Book 4 · Adhyay 1

pradeṣṭāras trayas trayo 'mātyāḥ kaṇṭaka.śodhanaṃ kuryuḥ | 1 |

arthya.pratīkārāḥ kāru.śāsitāraḥ sannikṣeptāraḥ sva.vitta.kāravaḥ śreṇī.pramāṇā nikṣepaṃ gṛhṇīyuḥ | 2 |

vipattau śreṇī nikṣepaṃ bhajeta | 3 |

nirdiṣṭa.deśa.kāla.kāryaṃ ca karma kuryuḥ, anirdiṣṭa.deśa.kālaṃ kārya.apadeśam | 4 |

kāla.atipātane pāda.hīnaṃ vetanaṃ tad.dvi.guṇaś ca daṇḍaḥ | 5 |

anyatra bhreṣa.upanipātābhyāṃ naṣṭaṃ vinaṣṭaṃ vā-abhyāvaheyuḥ | 6 |

kāryasya-anyathā.karaṇe vetana.nāśas tad.dvi.guṇaś ca daṇḍaḥ | 7 |

tantu.vāyā daśa.ekādaśikaṃ sūtraṃ vardhayeyuḥ | 8 |

vṛddhic.chede cheda.dvi.guṇo daṇḍaḥ | 9 |

sūtra.mūlyaṃ vāna.vetanaṃ, kṣauma.kauśeyānām adhyardha.guṇaṃ, pattra.ūrṇā.kambala.dukūlānāṃ dvi.guṇam | 10 |

māna.hīne hīna.avahīnaṃ vetanaṃ tad.dvi.guṇaś ca daṇḍaḥ, tulā.hīne hīna.catur.guṇo daṇḍaḥ, sūtra.parivartane mūlya.dvi.guṇaḥ | 11 |

tena dvi.paṭa.vānaṃ vyākhyātam | 12 |

ūrṇā.tulāyāḥ pañca.paliko vihananac.chedo romac.chedaś ca | 13 |

rajakāḥ kāṣṭha.phalaka.ślakṣṇa.śilāsu vastrāṇi nenijyuḥ | 14 |

anyatra nenijato vastra.upaghātaṃ ṣaṭ.paṇaṃ ca daṇḍaṃ dadyuḥ | 15 |

mudgara.aṅkād anyad vāsaḥ paridadhānās tri.paṇaṃ daṇḍaṃ dadyuḥ | 16 |

para.vastra.vikraya.avakraya.ādhāneṣu ca dvādaśa.paṇo daṇḍaḥ, parivartane mūlya.dvi.guṇo vastra.dānaṃ ca | 17 |

mukula.avadātaṃ śilā.paṭṭa.śuddhaṃ dhauta.sūtra.varṇaṃ pramṛṣṭa.śvetaṃ ca-eka.rātra.uttaraṃ dadyuḥ | 18 |

pañca.rātrikaṃ tanu.rāgaṃ, ṣaḍ.rātrikaṃ nīlaṃ, puṣpa.lākṣā.mañjiṣṭhā.raktaṃ guru.parikarma yatna.upacāryaṃ jātyaṃ vāsaḥ sapta.rātrikam | 19 |

tataḥ paraṃ vetana.hāniṃ prāpnuyuḥ | 20 |

śraddheyā rāga.vivādeṣu vetanaṃ kuśalāḥ kalpayeyuḥ | 21 |

parārdhyānāṃ paṇo vetanaṃ, madhyamānām ardha.paṇaḥ, pratyavarāṇāṃ pādaḥ, sthūlakānāṃ māṣaka.dvi.māṣakaṃ, dvi.guṇaṃ raktakānām | 22 |

prathama.nejane catur.bhāgaḥ kṣayaḥ, dvitīye pañca.bhāgaḥ | 23 |

tena-uttaraṃ vyākhyātam | 24 |

rajakais tunna.vāyā vyākhyātāḥ | 25 |

suvarṇa.kārāṇām aśuci.hastād rūpyaṃ suvarṇam anākhyāya sarūpaṃ krīṇatāṃ dvādaśapaṇo daṇḍaḥ, virūpaṃ catur.viṃśati.paṇaḥ, cora.hastād aṣṭa.catvāriṃśat.paṇaḥ | 26 |

