Book 4 · Adhyay 2

saṃsthā.adhyakṣaḥ paṇya.saṃsthāyāṃ purāṇa.bhāṇḍānāṃ sva.karaṇa.viśuddhānām ādhānaṃ vikrayaṃ vā sthāpayet | 1 |

tulā.māna.bhāṇḍāni ca-avekṣeta pautava.apacārāt | 2 |

parimāṇī.droṇayor ardha.pala.hīna.atiriktam adoṣaḥ | 3 |

pala.hīna.atirikte dvādaśa.paṇo daṇḍaḥ | 4 |

tena pala.uttarā daṇḍa.vṛddhir vyākhyātā | 5 |

tulāyāḥ karṣa.hīna.atiriktam adoṣaḥ | 6 |

dvi.karṣa.hīna.atirikte ṣaṭ.paṇo daṇḍaḥ | 7 |

tena karṣa.uttarā daṇḍa.vṛddhir vyākhyātā | 8 |

āḍhakasya-ardha.karṣa.hīna.atiriktam adoṣaḥ | 9 |

karṣa.hīna.atirikte tri.paṇo daṇḍaḥ | 10 |

tena karṣa.uttarā daṇḍa.vṛddhir vyākhyātā | 11 |

tulā.māna.viśeṣāṇām ato 'nyeṣām anumānaṃ kuryāt | 12 |

tulā.mānābhyām atiriktābhyāṃ krītvā hīnābhyāṃ vikrīṇānasya ta eva dvi.guṇā daṇḍāḥ | 13 |

gaṇya.paṇyeṣv aṣṭa.bhāgaṃ paṇya.mūlyeṣv apaharataḥ ṣaṇ.ṇavatir daṇḍaḥ | 14 |

kāṣṭha.loha.maṇi.mayaṃ rajju.carma.mṛṇ.mayaṃ sūtra.valka.roma.mayaṃ vā jātyam ity ajātyaṃ vikraya.ādhānaṃ nayato mūlya.aṣṭa.guṇo daṇḍaḥ | 15 |

sāra.bhāṇḍam ity asāra.bhāṇḍaṃ taj.jātam ity ataj.jātaṃ rādhā.yuktam ity upadhiyuktaṃ samudga.parivartimaṃ vā vikraya.ādhānaṃ nayato hīna.mūlyaṃ catuṣpañcāśat.paṇo daṇḍaḥ, paṇa.mūlyaṃ dvi.guṇo, dvi.paṇa.mūlyaṃ dvi.śataḥ | 16 |

tena-argha.vṛddhau daṇḍa.vṛddhir vyākhyātā | 17 |

kāru.śilpināṃ karma.guṇa.apakarṣam ājīvaṃ vikraya.kraya.upaghātaṃ vā sambhūya samutthāpayatāṃ sahasraṃ daṇḍaḥ | 18 |

vaidehakānāṃ vā sambhūya paṇyam avarundhatām anargheṇa vikrīṇatāṃ vā sahasraṃ daṇḍaḥ | 19 |

tulā.māna.antaram argha.varṇa.antaraṃ vā - dharakasya māyakasya vā paṇa.mūlyād aṣṭa.bhāgaṃ hasta.doṣeṇa-ācarato dvi.śato daṇḍaḥ | 20 |

tena dvi.śata.uttarā daṇḍa.vṛddhir vyākhyātā | 21 |

dhānya.sneha.kṣāra.lavaṇa.gandha.bhaiṣajya.dravyāṇāṃ sama.varṇa.upadhāne dvādaśa.paṇo daṇḍaḥ | 22 |

yan.niṣṛṣṭam upajīveyus tad eṣāṃ divasa.sañjātaṃ saṅkhyāya vaṇik sthāpayet | 23 |

kretṛ.vikretror antara.patitam ādāyād anyad bhavati | 24 |

tena dhānya.paṇya.nicayāṃś ca-anujñātāḥ kuryuḥ | 25 |

anyathā.nicitam eṣāṃ paṇya.adhyakṣo gṛhṇīyāt | 26 |

tena dhānya.paṇya.vikraye vyavahareta-anugraheṇa prajānām | 27 |

anujñāta.krayād upari ca-eṣāṃ sva.deśīyānāṃ paṇyānāṃ pañcakaṃ śatam ājīvaṃ sthāpayet, para.deśīyānāṃ daśakam | 28 |

tataḥ param arghaṃ vardhayatāṃ kraye vikraye vā bhāvayatāṃ paṇa.śate pañca.paṇād dvi.śato daṇḍaḥ | 29 |

tena-argha.vṛddhau daṇḍa.vṛddhir vyākhyātā | 30 |

sambhūya.kraye ca-eṣām avikrīte na-anyaṃ sambhūya.krayaṃ dadyāt | 31 |

paṇya.upaghāte ca-eṣām anugrahaṃ kuryāt | 32 |

paṇya.bāhulyāt paṇya.adhyakṣaḥ sarva.paṇyāny eka.mukhāni vikrīṇīta | 33 |

teṣv avikrīteṣu na-anye vikrīṇīran | 34 |

tāni divasa.vetanena vikrīṇīrann anugraheṇa prajānām | 35 | deśa.kāla.antaritānāṃ tu paṇyānāṃ -