāḥ | tri.padā ca-eva sāvitrī vijñeyaṃ brahmaṇo mukham || 81 ||

yo 'dhīte 'hany ahany etāṃ trīṇi varṣāṇy a.tandritaḥ | sa brahma param abhyeti vāyubhūtaḥ kha.mūrtimān || 82 ||

ekākṣaraṃ paraṃ brahma prāṇāyāmaḥ paraṃ tapaḥ | sāvitryās tu paraṃ na-asti maunāt satyaṃ viśiṣyate || 83 ||

kṣaranti sarvā vaidikyo juhoti.yajati.kriyāḥ | akṣaraṃ duṣkaraṃ jñeyaṃ brahma ca-eva prajāpatiḥ || 84 ||

vidhiyajñāj japayajño viśiṣṭo daśabhir guṇaiḥ | upāṃśuḥ syāt-śataguṇaḥ sāhasro mānasaḥ smṛtaḥ || 85 ||

ye pākayajñās catvāro vidhiyajñasamanvitāḥ | sarve te japayajñasya kalāṃ na-arhanti ṣoḍaśīm || 86 ||

japyena-eva tu saṃsidhyed brāhmaṇo na-atra saṃśayaḥ | kuryād anyan na vā kuryān maitro brāhmaṇa ucyate || 87 ||

indriyāṇāṃ vicaratāṃ viṣayeṣv apahāriṣu | saṃyame yatnam ātiṣṭhed vidvān yantā-iva vājinām || 88 ||

ekādaśa-indriyāṇy āhur yāni pūrve manīṣiṇaḥ | tāni samyak pravakṣyāmi yathāvad anupūrvaśaḥ || 89 ||

śrotraṃ tvak cakṣuṣī jihvā nāsikā ca-eva pañcamī | pāyu.upasthaṃ hasta.pādaṃ vāk ca-eva daśamī smṛtā || 90 ||

buddhīndriyāṇi pañca-eṣāṃ śrotrādīny anupūrvaśaḥ | karma.indriyāṇi pañca-eṣāṃ pāyu.ādīni pracakṣate || 91 ||

ekādaśaṃ mano jñeyaṃ svaguṇena-ubhaya.ātmakam | yasmin jite jitāv etau bhavataḥ pañcakau gaṇau || 92 ||

indriyāṇāṃ prasaṅgena doṣam ṛcchaty a.saṃśayam | sanniyamya tu tāny eva tataḥ siddhiṃ nigacchati || 93 ||

na jātu kāmaḥ kāmānām upabhogena śāmyati | haviṣā kṛṣṇavartmā-iva bhūya eva-abhivardhate || 94 ||

yaś ca-etān prāpnuyāt sarvān yaś ca-etān kevalāṃs tyajet | prāpaṇāt sarvakāmānāṃ parityāgo viśiṣyate || 95 ||

na tathā-etāni śakyante sanniyantum asevayā | viṣayeṣu prajuṣṭāni yathā jñānena nityaśaḥ || 96 ||

vedās tyāgaś ca yajñāś ca niyamāś ca tapāṃsi ca | na vipraduṣṭa.bhāvasya siddhiṃ gacchati karhi cit || 97 ||

śrutvā spṛṣṭvā ca dṛṣṭvā ca bhuktvā ghrātvā ca yo naraḥ | na hṛṣyati glāyati vā sa vijñeyo jita.indriyaḥ || 98 ||

indriyāṇāṃ tu sarveṣāṃ yady ekaṃ kṣarati-indriyam | tena-asya kṣarati prajñā dṛteḥ pādād iva-udakam || 99 ||

vaśe kṛtvā-indriyagrāmaṃ saṃyamya ca manas tathā | sarvān saṃsādhayed arthān a.kṣiṇvan yogatas tanum || 100 ||

