Adhyay 11

sāntānikaṃ yakṣyamāṇam adhvagaṃ sārvavedasam | guru.arthaṃ pitṛ.mātṛ.arthaṃ svādhyāyārthy upatāpinaḥ || 1 ||

na vai tān snātakān vidyād brāhmaṇān dharmabhikṣukān | niḥsvebhyo deyam etebhyo dānaṃ vidyāviśeṣataḥ || 2 ||

etebhyo hi dvijāgryebhyo deyam annaṃ sa.dakṣiṇam | itarebhyo bahirvedi kṛtānnaṃ deyam ucyate || 3 ||

sarvaratnāni rājā tu yathārhaṃ pratipādayet | brāhmaṇān vedaviduṣo yajñārthaṃ ca-eva dakṣiṇām || 4 ||

kṛta.dāro 'parān dārān bhikṣitvā yo 'dhigacchati | rati.mātraṃ phalaṃ tasya dravyadātus tu santatiḥ || 5 ||

dhanāni tu yathāśakti vipreṣu pratipādayet | vedavitsu vivikteṣu pretya svargaṃ samaśnute || 6 ||

yasya traivārṣikaṃ bhaktaṃ paryāptaṃ bhṛtyavṛttaye | adhikaṃ vā-api vidyeta sa somaṃ pātum arhati || 7 ||

ataḥ svalpīyasi dravye yaḥ somaṃ pibati dvijaḥ | sa pītasoma.pūrvo 'pi na tasya-āpnoti tatphalam || 8 ||

śaktaḥ parajane dātā svajane duḥkhajīvini | madhv.āpāto viṣa.āsvādaḥ sa dharma.pratirūpakaḥ || 9 ||

bhṛtyānām uparodhena yat karoty aurdhvadehikam | tad bhavaty asukha.udarkaṃ jīvataś ca mṛtasya ca || 10 ||

yajñaś cet pratiruddhaḥ syād ekena-aṅgena yajvanaḥ | brāhmaṇasya viśeṣena dhārmike sati rājani || 11 ||

yo vaiśyaḥ syād bahupaśur hīna.kratur asomapaḥ | kuṭumbāt tasya tad dravyam āhared yajñasiddhaye || 12 ||

āharet trīṇi vā dve vā kāmaṃ śūdrasya veśmanaḥ | na hi śūdrasya yajñeṣu kaś cid asti parigrahaḥ || 13 ||

yo 'nāhita.agniḥ śatagur a.yajvā ca sahasraguḥ | tayor api kuṭumbābhyām āhared a.vicārayan || 14 ||

ādāna.nityāc ca-ādātur āhared a.prayacchataḥ | tathā yaśo 'sya prathate dharmaś ca-eva pravardhate || 15 ||

tathāa-eva saptame bhakte bhaktāni ṣaḍ an.aśnatā | aśvastanavidhānena hartavyaṃ hīna.karmaṇaḥ || 16 ||

khalāt kṣetrād agārād vā yato vā-apy upalabhyate | ākhyātavyaṃ tu tat tasmai pṛcchate yadi pṛcchati || 17 ||

brāhmaṇasvaṃ na hartavyaṃ kṣatriyeṇa kadā cana | dasyu.niṣkriyayos tu svam a.jīvan hartum arhati || 18 ||

yo 'sādhubhyo 'rtham ādāya sādhubhyaḥ samprayacchati | sa kṛtvā plavam ātmānaṃ santārayati tāv ubhau || 19 ||

yad dhanaṃ yajñaśīlānāṃ devasvaṃ tad vidur budhāḥ | a.yajvanāṃ tu yad vittam āsurasvaṃ tad ucyate || 20 ||

na tasmin dhārayed daṇḍaṃ dhārmikaḥ pṛthivīpatiḥ | kṣatriyasya hi bāliśyād brāhmaṇaḥ sīdati kṣudhā || 21 ||

tasya bhṛtyajanaṃ jñātvā svakuṭumbān mahīpatiḥ | śruta.śīle ca vijñāya vṛttiṃ dharmyāṃ prakalpayet || 22 ||

kalpayitvā-asya vṛttiṃ ca rakṣed enaṃ samantataḥ | rājā hi dharmaṣaḍbhāgaṃ tasmāt prāpnoti rakṣitāt || 23 ||

na yajñārthaṃ dhanaṃ śūdrād vipro bhikṣeta karhi cit | yajamāno hi bhikṣitvā caṇḍālaḥ pretya jāyate || 24 ||

yājñārtham arthaṃ bhikṣitvā yo na sarvaṃ prayacchati | sa yāti bhāsatāṃ vipraḥ kākatāṃ vā śataṃ samāḥ || 25 ||

devasvaṃ brāhmaṇasvaṃ vā lobhena-upahinasti yaḥ | sa pāpa.ātmā pare loke gṛdhra.ucchiṣṭena jīvati || 26 ||

iṣṭiṃ vaiśvānarīṃ nityaṃ nirvaped abdaparyaye | kḷptānāṃ paśu.somānāṃ niṣkṛtyartham asambhave || 27 ||

āpatkalpena yo dharmaṃ kurute 'nāpadi dvijaḥ | sa na-āpnoti phalaṃ tasya paratra-iti vicāritam || 28 ||

viśvaiś ca devaiḥ sādhyaiś ca brāhmaṇaiś ca maharṣibhiḥ | āpatsu maraṇād bhītair vidheḥ pratinidhiḥ kṛtaḥ || 29 ||

prabhuḥ prathamakalpasya yo 'nukalpena vartate | na sāmparāyikaṃ tasya dur.mater vidyate phalam || 30 ||

na brāhmaṇo vedayeta kiṃ cid rājani dharmavit | svavīryeṇa-eva tān-śiṣyān mānavān apakāriṇaḥ || 31 ||

svavīryād rājavīryāc ca svavīryaṃ balavattaram | tasmāt svena-eva vīryeṇa nigṛhṇīyād arīn dvijaḥ || 32 ||

