Book 3 · Adhyay 4

pati.kulān niṣpatitāyāḥ striyāḥ ṣaṭ.paṇo daṇḍaḥ, anyatra viprakārāt | 1 |

pratiṣiddhāyāṃ dvādaśa.paṇaḥ | 2 |

prativeśa.gṛha.atigatāyāḥ ṣaṭ.paṇaḥ | 3 |

prātiveśika.bhikṣuka.vaidehakānām avakāśa.bhikṣā.paṇya.dāne dvādaśa.paṇo daṇḍaḥ | 4 |

pratiṣiddhānāṃ pūrvaḥ sāhasa.daṇḍaḥ | 5 |

para.gṛha.atigatāyāś catur.viṃśati.paṇaḥ | 6 |

para.bhāryā.avakāśa.dāne śatyo daṇḍaḥ, anyatra-āpadbhyaḥ | 7 |

vāraṇa.ajñānayor nirdoṣaḥ | 8 |

"pati.viprakārāt pati.jñāti.sukha.avastha.grāmika.anvādhi.bhikṣukī.jñāti.kulānām anyatamam apuruṣaṃ gantum adoṣaḥ" iti ācāryāḥ | 9 |

sa-puruṣaṃ vā jñāti.kulam | 10 |

kuto hi sādhvī.janasyac-chalam | 11 |

sukham etad avaboddhum, iti kauṭilyaḥ | 12 |

preta.vyādhi.vyasana.garbha.nimittam apratiṣiddham eva jñāti.kula.gamanam | 13 |

tan.nimittaṃ vārayato dvādaśa.paṇo daṇḍaḥ | 14 |

tatra-api gūhamānā strī.dhanaṃ jīyeta, jñātayo vā chādayantaḥ śulka.śeṣam | 15 | iti niṣpatanam |

pati.kulān niṣpatya grāma.antara.gamane dvādaśa.paṇo daṇḍaḥ sthāpyā.ābharaṇa.lopaś ca | 16 |

gamyena vā puṃsā saha prasthāne catur.viṃśati.paṇaḥ sarva.dharma.lopaś ca, anyatra bharma.dāna.tīrtha.gamanābhyām | 17 |

puṃsaḥ pūrvaḥ sāhasa.daṇḍaḥ tulya.śreyasoḥ, pāpīyaso madhyamaḥ | 18 |

bandhur.adaṇḍyaḥ | 19 |

pratiṣedhe 'rdha.daṇḍāḥ | 20 |

pathi vyantare gūḍha.deśa.abhigamane maithuna.arthena śaṅkita.pratiṣiddhāyāṃ vā pathy.anusaraṇe saṅgrahaṇaṃ vidyāt | 21 |

tāla.avacara.cāraṇa.matsya.bandhaka.lubdhaka.go.pālaka.śauṇḍikānām anyeṣāṃ ca prasṛṣṭa.strīkāṇāṃ pathy.anusaraṇam adoṣaḥ | 22 |

pratiṣiddhe vā nayataḥ puṃsaḥ striyo vā gacchantyās ta eva-ardha.daṇḍāḥ | 23 | iti pathy.anusaraṇam |

hrasva.pravāsināṃ śūdra.vaiśya.kṣatriya.brāhmaṇānāṃ bhāryāḥ saṃvatsara.uttaraṃ kālam ākāṅkṣeran aprajātāḥ, saṃvatsara.adhikaṃ prajātāḥ | 24 |

prativihitā dvi.guṇaṃ kālam | 25 |

aprativihitāḥ sukha.avasthā bibhṛyuḥ, paraṃ catvāri varṣāṇy aṣṭau vā jñātayaḥ | 26 |

tato yathā.dattam ādāya pramuñceyuḥ | 27 |

brāhmaṇam adhīyānaṃ daśa.varṣāṇy aprajātā, dvādaśa prajātā, rāja.puruṣam āyuḥ.kṣayād ākāṅkṣeta | 28 |

savarṇataś ca prajātā na-apavādaṃ labheta | 29 |

kuṭumba.ṛddhi.lope vā sukha.avasthair vimuktā yathā.iṣṭaṃ vindeta, jīvita.artham āpad.gatā vā | 30 |

dharma.vivāhāt kumārī parigrahītāram anākhyāya proṣitam aśrūyamāṇaṃ sapta tīrthāny ākāṅkṣeta, saṃvatsaraṃ śrūyamāṇam | 31 |

ākhyāya proṣitam aśrūyamāṇaṃ pañca tīrthāny ākāṅkṣeta, daśa śrūyamāṇam | 32 |

eka.deśa.datta.śulkaṃ trīṇi tīrthāny aśrūyamāṇam, śrūyamāṇaṃ sapta tīrthāny ākāṅkṣeta | 33 |

datta.śulkaṃ pañca tīrthāny aśrūyamāṇam, daśa śrūyamāṇam | 34 |

tataḥ paraṃ dharmasthair visṛṣṭā yathā.iṣṭaṃ vindeta | 35 |

tīrtha.uparodho hi dharma.vadha iti kauṭilyaḥ | 36 | iti hrasva.pravāsaḥ |

dīrgha.pravāsinaḥ pravrajitasya pretasya vā bhāryā sapta tīrthāny ākāṅkṣeta, saṃvatsaraṃ prajātā | 37 |

tataḥ pati.sodaryaṃ gacchet | 38 |

bahuṣu pratyāsannaṃ dhārmikaṃ bharma.samarthaṃ kaniṣṭham abhāryaṃ vā | 39 |

tad.abhāve 'py asodaryaṃ sapiṇḍaṃ kulyaṃ vā-āsannam | 40 |

eteṣām eṣa eva kramaḥ | 41 |