pūrvāṃ sandhyāṃ japāṃs tiṣṭhet sāvitrīm ā.arkadarśanāt | paścimāṃ tu samāsīnaḥ samyag ṛkṣavibhāvanāt || 101 ||

pūrvāṃ sandhyāṃ japaṃs tiṣṭhan naiśam eno vyapohati | paścimām tu samāsīno malaṃ hanti divākṛtam || 102 ||

na tiṣṭhati tu yaḥ pūrvāṃ na-upāste yaś ca paścimām | sa śūdravad bahiṣkāryaḥ sarvasmād dvijakarmaṇaḥ || 103 ||

apāṃ samīpe niyato naityakaṃ vidhim āsthitaḥ | sāvitrīm apy adhīyīta gatvā-araṇyaṃ samāhitaḥ || 104 ||

veda.upakaraṇe ca-eva svādhyāye ca-eva naityake | na-anurodho 'sty anadhyāye homamantreṣu ca-eva hi || 105 ||

naityake na-asty anadhyāyo brahmasattraṃ hi tat smṛtam | brahmāhuti.hutaṃ puṇyam an.adhyāya.vaṣaṭkṛtam || 106 ||

yaḥ svādhyāyam adhīte 'bdaṃ vidhinā niyataḥ śuciḥ | tasya nityaṃ kṣaraty eṣa payo dadhi ghṛtaṃ madhu || 107 ||

agnīndhanaṃ bhaikṣacaryām adhaḥśayyāṃ guror hitam | ā samāvartanāt kuryāt kṛta.upanayano dvijaḥ || 108 ||

ācāryaputraḥ śuśrūṣur jñānado dhārmikaḥ śuciḥ | āptaḥ śakto 'rthadaḥ sādhuḥ svo 'dhyāpyā daśa dharmataḥ || 109 ||

na-apṛṣṭaḥ kasya cid brūyān na ca-anyāyena pṛcchataḥ | jānann api hi medhāvī jaḍaval loka ācaret || 110 ||

adharmeṇa ca yaḥ prāha yaś ca-adharmeṇa pṛcchati | tayor anyataraḥ praiti vidveṣaṃ vā-adhigacchati || 111 ||

dharma.arthau yatra na syātāṃ śuśrūṣā vā-api tadvidhā | tatra vidyā na vaptavyā śubhaṃ bījam iva-ūṣare || 112 ||

vidyayā-eva samaṃ kāmaṃ martavyaṃ brahmavādinā | āpady api hi ghorāyāṃ na tv enām iriṇe vapet || 113 ||

vidyā brāhmaṇam etya-āha śevadhis te 'smi rakṣa mām | asūyakāya māṃ mādās tathā syāṃ vīryavattamā || 114 ||

yam eva tu śuciṃ vidyān niyata.brahmacāriṇam | tasmai māṃ brūhi viprāya nidhipāya-a.pramādine || 115 ||

brahma yas tv ananujñātam adhīyānād avāpnuyāt | sa brahmasteyasaṃyukto narakaṃ pratipadyate || 116 ||

laukikaṃ vaidikaṃ vā-api tathā-adhyātmikam eva vā | ādadīta yato jñānaṃ taṃ pūrvam abhivādayet || 117 ||

sāvitrīmātra.sāro 'pi varaṃ vipraḥ suyantritaḥ | na-a.yantritas trivedo 'pi sarvāśī sarvavikrayī || 118 ||

śayyā.āsane 'dhyācarite śreyasā na samāviśet | śayyā.āsanasthaś ca-eva-enaṃ pratyutthāya-abhivādayet || 119 ||

