Book 7 · Adhyay 7

vijigīṣur dvitīyāṃ prakṛtim evam upagṛhṇīyāt | 1 |

sāmantaṃ sāmantena sambhūya yāyāt, yadi vā manyeta "pārṣṇiṃ me na grahīṣyati, pārṣṇi.grāhaṃ vārayiṣyati, yātavyaṃ na-abhisariṣyati, bala.dvaiguṇyaṃ me bhaviṣyati, vīvadha.āsārau me pravartayiṣyati, parasya vārayiṣyati, bahv.ābādhe me pathi kaṇṭakān mardayiṣyati, durga.aṭavy.apasāreṣu daṇḍena cariṣyati, yātavyam aviṣahye doṣe sandhau vā sthāpayiṣyati, labdha.lābha.aṃśo vā śatrūn anyān me viśvāsayiṣyati" iti | 2 |

dvaidhī.bhūto vā kośena daṇḍaṃ daṇḍena kośaṃ sāmantānām anyatamāl lipseta | 3 |

teṣāṃ jyāyaso 'dhikena-aṃśena samāt samena hīnādd hīnena-iti sama.sandhiḥ | 4 |

viparyaye viṣama.sandhiḥ | 5 |

tayor viśeṣa.lābhād atisandhiḥ | 6 |

vyasaninam apāya.sthāne saktam anarthinaṃ vā jyāyāṃsaṃ hīno bala.samena lābhena paṇeta | 7 |

paṇitas tasya-apakāra.samartho vikrameta, anyathā sandadhyāt | 8 |

evaṃ.bhūto vā hīna.śakti.pratāpa.pūraṇa.arthaṃ sambhāvya.artha.abhisārī mūla.pārṣṇi.trāṇa.arthaṃ vā jyāyāṃsaṃ hīno bala.samād viśiṣṭena lābhena paṇeta | 9 |

paṇitaḥ kalyāṇa.buddhim anugṛhṇīyāt, anyathā vikrameta | 10 |

jāta.vyasana.prakṛti.randhram upasthita.anarthaṃ vā jyāyāṃsaṃ hīno durga.mitra.pratiṣṭabdho vā hrasvam adhvānaṃ yātu.kāmaḥ śatrum ayuddham eka.anta.siddhiṃ vā lābham ādātu.kāmo bala.samādd hīnena lābhena paṇeta | 11 |

paṇitas tasya-apakāra.samartho vikrameta, anyathā sandadhyāt | 12 |

arandhra.vyasano vā jyāyān dur.ārabdha.karmāṇaṃ bhūyaḥ kṣaya.vyayābhyāṃ yoktu.kāmo dūṣya.daṇḍaṃ pravāsayitu.kāmo dūṣya.daṇḍam āvāhayitu.kāmo vā pīḍanīyam ucchedanīyaṃ vā hīnena vyathayitu.kāmaḥ sandhi.pradhāno vā kalyāṇa.buddhir hīnaṃ lābhaṃ pratigṛhṇīyāt | 13 |

kalyāṇa.buddhinā sambhūya-arthaṃ lipseta, anyathā vikrameta | 14 |

evaṃ samaḥ samam atisandadhyād anugṛhṇīyād vā | 15 |

para.anīkasya pratyanīkaṃ mitra.aṭavīnāṃ vā, śatror vibhūmīnāṃ deśikaṃ mūla.pārṣṇi.trāṇa.arthaṃ vā samo bala.samena lābhena paṇeta | 16 |

paṇitaḥ kalyāṇa.buddhim anugṛhṇīyāt, anyathā vikrameta | 17 |

jāta.vyasana.prakṛti.randhram aneka.viruddham anyato labhamāno vā samo bala.samādd hīnena lābhena paṇeta | 18 |

paṇitas tasya-apakāra.samartho vikrameta, anyathā sandadhyāt | 19 |

evaṃ.bhūto vā samaḥ sāmanta.āyatta.kāryaḥ kartavya.balo vā bala.samād viśiṣṭena lābhena paṇeta | 20 |

paṇitaḥ kalyāṇa.buddhim anugṛhṇīyāt anyathā vikrameta | 21 |

jāta.vyasana.prakṛti.randhram abhihantu.kāmaḥ sv.ārabdham eka.anta.siddhiṃ vā-asya karma.upahantu.kāmo mūle yātrāyāṃ vā prahartu.kāmo yātavyād.bhūyo labhamāno vā jyāyāṃsaṃ hīnaṃ samaṃ vā bhūyo yāceta | 22 |

bhūyo vā yācitaḥ sva.bala.rakṣā.arthaṃ durdharṣam anya.durgam āsāram aṭavīṃ vā para.daṇḍena marditu.kāmaḥ prakṛṣṭe 'dhvani kāle vā para.daṇḍaṃ kṣaya.vyayābhyāṃ yoktu.kāmaḥ para.daṇḍena vā vivṛddhas tam eva-ucchettu.kāmaḥ para.daṇḍam ādātu.kāmo vā bhūyo dadyāt | 23 |

jyāyān vā hīnaṃ yātavya.apadeśena haste kartu.kāmaḥ param ucchidya vā tam eva-ucchettu.kāmaḥ, tyāgaṃ vā kṛtvā pratyādātu.kāmo bala.samād viśiṣṭena lābhena paṇeta | 24 |

paṇita- s tasya-apakāra.samartho vikrameta, anyathā sandadhyāt | 25 |

yātavya.saṃhito vā tiṣṭhet, dūṣya.amitra.aṭavī.daṇḍaṃ vā-asmai dadyāt | 26 |

jāta.vyasana.prakṛti.randhro vā jyāyān hīnaṃ bala.samena lābhena paṇeta | 27 |

paṇitas tasya-apakāra.samartho vikrameta, anyathā sandadhyāt | 28 |

evaṃ.bhūtaṃ hīnaṃ jyāyān bala.samādd hīnena lābhena paṇeta | 29 |

paṇitas tasya-apakāra.samartho vikrameta, anyathā sandadhyāt | 30 |