Book 2 · Adhyay 26

sūnā.adhyakṣaḥ pradiṣṭa.abhayānām abhaya.vana.vāsināṃ ca mṛga.paśu.pakṣi.matsyānāṃ bandha.vadha.hiṃsāyām uttamaṃ daṇḍaṃ kārayet, kuṭumbinām abhaya.vana.parigraheṣu madhyamam | 1 |

apravṛtta.vadhānāṃ matsya.pakṣiṇāṃ bandha.vadha.hiṃsāyāṃ pāda.ūna.sapta.viṃśati.paṇam atyayaṃ kuryāt, mṛga.paśūnāṃ dvi.guṇam | 2 |

pravṛtta.hiṃsānām aparigṛhītānāṃ ṣaḍ.bhāgaṃ gṛhṇīyāt, matsya.pakṣiṇāṃ daśa.bhāgaṃ vā-adhikam, mṛga.paśūnāṃ śulkaṃ vā-adhikam | 3 |

pakṣi.mṛgāṇāṃ jīvat ṣaḍ.bhāgam abhaya.vaneṣu pramuñcet | 4 |

sāmudra.hasty.aśva.puruṣa.vṛṣa.gardabha.ākṛtayo matsyāḥ sārasā na-ādeyās taṭāka.kulyā.udbhavā vā krauñca.utkrośaka.dātyūha.haṃsa.cakravāka.jīvan.jīvaka.bhṛṅga.- rāja.cakora.matta.kokila.mayūra.śuka.madana.śārikā vihāra.pakṣiṇo maṅgalyāś ca-anye 'pi prāṇinaḥ pakṣi.mṛgā hiṃsā.bādhebhyo rakṣyāḥ | 5 |

rakṣā.atikrame pūrvaḥ sāhasa.daṇḍaḥ | 6 |

mṛga.paśūnām anasthi.māṃsaṃ sadyo.hataṃ vikrīṇīran | 7 |

asthimataḥ pratipātaṃ dadyuḥ | 8 |

tulā.hīne hīna.aṣṭa.guṇam | 9 |

vatso vṛṣo dhenuś ca-eṣām avadhyāḥ | 10 |

ghnataḥ pañcāśatko daṇḍaḥ, kliṣṭa.ghātaṃ ghātayataś ca | 11 |

pariśūnam aśiraḥ.pāda.asthi vigandhaṃ svayaṃ.mṛtaṃ ca na vikrīṇīran | 12 |

anyathā dvādaśa.paṇo daṇḍaḥ | 13 |