ūrdhvaṃ prāṇā hy utkrāmanti yūnaḥ sthavira āyati | pratyutthāna.abhivādābhyāṃ punas tān pratipadyate || 120 ||

abhivādana.śīlasya nityaṃ vṛddha.upasevinaḥ | catvāri tasya vardhante āyur dharmo yaśo balam || 121 ||

abhivādāt paraṃ vipro jyāyāṃsam abhivādayan | asau nāma-aham asmi-iti svaṃ nāma parikīrtayet || 122 ||

nāmadheyasya ye ke cid abhivādaṃ na jānate | tān prājño 'ham iti brūyāt striyaḥ sarvās tathā-eva ca || 123 ||

bhoḥśabdaṃ kīrtayed ante svasya nāmno 'bhivādane | nāmnām svarūpa.bhāvo hi bho.bhāva ṛṣibhiḥ smṛtaḥ || 124 ||

āyuṣmān bhava saumya-iti vācyo vipro 'bhivādane | a.kāraś ca-asya nāmno 'nte vācyaḥ pūrvākṣaraḥ plutaḥ || 125 ||

yo na vetty abhivādasya vipraḥ pratyabhivādanam | na-abhivādyaḥ sa viduṣā yathā śūdras tathā-eva saḥ || 126 ||

brāhmaṇaṃ kuśalaṃ pṛcchet kṣatrabandhum an.āmayam | vaiśyaṃ kṣemaṃ samāgamya śūdram ārogyam eva ca || 127 ||

a.vācyo dīkṣito nāmnā yavīyān api yo bhavet | bho.bhavat.pūrvakaṃ tv enam abhibhāṣeta dharmavit || 128 ||

parapatnī tu yā strī syād a.sambandhā ca yonitaḥ | tāṃ brūyād bhavati-ity evaṃ subhage bhagini-iti ca || 129 ||

mātulāṃś ca pitṛvyāṃś ca śvaśurān ṛtvijo gurūn | asāv aham iti brūyāt pratyutthāya yavīyasaḥ || 130 ||

mātṛśvasā mātulānī śvaśrūr atha pitṛśvasā | sampūjyā gurupatnīvat samās tā gurubhāryayā || 131 ||

bhrātur bhāryā-upasaṅgrāhyā sa.varṇā-ahany ahany api | viproṣya tu-upasaṅgrāhyā jñāti.sambandhi.yoṣitaḥ || 132 ||

pitur bhaginyāṃ mātuś ca jyāyasyāṃ ca svasary api | mātṛvad vṛttim ātiṣṭhen mātā tābhyo garīyasī || 133 ||

daśābda.ākhyaṃ paurasakhyaṃ pañcābda.ākhyaṃ kalābhṛtām | tryabdapūrvaṃ śrotriyāṇāṃ svalpena-api svayoniṣu || 134 ||

brāhmaṇaṃ daśavarṣaṃ tu śatavarṣaṃ tu bhūmipam | pitā.putrau vijānīyād brāhmaṇas tu tayoḥ pitā || 135 ||

vittaṃ bandhur vayaḥ karma vidyā bhavati pañcamī | etāni mānyasthānāni garīyo yad yad uttaram || 136 ||

pañcānāṃ triṣu varṇeṣu bhūyāṃsi guṇavanti ca | yatra syuḥ so 'tra māna.arhaḥ śūdro 'pi daśamīṃ gataḥ || 137 ||

cakriṇo daśamīsthasya rogiṇo bhāriṇaḥ striyāḥ | snātakasya ca rājñaś ca panthā deyo varasya ca || 138 ||

teṣāṃ tu samāvetānāṃ mānyau snātaka.pārthivau | rāja.snātakayoś ca-eva snātako nṛpamānabhāk || 139 ||

upanīya tu yaḥ śiṣyaṃ vedam adhyāpayed dvijaḥ | sa.kalpaṃ sa.rahasyaṃ ca tam ācāryaṃ pracakṣate || 140 ||

ekadeśaṃ tu vedasya vedāṅgāny api vā punaḥ | yo 'dhyāpayati vṛttyartham upādhyāyaḥ sa ucyate || 141 ||

niṣeka.ādīni karmāṇi yaḥ karoti yathāvidhi | sambhāvayati ca-annena sa vipro gurur ucyate || 142 ||