śrutīr atharvāṅgirasīḥ kuryād ity a.vicārayan | vākśastraṃ vai brāhmaṇasya tena hanyād arīn dvijaḥ || 33 ||

kṣatriyo bāhuvīryeṇa tared āpadam ātmanaḥ | dhanena vaiśya.śūdrau tu japa.homair dvijottamaḥ || 34 ||

vidhātā śāsitā vaktā maitro brāhmaṇa ucyate | tasmai na-akuśalaṃ brūyān na śuṣkāṃ giram īrayet || 35 ||

na vai kanyā na yuvatir na-alpa.vidyo na bāliśaḥ | hotā syād agnihotrasya na-ārto na-asaṃskṛtas tathā || 36 ||

narake hi patanty ete juhvantaḥ sa ca yasya tat | tasmād vaitānakuśalo hotā syād vedapāragaḥ || 37 ||

prājāpatyam a.dattvā-aśvam agnyādheyasya dakṣiṇām | anāhitāgnir bhavati brāhmaṇo vibhave sati || 38 ||

puṇyāny anyāni kurvīta śraddadhāno jita.indriyaḥ | na tv alpa.dakṣiṇair yajñair yajeta-iha kathaṃ cana || 39 ||

indriyāṇi yaśaḥ svargam āyuḥ kīrtiṃ prajāḥ paśūn | hanty alpa.dakṣiṇo yajñas tasmān na-alpa.dhano yajet || 40 ||

agnihotry apavidhya-agnīn brāhmaṇaḥ kāmakārataḥ | cāndrāyaṇaṃ caren māsaṃ vīrahatyāsamaṃ hi tat || 41 ||

ye śūdrād adhigamya-artham agnihotram upāsate | ṛtvijas te hi śūdrāṇāṃ brahmavādiṣu garhitāḥ || 42 ||

teṣāṃ satatam ajñānāṃ vṛṣalāgnyupasevinām | padā mastakam ākramya dātā durgāṇi santaret || 43 ||

a.kurvan vihitaṃ karma ninditaṃ ca samācaran | prasaktaś ca-indriyārtheṣu prāyaścittīyate naraḥ || 44 ||

akāmataḥ kṛte pāpe prāyaścittaṃ vidur budhāḥ | kāmakārakṛte 'py āhur eke śrutinidarśanāt || 45 ||

akāmataḥ kṛtaṃ pāpaṃ vedābhyāsena śudhyati | kāmatas tu kṛtaṃ mohāt prāyaścittaiḥ pṛthagvidhaiḥ || 46 ||

prāyaścittīyatāṃ prāpya daivāt pūrvakṛtena vā | na saṃsargaṃ vrajet sadbhiḥ prāyaścitte 'kṛte dvijaḥ || 47 ||

iha duścaritaiḥ ke cit ke cit pūrvakṛtais tathā | prāpnuvanti dur.ātmāno narā rūpaviparyayam || 48 ||

suvarṇacauraḥ kaunakhyaṃ surāpaḥ śyāvadantatām | brahmahā kṣayarogitvaṃ dauścarmyaṃ gurutalpagaḥ || 49 ||

piśunaḥ pautināsikyaṃ sūcakaḥ pūtivaktratām | dhānyacauro 'ṅgahīnatvam ātiraikyaṃ tu miśrakaḥ || 50 ||

annahartā-āmayāvitvaṃ maukyaṃ vāgapahārakaḥ | vastrāpahārakaḥ śvaitryaṃ paṅgutām aśvahārakaḥ || 51 ||

evaṃ karmaviśeṣeṇa jāyante sadvigarhitāḥ | jaḍa.mūka.andha.badhirā vikṛta.ākṛtayas tathā || 52 ||

caritavyam ato nityaṃ prāyaścittaṃ viśuddhaye | nindyair hi lakṣaṇair yuktā jāyante 'niṣkṛta.enasaḥ || 53 ||

brahmahatyā surāpānaṃ steyaṃ gurvaṅganāgamaḥ | mahānti pātakāny āhuḥ saṃsargaś ca-api taiḥ saha || 54 ||

anṛtaṃ ca samutkarṣe rājagāmi ca paiśunam | guroś cālīka.nirbandhaḥ samāni brahmahatyayā || 55 ||

brahma.ujjhatā vedanindā kauṭasākṣyaṃ suhṛdvadhaḥ | garhita.anādyayor jagdhiḥ surāpānasamāni ṣaṭ || 56 ||

nikṣepasya-apaharaṇaṃ nara.aśva.rajatasya ca | bhūmi.vajra.maṇīnāṃ ca rukmasteyasamaṃ smṛtam || 57 ||

retaḥsekaḥ svayonīṣu kumārīṣv antyajāsu ca | sakhyuḥ putrasya ca strīṣu gurutalpasamaṃ viduḥ || 58 ||

govadho 'yājya.saṃyājyaṃ pāradārya.ātmavikrayaḥ | guru.mātṛ.pitṛ.tyāgaḥ svādhyāya.agnyoḥ sutasya ca || 59 ||

parivittitā-anuje 'nūḍhe parivedanam eva ca | tayor dānaṃ ca kanyāyās tayor eva ca yājanam || 60 ||

kanyāyā dūṣaṇaṃ ca-eva vārdhuṣyaṃ vratalopanam | taḍāga.ārāma.dārāṇām apatyasya ca vikrayaḥ || 61 ||

vrātyatā bāndhavatyāgo bhṛtyādhyāpanam eva ca | bhṛtyā ca-adhyayanādānam apaṇyānāṃ ca vikrayaḥ || 62 ||

sarvākāreṣv adhīkāro mahāyantrapravartanam | hiṃsā-oṣadhīnāṃ stri.ājīvo 'bhicāro mūlakarma ca || 63 ||

indhanārtham aśuṣkāṇāṃ drumāṇām avapātanam | ātmārthaṃ ca kriyārambho ninditānnādanaṃ tathā || 64 ||

anāhitāgnitā steyam ṛṇānām anapakriyā | asat.śāṣtrādhigamanaṃ kauśīlavyasya ca kriyā || 65 ||

dhānya.kupya.paśusteyaṃ madyapastrīniṣevaṇam | strī.śūdra.viś.kṣatravadho nāstikyaṃ ca-upapātakam || 66 ||

brāhmaṇasya rujaḥ kṛtvā ghrātir aghreya.madyayoḥ | jaihmyaṃ ca maithunaṃ puṃsi jātibhraṃśakaraṃ smṛtam || 67 ||

