Book 2 · Adhyay 11

kośa.adhyakṣaḥ kośa.praveśyaṃ ratnaṃ sāraṃ phalguṃ kupyaṃ vā taj.jāta.karaṇa.adhiṣṭhitaḥ pratigṛhṇīyāt | 1 |

tāmra.parṇikaṃ pāṇḍyaka.vāṭakaṃ pāśikyaṃ kauleyaṃ caurṇeyaṃ māhendraṃ kārdamikaṃ srautasīyaṃ hrādīyaṃ haimavataṃ ca mauktikam | 2 |

śuktiḥ śaṅkhaḥ prakīrṇakaṃ ca yonayaḥ | 3 |

masūrakaṃ tri.puṭakaṃ kūrmakam ardha.candrakaṃ kañcukitaṃ yamakaṃ kartakaṃ kharakaṃ siktakaṃ kāmaṇḍalukaṃ śyāvaṃ nīlaṃ durviddhaṃ ca-apraśastam | 4 |

sthūlaṃ vṛttaṃ nistalaṃ bhrājiṣṇu śvetaṃ guru snigdhaṃ deśa.viddhaṃ ca praśastam | 5 |

śīrṣakam upaśīrṣakaṃ prakāṇḍakam avaghāṭakaṃ tarala.pratibaddhaṃ ca-iti yaṣṭi.prabhedāḥ | 6 |

yaṣṭīnām aṣṭa.sahasram indrac.chandaḥ | 7 |

tato 'rdhaṃ vijayac.chandaḥ | 8 |

catuṣṣaṣṭir ardha.hāraḥ | 9 |

catuṣ.pañcāśad raśmi.kalāpaḥ | 10 |

dvātriṃśad gucchaḥ | 11 |

sapta.viṃśatir nakṣatra.mālā | 12 |

caturviṃśatir ardha.gucchaḥ | 13 |

viṃśatir māṇavakaḥ | 14 |

tato 'rdham ardha.māṇavakaḥ | 15 |

eta eva maṇi.madhyās tan.māṇavakā bhavanti | 16 |

eka.śīrṣakaḥ śuddho hāraḥ | 17 |

tadvat.śeṣāḥ | 18 |

maṇi.madhyo 'rdha.māṇavakaḥ | 19 |

tri.phalakaḥ phalaka.hāraḥ, pañca.phalako vā | 20 |

sūtram ekāvalī śuddhā | 21 |

sā-eva maṇi.madhyā yaṣṭiḥ | 22 |

hema.maṇi.citrā ratnāvalī | 23 |

hema.maṇi.muktā.antaro 'pavartakaḥ | 24 |

suvarṇa.sūtra.antaraṃ sopānakam | 25 |

maṇi.madhyaṃ vā maṇi.sopānakam | 26 |

tena śiro.hasta.pāda.kaṭī.kalāpa.jālaka.vikalpā vyākhyātāḥ | 27 |

maṇiḥ kauṭo.māleyakaḥ pāra.samudrakaś ca | 28 |

saugandhikaḥ padma.rāgo 'navadya.rāgaḥ pārijāta.puṣpako bāla.sūryakaḥ | 29 |

vaiḍūryam utpala.varṇaḥ śirīṣa.puṣpaka udaka.varṇo vaṃśa.rāgaḥ śuka.pattra.varṇaḥ puṣya.rāgo go.mūtrako go.medakaḥ | 30 |

indra.nīlo nīla.avalīyaḥ kalāya.puṣpako mahā.nīlo jambv.ābho jīmūta.prabho nandakaḥ sravan.madhyaḥ | 31 |

śuddha.sphaṭiko mūlāṭa.varṇaḥ śīta.vṛṣṭiḥ sūrya.kāntaś ca | iti maṇayaḥ | 32 |

ṣaḍ.aśraś catur.aśro vṛtto vā tīvra.rāgaḥ saṃsthānavān achaḥ snigdho gurur arciṣmān antar.gata.prabhaḥ prabhā.anulepī ca-iti maṇi.guṇāḥ | 33 |

manda.rāga.prabhaḥ sa-śarkaraḥ puṣpac.chidraḥ khaṇḍo durviddho lekha.ākīrṇa iti doṣāḥ | 34 |

vimalakaḥ sasyako 'ñjana.mūlakaḥ pittakaḥ sulabhako lohita.akṣo mṛga.aśmako jyotī.rasako māleyako 'hic.chatrakaḥ kūrpaḥ pratikūrpaḥ sugandhi.kūrpaḥ kṣīravakaḥ śśukti.cūrṇakaḥ śilā.pravālakaḥ pulakaḥ śukla.pulaka ity antara.jātayaḥ | 35 |