agnyādheyaṃ pākayajñān agniṣṭoma.ādikān makhān | yaḥ karoti vṛto yasya sa tasya-ṛtvig iha-ucyate || 143 ||

ya āvṛṇoty a.vitathaṃ brahmaṇā śravaṇāv ubhau | sa mātā sa pitā jñeyas taṃ na druhyet kadā cana || 144 ||

upādhyāyān daśa-ācārya ācāryāṇāṃ śataṃ pitā | sahasraṃ tu pitṝn mātā gauraveṇa-atiricyate || 145 ||

utpādaka.brahmadātror garīyān brahmadaḥ pitā | brahmajanma hi viprasya pretya ca-iha ca śāśvatam || 146 ||

kāmān mātā pitā ca-enaṃ yad utpādayato mithaḥ | sambhūtiṃ tasya tāṃ vidyād yad yonāv abhijāyate || 147 ||

ācāryas tv asya yāṃ jātiṃ vidhivad vedapāragaḥ | utpādayati sāvitryā sā satyā sā-ajarā-amarā || 148 ||

alpaṃ vā bahu vā yasya śrutasya-upakaroti yaḥ | tam apīha guruṃ vidyāt-śruta.upakriyayā tayā || 149 ||

brāhmasya janmanaḥ kartā svadharmasya ca śāsitā | bālo 'pi vipro vṛddhasya pitā bhavati dharmataḥ || 150 ||

adhyāpayām āsa pitṝn śiśur āṅgirasaḥ kaviḥ | putrakā iti ha-uvāca jñānena parigṛhya tān || 151 ||

te tam artham apṛcchanta devān āgata.manyavaḥ | devāś ca-etān sametya-ūcur nyāyyaṃ vaḥ śiśur uktavān || 152 ||

ajño bhavati vai bālaḥ pitā bhavati mantradaḥ | ajñaṃ hi bālam ity āhuḥ pitā-ity eva tu mantradam || 153 ||

na hāyanair na palitair na vittena na bandhubhiḥ | ṛṣayaś cakrire dharmaṃ yo 'nūcānaḥ sa no mahān || 154 ||

viprāṇāṃ jñānato jyaiṣṭhyaṃ kṣatriyāṇāṃ tu vīryataḥ | vaiśyānāṃ dhānyadhanataḥ śūdrāṇām eva janmataḥ || 155 ||

na tena vṛddho bhavati yenāsya palitaṃ śiraḥ | yo vai yuvā-apy adhīyānas taṃ devāḥ sthaviraṃ viduḥ || 156 ||

yathā kāṣṭhamayo hastī yathā carmamayo mṛgaḥ | yaś ca vipro 'n.adhīyānas trayas te nāma bibhrati || 157 ||

yathā ṣaṇḍho '.phalaḥ strīṣu yathā gaur gavi ca-a.phalā | yathā ca-ajñe '.phalaṃ dānaṃ tathā vipro 'n.ṛco '.phalaḥ || 158 ||

ahiṃsayā-eva bhūtānāṃ kāryaṃ śreyo 'nuśāsanam | vāk ca-eva madhurā ślakṣṇā prayojyā dharmam icchatā || 159 ||

yasya vāc.manasī śuddhe samyaggupte ca sarvadā | sa vai sarvam avāpnoti vedānta.upagataṃ phalam || 160 ||

na-aruntudaḥ syād ārto 'pi na paradroha.karma.dhīḥ | yayā-asya-udvijate vācā na-alokyāṃ tām udīrayet || 161 ||

sammānād brāhmaṇo nityam udvijeta viṣād iva | amṛtasya-iva ca-ākāṅkṣed avamānasya sarvadā || 162 ||

sukhaṃ hy avamataḥ śete sukhaṃ ca pratibudhyate | sukhaṃ carati loke 'sminn avamantā vinaśyati || 163 ||

anena kramayogena saṃskṛta.ātmā dvijaḥ śanaiḥ | gurau vasan sañcinuyād brahmādhigamikaṃ tapaḥ || 164 ||

tapo.viśeṣair vividhair vrataiś ca vidhicoditaiḥ | vedaḥ kṛtsno 'dhigantavyaḥ sa.rahasyo dvijanmanā || 165 ||

vedam eva sadā-abhyasyet tapas tapsyan dvijottamaḥ | vedābhyāso hi viprasya tapaḥ param iha-ucyate || 166 ||