khara.aśva.uṣṭra.mṛga.ibhānām aja.āvikavadhas tathā | saṅkarīkaraṇaṃ jñeyaṃ mīna.ahi.mahiṣasya ca || 68 ||

ninditebhyo dhanādānaṃ vāṇijyaṃ śūdrasevanam | apātrīkaraṇaṃ jñeyam asatyasya ca bhāṣaṇam || 69 ||

kṛmi.kīṭa.vayo.hatyā madyānugatabhojanam | phala.edhaḥ.kusuma.steyam adhairyaṃ ca malāvaham || 70 ||

etāny enāṃsi sarvāṇi yathā.uktāni pṛthak pṛthak | yair yair vratair apohyante tāni samyaṅ nibodhata || 71 ||

brahmahā dvādaśa samāḥ kuṭīṃ kṛtvā vane vaset | bhaikṣāśy ātmaviśuddhyarthaṃ kṛtvā śavaśiro dhvajam || 72 ||

lakṣyaṃ śastrabhṛtāṃ vā syād viduṣām icchayā-ātmanaḥ | prāsyed ātmānam agnau vā samiddhe trir avāk.śirāḥ || 73 ||

yajeta vā-aśvamedhena svarjitā gosavena vā | abhijid.viśvajidbhyāṃ vā trivṛtā-agniṣṭutā-api vā || 74 ||

japan vā-anyatamaṃ vedaṃ yojanānāṃ śataṃ vrajet | brahmahatyāpanodāya mitabhuj-niyata.indriyaḥ || 75 ||

sarvasvaṃ vedaviduṣe brāhmaṇāya-upapādayet | dhanaṃ hi jīvanāya-alaṃ gṛhaṃ vā sa.paricchadam || 76 ||

haviṣyabhug vā-anusaret pratisrotaḥ sarasvatīm | japed vā niyata.āhāras trir vai vedasya saṃhitām || 77 ||

kṛta.vāpano nivased grāmānte govraje 'pi vā | āśrame vṛkṣamūle vā go.brāhmaṇahite rataḥ || 78 ||

brāhmaṇārthe gavārthe vā sadyaḥ prāṇān parityajet | mucyate brahmahatyāyā goptā gor brāhmaṇasya ca || 79 ||

trivāraṃ pratiroddhā vā sarvasvam avajitya vā | viprasya tannimitte vā prāṇālābhe vimucyate || 80 ||

evaṃ dṛḍha.vrato nityaṃ brahmacārī samāhitaḥ | samāpte dvādaśe varṣe brahmahatyām vyapohati || 81 ||

śiṣṭvā vā bhūmidevānāṃ naradevasamāgame | svam eno 'vabhṛthasnāto hayamedhe vimucyate || 82 ||

dharmasya brāhmaṇo mūlam agraṃ rājanya ucyate | tasmāt samāgame teṣām eno vikhyāpya śudhyati || 83 ||

brahmaṇaḥ sambhavena-eva devānām api daivatam | pramāṇaṃ ca-eva lokasya brahmātra-eva hi kāraṇam || 84 ||

teṣāṃ vedavido brūyus trayo 'py enaḥ suniṣkṛtim | sā teṣāṃ pāvanāya syāt pavitrā viduṣāṃ hi vāk || 85 ||

ato 'nyatamam āsthāya vidhiṃ vipraḥ samāhitaḥ | brahmahatyākṛtaṃ pāpaṃ vyapohaty ātmavattayā || 86 ||

hatvā garbham avijñātam etad eva vrataṃ caret | rājanya.vaiśyau ca-ījānāv ātreyīm eva ca striyam || 87 ||

uktvā ca-eva-anṛtaṃ sākṣye pratirudhya guruṃ tathā | apahṛtya ca niḥkṣepaṃ kṛtvā ca strī.suhṛt.vadham || 88 ||

iyaṃ viśuddhir uditā pramāpya-akāmato dvijam | kāmato brāhmaṇavadhe niṣkṛtir na vidhīyate || 89 ||

surāṃ pītvā dvijo mohād agni.varṇāṃ surāṃ pibet | tayā sa kāye nirdagdhe mucyate kilbiṣāt tataḥ || 90 ||

gomūtram agni.varṇaṃ vā pibed udakam eva vā | payo ghṛtaṃ vā-ā maraṇād gośakṛdrasam eva vā || 91 ||

kaṇān vā bhakṣayed abdaṃ piṇyākaṃ vā sakṛt-niśi | surāpānāpanuttyarthaṃ vālavāsā jaṭī dhvajī || 92 ||

surā vai malam annānāṃ pāpmā ca malam ucyate | tasmād brāhmaṇa.rājanyau vaiśyaś ca na surāṃ pibet || 93 ||

gauḍī paiṣṭī ca mādhvī ca vijñeyā trividhā surā | yathā-eva-ekā tathā sarvā na pātavyā dvijottamaiḥ || 94 ||

yakṣa.rakṣaḥ.piśāca.annaṃ madyaṃ māṃsaṃ surāsavam | tad brāhmaṇena na-attavyaṃ devānām aśnatā haviḥ || 95 ||

amedhye vā paten matto vaidikaṃ vā-apy udāharet | akāryam anyat kuryād vā brāhmaṇo madamohitaḥ || 96 ||

yasya kāyagataṃ brahma madyena-āplāvyate sakṛt | tasya vyapaiti brāhmaṇyaṃ śūdratvaṃ ca sa gacchati || 97 ||

eṣā vicitrābhihitā surāpānasya niṣkṛtiḥ | ata ūrdhvaṃ pravakṣyāmi suvarṇasteyaniṣkṛtim || 98 ||

suvarṇasteyakṛd vipro rājānam abhigamya tu | svakarma khyāpayan brūyāt-māṃ bhavān anuśāstv iti || 99 ||

gṛhītvā musalaṃ rājā sakṛdd hanyāt tu taṃ svayam | vadhena śudhyati steno brāhmaṇas tapasā-eva tu || 100 ||

tapasāpanunutsus tu suvarṇasteyajaṃ malam | cīravāsā dvijo 'raṇye cared brahmahaṇo vratam || 101 ||

