Book 12 · Adhyay 5

daiva.tejyāyāṃ (devatā.ijyāyāṃ?) yātrāyām amitrasya bahūni pūjā.āgama.sthānāni bhaktitaḥ | 1 |

tatra-asya yogam ubjayet | 2 |

devatā.gṛha.praviṣṭasya-upari yantra.mokṣaṇena gūḍha.bhittiṃ śilāṃ vā pātayet | 3 |

śilā.śastra.varṣam uttama.āgārāt, kapāṭam avapātitaṃ vā, bhitti.praṇihitam eka.deśa.baddhaṃ vā parighaṃ mokṣayet | 4 |

devatā.deha.dhvaja.praharaṇāni vā-asya-upariṣṭāt pātayet | 5 |

sthāna.āsana.gamana.bhūmiṣu vā-asya go.maya.pradehena gandha.udaka.prasekena vā rasam aticārayet, puṣpa.cūrṇa.upahāreṇa vā | 6 |

gandha.praticchannaṃ vā-asya tīkṣṇaṃ dhūmam atinayet | 7 |

śūlakūpam avapātanaṃ vā śayana.āsanasya-adhastād yantra.baddha.talam enaṃ kīla.mokṣaṇena praveśayet | 8 |

pratyāsanne vā-amitre jana.padāj janam avarodha.kṣamam atinayet | 9 |

durgāc ca-anavarodha.kṣamam apanayet, pratyādeyam ari.viṣayaṃ vā preṣayet | 10 |

jana.padaṃ ca-ekasthaṃ śaila.vana.nadī.durgeṣv aṭavī.vyavahiteṣu vā putra.bhrātṛ.parigṛhītaṃ sthāpayet | 11 |

uparodha.hetavo daṇḍa.upanata.vṛtte vyākhyātāḥ | 12 |

tṛṇa.kāṣṭham ā.yojanād dāhayet | 13 |

udakāni ca dūṣayet, avasrāvayec ca | 14 |

kūpa.kūṭa.avapāta.kaṇṭakinīś ca bahir ubjayet | 15 |

suruṅgām amitra.sthāne bahu.mukhīṃ kṛtvā nicaya.mukhyān abhihārayet, amitraṃ vā | 16 |

para.prayuktāyāṃ vā suruṅgāyāṃ parikhām udaka.antikīṃ khānayet, kūpa.śālām anusālaṃ vā | 17 |

toya.kumbhān kāṃsya.bhāṇḍāni vā śaṅkā.sthāneṣu sthāpayet khāta.abhijñāna.artham | 18 |

jñāte suruṅgā.pathe pratisuruṅgāṃ kārayet | 19 |

madhye bhittvā dhūmam udakaṃ vā prayacchet | 20 |

prativihita.durgo vā mūle dāyādaṃ kṛtvā pratilomām asya diśaṃ gacchet, yato vā mitrair bandhubhir āṭavikair vā saṃsṛjyeta parasya-amitrair dūṣyair vā mahadbhiḥ, yato vā gato 'sya mitrair viyogaṃ kuryāt pārṣṇiṃ vā gṛhṇīyāt rājyaṃ vā-asya hārayet vīvadha.āsāra.prasārān vā vārayet, yato vā śaknuyād ākṣikavad apakṣepeṇa-asya prahartum, yato vā svaṃ rājyaṃ trāyeta mūlasya-upacayaṃ vā kuryāt | 21 |

yataḥ sandhim abhipretaṃ labheta tato vā gacchet | 22 |

saha.prasthāyino vā-asya preṣayeyuḥ "ayaṃ te śatrur asmākaṃ hasta.gataḥ, paṇyaṃ viprakāraṃ vā-apadiśya hiraṇyam antaḥ.sāra.balaṃ ca preṣaya yasya-enam arpayema baddhaṃ pravāsitaṃ vā" iti | 23 |

pratipanne hiraṇyaṃ sāra.balaṃ ca-ādadīta | 24 |

anta.pālo vā durga.sampradāne bala.eka.deśam atinīya viśvastaṃ ghātayet | 25 |

jana.padam ekasthaṃ vā ghātayitum amitra.anīkam āvāhayet | 26 |

tad avaruddha.deśam atinīya viśvastaṃ ghātayet | 27 |

mitra.vyañjano vā bāhyasya preṣayet "kṣīṇam asmin durge dhānyaṃ snehāḥ kṣāro lavaṇaṃ vā, tad amuṣmin deśe kāle ca pravekṣyati, tad upagṛhāṇa" iti | 28 |

tato rasa.viddhaṃ dhānyaṃ snehaṃ kṣāraṃ lavaṇaṃ vā dūṣya.amitra.āṭavikāḥ praveśayeyuḥ, anye vā-abhityaktāḥ | 29 |

tena sarva.bhāṇḍa.vīvadha.grahaṇaṃ vyākhyātam | 30 |

sandhiṃ vā kṛtvā hiraṇya.eka.deśam asmai dadyāt, vilambamānaḥ śeṣam | 31 |

tato rakṣā.vidhānāny avasrāvayet | 32 |

agni.rasa.śastrair vā praharet | 33 |

hiraṇya.pratigrāhiṇo vā-asya vallabhān anugṛhṇīyāt | 34 |

parikṣīṇo vā-asmai durgaṃ dattvā nirgacchet | 35 |

suruṅgayā kukṣi.pradareṇa vā prākāra.bhedena nirgacchet | 36 |

rātrāv avaskandaṃ dattvā siddhas tiṣṭhet, asiddhaḥ pārśvena-apagacchet | 37 |

pāṣaṇḍac.chadmanā manda.parivāro nirgacchet | 38 |

preta.vyañjano vā gūḍhair nihriyeta | 39 |

strī.veṣa.dhārī vā pretam anugacchet | 40 |

daivata.upahāra.śrāddha.prahavaṇeṣu vā rasa.viddham anna.pānam avasṛjya | 41 |

kṛta.upajāpo dūṣya.vyañjanair niṣpatya gūḍha.sainyo 'bhihanyāt | 42 |

evaṃ gṛhīta.durgo vā prāśya.prāśaṃ caityam upasthāpya daivata.pratimāc.chidraṃ praviśya-āsīta, gūḍha.bhittiṃ vā, daivata.pratimā.yuktaṃ vā bhūmi.gṛham | 43 |

vismṛte suruṅgayā rātrau rāja.āvāsam anupraviśya suptam amitraṃ hanyāt | 44 |

yantra.viśleṣaṇaṃ vā viśleṣya-adhastād avapātayet | 45 |

rasa.agni.yogena-avaliptaṃ gṛhaṃ jatu.gṛhaṃ vā-adhiśayānam amitram ādīpayet | 46 |

pramada.vana.vihārāṇām anyatame vā vihāra.sthāne pramattaṃ bhūmi.gṛha.suruṅgā.gūḍha.bhitti.praviṣṭās tīkṣṇā hanyuḥ, gūḍha.praṇihitā vā rasena | 47 |

svapato vā niruddhe deśe gūḍhāḥ striyaḥ sarpa.rasa.agni.dhūmān upari muñceyuḥ | 48 |

pratyutpanne vā kāraṇe yad yad upapadyeta tat tad amitre 'ntaḥ.pura.gate gūḍha.sañcāraḥ prayuñjīta | 49 |

tato gūḍham eva-apagacchet, svajana.sañjñāṃ ca prarūpayet | 50 |