Book 3 · Adhyay 10

karma.udaka.mārgam ucitaṃ rundhataḥ kurvato 'nucitaṃ vā pūrvaḥ sāhasa.daṇḍaḥ, setu.kūpa.puṇya.sthāna.caitya.deva.āyatanāni ca para.bhūmau niveśayataḥ | 1 |

pūrva.anuvṛttaṃ dharma.setum ādhānaṃ vikrayaṃ vā nayato nāyayato vā madhyamaḥ sāhasa.daṇḍaḥ, śrotṝṇām uttamaḥ, anyatra bhagna.utsṛṣṭāt | 2 |

svāmy abhāve grāmāḥ puṇya.śīlā vā pratikuryuḥ | 3 |

pathi.pramāṇaṃ durga.niveśe vyākhyātam | 4 |

kṣudra.paśu.manuṣya.pathaṃ rundhato dvādaśa.paṇo daṇḍaḥ, mahā.paśu.pathaṃ catur.viṃśati.paṇaḥ, hasti.kṣetra.pathaṃ catuṣ.pañcāśat.paṇaḥ, setu.vana.pathaṃ ṣaṭ.śataḥ, śmaśāna.grāma.pathaṃ dviśataḥ, droṇa.mukha.pathaṃ pañca.śataḥ, sthānīya.rāṣṭra.vivīta.pathaṃ sāhasraḥ | 5 |

atikarṣaṇe ca-eṣāṃ daṇḍa.caturthā daṇḍāḥ | 6 |

karṣaṇe pūrva.uktāḥ | 7 |

kṣetrikasya-akṣipataḥ kṣetram upavāsasya vā tyajato bīja.kāle dvādaśa.paṇo daṇḍaḥ, anyatra doṣa.upanipāta.aviṣahyebhyaḥ | 8 |

karadāḥ karadeṣv ādhānaṃ vikrayaṃ vā kuryuḥ, brahma.deyikā brahma.deyikeṣu | 9 |

anyathā pūrvaḥ sāhasa.daṇḍaḥ | 10 |

karadasya vā-akarada.grāmaṃ praviśataḥ | 11 |

karadaṃ tu praviśataḥ sarva.dravyeṣu prākāmyaṃ syāt, anyatra-agārāt | 12 |

tad apy asmai dadyāt | 13 |

anādeyam akṛṣato 'nyaḥ pañca.varṣāṇy upabhujya prayāsa.niṣkrayeṇa dadyāt | 14 |

akaradāḥ paratra vasanto bhogam upajīveyuḥ | 15 |

grāma.arthena grāmikaṃ vrajantam upavāsāḥ paryāyeṇa-anugaccheyuḥ | 16 |

ananugacchantaḥ paṇa.ardha.paṇikaṃ yojanaṃ dadyuḥ | 17 |

grāmikasya grāmād astena.pāradārikaṃ nirasyataś catur.viṃśati.paṇo daṇḍaḥ, grāmasya-uttamaḥ | 18 |

nirastasya praveśo hy abhigamena vyākhyātaḥ | 19 |

stambhaiḥ samantato grāmād dhanuḥ.śata.apakṛṣṭam upasālaṃ kārayet | 20 |

paśu.pracāra.arthaṃ vivītam ālavanena-upajīveyuḥ | 21 |

vivītaṃ bhakṣayitvā-apasṛtānām uṣṭra.mahiṣāṇāṃ pādikaṃ rūpaṃ gṛhṇīyuḥ, gava.aśva.kharāṇāṃ ca-ardha.pādikam, kṣudra.paśūnāṃ ṣoḍaśa.bhāgikam | 22 |

bhakṣayitvā niṣaṇṇānām eta eva dvi.guṇā daṇḍāḥ, parivasatāṃ catur.guṇāḥ | 23 |

grāma.deva.vṛṣā vā-anirdaśa.ahā vā dhenur ukṣāṇo go.vṛṣāś ca-adaṇḍyāḥ | 24 |

sasya.bhakṣaṇe sasya.upaghātaṃ niṣpattitaḥ parisaṅkhyāya dvi.guṇaṃ dāpayet | 25 |

svāminaś ca-anivedya cārayato dvādaśa.paṇo daṇdaḥ, pramuñcataś catur.viṃśati.paṇaḥ | 26 |

pālinām ardha.daṇḍāḥ | 27 |

tad eva ṣaṇḍa.bhakṣaṇe kuryāt | 28 |

vāṭa.bhede dvi.guṇaḥ veśma.khala.valaya.gatānāṃ ca dhānyānāṃ bhakṣaṇe | 29 |

hiṃsā.pratīkāraṃ kuryāt | 30 |

abhaya.vana.mṛgāḥ parigṛhītā vā bhakṣayantaḥ svāmino nivedya yathā-avadhyās tathā pratiṣeddhavyāḥ | 31 |

paśavo raśmi.pratodābhyāṃ vārayitavyāḥ | 32 |

teṣām anyathā hiṃsāyāṃ daṇḍa.pāruṣya.daṇḍāḥ | 33 |

prārthayamānā dṛṣṭa.aparādhā vā sarva.upāyair niyantavyāḥ | 34 | iti kṣetra.patha.hiṃsā |

karṣakasya grāmam abhyupetya-akurvato grāma eva-atyayaṃ haret | 35 |

karma.akaraṇe karma.vetana.dvi.guṇam, hiraṇya.adāne pratyaṃśa.dvi.guṇam, bhakṣya.peya.adāne ca prahavaṇeṣu dvi.guṇam aṃśaṃ dadyāt | 36 |

prekṣāyām anaṃśadaḥ, sa-sva.jano na prekṣeta | 37 |

pracchanna.śravaṇa.īkṣaṇe ca sarva.hite ca karmaṇi nigraheṇa dvi.guṇam aṃśaṃ dadyāt | 38 |

sarva.hitam ekasya bruvataḥ kuryur ājñām | 39 |

akaraṇe dvādaśa.paṇo daṇḍaḥ | 40 |

taṃ cet sambhūya vā hanyuḥ pṛthag eṣām aparādha.dvi.guṇo daṇḍaḥ | 41 |

upahantṛṣu viśiṣṭaḥ | 42 |

brāhmaṇaś ca-eṣāṃ jyaiṣṭhyaṃ niyamyeta | 43 |

prahavaṇeṣu ca-eṣāṃ brāhmaṇā na-akāmāḥ kuryuḥ, aṃśaṃ ca labheran | 44 |

tena deśa.jāti.kula.saṅghānāṃ samayasya-anapākarma vyākhyātam | 45 |