etair vratair apoheta pāpaṃ steyakṛtaṃ dvijaḥ | gurustrīgamanī-iyaṃ tu vratair ebhir apānudet || 102 ||

gurutalpy abhibhāṣya-enas tapte svapyād ayomaye | sūrmīṃ jvalantīṃ svāśliṣyen mṛtyunā sa viśudhyati || 103 ||

svayaṃ vā śiṣṇa.vṛṣaṇāv utkṛtya-ādhāya ca-añjalau | nairṛtīṃ diśam ātiṣṭhed ā nipātād ajihmagaḥ || 104 ||

khaṭvāṅgī cīra.vāsā vā śmaśrulo vijane vane | prājāpatyaṃ caret kṛcchram abdam ekaṃ samāhitaḥ || 105 ||

cāndrāyaṇaṃ vā trīn māsān abhyasyen niyata.indriyaḥ | haviṣyeṇa yavāgvā vā gurutalpāpanuttaye || 106 ||

etair vratair apoheyur mahāpātakino malam | upapātakinas tv evam ebhir nānāvidhair vrataiḥ || 107 ||

upapātakasaṃyukto goghno māsaṃ yavān pibet | kṛta.vāpo vased goṣṭhe carmaṇā tena saṃvṛtaḥ || 108 ||

caturthakālam aśnīyād a.kṣāra.lavaṇaṃ mitam | gomūtreṇa-ācaret snānaṃ dvau māsau niyata.indriyaḥ || 109 ||

divā-anugacched gās tās tu tiṣṭhann ūrdhvaṃ rajaḥ pibet | śuśrūṣitvā namaskṛtya rātrau vīrāsanaṃ vaset || 110 ||

tiṣṭhantīṣv anutiṣṭhet tu vrajantīṣv apy anuvrajet | āsīnāsu tathā-āsīno niyato vīta.matsaraḥ || 111 ||

āturām abhiśastāṃ vā caura.vyāghrādibhir bhayaiḥ | patitāṃ paṅkalagnaṃ vā sarva.upāyair vimocayet || 112 ||

uṣṇe varṣati śīte vā mārute vāti vā bhṛśam | na kurvīta-ātmanas trāṇaṃ gor a.kṛtvā tu śaktitaḥ || 113 ||

ātmano yadi vā-anyeṣāṃ gṛhe kṣetre 'tha vā khale | bhakṣayantīṃ na kathayet pibantaṃ ca-eva vatsakam || 114 ||

anena vidhinā yas tu goghno gām anugacchati | sa gohatyākṛtaṃ pāpaṃ tribhir māsair vyapohati || 115 ||

vṛṣabha.ekādaśā gāś ca dadyāt sucarita.vrataḥ | a.vidyamāne sarvasvaṃ vedavidbhyo nivedayet || 116 ||

etad eva vrataṃ kuryur upapātakino dvijāḥ | avakīrṇivarjyaṃ śuddhyarthaṃ cāndrāyaṇam atha-api vā || 117 ||

avakīrṇī tu kāṇena gardabhena catuṣpathe | pākayajñavidhānena yajeta nirṛtiṃ niśi || 118 ||

hutvā-agnau vidhivadd homān antataś ca sama-ity ṛcā | vāta.indra.guru.vahnīnāṃ juhuyāt sarpiṣā-āhutīḥ || 119 ||

kāmato retasaḥ sekaṃ vratasthasya dvijanmanaḥ | atikramaṃ vratasya-āhur dharmajñā brahmavādinaḥ || 120 ||

mārutaṃ puruhūtaṃ ca guruṃ pāvakam eva ca | caturo vratino 'bhyeti brāhmaṃ tejo 'vakīrṇinaḥ || 121 ||

etasminn enasi prāpte vasitvā gardabhājinam | saptāgārāṃś cared bhaikṣaṃ svakarma parikīrtayan || 122 ||

tebhyo labdhena bhaikṣeṇa vartayann ekakālikam | upaspṛśaṃs triṣavaṇaṃ tv abdena sa viśudhyati || 123 ||

jātibhraṃśakaraṃ karma kṛtvā-anyatamam icchayā | caret sāntapanaṃ kṛcchraṃ prājāpatyam anicchayā || 124 ||

saṅkara.apātrakṛtyāsu māsaṃ śodhanam aindavam | malinīkaraṇīyeṣu taptaḥ syād yāvakais tryaham || 125 ||

turīyo brahmahatyāyāḥ kṣatriyasya vadhe smṛtaḥ | vaiśye 'ṣṭamāṃśo vṛttasthe śūdre jñeyas tu ṣoḍaśaḥ || 126 ||

akāmatas tu rājanyaṃ vinipātya dvijottamaḥ | vṛṣabha.ekasahasrā gā dadyāt sucarita.vrataḥ || 127 ||

tryabdaṃ cared vā niyato jaṭī brahmahaṇo vratam | vasan dūratare grāmād vṛkṣamūla.niketanaḥ || 128 ||

etad eva cared abdaṃ prāyaścittaṃ dvijottamaḥ | pramāpya vaiśyaṃ vṛttasthaṃ dadyāc ca-ekaśataṃ || 129 ||

etad eva vrataṃ kṛtsnaṃ ṣaṇmāsān-śūdrahā caret | vṛṣabha.ekādaśā vā-api dadyād viprāya gāḥ sitāḥ || 130 ||

mārjāra.nakulau hatvā cāṣaṃ maṇḍūkam eva ca | śva.godhā.ulūka.kākāṃś ca śūdrahatyāvrataṃ caret || 131 ||

payaḥ pibet trirātraṃ vā yojanaṃ vā-adhvano vrajet | upaspṛśet sravantyāṃ vā sūktaṃ vā-ab.daivataṃ japet || 132 ||

abhriṃ kārṣṇāyasīṃ dadyāt sarpaṃ hatvā dvijottamaḥ | palālabhārakaṃ ṣaṇḍhe saisakaṃ ca-ekamāṣakam || 133 ||

ghṛtakumbhaṃ varāhe tu tiladroṇaṃ tu tittirau | śuke dvihāyanaṃ vatsaṃ krauñcaṃ hatvā trihāyanam || 134 ||

hatvā haṃsaṃ balākāṃ ca bakaṃ barhiṇam eva ca | vānaraṃ śyena.bhāsau ca sparśayed brāhmaṇāya gām || 135 ||