ā ha-eva sa nakhāgrebhyaḥ paramaṃ tapyate tapaḥ | yaḥ sragvy api dvijo 'dhīte svādhyāyaṃ śaktito 'nvaham || 167 ||

yo 'n.adhītya dvijo vedam anyatra kurute śramam | sa jīvann eva śūdratvam āśu gacchati sa.anvayaḥ || 168 ||

mātur agre 'dhijananaṃ dvitīyaṃ mauñjibandhane | tṛtīyaṃ yajñadīkṣāyāṃ dvijasya śruticodanāt || 169 ||

tatra yad brahmajanma-asya mauñjībandhanacihnitam | tatra-asya mātā sāvitrī pitā tv ācārya ucyate || 170 ||

vedapradānād ācāryaṃ pitaraṃ paricakṣate | na hy asmin yujyate karma kiñ cid ā mauñjibandhanāt || 171 ||

na-abhivyāhārayed brahma svadhāninayanād ṛte | śūdreṇa hi samas tāvad yāvad vede na jāyate || 172 ||

kṛta.upanayanasya-asya vratādeśanam iṣyate | brahmaṇo grahaṇaṃ ca-eva krameṇa vidhi.pūrvakam || 173 ||

yady asya vihitaṃ carma yat sūtraṃ yā ca mekhalā | yo daṇḍo yat-ca vasanaṃ tat tad asya vrateṣv api || 174 ||

seveta-imāṃs tu niyamān brahmacārī gurau vasan | sanniyamya-indriyagrāmaṃ tapovṛddhi.artham ātmanaḥ || 175 ||

nityaṃ snātvā śuciḥ kuryād deva.ṛṣi.pitṛtarpaṇam | devatābhyarcanaṃ ca-eva samidādhānam eva ca || 176 ||

varjayen madhu māṃsaṃ ca gandhaṃ mālyaṃ rasān striyaḥ | śuktāni yāni sarvāṇi prāṇināṃ ca-eva hiṃsanam || 177 ||

abhyaṅgam añjanaṃ cākṣṇor upānah.chatradhāraṇam | kāmaṃ krodhaṃ ca lobhaṃ ca nartanaṃ gītavādanam || 178 ||

dyūtaṃ ca janavādaṃ ca parivādaṃ tathā-anṛtam | strīṇāṃ ca prekṣaṇālambham upaghātaṃ parasya ca || 179 ||

ekaḥ śayīta sarvatra na retaḥ skandayet kva cit | kāmādd hi skandayan reto hinasti vratam ātmanaḥ || 180 ||

svapne siktvā brahmacārī dvijaḥ śukram a.kāmataḥ | snātvā-arkam arcayitvā triḥ punar mām ity ṛcaṃ japet || 181 ||

udakumbhaṃ sumanaso gośakṛt.mṛttikā.kuśān | āhared yāvad arthāni bhaikṣaṃ ca-ahar.ahaś caret || 182 ||

veda.yajñair ahīnānāṃ praśastānāṃ svakarmasu | brahmacāry āhared bhaikṣaṃ gṛhebhyaḥ prayato 'nvaham || 183 ||

guroḥ kule na bhikṣeta na jñāti.kula.bandhuṣu | a.lābhe tv anyagehānāṃ pūrvaṃ pūrvaṃ vivarjayet || 184 ||