śeṣāḥ kāca.maṇayaḥ | 36 |

sabhā.rāṣṭrakaṃ tajjamā.rāṣṭrakaṃ kāstīra.rāṣṭrakaṃ śrī.kaṭanakaṃ maṇimantakam indra.vānakaṃ ca vajram | 37 |

khaniḥ srotaḥ prakīrṇakaṃ ca yonayaḥ | 38 |

mārjāra.akṣakaṃ śirīṣa.puṣpakaṃ go.mūtrakaṃ go.medakaṃ śuddha.sphaṭikaṃ mūlāṭī.varṇaṃ maṇi.varṇānām anyatama.varṇam iti vajra.varṇāḥ | 39 |

sthūlaṃ guru prahāra.sahaṃ samakoṭikaṃ bhājana.lekhi tarku.bhrāmi bhrājiṣṇu ca praśastam | 40 |

naṣṭa.koṇaṃ nirāśri pārśva.apavṛttaṃ ca-apraśastam | 41 |

pravālakam āla.kandakaṃ vaivarṇikaṃ ca, raktaṃ padma.rāgaṃ ca karaṭa.garbhiṇikā.varjam iti | 42 |

candanaṃ sātanaṃ raktaṃ bhūmi.gandhi | 43 |

go.śīrṣakaṃ kāla.tāmraṃ matsya.gandhi | 44 |

hari.candanaṃ śuka.pattra.varṇam āmra.gandhi, tārṇasaṃ ca | 45 |

grāmerukaṃ raktaṃ rakta.kālaṃ vā basta.mūtra.gandhi | 46 |

daivasabheyaṃ raktaṃ padma.gandhi, jāpakaṃ ca | 47 |

joṅgakaṃ raktaṃ rakta.kālaṃ vā snigdham, taurūpaṃ ca | 48 |

māleyakaṃ pāṇḍu.raktam | 49 |

kucandanaṃ rūkṣam aguru.kālaṃ raktaṃ rakta.kālaṃ vā | 50 |

kāla.parvatakaṃ rakta.kālam anavadya.varṇaṃ vā | 51 |

kośa.agāra.parvatakaṃ kālaṃ kāla.citraṃ vā | 52 |

śīta.udakīyaṃ padma.ābhaṃ kāla.snigdhaṃ vā | 53 |

nāga.parvatakaṃ rūkṣaṃ śaivala.varṇaṃ vā | 54 |

śākalaṃ kapilam | iti | 55 |

laghu snigdham aśyānaṃ sarpiḥ.sneha.lepi gandha.sukhaṃ tvag.anusāry anulbaṇam avirāgy uṣṇa.sahaṃ dāha.grāhi sukha.sparśanam iti candana.guṇāḥ | 56 |

aguru joṅgakaṃ kālaṃ kāla.citraṃ maṇḍala.citraṃ vā | 57 |

śyāmaṃ doṅgakam | 58 |

pāra.samudrakaṃ citra.rūpam uśīra.gandhi nava.mālikā.gandhi vā | iti | 59 |

guru snigdhaṃ peśala.gandhi nirhāry agni.saham asampluta.dhūmaṃ vimarda.saham ity aguru.guṇāḥ | 60 |

