Book 3 · Adhyay 2

vivāha.pūrvo vyavahāraḥ | 1 |

kanyā.dānaṃ kanyām alaṅkṛtya brāhmo vivāhaḥ | 2 |

saha.dharma.caryā prājāpatyaḥ | 3 |

go.mithuna.ādānād ārṣaḥ | 4 |

antar.vedyām ṛtvije dānād daivaḥ | 5 |

mithaḥ.samavāyād gāndharvaḥ | 6 |

śulka.ādānād āsuraḥ | 7 |

prasahya.ādānād rākṣasaḥ | 8 |

supta.matta.ādānāt paiśācaḥ | 9 |

pitṛ.pramāṇāś catvāraḥ pūrve dharmyāḥ, mātā.pitṛ.pramāṇāḥ śeṣāḥ | 10 |

tau hi śulka.harau duhituḥ, anyatara.abhāve 'nyataro vā | 11 |

dvitīyaṃ śulkaṃ strī hareta | 12 |

sarveṣāṃ prīty.āropaṇam apratiṣiddham | 13 | iti vivāha.dharmaḥ |

vṛttir ābandhyaṃ vā strī.dhanam | 14 |

para.dvi.sāhasrā sthāpyā vṛttiḥ, ābandhya.aniyamaḥ | 15 |

tad ātma.putra.snuṣā.bharmaṇi pravāsa.apratividhāne ca bhāryāyā bhoktum adoṣaḥ, pratirodhaka.vyādhi.durbhikṣa.bhaya.pratīkāre dharma.kārye ca patyuḥ, sambhūya vā dampatyor mithunaṃ prajātayoḥ | 16 |

tri.varṣa.upabhuktaṃ ca dharmiṣṭheṣu vivāheṣu na-anuyuñjīta | 17 |

gāndharva.āsura.upabhuktaṃ sa-vṛddhikam ubhayaṃ dāpyeta, rākṣasa.paiśāca.upabhuktaṃ steyaṃ dadyāt | 18 |

mṛte bhartari dharma.kāmā tadānīm eva sthāpya-ābharaṇaṃ śulka.śeṣaṃ ca labheta | 19 |

labdhvā vā vindamānā sa-vṛddhikam ubhayaṃ dāpyeta | 20 |

kuṭumba.kāmā tu śvaśura.pati.dattaṃ niveśa.kāle labheta | 21 |

niveśa.kālaṃ hi dīrgha.pravāse vyākhyāsyāmaḥ | 22 |

śvaśura.prātilomyena vā niviṣṭā śvaśura.pati.dattaṃ jīyeta | 23 |

jñāti.hastād.abhimṛṣṭāyā jñātayo yathā.gṛhītaṃ dadyuḥ | 24 |

nyāya.upagatāyāḥ pratipattā strī.dhanaṃ gopayet | 25 |

pati.dāyaṃ vindamānā jīyeta | 26 |

dharma.kāmā bhuñjīta | 27 |

putravatī vindamānā strī.dhanaṃ jīyeta | 28 |

tat tu strī.dhanaṃ putrā hareyuḥ | 29 |

putra.bharaṇa.arthaṃ vā vindamānā putra.arthaṃ sphātī.kuryāt | 30 |

bahu.puruṣa.prajānāṃ putrāṇāṃ yathā.pitṛ.dattaṃ strī.dhanam avasthāpayet | 31 |

kāma.karaṇīyam api strī.dhanaṃ vindamānā putra.saṃsthaṃ kuryāt | 32 |

aputrā pati.śayanaṃ pālayantī guru.samīpe strī.dhanam āyuḥ.kṣayād bhuñjīta | 33 |

āpad.arthaṃ hi strī.dhanam | 34 |

ūrdhvaṃ dāyādaṃ gacchet | 35 |

jīvati bhartari mṛtāyāḥ putrā duhitaraś ca strī.dhanaṃ vibhajeran, aputrāyā duhitaraḥ, tad.abhāve bhartā | 36 |

śulkam anvādheyam anyad vā bandhubhir dattaṃ bāndhavā hareyuḥ | 37 | iti strī.dhana.kalpaḥ |

varṣāṇy aṣṭāv aprajāyamānām aputrāṃ vandhyāṃ ca-ākāṅkṣeta, daśa nindum, dvādaśa kanyā.prasavinīm | 38 |

tataḥ putra.arthī dvitīyāṃ vindeta | 39 |

tasya-atikrame śulkaṃ strī.dhanam ardhaṃ ca-ādhivedanikaṃ dadyāt, catur.viṃśati.paṇa.paraṃ ca daṇḍam | 40 |

śulkaṃ strī.dhanam aśulka.strī.dhanāyās tat.pramāṇam ādhivedanikam anurūpāṃ ca vṛttiṃ dattvā bahvīr api vindeta | 41 |

putra.arthā hi striyaḥ | 42 |

tīrtha.samavāye ca-āsāṃ yathā.vivāhaṃ pūrva.ūḍhāṃ jīvat.putrāṃ vā pūrvaṃ gacchet | 43 |

tīrtha.gūhana.āgamane ṣaṇ.ṇavatir daṇḍaḥ | 44 |

putravatīṃ dharma.kāmāṃ vandhyāṃ ninduṃ nīrajaskāṃ vā na-akāmām upeyāt | 45 |

na ca-akāmaḥ puruṣaḥ kuṣṭhinīm unmattāṃ vā gacchet | 46 |

strī tu putra.artham evaṃ.bhūtaṃ vā-upagacchet | 47 |