Book 2 · Adhyay 19

pautava.adhyakṣaḥ pautava.karma.antān kārayet | 1 |

dhānya.māṣā daśa suvarṇa.māṣakaḥ, pañca vā guñjāḥ | 2 |

te ṣoḍaśa suvarṇaḥ karṣo vā | 3 |

catuṣ.karṣaṃ palam | 4 |

aṣṭa.aśītir gaura.sarṣapā rūpya.māṣakaḥ | 5 |

te ṣoḍaśa dharaṇam, śaumbyāni vā viṃśatiḥ | 6 |

viṃśati.taṇḍulaṃ vajra.dharaṇam | 7 |

ardha.māṣakaḥ māṣakaḥ dvau catvāraḥ aṣṭau māṣakāḥ suvarṇo dvau catvāraḥ, aṣṭau suvarṇāḥ daśa viṃśatiḥ triṃśat catvāriṃśat śatam iti | 8 |

tena dharaṇāni vyākhyātāni | 9 |

pratimānāny ayomayāni māgadha.mekala.śailamayāni yāni vā na-udaka.pradehābhyāṃ vṛddhiṃ gaccheyur uṣṇena vā hrāsam | 10 |

ṣaḍaṅgulād ūrdhvam aṣṭa.aṅgula.uttarā daśa tulāḥ kārayet loha.palād ūrdhvam eka.pala.uttarāḥ, yantram ubhayataḥ.śikyaṃ vā | 11 |

pañca.triṃśat.palalohāṃ dvi.saptaty.aṅgula.āyāmāṃ sama.vṛttāṃ kārayet | 12 |

tasyāḥ pañca.palikaṃ maṇḍalaṃ baddhvā sama.karaṇaṃ kārayet | 13 |

tataḥ karṣa.uttaraṃ palaṃ pala.uttaraṃ daśa.palaṃ dvādaśa pañcadaśa viṃśatir iti padāni kārayet | 14 |

tata ā.śatād daśa.uttaraṃ kārayet | 15 |

akṣeṣu nāndī.pinaddhaṃ kārayet | 16 |

dvi.guṇa.lohāṃ tulām ataḥ ṣaṇṇavaty.aṅgula.āyāmāṃ parimāṇīṃ kārayet | 17 |

tasyāḥ śata.padād ūrdhvaṃ viṃśatiḥ pañcāśat śatam iti padāni kārayet | 18 |

viṃśati.tauliko bhāraḥ | 19 |

daśa.dhāraṇikaṃ palam | 20 |

tat.pala.śatam āya.mānī | 21 |

pañca.pala.avarā vyāvahārikī bhājany antaḥ.pura.bhājanī ca | 22 |

tāsām ardha.dharaṇa.avaraṃ palam, dvi.pala.avaram uttara.loham, ṣaḍ.aṅgula.avarāś ca-āyāmāḥ | 23 |

pūrvayoḥ pañca.palikaḥ prayāmo māṃsa.loha.lavaṇa.maṇi.varjam | 24 |

kāṣṭha.tulā aṣṭa.hastā padavatī pratimānavatī mayūra.pada.adhiṣṭhitā | 25 |

kāṣṭha.pañcaviṃśati.palaṃ taṇḍula.prastha.sādhanam | 26 |

eṣa pradeśo bahv.alpayoḥ | 27 |

iti tulā.pratimānaṃ vyākhyātam | 28 |

atha dhānya.māṣa.dvi.pala.śataṃ droṇam āya.mānam, sapta.aśīti.pala.śatam ardha.palaṃ ca vyāvahārikam, pañca.saptati.pala.śataṃ bhājanīyam, dvi.ṣaṣṭi.pala.śatam ardha.palaṃ ca-antaḥ.pura.bhājanīyam | 29 |

teṣām āḍhaka.prastha.kuḍubāś catur.bhāga.avarāḥ | 30 |

ṣoḍaśa.droṇā khārī | 31 |

viṃśati.droṇikaḥ kumbhaḥ | 32 |

kumbhair daśabhir vahaḥ | 33 |

śuṣka.sāra.dāru.mayaṃ samaṃ catur.bhāga.śikhaṃ mānaṃ kārayet, antaḥ.śikhaṃ vā | 34 |

rasasya tu surāyāḥ puṣpa.phalayos tuṣa.aṅgārāṇāṃ sudhāyāś ca śikhā.mānaṃ dvi.guṇa.uttarā vṛddhiḥ | 35 |

sa-pāda.paṇo droṇa.mūlyam āḍhakasya pāda.ūnaḥ, ṣaṇ.māṣakāḥ prasthasya, māṣakaḥ kuḍubasya | 36 |

dvi.guṇaṃ rasa.ādīnāṃ māna.mūlyam | 37 |

viṃśati.paṇāḥ pratimānasya | 38 |

tulā.mūlyaṃ tri.bhāgaḥ | 39 |

catur.māsikaṃ prātivedhanikaṃ kārayet | 40 |

apratividdhasya-atyayaḥ sa-pādaḥ sapta.viṃśati.paṇaḥ | 41 |

prātivedhanikaṃ kākaṇīkam ahar ahaḥ pautava.adhyakṣāya dadyuḥ | 42 |

dvātriṃśad.bhāgas tapta.vyājī sarpiṣaḥ, catuḥ.ṣaṣṭi.bhāgas tailasya | 43 |

pañcāśad bhāgo māna.srāvo dravāṇām | 44 |

kuḍuba.ardha.catur.aṣṭa.bhāgāni mānāni kārayet | 45 |

kuḍubāś catur.aśītir vārakaḥ sarpiṣo mataḥ | 46 |

catuḥ.ṣaṣṭis tu tailasya pādaś ca ghaṭikā-anayoḥ | 47 |