sarvaṃ vāpi cared grāmaṃ pūrva.uktānām a.sambhave | niyamya prayato vācam abhiśastāṃs tu varjayet || 185 ||

dūrād āhṛtya samidhaḥ sannidadhyād vihāyasi | sāyaṃ.prātaś ca juhuyāt tābhir agnim atandritaḥ || 186 ||

a.kṛtvā bhaikṣacaraṇam a.samidhya ca pāvakaṃ | an.āturaḥ saptarātram avakīrṇivrataṃ caret || 187 ||

bhaikṣeṇa vartayen nityaṃ na-ekānna.adī bhaved vratī | bhaikṣeṇa vratino vṛttir upavāsa.samā smṛtā || 188 ||

vratavad deva.daivatye pitrye karmaṇy atha-ṛṣivat | kāmam abhyarthito 'śnīyād vratam asya na lupyate || 189 ||

brāhmaṇasya-eva karma-etad upadiṣṭaṃ manīṣibhiḥ | rājanya.vaiśyayos tv evaṃ na-etat karma vidhīyate || 190 ||

codito guruṇā nityam a.pracodita eva vā | kuryād adhyayane yatnam ācāryasya hiteṣu ca || 191 ||

śarīraṃ ca-eva vācaṃ ca buddhīndriya.manāṃsi ca | niyamya prāñjalis tiṣṭhed vīkṣamāṇo guror mukham || 192 ||

nityam uddhṛta.pāṇiḥ syāt sādhu.ācāraḥ su.saṃvṛtaḥ | āsyatām iti ca-uktaḥ sann āsīta-abhimukhaṃ guroḥ || 193 ||

hīna.anna.vastra.veṣaḥ syāt sarvadā gurusannidhau | uttiṣṭhet prathamaṃ cāsya caramaṃ ca-eva saṃviśet || 194 ||

pratiśrāvaṇa.sambhāṣe śayāno na samācaret | na-āsīno na ca bhuñjāno na tiṣṭhan na parāṅ.mukhaḥ || 195 ||

āsīnasya sthitaḥ kuryād abhigacchaṃs tu tiṣṭhataḥ | pratyudgamya tv āvrajataḥ paścād dhāvaṃs tu dhāvataḥ || 196 ||

parāṅ.mukhasya-abhimukho dūrasthasya-etya ca.antikam | praṇamya tu śayānasya nideśe ca-eva tiṣṭhataḥ || 197 ||

nīcaṃ śayyā.āsanaṃ ca.asya nityaṃ syād gurusannidhau | guros tu cakṣurviṣaye na yathā.iṣṭa.āsano bhavet || 198 ||

na-udāhared asya nāma parokṣam api kevalam | na ca-eva-asya.anukurvīta gati.bhāṣita.ceṣṭitam || 199 ||

guror yatra parivādo nindā vā.api pravartate | karṇau tatra pidhātavyau gantavyaṃ vā tato 'nyataḥ || 200 ||

parīvādāt kharo bhavati śvā vai bhavati nindakaḥ | paribhoktā kṛmir bhavati kīṭo bhavati matsarī || 201 ||

dūrastho na-arcayed enaṃ na kruddho na-antike striyāḥ | yāna.āsanasthaś ca-eva-enam avaruhya-abhivādayet || 202 ||

prativāte 'nuvāte ca na-āsīta guruṇā saha | a.saṃśrave ca-eva guror na kiṃ cid api kīrtayet || 203 ||

go.'śva.uṣṭra.yāna.prāsāda.prastareṣu kaṭeṣu ca | āsīta guruṇā sārdhaṃ śilā.phalaka.nauṣu ca || 204 ||

guror gurau sannihite guruvad vṛttim ācaret | na ca-a.nisṛṣṭo guruṇā svān gurūn abhivādayet || 205 ||

vidyāguruṣv evam eva nityā vṛttiḥ svayoniṣu | pratiṣedhatsu ca-adharmādd hitaṃ ca-upadiśatsv api || 206 ||