vāso dadyādd hayaṃ hatvā pañca nīlān vṛṣān gajam | aja.meṣāv anaḍvāhaṃ kharaṃ hatvā-ekahāyanam || 136 ||

kravyādāṃs tu mṛgān hatvā dhenuṃ dadyāt payasvinīm | akravyādān vatsatarīm uṣṭraṃ hatvā tu kṛṣṇalam || 137 ||

jīna.kārmuka.basta.avīn pṛthag dadyād viśuddhaye | caturṇām api varṇānāṃ nārīr hatvā-an.avasthitāḥ || 138 ||

dānena vadhanirṇekaṃ sarpādīnām a.śaknuvan | ekaikaśaś caret kṛcchraṃ dvijaḥ pāpāpanuttaye || 139 ||

asthimatāṃ tu sattvānāṃ sahasrasya pramāpaṇe | pūrṇe ca-anasy an.asthnāṃ tu śūdrahatyāvrataṃ caret || 140 ||

kiṃ cid eva tu viprāya dadyād asthimatāṃ vadhe | an.asthnāṃ ca-eva hiṃsāyāṃ prāṇāyāmena śudhyati || 141 ||

phaladānāṃ tu vṛkṣāṇāṃ chedane japyam ṛc.śatam | gulma.vallī.latānāṃ ca puṣpitānāṃ ca vīrudhām || 142 ||

annādyajānāṃ sattvānāṃ rasajānāṃ ca sarvaśaḥ | phala.puṣpa.udbhavānāṃ ca ghṛtaprāśo viśodhanam || 143 ||

kṛṣtajānām oṣadhīnāṃ jātānāṃ ca svayaṃ vane | vṛthālambhe 'nugacched gāṃ dinam ekaṃ payo.vrataḥ || 144 ||

etair vratair apohyaṃ syād eno hiṃsā.samudbhavam | jñāna.ajñānakṛtaṃ kṛtsnaṃ śṛṇuta-anādyabhakṣaṇe || 145 ||

ajñānād vāruṇīṃ pītvā saṃskāreṇa-eva śudhyati | matipūrvam anirdeśyaṃ prāṇāntikam iti sthitiḥ || 146 ||

apaḥ surābhājanasthā madyabhāṇḍasthitās tathā | pañcarātraṃ pibet pītvā śaṅkhapuṣpīśṛtaṃ payaḥ || 147 ||

spṛṣṭva dattvā ca madirāṃ vidhivat pratigṛhya ca | śūdra.ucchiṣṭāś ca pītvā-apaḥ kuśavāri pibet tryaham || 148 ||

brāhmaṇas tu surāpasya gandham āghrāya somapaḥ | prāṇān apsu trir āyamya ghṛtaṃ prāśya viśudhyati || 149 ||

ajñānāt prāśya viṣ.mūtraṃ surāsaṃspṛṣṭam eva ca | punaḥ saṃskāram arhanti trayo varṇā dvijātayaḥ || 150 ||

vapanaṃ mekhalā daṇḍo bhaikṣacaryā vratāni ca | nivartante dvijātīnāṃ punaḥsaṃskārakarmaṇi || 151 ||

abhojyānāṃ tu bhuktvā-annaṃ strī.śūdra.ucchiṣṭam eva ca | jagdhvā māṃsam abhakṣyaṃ ca saptarātraṃ yavān pibet || 152 ||

śuktāni ca kaṣāyāṃś ca pītvā medhyāny api dvijaḥ | tāvad bhavaty a.prayato yāvat tan na vrajaty adhaḥ || 153 ||

viḍvarāha.khara.uṣtrāṇāṃ gomāyoḥ kapi.kākayoḥ | prāśya mūtra.purīṣāṇi dvijaś cāndrāyaṇaṃ caret || 154 ||

śuṣkāṇi bhuktvā māṃsāni bhaumāni kavakāni ca | ajñātaṃ ca-eva sūnāstham etad eva vrataṃ caret || 155 ||

kravyāda.sūkara.uṣṭrāṇāṃ kukkuṭānāṃ ca bhakṣaṇe | nara.kāka.kharāṇāṃ ca taptakṛcchraṃ viśodhanam || 156 ||

māsikānnaṃ tu yo 'śnīyād asamāvartako dvijaḥ | sa trīṇy ahāny upavased ekāhaṃ ca-udake vaset || 157 ||

brahmacārī tu yo 'śnīyān madhu māṃsaṃ kathaṃ cana | sa kṛtvā prākṛtaṃ kṛcchraṃ vrataśeṣaṃ samāpayet || 158 ||

biḍāla.kāka.ākhu.ucchiṣṭaṃ jagdhvā śva.nakulasya ca | keśa.kīṭāvapannaṃ ca pibed brahmasuvarcalām || 159 ||

abhojyam annaṃ na-attavyam ātmanaḥ śuddhim icchatā | ajñānabhuktaṃ tu-uttāryaṃ śodhyaṃ vā-apy āśu śodhanaiḥ || 160 ||

eṣo 'nādya.adanasya-ukto vratānāṃ vividho vidhiḥ | steyadoṣāpahartṝṇāṃ vratānāṃ śrūyatāṃ vidhiḥ || 161 ||

dhānya.anna.dhanacauryāṇi kṛtvā kāmād dvijottamaḥ | svajātīyagṛhād eva kṛcchrābdena viśudhyati || 162 ||

manuṣyāṇāṃ tu haraṇe strīṇāṃ kṣetra.gṛhasya ca | kūpa.vāpījalānāṃ ca śuddhiś cāndrāyaṇaṃ smṛtam || 163 ||

dravyāṇām alpa.sārāṇāṃ steyaṃ kṛtvā-anyaveśmataḥ | caret sāntapanaṃ kṛcchraṃ tan niryāty ātmaśuddhaye || 164 ||

bhakṣya.bhojyāpaharaṇe yāna.śayyā.āsanasya ca | puṣpa.mūla.phalānāṃ ca pañcagavyaṃ viśodhanam || 165 ||

tṛṇa.kāṣṭha.drumāṇāṃ ca śuṣkānnasya guḍasya ca | cela.carma.āmiṣāṇāṃ ca trirātraṃ syād abhojanam || 166 ||