taila.parṇikam aśoka.grāmikaṃ māṃsa.varṇaṃ padma.gandhi | 61 |

joṅgakaṃ rakta.pītakam utpala.gandhi go.mūtra.gandhi vā | 62 |

grāmerukaṃ snigdhaṃ go.mūtra.gandhi | 63 |

sauvarṇa.kuḍyakaṃ rakta.pītaṃ mātuluṅga.gandhi | 64 |

pūrṇaka.dvīpakaṃ padma.gandhi nava.nīta.gandhi vā | 65 |

bhadra.śriyaṃ pāralauhityakaṃ jātī.varṇam | 66 |

āntaravatyam uśīra.varṇam | 67 |

ubhayaṃ kuṣṭha.gandhi ca | iti | 68 |

kāleyakaḥ svarṇa.bhūmijaḥ snigdha.pītakaḥ | 69 |

auttara.parvatako rakta.pītakaḥ || iti sārāḥ |

piṇḍa.kvātha.dhūma.saham avirāgi yoga.anuvidhāyi ca | 71 |

candana.aguruvac ca teṣāṃ guṇāḥ | 72 |

kāntanāvakaṃ praiyakaṃ ca-uttara.parvatakaṃ carma | 73 |

kāntanāvakaṃ mayūra.grīva.ābham | 74 |

praiyakaṃ nīla.pīta.śveta.lekhā.bindu.citram | 75 |

tad.ubhayam aṣṭa.aṅgula.āyāmam | 76 |

bisī mahā.bisī ca dvādaśa.grāmīye | 77 |

avyakta.rūpā duhilitikā citrā vā bisī | 78 |

paruṣā śveta.prāyā mahābisī | 79 |

dvādaśa.aṅgula.āyāmam ubhayam | 80 |

śyāmikā kālikā kadalī candra.uttarā śākulā ca-ārohajāḥ | 81 |

kapilā bindu.citrā vā śyāmikā | 82 |

kālikā kapilā kapota.varṇā vā | 83 |

tad ubhayam aṣṭa.aṅgula.āyāmam | 84 |

paruṣā kadalī hasta.āyatā | 85 |

sā-eva candra.citrā candra.uttarā | 86 |

kadalī.tri.bhāgā śākulā koṭha.maṇḍala.citrā kṛta.karṇikā-ajina.citrā vā | iti | 87 |

sāmūraṃ cīnasī sāmūlī ca bāhlaveyāḥ | 88 |

ṣaṭ.triṃśad.aṅgulam añjana.varṇaṃ sāmūram | 89 |

cīnasī rakta.kālī pāṇḍu.kālī vā | 90 |

sāmūlī go.dhūma.varṇā | iti | 91 |

sāntinā nala.tūlā vṛtta.pṛcchā caudrāḥ | 92 |

sātinā kṛṣṇā | 93 |

nala.tūlā nala.tūla.varṇā | 94 |

kapilā vṛtta.pucchā ca | 95 | iti carma.jātayaḥ |

carmaṇāṃ mṛdu snigdhaṃ bahula.roma ca śreṣṭham | 96 |

śuddhaṃ śuddha.raktaṃ pakṣa.raktaṃ ca-āvikam, khacitaṃ vāna.citraṃ khaṇḍa.saṅghātyaṃ tantu.vicchinnaṃ ca | 97 |

kambalaḥ kaucapakaḥ kulamitikā saumitikā turaga.āstaraṇaṃ varṇakaṃ talicchakaṃ vāra.vāṇaḥ paristomaḥ samanta.bhadrakaṃ ca-āvikam | 98 |

picchilam ārdram iva ca sūkṣmaṃ mṛdu ca śreṣṭham | 99 |

aṣṭa.proti.saṅghātyā kṛṣṇā bhiṅgisī varṣa.vāraṇam apasāraka iti naipālakam | 100 |

sampuṭikā catur.aśrikā lambarā kaṭavānakaṃ prāvarakaḥ sattalikā-iti mṛga.roma | 101 |

vāṅgakaṃ śvetaṃ snigdhaṃ dukūlam | 102 |

pauṇḍrakaṃ śyāmaṃ maṇi.snigdham | 103 |

sauvarṇa.kuḍyakaṃ sūrya.varṇaṃ maṇi.snigdha.udaka.vānaṃ catur.aśra.vānaṃ vyāmiśra.vānaṃ ca | 104 |

eteṣām eka.aṃśukam adhyardha.dvi.tri.catur.aṃśukam iti | 105 |

tena kāśikaṃ pauṇḍrakaṃ ca kṣaumaṃ vyākhyātam | 106 |

māgadhikā pauṇḍrikā sauvarṇa.kuḍyakā ca pattra.ūrṇā | 107 |

nāga.vṛkṣo likuco bakulo vaṭaś ca yonayaḥ | 108 |

pītikā nāga.vṛkṣikā | 109 |

go.dhūma.varṇā laikucī | 110 |

śvetā bākulī | 111 |

śeṣā nava.nīta.varṇā | 112 |

tāsāṃ sauvarṇa.kuḍyakā śreṣṭhā | 113 |

tayā kauśeyaṃ cīna.paṭṭāś ca cīna.bhūmijā vyākhyātāḥ | 114 |

mādhuram āparāntakaṃ kāliṅgaṃ kāśikaṃ vāṅgakaṃ vātsakaṃ māhiṣakaṃ ca kārpāsikaṃ śreṣṭham | iti | 115 |

ataḥ pareṣāṃ ratnānāṃ pramāṇaṃ mūlya.lakṣaṇam |

jātiṃ rūpaṃ ca jānīyān nidhānaṃ nava.karma ca | 117 |

purāṇa.pratisaṃskāraṃ karma guhyam upaskarān |

deśa.kāla.parībhogaṃ hiṃsrāṇāṃ ca pratikriyām | 119 |