Book 7 · Adhyay 14

sāmavāyikair evam abhiyukto vijigīṣur yas teṣāṃ pradhānas taṃ brūyāt "tvayā me sandhiḥ, idaṃ hiraṇyam, ahaṃ ca mitram, dvi.guṇā te vṛddhiḥ, na-arhasy ātma.kṣayeṇa mitra.mukhān amitrān vardhayitum, ete hi vṛddhās tvām eva paribhaviṣyanti" iti | 1 |

bhedaṃ vā brūyāt "anapakāro yathā-aham etaiḥ sambhūya-abhiyuktas tathā tvām apy ete saṃhita.balāḥ svasthā vyasane vā-abhiyokṣyante, balaṃ hi cittaṃ vikaroti, tad eṣāṃ vighātaya" iti | 2 |

bhinneṣu pradhānam upagṛhya hīneṣu vikramayet, hīnān anugrāhya vā pradhāne, yathā vā śreyo 'bhimanyeta tathā | 3 |

vairaṃ vā parair grāhayitvā visaṃvādayet | 4 |

phala.bhūyastvena vā pradhānam upajāpya sandhiṃ kārayet | 5 |

atha-ubhaya.vetanāḥ phala.bhūyastvaṃ darśayantaḥ sāmavāyikān "atisaṃhitāḥ stha" ity udddūṣayeyuḥ | 6 |

duṣṭeṣu sandhiṃ dūṣayet | 7 |

atha-ubhaya.vetanā bhūyo bhedam eṣāṃ kuryuḥ "evaṃ tad yad asmābhir darśitam" iti | 8 |

bhinneṣv anyatama.upagraheṇa ceṣṭeta | 9 |

pradhāna.abhāve sāmavāyikānām utsāhayitāraṃ sthira.karmāṇam anurakta.prakṛktiṃ lobhād bhayād vā saṅghātam upāgataṃ vijigīṣor bhītaṃ rājya.pratisambaddhaṃ mitraṃ cala.amitraṃ vā pūrvān uttara.abhāve sādhayet - utsāhayitāram ātma.nisargeṇa, sthira.karmāṇaṃ sāntva.praṇipātena, anurakta.prakṛtiṃ kanyā.dāna.yāpanābhyām, lubdham aṃśa.dvaiguṇyena, bhītam ebhyaḥ kośa.daṇḍa.anugraheṇa, svato bhītaṃ viśvāsya pratibhū.pradānena, rājya.pratisambaddham ekī.bhāva.upagamanena, mitram ubhayataḥ priya.hitābhyām, upakāra.tyāgena vā, cala.amitram avadhṛtam anapakāra.upakārābhyām | 10 |

yo vā yathā-ayogaṃ bhajeta taṃ tathā sādhayet, sāma.dāna.bheda.daṇḍair vā yathā-āpatsu vyākhyāsyāmaḥ | 11 |

vyasana.upaghāta.tvarito vā kośa.daṇḍābhyāṃ deśe kāle kārye vā-avadhṛtaṃ sandhim upeyāt | 12 |

kṛta.sandhir hīnam ātmānaṃ pratikurvīta | 13 |

pakṣe hīno bandhu.mitra.pakṣaṃ kurvīta, durgam aviṣahyaṃ vā | 14 |

durga.mitra.pratiṣṭabdho hi sveṣāṃ pareṣāṃ ca pūjyo bhavati | 15 |

mantra.śakti.hīnaḥ prājña.puruṣa.upacayaṃ vidyā.vṛddha.samyogaṃ vā kurvīta | 16 |

tathā hi sadyaḥ śreyaḥ prāpnoti | 17 |

prabhāva.hīnaḥ prakṛti.yoga.kṣema.siddhau yateta | 18 |

jana.padaḥ sarva.karmaṇāṃ yoniḥ, tataḥ prabhāvaḥ | 19 |

tasya sthānam ātmanaś ca-āpadi durgam | 20 |

setu.bandhaḥ sasyānāṃ yoniḥ | 21 |

nitya.anuṣakto hi varṣa.guṇa.lābhaḥ setu.vāpeṣu | 22 |

vaṇik.pathaḥ para.atisandhānasya yoniḥ | 23 |

vaṇik.pathena hi daṇḍa.gūḍha.puruṣa.atinayanaṃ śastra.āvaraṇa.yāna.vāhana.krayaś ca kriyate, praveśo nirṇayanaṃ ca | 24 |

khaniḥ saṅgrāma.upakaraṇānāṃ yoniḥ, dravya.vanaṃ durga.karmaṇāṃ yāna.rathayoś ca, hasti.vanaṃ hastinām, gava.aśva.khara.uṣṭrāṇāṃ ca vrajaḥ | 25 |

teṣām alābhe bandhu.mitra.kulebhyaḥ samārjanam | 26 |

utsāha.hīnaḥ śreṇī.pravīra.puruṣāṇāṃ cora.gaṇa.āṭavika.mleccha.jātīnāṃ para.apakāriṇāṃ gūḍha.puruṣāṇāṃ ca yathā.lābbham upacayaṃ kurvīta | 27 |

para.miśra.apratīkāram ābalīyasaṃ vā pareṣu prayuñjīta | 28 |