maṇi.muktā.pravālānāṃ tāmrasya rajatasya ca | ayaḥ.kāṃsya.upalānāṃ ca dvādaśāhaṃ kaṇānnatā || 167 ||

kārpāsa.kīṭaja.ūrṇānāṃ dviśapha.ekaśaphasya ca | pakṣi.gandha.oṣadhīnāṃ ca rajjvāś ca-eva tryahaṃ payaḥ || 168 ||

etair vratair apoheta pāpaṃ steyakṛtaṃ dvijaḥ | agamyāgamanīyaṃ tu vratair ebhir apānudet || 169 ||

gurutalpavrataṃ kuryād retaḥ siktvā svayoniṣu | sakhyuḥ putrasya ca strīṣu kumārīṣv antyajāsu ca || 170 ||

paitṛsvaseyīṃ bhaginīṃ svasrīyāṃ mātur eva ca | mātuś ca bhrātus tanayāṃ gatvā cāndrāyaṇaṃ caret || 171 ||

etās tisras tu bhāryārthe na-upayacchet tu buddhimān | jñātitvena-an.upeyās tāḥ patati hy upayann adhaḥ || 172 ||

amānuṣīṣū puruṣa udakyāyām ayoniṣu | retaḥ siktvā jale ca-eva kṛcchraṃ sāntapanaṃ caret || 173 ||

maithunaṃ tu samāsevya puṃsi yoṣiti vā dvijaḥ | go.yāne 'psu divā ca-eva sa.vāsāḥ snānam ācaret || 174 ||

caṇḍāla.antyastriyo gatvā bhuktvā ca pratigṛhya ca | pataty ajñānato vipro jñānāt sāmyaṃ tu gacchati || 175 ||

vipraduṣṭāṃ striyaṃ bhartā nirundhyād ekaveśmani | yat puṃsaḥ paradāreṣu tac ca-enāṃ cārayed vratam || 176 ||

sā cet punaḥ praduṣyet tu sadṛśena-upamantritā | kṛcchraṃ cāndrāyaṇaṃ ca-eva tad asyāḥ pāvanaṃ smṛtam || 177 ||

yat karoty ekarātreṇa vṛṣalīsevanād dvijaḥ | tad bhaikṣabhuj-japan nityaṃ tribhir varṣair vyapohati || 178 ||

eṣā pāpakṛtām uktā caturṇām api niṣkṛtiḥ | patitaiḥ samprayuktānām imāḥ śṛṇuta niṣkṛtīḥ || 179 ||

saṃvatsareṇa patati patitena saha-ācaran | yājana.adhyāpanād yaunāt-na tu yāna.āsana.aśanāt || 180 ||

yo yena patitena-eṣāṃ saṃsargaṃ yāti mānavaḥ | sa tasya-eva vrataṃ kuryāt tatsaṃsargaviśuddhaye || 181 ||

patitasya-udakaṃ kāryaṃ sapiṇḍair bāndhavair bahiḥ | nindite 'hani sāyāhne jñāti.ṛtvij.gurusannidhau || 182 ||

dāsī ghaṭam apāṃ pūrṇaṃ paryasyet pretavat padā | ahorātram upāsīrann aśaucaṃ bāndhavaiḥ saha || 183 ||

nivarteraṃś ca tasmāt tu sambhāṣaṇa.sahāsane | dāyādyasya pradānaṃ ca yātrā ca-eva hi laukikī || 184 ||

jyeṣṭhatā ca nivarteta jyeṣṭhāvāpyaṃ ca yad dhanam | jyeṣṭhāṃśaṃ prāpnuyāc ca-asya yavīyān guṇato 'dhikaḥ || 185 ||

prāyaścitte tu carite pūrṇakumbham apāṃ navam | tena-eva sārdhaṃ prāsyeyuḥ snātvā puṇye jalāśaye || 186 ||

sa tv apsu taṃ ghaṭaṃ prāsya praviśya bhavanaṃ svakam | sarvāṇi jñātikāryāṇi yathāpūrvaṃ samācaret || 187 ||

etad eva vidhiṃ kuryād yoṣitsu patitāsv api | vastra.anna.pānaṃ deyaṃ tu vaseyuś ca gṛhāntike || 188 ||

enasvibhir a.nirṇiktair na-arthaṃ kiṃ cit saha-ācaret | kṛtanirṇejanāṃś ca-eva na jugupseta karhi cit || 189 ||

bālaghnāṃś ca kṛtaghnāṃś ca viśuddhān api dharmataḥ | śaraṇāgatahantṝṃś ca strīhantṝṃś ca na saṃvaset || 190 ||

yeṣāṃ dvijānāṃ sāvitrī na-anūcyeta yathāvidhi | tāṃś cārayitvā trīn kṛcchrān yathāvidhi-upanāyayet || 191 ||

prāyaścittaṃ cikīrṣanti vikarmasthās tu ye dvijāḥ | brahmaṇā ca parityaktās teṣām apy etad ādiśet || 192 ||

yad garhitena-arjayanti karmaṇā brāhmaṇā dhanam | tasya-utsargeṇa śudhyanti japyena tapasā-eva ca || 193 ||

japitvā trīṇi sāvitryāḥ sahasrāṇi samāhitaḥ | māsaṃ goṣṭhe payaḥ pītvā mucyate 'satpratigrahāt || 194 ||

upavāsakṛśaṃ taṃ tu govrajāt punar āgatam | praṇataṃ prati pṛccheyuḥ sāmyaṃ saumya-icchasi-iti kim || 195 ||

satyam uktvā tu vipreṣu vikired yavasaṃ gavām | gobhiḥ pravartite tīrthe kuryus tasya parigraham || 196 ||

vrātyānāṃ yājanaṃ kṛtvā pareṣām antyakarma ca | abhicāram ahīnaṃ ca tribhiḥ kṛcchrair vyapohati || 197 ||

śaraṇāgataṃ parityajya vedaṃ viplāvya ca dvijaḥ | saṃvatsaraṃ yavāhāras tat pāpam apasedhati || 198 ||

