Book 4 · Adhyay 3

daivāny aṣṭau mahā.bhayāni - agnir udakaṃ vyādhir durbhikṣaṃ mūṣikā vyālāḥ sarpā rakṣāṃsi-iti | 1 |

tebhyo jana.padaṃ rakṣet | 2 |

grīṣme bahir.adhiśrayaṇaṃ grāmāḥ kuryuḥ, daśa.mūlī.saṅgraheṇa-adhiṣṭhitā vā | 3 |

nāgarika.praṇidhāv agni.pratiṣedho vyākhyātaḥ, niśānta.praṇidhau rāja.parigrahe ca | 4 |

bali.homa.svasti.vācanaiḥ parvasu ca-agni.pūjāḥ kārayet | 5 |

varṣā.rātram ānūpa.grāmāḥ pūra.velām utsṛjya vaseyuḥ | 6 |

kāṣṭha.veṇu.nāvaś ca-upagṛhṇīyuḥ | 7 |

uhyamānam alābu.dṛti.plava.gaṇḍikā.veṇikābhis tārayeyuḥ | 8 |

anabhisaratāṃ dvādaśa.paṇo daṇḍaḥ, anyatra plava.hīnebhyaḥ | 9 |

parvasu ca nadī.pūjāḥ kārayet | 10 |

māyā.yogavido vedavido vā varṣam abhicareyuḥ | 11 |

varṣa.avagrahe śacī.nātha.gaṅgā.parvata.mahā.kaccha.pūjāḥ kārayet | 12 |

vyādhi.bhayam aupaniṣadikaiḥ pratīkāraiḥ pratikuryuḥ, auṣadhaiś cikitsakāḥ śānti.prāyaścittair vā siddha.tāpasāḥ | 13 |

tena marako vyākhyātaḥ | 14 |

tīrtha.abhiṣecanaṃ mahā.kaccha.vardhanaṃ gavāṃ śmaśāna.avadohanaṃ kabandha.dahanaṃ deva.rātriṃ ca kārayet | 15 |

paśu.vyādhi.marake sthāna.artha.nīrājanaṃ sva.daivata.pūjanaṃ ca kārayet | 16 |

durbhikṣe rājā bīja.bhakta.upagrahaṃ kṛtvā-anugrahaṃ kuryāt, durga.setu.karma vā bhakta.anugraheṇa, bhakta.saṃvibhāgaṃ vā, deśa.nikṣepaṃ vā | 17 |

mitrāṇi vā vyapāśrayeta, karśanaṃ vamanaṃ vā kuryāt | 18 |

niṣpanna.sasyam anya.viṣayaṃ vā sajana.pado yāyāt, samudra.saras.taṭākāni vā saṃśrayeta | 19 |

dhānya.śāka.mūla.phala.āvāpān vā setuṣu kurvīta, mṛga.paśu.pakṣi.vyāla.matsya.ārambhān vā | 20 |

mūṣika.bhaye mārjāra.nakula.utsargaḥ | 21 |

teṣāṃ grahaṇa.hiṃsāyāṃ dvādaśa.paṇo daṇḍaḥ, śunām anigrahe ca-anyatra-araṇya.carebhyaḥ | 22 |

snuhi.kṣīra.liptāni dhānyāni visṛjed, upaniṣad.yoga.yuktāni vā | 23 |

mūṣika.karaṃ vā prayuñjīta | 24 |

śāntiṃ vā siddha.tāpasāḥ kuryuḥ | 25 |

parvasu ca mūṣika.pūjāḥ kārayet | 26 |

tena śalabha.pakṣi.krimi.bhaya.pratīkārā vyākhyātāḥ | 27 |

vyāla.bhaye madana.rasa.yuktāni paśu.śavāni prasṛjet, madana.kodrava.pūrṇāny audaryāṇi vā | 28 |

lubdhakāḥ śva.gaṇino vā kūṭa.pañjara.avapātaiś careyuḥ | 29 |

āvaraṇinaḥ śastra.pāṇayo vyālān abhihanyuḥ | 30 |

anabhisartur dvādaśa.paṇo daṇḍaḥ | 31 |

sa eva lābho vyāla.ghātinaḥ | 32 |

parvasu ca parvata.pūjāḥ kārayet | 33 |

tena mṛga.paśu.pakṣi.saṅgha.grāha.pratīkārā vyākhyātāḥ | 34 |

sarpa.bhaye mantrair oṣadhibhiś ca jāṅgulīvidaś careyuḥ | 35 |

sambhūya vā-api sarpān hanyuḥ | 36 |

atharva.vedavido vā-abhicareyuḥ | 37 |

parvasu ca nāga.pūjāḥ kārayet | 38 |

tena-udaka.prāṇi.bhaya.pratīkārā vyākhyātāḥ | 39 |

rakṣo.bhaye rakṣo.ghnāny atharva.vedavido māyā.yogavido vā karmāṇi kuryuḥ | 40 |

parvasu ca vitardic.chatra.ullopikā.hasta.patākāc.chāga.upahāraiś caitya.pūjāḥ kārayet | 41 |

"caruṃ vaś carāmaḥ" ity evaṃ sarva.bhayeṣv aho.rātraṃ careyuḥ | 42 |

sarvatra ca-upahatān pitā-iva-anugṛhṇīyāt | 43 |