śreyaḥsu guruvad vṛttiṃ nityam eva samācaret | guruputreṣu ca-āryeṣu guroś ca-eva svabandhuṣu || 207 ||

bālaḥ samāna.janmā vā śiṣyo vā yajñakarmaṇi | adhyāpayan gurusuto guruvat-mānam arhati || 208 ||

utsādanaṃ ca gātrāṇāṃ snāpana.ucchiṣṭabhojane | na kuryād guruputrasya pādayoś ca-avanejanam || 209 ||

guruvat pratipūjyāḥ syuḥ sa.varṇā guruyoṣitaḥ | a.savarṇās tu sampūjyāḥ pratyutthāna.abhivādanaiḥ || 210 ||

abhyañjanaṃ snāpanaṃ ca gātra.utsādanam eva ca | gurupatnyā na kāryāṇi keśānāṃ ca prasādhanam || 211 ||

gurupatnī tu yuvatir na-abhivādyā-iha pādayoḥ | pūrṇaviṃśativarṣeṇa guṇa.doṣau vijānatā || 212 ||

svabhāva eṣa nārīṇāṃ narāṇām iha dūṣaṇam | ato 'rthān na pramādyanti pramadāsu vipaścitaḥ || 213 ||

a.vidvāṃsam alaṃ loke vidvāṃsam api vā punaḥ | pramadā hy utpathaṃ netuṃ kāma.krodhavaśānugam || 214 ||

mātrā svasrā duhitrā vā na viviktāsano bhavet | balavān indriyagrāmo vidvāṃsam api karṣati || 215 ||

kāmaṃ tu gurupatnīnāṃ yuvatīnāṃ yuvā bhuvi | vidhivad vandanaṃ kuryād asāv aham iti bruvan || 216 ||

viproṣya pādagrahaṇam anvahaṃ ca-abhivādanam | gurudāreṣu kurvīta satāṃ dharmam anusmaran || 217 ||

yathā khanan khanitreṇa naro vāry adhigacchati | tathā gurugatāṃ vidyāṃ śuśrūṣur adhigacchati || 218 ||

muṇḍo vā jaṭilo vā syād atha vā syāt-śikhā.jaṭaḥ | na-enaṃ grāme 'bhinimlocet sūryo na-abhyudiyāt kva cit || 219 ||

taṃ ced abhyudiyāt sūryaḥ śayānaṃ kāmacārataḥ | nimloced vā-apy a.vijñānāj japann upavased dinam || 220 ||

sūryeṇa hy abhinirmuktaḥ śayāno 'bhyuditaś ca yaḥ | prāyaścittam a.kurvāṇo yuktaḥ syān mahatā-enasā || 221 ||

ācamya prayato nityam ubhe sandhye samāhitaḥ | śucau deśe japañ japyam upāsīta yathāvidhi || 222 ||

yadi strī yady avarajaḥ śreyaḥ kiṃ cit samācaret | tat sarvam ācared yukto yatra ca-asya ramen manaḥ || 223 ||

dharma.arthāv ucyate śreyaḥ kāma.arthau dharma eva ca | artha eva-iha vā śreyas trivarga iti tu sthitiḥ || 224 ||

ācāryaś ca pitā ca-eva mātā bhrātā ca pūrvajaḥ | na-ārtena-apy avamantavyā brāhmaṇena viśeṣataḥ || 225 ||