śva.śṛgāla.kharair daṣṭo grāmyaiḥ kravyādbhir eva ca | nara.aśva.uṣṭra.varāhaiś ca prāṇāyāmena śudhyati || 199 ||

ṣaṣṭhānnakālatā māsaṃ saṃhitājapa eva vā | homāś ca sakalā nityam apāṅktyānāṃ viśodhanam || 200 ||

uṣṭrayānaṃ samāruhya kharayānaṃ tu kāmataḥ | snātvā tu vipro dig.vāsāḥ prāṇāyāmena śudhyati || 201 ||

vinā-adbhir apsu vā-apy ārtaḥ śārīraṃ sanniṣevya ca | sa.cailo bahir āplutya gām ālabhya viśudhyati || 202 ||

veda.uditānāṃ nityānāṃ karmaṇāṃ samatikrame | snātakavratalope ca prāyaścittam abhojanam || 203 ||

huṅkāraṃ brāhmaṇasya-uktvā tvamkāraṃ ca garīyasaḥ | snātvā-an.aśnann ahaḥ śeṣam abhivādya prasādayet || 204 ||

tāḍayitvā tṛṇena-api kaṇṭhe vā-ābadhya vāsasā | vivāde vā vinirjitya praṇipatya prasādayet || 205 ||

avagūrya tv abdaśataṃ sahasram abhihatya ca | jighāṃsayā brāhmaṇasya narakaṃ pratipadyate || 206 ||

śoṇitaṃ yāvataḥ pāṃsūn saṅgṛhṇāti mahītale | tāvanty abdasahasrāṇi tatkartā narake vaset || 207 ||

avagūrya caret kṛcchram atikṛcchraṃ nipātane | kṛcchra.atikṛcchrau kurvīta viprasya-utpādya śoṇitam || 208 ||

anuktaniṣkṛtīnāṃ tu pāpānām apanuttaye | śaktiṃ ca-avekṣya pāpaṃ ca prāyaścittaṃ prakalpayet || 209 ||

yair abhyupāyair enāṃsi mānavo vyapakarṣati | tān vo 'bhyupāyān vakṣyāmi deva.ṛṣi.pitṛsevitān || 210 ||

tryahaṃ prātas tryahaṃ sāyaṃ tryaham adyād ayācitam | tryahaṃ paraṃ ca na-aśnīyāt prājāpatyaṃ caran dvijaḥ || 211 ||

gomūtraṃ gomayaṃ kṣīraṃ dadhi sarpiḥ kuśa.udakam | ekarātra.upavāsaś ca kṛcchraṃ sāntapanaṃ smṛtam || 212 ||

ekaikaṃ grāsam aśnīyāt tryahāṇi trīṇi pūrvavat | tryahaṃ ca-upavased antyam atikṛcchraṃ caran dvijaḥ || 213 ||

taptakṛcchraṃ caran vipro jala.kṣīra.ghṛta.anilān | prati.tryahaṃ pibed uṣṇān sakṛtsnāyī samāhitaḥ || 214 ||

yata.ātmano 'pramattasya dvādaśāham abhojanam | parāko nāma kṛcchro 'yaṃ sarvapāpa.apanodanaḥ || 215 ||

ekaikaṃ hrāsayet piṇḍaṃ kṛṣṇe śukle ca vardhayet | upaspṛśaṃs triṣavaṇam etat-cāṇdrāyaṇaṃ smṛtam || 216 ||

etam eva vidhiṃ kṛtsnam ācared yavamadhyame | śuklapakṣādiniyataś caraṃś cāndrāyaṇaṃ vratam || 217 ||

aṣṭāv aṣṭau samaśnīyāt piṇḍān madhyandine sthite | niyata.ātmā haviṣyāśī yaticāndrāyaṇaṃ caran || 218 ||

caturaḥ prātar aśnīyāt piṇḍān vipraḥ samāhitaḥ | caturo 'stam ite sūrye śiśucāndrāyaṇaṃ smṛtam || 219 ||

yathā kathaṃ cit piṇḍānāṃ tisro 'śītīḥ samāhitaḥ | māsena-aśnan haviṣyasya candrasya-eti salokatām || 220 ||

etad rudrās tathā-ādityā vasavaś ca-ācaran vratam | sarvākuśalamokṣāya marutaś ca maharṣibhiḥ || 221 ||

mahāvyāhṛtibhir homaḥ kartavyaḥ svayam anvaham | ahiṃsā satyam akrodham ārjavaṃ ca samācaret || 222 ||

trir ahnas trir niśāyāṃ ca sa.vāsā jalam āviśet | strī.śūdra.patitāṃś ca-eva na-abhibhāṣeta karhi cit || 223 ||

sthāna.āsanābhyāṃ vihared aśakto 'dhaḥ śayīta vā | brahmacārī vratī ca syād guru.deva.dvija.arcakaḥ || 224 ||

sāvitrīṃ ca japen nityaṃ pavitrāṇi ca śaktitaḥ | sarveṣv eva vrateṣv evaṃ prāyaścittārtham ādṛtaḥ || 225 ||

etair dvijātayaḥ śodhyā vratair āviṣkṛta.enasaḥ | anāviṣkṛta.pāpāṃs tu mantrair homaiś ca śodhayet || 226 ||

khyāpanena.anutāpena tapasā-adhyayanena ca | pāpakṛt-mucyate pāpāt tathā dānena ca-āpadi || 227 ||

yathā yathā naro 'dharmaṃ svayaṃ kṛtvā-anubhāṣate | tathā tathā tvacā-iva-ahis tena-adharmeṇa mucyate || 228 ||

yathā yathā manas tasya duṣkṛtaṃ karma garhati | tathā tathā śarīraṃ tat tena-adharmeṇa mucyate || 229 ||

kṛtvā pāpaṃ hi santapya tasmāt pāpāt pramucyate | na-evaṃ kuryāṃ punar iti nivṛttyā pūyate tu saḥ || 230 ||

evaṃ sañcintya manasā pretya karmaphala.udayam | mano.vāc.mūrtibhir nityaṃ śubhaṃ karma samācaret || 231 ||

ajñānād yadi vā jñānāt kṛtvā karma vigarhitam | tasmād vimuktim anvicchan dvitīyaṃ na samācaret || 232 ||

yasmin karmaṇy asya kṛte manasaḥ syād alāghavam | tasmiṃs tāvat tapaḥ kuryād yāvat tuṣṭikaraṃ bhavet || 233 ||

tapomūlam idaṃ sarvaṃ daiva.mānuṣakaṃ sukham | tapomadhyaṃ budhaiḥ proktaṃ tapo.'ntaṃ vedadarśibhiḥ || 234 ||

brāhmaṇasya tapo jñānaṃ tapaḥ kṣatrasya rakṣaṇam | vaiśyasya tu tapo vārtā tapaḥ śūdrasya sevanam || 235 ||

