Book 4 · Adhyay 5

sattri.prayogād ūrdhvaṃ siddha.vyañjanā māṇavān māṇava.vidyābhiḥ pralobhayeyuḥ, prasvāpana.antar.dhāna.dvāra.apoha.mantreṇa pratirodhakān, saṃvadana.mantreṇa pāratalpikān | 1 |

teṣāṃ kṛta.utsāhānāṃ mahāntaṃ saṅgham ādāya rātrāv anyaṃ grāmam uddiśya-anyaṃ grāmaṃ kṛtaka.strī.puruṣaṃ gatvā brūyuḥ - "iha-eva vidyā.prabhāvo dṛśyatāṃ, kṛcchraḥ para.grāmo gantum" iti | 2 |

tato dvāra.apoha.mantreṇa dvārāṇy apohya "praviśyatām" iti brūyuḥ | 3 |

antar.dhāna.mantreṇa jāgratām ārakṣiṇāṃ madhyena māṇavān atikrāmayeyuḥ | 4 |

prasvāpana.mantreṇa prasvāpayitvā rakṣiṇaḥ śayābhir māṇavaiḥ sañcārayeyuḥ | 5 |

saṃvadana.mantreṇa bhāryā.vyañjanāḥ pareṣāṃ māṇavaiḥ sammodayeyuḥ | 6 |

upalabdha.vidyā.prabhāvāṇāṃ puraścaraṇā.ādy ādiśeyur abhijñāna.artham | 7 |

kṛta.lakṣaṇa.dravyeṣu vā veśmasu karma kārayeyuḥ | 8 |

anupraviṣṭā vā-ekatra grāhayeyuḥ | 9 |

kṛta.lakṣaṇa.dravya.kraya.vikraya.ādhāneṣu yoga.surā.mattān vā grāhayeyuḥ | 10 |

gṛhītān pūrva.apadāna.sahāyān anuyuñjīta | 11 |

purāṇa.cora.vyañjanā vā corān anupraviṣṭās tathā-eva karma kārayeyur grāhayeyuś ca | 12 |

gṛhītān samāhartā paura.jānapadānāṃ darśayet - "cora.grahaṇīṃ vidyām adhīte rājā, tasya-upadeśād ime corā gṛhītāḥ, bhūyaś ca grahīṣyāmi, vārayitavyo vaḥ sva.janaḥ pāpa.ācārah-" iti | 13 |

yaṃ ca-atra-apasarpa.upadeśena śamyā.pratoda.ādīnām apahartāraṃ jānīyāt tam eṣāṃ pratyādiśet "eṣa rājñaḥ prabhāvaḥ" iti | 14 |

purāṇa.cora.go.pālaka.vyādha.śva.gaṇinaś ca vana.cora.āṭavikān anupraviṣṭāḥ prabhūta.kūṭa.hiraṇya.kupya.bhāṇḍeṣu sārtha.vraja.grāmeṣv enān abhiyojayeyuḥ | 15 |

abhiyoge gūḍha.balair ghātayeyuḥ, madana.rasa.yuktena vā pathy.adanena | 16 |

gṛhīta.loptra.bhārān āyata.gata.pariśrāntān prasvapataḥ prahavaṇeṣu yoga.surā.mattān vā grāhayeyuḥ | 17 |