ācāryo brahmaṇo mūrtiḥ pitā mūrtiḥ prajāpateḥ | mātā pṛthivyā mūrtis tu bhrātā svo mūrtir ātmanaḥ || 226 ||

yaṃ mātā.pitarau kleśaṃ sahete sambhave nṛṇām | na tasya niṣkṛtiḥ śakyā kartuṃ varṣaśatair api || 227 ||

tayor nityaṃ priyaṃ kuryād ācāryasya ca sarvadā | teṣv eva triṣu tuṣṭeṣu tapaḥ sarvaṃ samāpyate || 228 ||

teṣāṃ trayāṇāṃ śuśrūṣā paramaṃ tapa ucyate | na tair an.abhyanujñāto dharmam anyaṃ samācaret || 229 ||

ta eva hi trayo lokās ta eva traya āśramāḥ | ta eva hi trayo vedās ta eva-uktās trayo 'gnayaḥ || 230 ||

pitā vai gārhapatyo 'gnir mātā-agnir dakṣiṇaḥ smṛtaḥ | gurur āhavanīyas tu sā-agnitretā garīyasī || 231 ||

triṣv a.pramādyann eteṣu trīn lokān vijayed gṛhī | dīpyamānaḥ svavapuṣā devavad divi modate || 232 ||

imaṃ lokaṃ mātṛbhaktyā pitṛbhaktyā tu madhyamam | guruśuśrūṣayā tv evaṃ brahmalokaṃ samaśnute || 233 ||

sarve tasya-ādṛtā dharmā yasya-ete traya ādṛtāḥ | an.ādṛtās tu yasya-ete sarvās tasya-a.phalāḥ kriyāḥ || 234 ||

yāvat trayas te jīveyus tāvat-na-anyaṃ samācaret | teṣv eva nityaṃ śuśrūṣāṃ kuryāt priyahite rataḥ || 235 ||

teṣām an.uparodhena pāratryaṃ yad yad ācaret | tat tan nivedayet tebhyo mano.vacana.karmabhiḥ || 236 ||

triṣv eteṣv itikṛtyaṃ hi puruṣasya samāpyate | eṣa dharmaḥ paraḥ sākṣād upadharmo 'nya ucyate || 237 ||

śraddadhānaḥ śubhāṃ vidyām ādadīta-avarād api | anyād api paraṃ dharmaṃ strīratnaṃ duṣkulād api || 238 ||

viṣād apy amṛtaṃ grāhyaṃ bālād api subhāṣitam | amitrād api sadvṛttam amedhyād api kāñcanam || 239 ||

striyo ratnāny atho vidyā dharmaḥ śaucaṃ subhāṣitam | vividhāni ca śīlpāni samādeyāni sarvataḥ || 240 ||

a.brāhmaṇād adhyāyanam āpatkāle vidhīyate | anuvrajyā ca śuśrūṣā yāvad adhyāyanaṃ guroḥ || 241 ||

na-a.brāhmaṇe gurau śiṣyo vāsam ātyantikaṃ vaset | brāhmaṇe vā-an.anūcāne kāṅkṣan gatim an.uttamām || 242 ||

yadi tv ātyantikaṃ vāsaṃ rocayeta guroḥ kule | yuktaḥ paricared enam ā śarīravimokṣaṇāt || 243 ||

ā samāpteḥ śarīrasya yas tu śuśrūṣate gurum | sa gacchaty añjasā vipro brahmaṇaḥ sadma śāśvatam || 244 ||

na pūrvaṃ gurave kiṃ cid upakurvīta dharmavit | snāsyaṃs tu guruṇā-ājñaptaḥ śaktyā guru.artham āharet || 245 ||

kṣetraṃ hiraṇyaṃ gām aśvaṃ chatra.upānaham āsanam | dhānyaṃ śākaṃ ca vāsāṃsi gurave prītim āvahet || 246 ||

ācārye tu khalu prete guruputre guṇānvite | gurudāre sapiṇḍe vā guruvad vṛttim ācaret || 247 ||

eteṣv a.vidyamāneṣu sthāna.āsana.vihāravān | prayuñjāno 'gniśuśrūṣāṃ sādhayed deham ātmanaḥ || 248 ||

evaṃ carati yo vipro brahmacaryam a.viplutaḥ | sa gacchaty uttamasthānaṃ na ca-iha jāyate punaḥ || 249 ||