ṛṣayaḥ saṃyata.ātmānaḥ phala.mūla.anila.aśanāḥ | tapasā-eva prapaśyanti trailokyaṃ sa.carācaram || 236 ||

auṣadhāny agado vidyā daivī ca vividhā sthitiḥ | tapasā-eva prasidhyanti tapas teṣāṃ hi sādhanam || 237 ||

yad dustaraṃ yad durāpaṃ yad durgaṃ yac ca duṣkaram | sarvaṃ tu tapasā sādhyaṃ tapo hi duratikramam || 238 ||

mahāpātakinaś ca-eva śeṣāś ca-akāryakāriṇaḥ | tapasā-eva sutaptena mucyante kilbiṣāt tataḥ || 239 ||

kītāś ca-ahi.pataṅgāś ca paśavaś ca vayāṃsi ca | sthāvarāṇi ca bhūtāni divaṃ yānti tapobalāt || 240 ||

yat kiṃ cid enaḥ kurvanti mano.vāc.mūrtibhir janāḥ | tat sarvaṃ nirdahanty āśu tapasā-eva tapo.dhanāḥ || 241 ||

tapasā-eva viśuddhasya brāhmaṇasya diva.okasaḥ | ijyāś ca pratigṛhṇanti kāmān saṃvardhayanti ca || 242 ||

prajāpatir idaṃ śāstraṃ tapasā-eva-asṛjat prabhuḥ | tathā-eva vedān ṛṣayas tapasā pratipedire || 243 ||

ity etat tapaso devā mahābhāgyaṃ pracakṣate | sarvasya-asya prapaśyantas tapasaḥ puṇyam uttamam || 244 ||

vedābhyāso 'nvahaṃ śaktyā mahāyajñakriyā kṣamā | nāśayanty āśu pāpāni mahāpātakajāny api || 245 ||

yathā-edhas tejasā vahniḥ prāptaṃ nirdahati kṣaṇāt | tathā jñānāgninā pāpaṃ sarvaṃ dahati vedavit || 246 ||

ity etad enasām uktaṃ prāyaścittaṃ yathāvidhi | ata ūrdhvaṃ rahasya-anāṃ prāyaścittaṃ nibodhata || 247 ||

sa.vyāhṛti.praṇavakāḥ prāṇāyāmās tu ṣoḍaśa | api bhrūṇahanaṃ māsāt punanty ahar ahaḥ kṛtāḥ || 248 ||

kautsaṃ japtvā-apa ity etad vasiṣṭhaṃ ca prati-ity ṛcam | māhitraṃ śuddhavatyaś ca surāpo 'pi viśudhyati || 249 ||

sakṛt-japtvā-āsyavāmīyaṃ śivasaṅkalpam eva ca | apahṛtya suvarṇaṃ tu kṣaṇād bhavati nir.malaḥ || 250 ||

haviṣpāntīyam abhyasya na tamaṃ ha iti-iti ca | japitvā pauruṣaṃ sūktaṃ mucyate gurutalpagaḥ || 251 ||

enasāṃ sthūla.sūkṣmāṇāṃ cikīrṣann apanodanam | ava-ity ṛcaṃ japed abdaṃ yat kiṃ ca-idam iti-iti vā || 252 ||

pratigṛhya-apratigrāhyaṃ bhuktvā ca-annaṃ vigarhitam | japaṃs taratsamandīyaṃ pūyate mānavas tryahāt || 253 ||

somāraudram tu bahv.enāḥ māsam abhyasya śudhyati | sravantyām ācaran snānam aryamṇām iti ca tṛcam || 254 ||

abdārdham indram ity etad enasvī saptakaṃ japet | apraśastaṃ tu kṛtvā-apsu māsam āsīta bhaikṣabhuk || 255 ||

mantraiḥ śākalahomīyair abdaṃ hutvā ghṛtaṃ dvijaḥ | sugurv apy apahanty eno japtvā vā nama ity ṛcam || 256 ||

mahāpātakasaṃyukto 'nugacched gāḥ samāhitaḥ | abhyasya-abdaṃ pāvamānīr bhaikṣa.āhāro viśudhyati || 257 ||

araṇye vā trir abhyasya prayato vedasaṃhitām | mucyate pātakaiḥ sarvaiḥ parākaiḥ śodhitas tribhiḥ || 258 ||

tryahaṃ tu-upavased yuktas trir ahno 'bhyupayann apaḥ | mucyate pātakaiḥ sarvais trir japitvā-aghamarṣaṇam || 259 ||

yathā-aśvamedhaḥ kraturāj-sarvapāpāpa.nodanaḥ | tathā-aghamarṣaṇaṃ sūktaṃ sarvapāpāpa.nodanam || 260 ||

hatvā lokān api-imāṃs trīn aśnann api yatas tataḥ | ṛgvedaṃ dhārayan vipro na-enaḥ prāpnoti kiṃ cana || 261 ||

ṛksaṃhitāṃ trir abhyasya yajuṣāṃ vā samāhitaḥ | sāmnāṃ vā sa.rahasyānāṃ sarvapāpaiḥ pramucyate || 262 ||

yathā mahāhradaṃ prāpya kṣiptaṃ loṣṭaṃ vinaśyati | tathā duścaritaṃ sarvaṃ vede trivṛti majjati || 263 ||

ṛco yajūṃṣi ca-anyāni sāmāni vividhāni ca | eṣa jñeyas trivṛdvedo yo veda-enaṃ sa vedavit || 264 ||

ādyaṃ yat tryakṣaraṃ brahma trayī yasmin pratiṣṭhitā | sa guhyo 'nyas trivṛdvedo yas taṃ veda sa vedavit || 265 ||