Book 4 · Adhyay 8

muṣita.sannidhau bāhyānām abhyantarāṇāṃ ca sākṣiṇām abhiśastasya deśa.jāti.gotra.nāma.karma.sāra.sahāya.nivāsān anuyuñjīta | 1 |

tāṃś ca-apadeśaiḥ pratisamānayet | 2 |

tataḥ pūrvasya-ahnaḥ pracāraṃ rātrau nivāsaṃ cā grahaṇād ity anuyuñjīta | 3 |

tasya-apasāra.pratisandhāne śuddhaḥ syāt, anyathā karma.prāptaḥ | 4 |

tri.rātrād ūrdhvam agrāhyaḥ śaṅkitakaḥ pṛcchā.abhāvād anyatra-upakaraṇa.darśanāt | 5 |

acoraṃ cora ity abhivyāharataś cora.samo daṇḍaḥ, coraṃ pracchādayataś ca | 6 |

coreṇa-abhiśasto vaira.dveṣābhyām apadiṣṭakaḥ śuddhaḥ syāt | 7 |

śuddhaṃ parivāsayataḥ pūrvaḥ sāhasa.daṇḍaḥ | 8 |

śaṅkā.niṣpannam upakaraṇa.mantri.sahāya.rūpa.vaiyāvṛtya.karān niṣpādayet | 9 |

karmaṇaś ca pradeśa.dravya.ādāna.aṃśa.vibhāgaiḥ pratisamānayet | 10 |

eteṣāṃ kāraṇānām anabhisandhāne vipralapantam acoraṃ vidyāt | 11 |

dṛśyate hy acoro 'pi cora.mārge yadṛcchayā sannipāte cora.veṣa.śastra.bhāṇḍa.sāmānyena gṛhyamāṇaś cora.bhāṇḍasya-upavāsena vā, yathā-aṇi.māṇḍavyaḥ karma.kleśa.bhayād acoraḥ "coro 'smi" iti bruvāṇaḥ | 12 |

tasmāt samāpta.karaṇaṃ niyamayet | 13 |

manda.aparādhaṃ bālaṃ vṛddhaṃ vyādhitaṃ mattam unmattaṃ kṣut.pipāsā.adhva.klāntam atyāśitam āmaka.aśitaṃ durbalaṃ vā na karma kārayet | 14 |

tulya śīla.puṃścalī.prāpāvika.kathā.avakāśa.bhojana.dātṛbhir apasarpayet | 15 |

evam atisandadhyāt, yathā vā nikṣepa.apahāre vyākhyātam | 16 |

āpta.doṣaṃ karma kārayet, na tv eva striyaṃ garbhiṇīṃ sūtikāṃ vā māsa.avara.prajātām | 17 |

striyās tv ardha.karma, vākya.anuyogo vā | 18 |

brāhmaṇasya sattri.parigrahaḥ śrutavatas tapasvinaś ca | 19 |

tasya-atikrama uttamo daṇḍaḥ kartuḥ kārayituś ca, karmaṇā vyāpādanena ca | 20 |

vyāvahārikaṃ karma.catuṣkaṃ - ṣaḍ daṇḍāḥ, sapta kaśāḥ, dvāv upari.nibandhau, udaka.nālikā ca | 21 |

paraṃ pāpa.karmaṇāṃ nava vetra.latāḥ, dvādaśa kaśāḥ, dvāv ūru.veṣṭau, viṃśatir nakta.māla.latāḥ, dvātriṃśat.talāḥ, dvau vṛścika.bandhau, ullambane ca dve, sūcī hastasya, yavāgū.pītasya eka.parva.dahanam aṅgulyāḥ, sneha.pītasya pratāpanam ekam ahaḥ, śiśira.rātrau balbaja.agra.śayyā ca | 22 |

ity aṣṭādaśakaṃ karma | 23 |

tasya.upakaraṇaṃ pramāṇaṃ praharaṇaṃ pradharaṇam avadhāraṇaṃ ca khara.paṭṭād āgamayet | 24 |

divasa.antaram eka.ekaṃ ca karma kārayet | 25 |

pūrva.kṛta.apadānaṃ pratijñāya-apaharantam eka.deśa.dṛṣṭa.dravyaṃ karmaṇā rūpeṇa vā gṛhītaṃ rāja.kośam avastṛṇantaṃ karma.vadhyaṃ vā rāja.vacanāt samastaṃ vyastam abhyastaṃ vā karma kārayet | 26 |

sarva.aparādheṣv apīḍanīyo brāhmaṇaḥ | 27 |

tasya-abhiśasta.aṅko lalāṭe syād vyavahāra.patanāya, steyo śvā, manuṣya.vadhe kabandhaḥ, guru.talpe bhagam, surā.pāne madya.dhvajaḥ | 28 |