pracchanna.virūpa.mūlya.hīna.krayeṣu steya.daṇḍaḥ, kṛta.bhāṇḍa.upadhau ca | 27 |

suvarṇān māṣakam apaharato dvi.śato daṇḍaḥ, rūpya.dharaṇān māṣakam apaharato dvādaśa.paṇaḥ | 28 |

tena-uttaraṃ vyākhyātam | 29 |

varṇa.utkarṣam apasāraṇaṃ yogaṃ vā sādhayataḥ pañca.śato daṇḍaḥ | 30 |

tayor apacaraṇe rāgasya-apahāraṃ vidyāt | 31 |

māṣako vetanaṃ rūpya.dharaṇasya, suvarṇasya-aṣṭa.bhāgaḥ | 32 |

śikṣā.viśeṣeṇa dvi.guṇo vetana.vṛddhiḥ | 33 |

tena-uttaraṃ vyākhyātam | 34 |

tāmra.vṛtta.kaṃsa.vaikṛntaka.āra.kūṭakānāṃ pañcakaṃ śataṃ vetanam | 35 |

tāmra.piṇḍo daśa.bhāga.kṣayaḥ | 36 |

pala.hīne hīna.dvi.guṇo daṇḍaḥ | 37 |

tena-uttaraṃ vyākhyātam | 38 |

sīsa.trapu.piṇḍo viṃśati.bhāga.kṣayaḥ | 39 |

kākaṇī ca-asya pala.vetanam | 40 |

kāla.āyasa.piṇḍaḥ pañca.bhāga.kṣayaḥ | 41 |

kākaṇī.dvayaṃ ca-asya pala.vetanam | 42 |

tena-uttaraṃ vyākhyātam | 43 |

rūpa.darśakasya sthitāṃ paṇa.yātrām akopyāṃ kopayataḥ kopyām akopayato dvādaśa.paṇo daṇḍaḥ | 44 |

vyājī.pariśuddhau paṇa.yātrā | 45 |

paṇān māṣakam upajīvato dvādaśa.paṇo daṇḍaḥ | 46 |

tena-uttaraṃ vyākhyātam | 47 |

kūṭa.rūpaṃ kārayataḥ pratigṛhṇato niryāpayato vā sahasraṃ daṇḍaḥ, kośe prakṣipato vadhaḥ | 48 |

caraka.pāṃsu.dhāvakāḥ sāra.tri.bhāgaṃ, dvau rājā ratnaṃ ca | 49 |

ratna.apahāra uttamo daṇḍaḥ | 50 |

khani.ratna.nidhi.nivedaneṣu ṣaṣṭham aṃśaṃ nivettā labheta, dvādaśam aṃśaṃ bhṛtakaḥ | 51 |

śata.sahasrād ūrdhvaṃ rāja.gāmī nidhiḥ | 52 |

ūne ṣaṣṭham aṃśaṃ dadyāt | 53 |

paurvapauruṣikaṃ nidhiṃ jānapadaḥ śuciḥ sva.karaṇena samagraṃ labheta | 54 |

sva.karaṇa.abhāve pañca.śato daṇḍaḥ, pracchanna.ādāne sahasram | 55 |

bhiṣajaḥ prāṇa.ābādhikam anākhyāya-upakramamāṇasya vipattau pūrvaḥ sāhasa.daṇḍaḥ, karma.aparādhena vipattau madhyamaḥ | 56 |

marma.vadha.vaiguṇya.karaṇe daṇḍa.pāruṣyaṃ vidyāt | 57 |

kuśīlavā varṣā.rātram ekasthā vaseyuḥ | 58 |

kāma.dānam atimātram ekasya-ativādaṃ ca varjayeyuḥ | 59 |

tasya-atikrame dvādaśa.paṇo daṇḍaḥ | 60 |

kāmaṃ deśa.jāti.gotra.caraṇa.maithuna.avahāsena narmayeyuḥ | 61 |

kuśīlavaiś cāraṇā bhikṣukāś ca vyākhyātāḥ | 62 |

teṣām ayaḥ.śūlena yāvataḥ paṇān abhivadeyus tāvantaḥ śiphā.prahārā daṇḍāḥ | 63 |

śeṣāṇāṃ karmaṇāṃ niṣpatti.vetanaṃ śilpināṃ kalpayet | 64 |